ད་ལྟ་བོད་གཞིས་བྱེས་གཉིས་སུ་གྱར་བའི་གནས་སྟངས་བྱུང་རྐྱེན། བོད་ཀྱི་གསོ་རིག་ཐོག་གནས་སྟངས་འདྲ་མིན་བྱུང་དང་འབྱུང་གི་ཡོད་ཀྱང་། དེའི་བདག་དབང་བོད་མི་ཁོ་ནར་མ་གཏོགས་མེད་སྐོར་བརྗོད།
རྒྱ་ནག་གཞུང་གིས་བོད་ཀྱི་གསོ་རིག་པའི་གཞུང་ལས་དཔལ་ལྡན་རྒྱུད་བཞི་ཆེན་མོ་མཉམ་འབྲེལ་རྒྱལ་ཚོགས་ཀྱི་རིག་དངོས་ཤུལ་བཞག་ཁོངས་སུ་ཐོ་འགོད་བྱས་ཡོད་པ་དང་། དེ་ནི་བོད་ཀྱི་གསོ་བ་རིག་པར་རྒྱལ་སྤྱིའི་ངོས་འཛིན་མཚན་གནས་གསར་པ་ཞིག་ཆགས་ཀྱི་ཡོད་ཅེས་རྒྱ་ནག་གཞུང་འབྲེལ་གྱི་གསར་ལམ་ཁག་གིས་རྒྱང་བསྒྲགས་འབོད་བསྒྲགས་བྱེད་ཀྱི་འདུག
འདི་གའི་གསར་འགོད་པས་འགྲོ་ཕན་སྨན་རྩིས་ཁང་གི་སྤྱི་ཁྱབ་དྲུང་ཆེ་ཚེ་རིང་ཕུན་ཚོགས་ལགས་སུ། བོད་ཀྱི་གསོ་རིག་གི་གཞུང་དཔལ་ལྡན་རྒྱུད་བཞི་ཆེན་མོ་རྒྱལ་ཚོགས་ཀྱི་རིག་དངོས་ཤུལ་བཞག་ཁོངས་སུ་ཐོ་འགོད་བྱས་པའི་ཐད་དགོངས་འཆར་གང་ཡོད་དྲིས་པར་ཁོང་གིས། བོད་ཀྱི་གསོ་བ་རིག་པོ་དེ་རྒྱལ་སྤྱིའི་སྟེང་ཐོ་འགོད་བྱེད་མཁན་བོད་མི་ཡིན་དགོས་པ་ལས། རྒྱ་ནག་གཞུང་ལ་ཇུས་གཏོགས་མེད། རྒྱ་ནག་གཞུང་གིས་བོད་ཀྱི་གསོ་བ་རིག་པའི་གཞུང་ལུགས་རྒྱུན་འཛིན་དང་དར་སྤེལ། གཞན་ཕན་ཞབས་འདེགས་བཅས་ཀྱི་སླད་དུ་ཐོ་འགོད་བྱས་པ་ཡིན་ན་འགྲིག་གི་ཡོད་པ་རེད་དེ། ཁེ་ཕན་གཙོ་བོར་བཟུང་སྟེ་བོད་མི་རྣམས་ལ་བཙན་དབང་གིས་གསོ་བ་རིག་པ་མཉམ་འབྲེལ་རྒྱལ་ཚོགས་ཀྱི་རིག་དངོས་ཤུལ་བཞག་ཁོངས་སུ་ཐོ་འགོད་བྱས་པ་ནི་ནོར་འཁྲུལ་ཡིན་པ་མ་ཟད། ངོས་ལེན་ཀྱང་མེད། ཅེས་བརྗོད་བྱུང་།
ཚེ་རིང་ཕུན་ཚོགས་ལགས་ཀྱིས་གསུངས་པ་ལྟར་ན། གཡུ་ཐོག་ཡོན་ཏན་མགོན་པོས་གསོ་རིག་རྒྱུད་བཞི་སྲོལ་མཛད་པ་ནས་ད་བར་རྒྱུས་པའི་བོད་ཀྱི་གསོ་བ་རིག་པའི་བདག་དབང་དེ་བོད་མི་ཁོ་ནར་མ་གཏོགས་རྒྱ་དཀར་ནག་གཉིས་ལ་མེད་པ་དང་། བོད་ཀྱི་གསོ་བ་རིག་པ་དེ་ཉམས་དམའ་བོ་དང་དཔལ་འབྱོར་མཁོ་སྒྲུབ་ཆེད་བེད་སྤྱོད་གཏོང་དགོས་པར་མཐོང་གི་མེད་པ་དང་། ད་ལྟ་བོད་གཞིས་བྱེས་གཉིས་སུ་གྱར་ཏེ། གཅིག་དྲག་གནོན་བཙན་དབང་འོག་གནས་དགོས་བྱུང་བ་དང་གཅིག་གཞན་ཡུལ་དུ་སྐྱབས་བཅོལ་ནས་སྡོད་དགོས་པའི་གནས་སྟངས་བྱུང་རྐྱེན། བོད་ཀྱི་གསོ་རིག་ཐོག་གནས་སྟངས་འདྲ་མིན་བྱུང་དང་འབྱུང་གི་ཡོད་པ་མ་གཏོགས། བོད་ཀྱི་གསོ་བ་རིག་པའི་བདག་དབང་བོད་མི་ཁོ་ན་མ་གཏོགས་གཞན་སུ་ལའང་མེད་པའི་འགྲེལ་བརྗོད་གནང་བྱུང་།
ཡང་རྒྱ་ནག་གཞུང་འབྲེལ་གྱི་གནས་ཚུལ་ཁག་ཏུ། ད་རེས་དཔལ་ལྡན་རྒྱུད་བཞི་ཆེན་མོ་རྒྱལ་ཚོགས་ཀྱི་རིག་དངོས་ཤུལ་བཞག་ཁོངས་སུ་ཐོ་འགོད་བྱེད་མཁན་བོད་རང་སྐྱོང་ལྗོངས་ཟེར་བའི་བོད་ཀྱི་སྨན་རྩིས་ཁང་ཡིན་སྐོར་བསྒྲགས་འདུག་ཀྱང་། མཉམ་འབྲེལ་རྒྱལ་ཚོགས་ཀྱི་རིག་དངོས་ཤུལ་བཞག་ཐོ་འགོད་དྲ་རྒྱའི་སྟེང་། དཔལ་ལྡན་རྒྱུད་བཞི་ཐོ་འགོད་བྱེད་མཁན་རྒྱ་ནག་ཡིན་ཞེས་བྲིས་ཡོད་པ་ལས་བོད་དང་བོད་མིས་ཐོ་འགོད་བྱས་སྐོར་བཀོད་མི་འདུག
རྒྱལ་ཚོགས་ཀྱི་རིག་དངོས་ཤུལ་བཞག་དྲ་རྒྱར་གཞིགས་ན། ཐེངས་འདིར་རྒྱ་ནག་གཞུང་གིས། བོད་ཀྱི་གསོ་རིག་གི་རྒྱུད་བཞིའི་དང་པོ་རྩ་རྒྱུད་དང་གཉིས་པ་བཤད་རྒྱུད། གསུམ་པ་མན་ངག་གི་རྒྱུད། བཞི་བ་ཕྱི་མ་རྒྱུད་ཅེས་རྒྱུད་བཞི་ཐོ་འགོད་བྱས་པ་དང་། དེ་ནི་དུས་རབས་བརྒྱད་པ་དང་བཅུ་གཉིས་བར་དེབ་གཟུགས་སུ་གྲུབ་ཅིང་། བོད་ཀྱི་གསོ་རིག་ལ་ཤུགས་རྐྱེན་ཧ་ཅང་ཆེ་བའི་རྨད་བྱུང་གི་གསུང་རབ་ཅིག་ཡིན་པ་དང་། རྒྱུད་བཞིས་བོད་ཀྱི་གསོ་རིག་འཕེལ་བྱུང་གི་ལོ་རྒྱུས་མཚོན་ཞིང་། བོད་དང་ཧི་མ་ལ་ཡ། སོག་པོ་བཅས་ཀྱི་ས་ཁུལ་དུ་བོད་ཀྱི་གསོ་བ་རིག་པ་བརྒྱུད་སྒྲོག་གི་ནུས་པ་གལ་ཆེན་བཏོན་ཡོད་སྐོར་བརྗོད་འདུག
རྒྱ་ནག་གཞུང་འབྲེལ་གྱི་གནས་ཚུལ་ནང་། ད་རེས་ཐོ་འགོད་བྱས་པའི་དཔལ་ལྡན་རྒྱུད་བཞིའི་ནང་ཕྱི་ལོ་ ༡༥༤༦ ལོའི་ཤིང་དཔར་བཀྲ་ཐང་པར་གཞི་དང་ཕྱི་ལོ་ ༡༦༤༠ ལོའི་ཤིང་དཔར་རྟག་བརྟན་པར་གཞི། ཕྱི་ལོ་ ༡༦༦༢ ལོའི་ཤིང་དཔར་དགའ་ལྡན་ཕུན་ཚོགས་གླིང་པར་གཞི། ཕྱི་ལོ་ ༡༨༩༢ ལོའི་ཤིང་དཔར་ལྕགས་པོ་རི་པར་གཞི། ཕྱི་ལོ་ ༡༩༤༢ ལོའི་གསེར་བྲིས་བཅས་དུས་རབས་མི་འདྲ་བར་ཞུ་དག་དང་ལེགས་སྒྲིག་བྱས་པའི་པར་གཞི་ཡིན་སྐོར་བརྗོད་འདུག
གཞན་ཡང་ཐེངས་འདིར་རྒྱ་ནག་གཞུང་གིས་རྒྱུད་བཞི་ཐོ་འགོད་བྱས་པ་དང་ལྷན་དུ། ཨོ་མན་དུ་རྟེན་གཞི་བྱས་པའི་ཀུན་བདེ་གླིང་དགོན་པའི་ཕྱི་ལོ་ ༡༦༤༥ ནས་ ༡༩༨༠ བར་གྱི་ཡིག་ཚགས་དང་ཕྱག་བྲིས་རི་མོ། དཔེ་དེབ་སོགས་རིག་དངོས་མི་འདྲ་བ་ཁྱོན་ ༢༣༠༠ ཐོ་འགོད་བྱས་ཡོད་པ་རྒྱལ་ཚོགས་རིག་དངོས་ཤུལ་བཞག་ཚན་པའི་དྲ་རྒྱར་བཀོད་འདུག
ཕྱི་ལོ་ ༢༠༡༨ ལོར་རྒྱ་ནག་གཞུང་གིས་བོད་ཀྱི་གསོ་བ་རིག་པ་ལས་ལུམས་བཅོས་དེ་རྒྱལ་ཚོགས་ཀྱི་རིག་དངོས་ཤུལ་བཞག་ཚན་ཁོངས་ནས་སྲུང་སྐྱོབ་དགོས་པའི་ཁྱབ་ཁོངས་སུ་ཐོ་འགོད་བྱས་པ་དང་། སྐབས་དེར་བཞུགས་སྒར་བོད་ཀྱི་སྨན་རྩིས་ཁང་གི་ངོས་ནས། བོད་ཀྱི་གསོ་བ་རིག་པ་ནུས་མེད་སྲུང་སྐྱོབ་ཁོངས་སུ་འཇུག་རྒྱུ་མ་ཡིན་པར། དེང་སྐབས་བོད་ཀྱི་གསོ་རིག་གིས་མིའི་རིགས་ལ་ཕན་པ་རླབས་ཆེན་བསྐྲུན་ནུས་ཤིང་། སྨན་པ་དང་སྨན་ཁང་ཉུང་དྲགས་པ་ཙམ་མ་གཏོགས། བོད་ཀྱི་གསོ་རིག་སྨན་ལ་བསྟེན་གཏུག་བྱེད་མཁན་ཧ་ཅང་མང་བ་སོགས་བརྗོད་པ་དང་སྦྲགས་རྒྱ་ནག་གཞུང་ལ་སྐྱོན་བརྗོད་བྱས་ཡོད་པ་མ་ཟད། བོད་ཀྱི་སྨན་རྩིས་ཁང་གི་སྨན་སློབ་ཁག་ཅིག་ཐད་ཀར་རྒྱལ་ས་ལྡི་ལིའི་རྒྱ་ནག་གཞུང་ཚབ་མདུན་དུ་ཕྱིན་ནས་ངོ་རྒོལ་ལས་འགུལ་སྤེལ་ཡོད།
གསར་འགོད་པ། སྐལ་བཟང་སྦྱིན་པ།
