བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐོག་བོད་ཀྱི་སྐད་ཡིག་དང་། ཆོས་རིག་གཞུང་བཅས་རྒྱུན་འཛིན་བྱེད་ཕྱོགས་དང་། བོད་དོན་ཞུ་གཏུགས་ལས་འགུལ་སྤེལ་ཕྱོགས། དྭང་བླངས་དཔྱ་དངུལ་དང་འབྲེལ་བའི་གནད་དོན་སོགས་ཀྱི་ཐད་གྲོས་བསྡུར་གནང་བཞིན་འདུག
ཟླ་འདིའི་ཕྱི་ཚེས་ ༢ ནས་ཉིན་གསུམ་རིང་ཁེ་ན་ཌའི་གྲོང་ཁྱེར་ཀྲོ་རོན་ཌོའི་གངས་ལྗོངས་ཆོས་ལྡན་གླིང་ཚོགས་ཁང་དུ། ཀྲོ་རོན་ཌོ་བོད་རིགས་སྤྱི་མཐུན་ཚོགས་པ་དང་བྱང་ཨ་རིའི་སྐུ་ཚབ་དོན་གཅོད་ཁང་གཉིས་ཀྱི་གོ་སྒྲིག་འོག བོད་ཀྱི་དམངས་གཙོའི་ཉིན་མོ་དང་བསྟུན་ནས་བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༡ པ་འཚོག་བཟིན་ཡོད་པ་དང་། ཚོགས་ཐོག་ཏུ་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་དང་། བོད་མི་མང་སྤྱི་འཐུས་བསྟན་འཛིན་འཇིགས་མེད་ལགས། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས། བོད་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲ་ཤིས་ལགས། ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་སྤྱི་ཁྱབ་འགན་འཛིན་ལྷ་ལུང་པ་བསམ་འཕེལ་ལགས་དང་རྒྱུན་ལས་འགན་འཛིན་ཤེས་རབ་མཐར་ཕྱིན་ལགས། བོད་ཀྱི་ཐེབས་རྩའི་འགན་འཛིན་སྦོབ་ཨན་ཁར་སིན་ལགས། བོད་མིའི་སྒྲིག་འཛུགས་ཀྱི་གཞུང་ཞབས་ཟུར་པ་དང་སྤྱི་ཟུར་བཅས་བོད་རིགས་སྤྱི་མཐུན་ཚོགས་པ་ཁག་ ༡༩ ཡི་ཚོགས་བཅར་བ་མི་གྲངས་ ༤༠ ལྷག་དང་ས་གནས་མི་མང་མཉམ་ཞུགས་གནང་ཡོད་འདུག
ཚོགས་ཐོག་ཏུ་བྱང་ཨ་རིའི་བོད་མི་མང་སྤྱི་འཐུས་བསྟན་འཛིན་འཇིགས་མེད་ལགས་ཀྱིས། སྤྱི་ཚོགས་ནང་དུ་བོད་དོན་ལས་འགུལ་ཡོད་ཚད་ལ་མཉམ་ཞུགས་བྱེད་པར་ཁག་པོ་ཡོད་ཀྱང་། ལས་ཀ་གཅིག་ཚང་མས་བསྒྲུབ་ཐུབ་པ་ནི་དཔྱ་ཁྲལ་ལག་དེབ་ཀྱི་དངུལ་འབུལ་ཐུབ་རྒྱུ་དེ་རེད། གྲོས་ཚོགས་ཀྱི་ངོས་ནས་བཀའ་ཤག་གི་དཔྱ་ཁྲལ་ལག་དེབ་ཀྱི་ཡོང་འབབ་གཏན་འབེབ་བཞིན་བརྒྱ་ཆ་ ༩༠ ཆག་ཡང་བཏང་བ་འགྲོ་མུས་ཡིན། ཕྱོགས་གཅིག་ནས་ཡག་པོ་ཡིན་ཡང་ཕྱོགས་གཞན་ནས་སེམས་པ་སྐྱོ་བོ་ཆགས་ཀྱི་འདུག ང་ཚོ་བོད་པ་ཡིན་པའི་ཆ་ནས་སོ་སོའི་རང་བཙན་ལག་དེབ་ཀྱི་དངུལ་འབུལ་ཐུབ་ཀྱི་མེད་པས། ཆག་ཡང་སྤྲད་དགོས་ཁེལ་གྱི་ཡོད་པ་རེད། བོད་ཀྱི་ཡུལ་མི་ཡིན་པའི་དཔང་རྟགས་མཚོན་བྱེད་དཔྱ་ཁྲལ་ལག་དེབ་ལས་ལྷག་ཅིག་མེད་ལ། ཆབ་སྲིད་ཀྱི་ཐོག་ནས་རྒྱ་ནག་གཞུང་ལ་བཙན་བྱོལ་མི་མང་༧གོང་ས་རྒྱལ་བ་རིན་པོ་ཆེ་དང་བཙན་བྱོལ་བོད་མིའི་སྒྲིག་འཛུགས་ཀྱི་རྒྱབ་ཏུ་ཡོད་པ་བརྡ་ལན་གལ་ཆེན་ཞིག་ཏུ་ཆགས་ཡོད་སྐོར་གསུངས་འདུག
ཀྲོ་རོན་ཌོ་བོད་རིགས་སྤྱི་མཐུན་ཚོགས་པའི་ཚོགས་གཙོ་བསྟན་འཛིན་ཕུན་ཚོགས་ལགས་ཀྱིས། བོད་ཀྱི་སྤྱི་ཚོགས་ལས་དོན་གྱི་ཐོག་ད་ལྟའི་ཆར་སེམས་འཚབ་ཆེ་ཤོས་མི་རབས་རྒན་གཞོན་བར་གྱི་འབྲེལ་བ་རྒྱུན་གནས་ཐུབ་པ་དང་། བོད་ཀྱི་གཞོན་སྐྱེས་ཕན་ཚུན་བར་འབྲེལ་བ་ཆགས་རྒྱུ་ཡིན་པས། གཞོན་སྐྱེས་རྣམས་ཀྱི་ཤེས་ཡོན་ཆེད་ཚོགས་འདུ་ཐེངས་ཁ་ཤས་གོ་སྒྲིག་ཞུས་ཐུབ་ཡོད་ཅིང་། མ་འོངས་པར་བོད་དོན་ཆེད་རྒྱལ་སྤྱི་དང་ཚོགས་པ་ཁག་གི་ནང་དུ་མཉམ་ཞུགས་གོ་སྐབས་ལེན་ཕྱོགས་ཐད་རེ་སྐུལ་ཞུ་བཞིན་ཡོད་ལ། བོད་ཀྱི་གཞོན་སྐྱེས་རྣམས་ཀྱིས་བོད་མི་རིགས་ཀྱི་སྐད་ཡིག་དང་། ཆོས། རིག་གཞུང་། ཡུལ་སྲོལ་གོམས་གཤིས་སོགས་ལ་གང་ཐུབ་ཀྱིས་བདག་པོ་རྒྱག་པར་འབད་བརྩོན་བྱེད་མུས་ཡིན་སྐོར་བརྗོད་སོང་།
བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་ཀྱིས། ད་ལན་གྱི་ཚོགས་ཆེན་འདི་ནི་བོད་ཀྱི་དམངས་གཙོ་དངོས་སུ་ལག་བསྟར་བྱས་པའི་དཔེ་མཚོན་ཞིག་ཆགས་ཡོད་ཅིང་། བྱང་ཨ་རིའི་སྤྱི་མཐུན་ཚོགས་པ་ཚང་མས་བོད་མིའི་སྒྲིག་འཛུགས་དེ་བོད་གཞིས་བྱེས་གཉིས་སུ་ཁྱབ་པའི་སྒྲིག་འཛུགས་ཤིག་གི་ཐོག་ནས་མཉམ་ཞུགས་བྱེད་བཞིན་ཡོད་པར་བཟང་སྤྱོད་དང་ལེགས་ཆ་ཞིག་ཏུ་གྱུར་ཡོད། ༧གོང་ས་རྒྱལ་བ་རིན་པོ་ཆེ་མཆོག་གིས་དགུང་ལོ་ ༡༦ ཐོག་བོད་ཀྱི་ཆབ་སྲིད་ཐུགས་འགན་བཞེས་པ་དང་། དགུང་ལོ་ ༢༥ ཐོག་བཙན་བྱོལ་ཏུ་ཕེབས་ཏེ། གཞིས་ཆགས་དང་། སློབ་གྲྭ། དགོན་སྡེ་གསུམ་གྱི་ལས་གཞི་ཆེན་པོ་གསུམ་གྱི་ཐུགས་འགན་བཞེས་ཏེ་འབད་བརྩོན་གནང་ཡོད་ཅིང་། ད་ལྟའི་ཆར་ལས་གཞི་དེ་གསུམ་ནི་བོད་ཀྱི་མ་འོངས་མངོན་གཟིགས་སུ་ཆགས་ཡོད་པས། བཙན་བྱོལ་བོད་མི་འདྲ་འདྲའི་ནང་ནས་མ་འདྲ་བ་ཞིག་ཆགས་པ་ཡང་༧གོང་ས་མཆོག་གི་ཐུགས་སྨོན་བཀའ་དྲིན་ཉག་གཅིག་ཡིན་པ་རེད། བོད་ཀྱི་དབུ་འཁྲིད་དང་བོད་མིའི་སྒྲིག་འཛུགས་ཀྱི་རྩ་དོན་འཐབ་རྩོད་ལ་ཡུ་གུར་དང་། ཧོང་ཀོང་། ཐའེ་ཝན་བཅས་ཀྱིས་ཡིད་སྨོན་བྱེད་མུས་ཡིན་སྐོར་གསུངས་འདུག
ཐེངས་འདིའི་བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ནང་དུ་སྐབས་སྔོན་མའི་ཚོགས་ཆེན་གྱི་གྲོས་ཆོད་དགོངས་དོན་ལྟར། བོད་དོན་ལས་འགུལ་སྤེལ་ཕྱོགས་དང་། བོད་ཀྱི་ཆོས་དང་རིག་གཞུང་སྐད་ཡིག་བཅས་མི་ཉམས་རྒྱུན་འཛིན་གནང་ཕྱོགས། བོད་དོན་ཞུ་གཏུགས་བྱེད་ཕྱོགས། ༧གོང་ས་༧རྒྱལ་བ་རིན་པོ་ཆེ་མཆོག་གི་ཐུགས་སྐྱེད་དམ་བཅའ་བཞིའི་གལ་གནད་ངོ་སྤྲོད་གནང་ཕྱོགས། རང་རིགས་གཞོན་སྐྱེས་རྣམས་བོད་པའི་སྤྱི་ཚོགས་ནང་མཉམ་ཞུགས་གནང་ཕྱོགས། དྭང་བླངས་དཔྱ་དངུལ་དང་འབྲེལ་བའི་གནད་དོན་སོགས་ཀྱི་ཐད་གྲོས་བསྡུར་གནང་མུས་ཡིན་འདུག ཚོགས་འདུའི་ཉིན་མཐའ་མར་སྤྱི་ཚོགས་རིག་པའི་འབུམ་རམས་པ་རྒན་རྒྱལ་ལོ་ལགས་ཀྱིས་རྒྱ་ནག་གཞུང་གིས་བོད་ཀྱི་སྐད་ཡིག་རྩ་མེད་གཏོང་བའི་སྲིད་བྱུས་ལག་བསྟར་དང་། བཙན་བྱོལ་བོད་མིས་དེར་གདོང་ལེན་བྱེད་ཕྱོགས་སྐོར་ལ་གསུང་བཤད་དང་དྲི་བ་དྲིས་ལན་གནང་གི་ཡོད་འདུག
གསར་འགོད་པ། བྱམས་པ་ཚེ་རིང་།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
