རྒྱ་རིགས་ཚོང་པ་ཞིག་གི་མགོ་སྐོར་བསླུ་བྲིད་འོག བོད་རྔ་བ་ཁུལ་ཆུ་ཆེན་རྫོང་འབྲིང་རིམ་སློབ་གྲྭའི་བོད་པའི་སློབ་མ་གསུམ་འབར་མའི་མི་ཚོང་རྒྱག་མཁན་ནག་ཚོགས་ཤིག་གི་ལག་ཏུ་ལྷུང་ནས་ད་ལྟའང་གར་ཡོད་འདིར་ཡོད་ཤེས་རྟོགས་མ་ཐུབ་པར་ལྷག་ཡོད་འདུག
བོད་གནས་ལྟ་ཞིབ་ཁང་གིས་སྤེལ་བའི་གནས་ཚུལ་ལྟར་ན། འདི་ལོའི་ཕྱི་ཟླ་ ༣ ནང་ཟུང་ཆུ་རྫོང་ནས་ཡིན་པའི་རྒྱ་རིགས་ཚོང་པ་ཞིག་གིས། རྔ་བ་བོད་རིགས་དང་ཆང་རིགས་རང་སྐྱོང་ཁུལ་ཟེར་བའི་ནང་གི་ཆུ་ཆེན་རྫོང་གི་འབྲིང་རིམ་སློབ་གྲྭར་འགྲིམས་པའི་བོད་ཕྲུག་ ༨ རྒྱ་གར་དུ་འཁྲིད་ནས་ཟླ་གླ་མཐོ་བའི་ལས་ཀ་སྤྲོད་རྒྱུ་ཡིན་ལུགས་སོགས་བརྗོད་དེ་ལྷ་སར་འཁྲིད་རྗེས། ཚོང་པ་དེས་བོད་པའི་སློབ་མ་དེ་དག་གི་ལག་ཏུ་དངུལ་ཡོད་མེད་སོགས་ཀྱི་སྐད་ཆ་དྲིས་པར་བརྟེན། སློབ་མ་བརྒྱད་ཀྱི་ནང་ནས་བཞིས་རྒྱ་རིགས་ཚོང་པ་དེར་ཡིད་མ་ཆེས་པར་ལོགས་ཁར་ཕྱིན་ཡོད་ཅིང་། ཕྱིས་སུ་རྒྱ་ནག་གཞུང་གི་ཉེན་རྟོག་པས་ལོགས་ཁར་ཕྱིན་པའི་བོད་ཕྲུག་བཞི་རྒྱ་གར་དུ་འགྲོ་རྩིས་བྱས་པའི་ཉེས་མིང་འོག ལྷ་ས་རང་ནས་འཛིན་བཟུང་བཀག་ཉར་བྱས་ཏེ་འདྲི་བརྩད་དང་གཅར་རྡུང་བཏང་ཡོད་པ་མ་ཟད། ཕྱིར་ཆུ་ཆེན་རྫོང་ཉེན་རྟོག་པར་རྩིས་སྤྲོད་བྱས་ཏེ་སློབ་ཕྲུག་རེར་རྒྱ་སྒོར་ཁྲི་ ༢ ཀྱི་དངུལ་ཆད་བཏང་ཡོད་འདུག
ཡང་སློབ་ཕྲུག་གཞན་བཞི་དེ་རྒྱ་རིགས་ཚོང་པ་དེས་འཁྲིད་ནས་འབར་མའི་ས་མཚམས་ཤིག་ཏུ་འབྱོར་བ་དང་། མི་གཞན་ལ་རྩིས་སྤྲོད་བྱས་ཡོད་འདུག་ལ། སྤྱིར་རྒྱ་མི་དེས་ཁོ་ཚོ་མི་ཚོང་རྒྱག་མཁན་ནག་ཚོགས་ཀྱི་ལག་ཏུ་བཞག་ཡོད་ཅིང་། ཉེ་ལམ་སློབ་མ་དེ་དག་ལས་སློབ་མ་གཅིག་ཕྱིར་རང་ཡུལ་དུ་ལོག་ཐུབ་ཡོད་པ་དང་། སློབ་མ་གཞན་གསུམ་གྱི་གནས་སྟངས་ད་ལྟའང་གར་སོང་ཆ་མེད་དུ་གྱུར་ཡོད་འདུག
ཉེ་ལམ་རང་ཡུལ་དུ་ལོག་པའི་སློབ་མ་དེས་ཉམས་མྱོང་བརྗོད་པ་ལྟར་ན། ཁོ་ཚོ་འབར་མའི་ས་མཚམས་སུ་འབྱོར་བ་དང་འབར་མའི་ཕྱོགས་ཀྱི་མི་ཁག་ཅིག་གིས་མཚན་ལམ་རྐྱང་རྐྱང་བརྒྱུད་པའི་མཐར། ཁོ་ཚོ་བཞི་ལོགས་སུ་དབྱེ་ནས་འཁྲིད་ཡོད་ཅིང་། ཁོ་རང་ནགས་ཚལ་ཞིག་གི་དཀྱིལ་དུ་ཡོད་པའི་ཁང་བརྩེགས་ཤིག་གི་ནང་བཅུག་ཡོད་འདུག་ལ། ཐོག་མའི་ཉིན་འགའི་རིང་ཁོ་ལ་ངལ་གསོ་རྒྱག་པ་དང་ཟ་མ་སོགས་སྤྲད་ཡོད་ཀྱང་། དེ་ནས་མི་ཚོང་རྒྱག་མཁན་ཚོས་རྒྱ་སྒོར་འབུམ་མང་པོ་སྤྲོད་དགོས་པའི་བཙན་དབང་བྱེད་སྐབས། བོད་པའི་སློབ་མ་དེའི་ལག་ཏུ་དངུལ་མེད་པ་ཤེས་ནས། ལས་ཀ་བྱས་ནས་དངུལ་ཚབ་འཇལ་བའམ་ཡང་ན་ཕ་མ་ལ་ཁ་པར་བཏང་ནས་སྐྱིན་ཚབ་འཇལ་དགོས་པའི་འདེམས་ཀ་སྤྲད་ཡོད་འདུག
བོད་པའི་སློབ་མ་དེས་རང་གི་ཕ་མ་ལ་ཁ་པར་བརྒྱུད་འབྲེལ་བ་བྱེད་སྐབས། མི་ཚོང་རྒྱག་མཁན་ཚོས་སློབ་མ་དེ་ནི་ཁོ་ཚོས་མི་གཞན་གྱི་ལག་ནས་ཉོས་པ་ཡིན་ཚུལ་སོགས་བརྗོད་དེ་རྒྱ་སྒོར་འབུམ་ ༣༠ སྤྲོད་དགོས་པའི་བཙན་བཀའ་བཏང་ཡོད་པ་ལྟར། སློབ་མའི་ཕ་མ་སྤུན་མཆེད་སོགས་ཀྱིས་རྟའུ་རྫོང་ཉེན་རྟོག་ཁང་ལ་འབྲེལ་བ་བྱས་ཏེ་རོགས་རམ་བྱེད་པའི་རེ་སྐུལ་ཞུ་སྐབས། ཉེན་རྟོག་ཁང་གིས་གནད་དོན་དེ་ནི་ཕྱི་སྲིད་དང་འབྲེལ་བའི་མི་ཚོང་རྒྱག་མཁན་གྱི་ནག་ཚོགས་ཤིག་དང་འབྲེལ་བ་ཡོད་སྟབས། ཁོ་ཚོས་ལག་པ་འཆང་གི་མིན་པའི་ལན་འདེབས་བྱས་ཡོད་པ་དང་། མཐར་སློབ་མ་དེའི་ཕ་མས་ནག་ཚོགས་དེར་རྒྱ་སྒོར་འབུམ་ ༣༠ སྤྲད་རྗེས། ནག་ཚོགས་ཀྱིས་བསྐྱར་དུ་དངུལ་འབོར་མང་པོ་སྤྲོད་དགོས་སྐོར་བརྗོད་ཡོད་ཅིང་། སློབ་མའི་ཕ་མས་བསྐྱར་དུ་དངུལ་གོ་སྒྲིག་ཐུབ་ཀྱི་མེད་པས། མོ་བརྒྱབ་ནས་མཐར་བུ་ཕྲུག་ལ་བྲོས་དགོས་པའི་ལམ་སྟོན་བྱས་པ་ལྟར། མཚན་མོ་ཞིག་ལ་བུ་ཕྲུག་དེ་ཁང་ཐོག་ནས་མཆོངས་ཏེ་བྲོས་ཐུབ་ཡོད་པ་རེད་ལ། ཕྱི་ཉིན་དེར་བུ་ཕྲུག་གི་སྤུན་མཆེད་ཁག་ཅིག་གིས་རྒྱ་སྒོར་མང་པོ་སྤྲད་ནས་འབར་མའི་ནང་འཛུལ་ཏེ་བུ་ཕྲུག་དེ་ཕྱིར་རང་ཡུལ་དུ་འཁྲིད་ཐུབ་པ་བྱུང་ཡོད་འདུག
བོད་པའི་སློབ་མ་བཞི་གར་སོང་ཆ་མེད་དུ་གྱུར་བའི་གནད་དོན་དང་འབྲེལ་ནས། སློབ་ཕྲུག་གི་ཕ་མ་སོགས་ཀྱིས་འབྲེལ་ཡོད་རྒྱ་གཞུང་ཉེན་རྟོག་པར་ཞུ་བ་ཐེངས་མང་བྱས་ཡོད་ཅིང་། རྒྱ་གཞུང་ཉེན་རྟོག་པས་སློབ་ཕྲུག་དེ་དག་ས་མཚམས་བརྒལ་ནས་ཕྱིན་ཟིན་ཚུལ་དང་། ཕྱི་ཕྱོགས་ཀྱི་ཁྲིམས་འགལ་ཉེས་དོན་རུ་ཁག་གི་ལག་ཏུ་ཐེབས་ཡོད་ལུགས་སོགས་བརྗོད་ཡོད་པ་མ་ཟད། ཕ་མ་རྣམས་ཀྱིས་རང་གི་ཕྲུ་གུ་དང་ཐུག་འདོད་ཡོད་ཚེ་རྒྱ་སྒོར་ཁྲི་ ༨ རེ་སྤྲོད་དགོས་སྐོར་སོགས་བརྗོད་ཡོད་འདུག་ལ། སློབ་ཕྲུག་དེ་དག་གི་ཕ་མ་སྤུན་མཆེད་སོགས་ཀྱིས། སློབ་ཕྲུག་བཞི་པོ་བོད་ནང་དུ་ཡོད་པ་དང་། ཉེན་རྟོག་པས་ལྐོག་རྔན་ལེན་འདོད་ཡོད་པའི་དོགས་པའང་བྱས་ཡོད་འདུག ད་ལྟ་ད་དུང་བོད་ཕྲུག་གསུམ་གར་ཡོད་འདིར་ཡོད་ཀྱི་གནས་སྟངས་གང་ཡང་ཤེས་རྟོགས་མ་ཐུབ་པར་ལྷག་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། སྐལ་བཟང་སྦྱིན་པ།
