ཉེ་ལམ་ནས་རྒྱ་ནག་གི་བྱིས་པ་མང་པོར་ངོ་རྟགས་མི་ཆོད་པའི་གློ་བའི་ནད་གཞི་ཕོག་མཁན་ཇེ་མང་དུ་ཕྱིན་པ་མ་ཟད། ནད་གཞི་དེའི་ཁྱབ་ཚད་ཤུགས་ཆེན་འགྲོ་བཞིན་ཡོད་པར་བརྟེན། འཛམ་གླིང་གི་རྒྱལ་ཁབ་འགས་ནད་གཞི་དེ་འགོས་ཁྱབ་མི་ཡོང་བ་དང་སྔོན་འགོག་སླད། རྒྱ་ནག་ནང་འགྲིམ་འགྲུལ་མི་བྱེད་པའི་ལམ་སྟོན་གནང་ཡོད་འདུག
ཁ་སང་ཕྱི་ཚེས་ ༡ ཉིན་ཨ་རིའི་གྲོས་ཚོགས་གོང་མའི་འཐུས་མི་མར་ཁོ་རུ་བྷིའོ་ (Marco Rubio) དང་། གྲོས་ཚོགས་གོང་མའི་འཐུས་མི་ཇེམ་སི་ཌེ་ཝི་ཌི་ (James David Vance) ལགས། གྲོས་ཚོགས་གོང་མའི་འཐུས་མི་རིཀ་སི་ཀོ་ཊི་ (Rick Scott) ལགས། གྲོས་ཚོགས་གོང་མའི་འཐུས་མི་ཊོ་མི་ (Tommy Tuberville) ལགས། གྲོས་ཚོགས་གོང་མའི་འཐུས་མི་མ་ཡི་ཀི་ (Mike Braun) ལགས་བཅས་ཀྱིས་ཨ་རིའི་སྲིད་འཛིན་རྗོ་བྷའེ་ཌིན་མཆོག་གི་མཚན་ཐོག་ཏུ་ཨ་རྒྱའི་བར་གྱི་འགྲིམ་འགྲུལ་འཕྲལ་དུ་བཀག་སྡོམ་དགོས་པའི་འཕྲིན་ཡིག་ཅིག་བསྐུར་ཡོད་འདུག་ལ། འཕྲིན་ཡིག་དེའི་ནང་དུ། ཉེ་ལམ་རྒྱ་ནག་ནང་ངོ་རྟགས་མི་ཆོད་པའི་གློ་བའི་ནད་གཞི་ཞིག་ཁྱབ་གདལ་དུ་ཤུགས་ཆེན་འགྲོ་དང་འགྲོ་བཞིན་ཡོད་པས། ནད་གཞི་དེའི་འབྱུང་ཁུངས་དང་། ཉེན་ཚབས་ཆེ་ལུགས་སོགས་ཞིབ་ཕྲའི་གནས་ཚུལ་ཁ་གསལ་མ་ཆགས་བར་དུ་ཨ་རི་དང་རྒྱ་ནག་དབར་གྱི་འགྲིམ་འགྲུལ་འཕྲལ་དུ་བཀག་སྡོམ་བྱེད་དགོས་པའི་ནན་སྐུལ་ཞུས་ཡོད་ཅིང་། གལ་སྲིད་འགྲིམ་འགྲུལ་བཀག་སྡོམ་བྱ་ཚེ། ཨ་རིའི་ནང་རྐྱེན་འདས་དང་ཐེམ་སྤང་བཀག་རྒྱ་སོགས་ཀྱི་གནད་དོན་མི་འབྱུང་བའི་རེ་བ་བྱེད་ཀྱི་ཡོད་སྐོར་སོགས་བཀོད་འདུག
ཡང་། ཕྱི་ཟླ་ ༡༡ ཚེས་ ༣༠ ཉིན་ཐའེ་ཝན་གྱི་འཕྲོད་བསྟེན་ལྷན་ཁང་གིས། རྒྱ་ནག་ནང་གློ་བའི་ནད་གཞི་ཁྱབ་གདལ་མུ་མཐུད་དུ་འགྲོ་བཞིན་ཡོད་པར་བརྟེན། ལོ་ན་མཐོ་བ་དང་རྒན་རྒོན། དེ་བཞིན་བྱིས་པ་ཆུང་ཆུང་དང་འཕྲོད་བསྟེན་གྱི་གནས་སྟངས་ཞན་པའི་མི་རྣམས་རྒྱ་ནག་ནང་འགྲིམ་འགྲུལ་མི་བྱེད་པའི་འབོད་སྐུལ་ནན་ཏན་ཞུས་ཡོད་འདུག
དེ་བཞིན། ཕྱི་ཟླ་ ༡༡ ཚེས་ ༢༦ ཉིན་རྒྱ་གར་དབུས་གཞུང་གིས་ཀྱང་། རྒྱ་ནག་ནང་ངོ་རྟགས་མི་འཕྲོད་པའི་གློ་བའི་ནད་གཞི་ཞིག་ཁྱབ་གདལ་ཤུགས་ཆེན་འགྲོ་བཞིན་ཡོད་པ་དང་འབྲེལ་ནས་ཡོངས་ཁྱབ་གསལ་བསྒྲགས་ཤིག་སྤེལ་བའི་ནང་། མི་མང་གི་འཕྲོད་བསྟེན་གྱི་གནས་སྟངས་ཐད་ཞིབ་འཇུག་ངེས་པར་དུ་བྱ་དགོས་པ་དང་། སྨན་ཁང་ཁག་ཏུ་ཉལ་ཁྲི་དང་སྲོག་རླུང་། བརྟག་དཔྱད་ཀྱི་ཡོ་ཆས་སོགས་སྨན་བཅོས་ཀྱི་མཐུན་རྐྱེན་གང་མང་དགོས་པ་སོགས་སྔོན་འགོག་གི་གྲ་སྒྲིག་བྱེད་དགོས་པའི་ལམ་སྟོན་གནང་ཡོད་པ་ལྟར། རྒྱ་གར་གྱི་མངའ་སྡེ་ཀར་ན་ཊ་ཀཱ་ (Karnataka) དང་ཨུ་ཏར་ཁན་ཌི (Uttarakhand)། གྷུ་ཇ་ར་ཏི་ (Gujarat)། ཧར་ཡ་ན་ (Haryana)། ཏ་མིལ་ན་ཌུ་ (Tamil Nadu)། དེ་བཞིན་ར་ཇི་སི་ཐན་ (Rajasthan) དང་ཇར་ཁན་ཌི་ (Jharkhand)། ཨན་དྷ་ར་པ་ར་དྷེ་ཤི་ (Andhra Pradesh) སོགས་ཀྱི་མངའ་སྡེའི་འཕྲོད་བསྟེན་ལས་ཁུངས་ཀྱིས། རྒྱ་ནག་གི་ནད་གཞི་དེ་དང་འབྲེལ་ནས། མང་ཚོགས་ཀྱིས་ཁ་རས་གྱོན་པ་སོགས་སྔོན་འགོག་གི་ཐབས་ལམ་ལག་བསྟར་དགོས་པ་དང་། སྨན་ཁང་ནང་གི་ཉལ་ཁྲི་དང་སྲོག་རླུང་སོགས་གང་མང་གྲ་སྒྲིག་དགོས་པའི་སྔོན་བརྡ་བཏང་ཡོད་འདུག་ལ། ཡུལ་མིའི་ཁྲོད་ངོ་རྟགས་མི་ཆོད་པའི་གློ་བའི་ནད་གཞི་ཕོག་མཁན་ཡོད་མེད་ཐད་ཞིབ་འཇུག་བྱས་དང་བྱེད་མུས་ཡིན་འདུག
འདི་ལོའི་ཕྱི་ཟླ་ ༡༠ པའི་ཟླ་དཀྱིལ་ནས་བཟུང་རྒྱ་ནག་བྱང་ཁུལ་དུ་ཡོད་པའི་བྱིས་པ་ཆུང་ཆུང་ཚོར་ངོས་འཛིན་མི་ཐུབ་པའི་གློ་བའི་ནད་གཞི་ཞིག་འགོས་ཁྱབ་ཤུགས་ཆེན་བྱུང་ཡོད་ཅིང་། དེ་ནི་འདས་པའི་ལོ་ངོ་གསུམ་གོང་གི་ཏོག་དབྱིབས་གཉན་རིམས་ཀྱི་ཁྱབ་ཚད་ལས་ཀྱང་རྒྱ་ནག་ནང་ཁྱབ་གདལ་ཆེ་བའི་ནད་གཞི་ཞིག་ཆགས་ཡོད་པར་བརྟེན། ཕྱི་ཟླ་ ༡༡ ཚེས་ ༢༢ ཉིན་འཛམ་གླིང་འཕྲོད་བསྟེན་སྒྲིག་འཛུགས་ཀྱིས། རྒྱ་ནག་གཞུང་གིས་ངོས་འཛིན་མི་ཐུབ་པའི་གློ་བའི་ནད་གཞི་དེའི་འབྱུང་རྐྱེན་སོགས་ཞིབ་ཕྲའི་གནས་ཚུལ་མཁོ་སྤྲོད་དགོས་པའི་འབོད་སྐུལ་ཞུས་ཡོད་པ་རེད། གཞན་ཡང་། ད་ལྟའི་ཆར་རྒྱ་ནག་གི་རྒྱལ་ས་པེ་ཅིན་དུ་ཡོད་པའི་ཡན་ལག་སྨན་ཁང་འགའི་ནང་ཉིན་རེར་མི་གྲངས་ ༧༠༠༠ ཙམ་དང་། རྒྱ་ནག་གི་གྲོང་ཁྱེར་ཐེན་ཅིན་དུ་ཡོད་པའི་སྨན་ཁང་དུ་བྱིས་པ་ ༡༣,༠༠༠ ལྷག་སྨན་པར་བསྟེན་གཏུག་བྱེད་བཞིན་པའི་གནས་སྟངས་ཛ་དྲག་ཅན་དུ་གྱུར་ཡོད་འདུག ད་ལྟའི་ཆར་རྒྱ་ནག་གཞུང་ཕྱོགས་ནས་རྒྱ་ནག་ནང་འགྲིམ་འགྲུལ་དང་ཚོང་འབྲེལ་སོགས་བཀག་སྡོམ་བྱས་མེད་ནའང་། རྒྱ་ནག་འཕྲོད་བསྟེན་ལས་ཁུངས་ཀྱིས། ས་གནས་དཔོན་རིགས་རྣམས་ཀྱིས་ཚ་བའི་བརྟག་དཔྱད་ཁང་ (fever clinic) གི་གྲངས་ཚད་མང་དུ་གཏོང་དགོས་པའི་ནན་སྐུལ་བྱས་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། སྐལ་བཟང་སྦྱིན་པ།
