རྔ་བ་ཀིརྟི་དགོན་གྱི་དགེ་བའི་བཤེས་གཉེན་ཆེན་མོ་མཛོད་ཚང་བློ་བཟང་བརྩོན་འགྲུས་མཆོག་ཁྲིན་ཏུའུ་གྲོང་ཁྱེར་གྱི་སྨན་ཁང་ཞིག་ཏུ་སྙུན་གཞིའི་རྐྱེན་གྱིས་སྐུ་གཤེགས་ཡོད་འདུག
ཁ་སང་ཕྱི་ཚེས་ ༡༩ ཉིན་རྔ་བ་ཀིརྟི་དགོན་གྱི་དགེ་བའི་བཤེས་གཉེན་ཆེན་མོ་མཛོད་ཚང་བློ་བཟང་བརྩོན་འགྲུས་མཆོག་སྙུན་གཞིའི་རྐྱེན་གྱིས་ཁྲིན་ཏུའུ་གྲོང་ཁྱེར་གྱི་སྨན་ཁང་ཞིག་ཏུ་སྐུ་གཤེགས་ཡོད་པ་དང་། སྐུ་གཤེགས་དམ་པ་ཁོང་གིས་དེ་སྔོན་རྔ་བ་ཀིརྟི་དགོན་པའི་སྨན་པ་གྲྭ་ཚང་གི་ལས་ཐོག་མཁན་པོ་ཡིན་འདུག་ལ། བོད་ནང་གི་དགོན་སྡེ་མང་པོར་དཔེ་ཁྲིད་གནང་སྟེ་སློབ་བུ་མང་པོ་བསྐྱངས་གནང་བ་དང་། ཕྱག་དཔེ་མང་པོ་ལྗགས་རྩོམ་གནང་ཡོད་འདུག
དགེ་བའི་བཤེས་གཉེས་ཆེན་མོ་མཛོད་ཚང་བློ་བཟང་བརྩོན་འགྲུས་མཆོག་ནི་ཕྱི་ལོ་ ༡༩༦༦ ལོའི་ཆོས་འཁོར་སྐོར་བའི་དུས་ཆེན་ཉིན་སྐུ་འཁྲུངས་ཤིང་། མི་རིང་བར་གནས་སྐྱོང་ཆོས་རྒྱལ་ཆེན་པོ་སྐུ་ཕེབས་ཐོག་མཚན་ལ་བློ་བཟང་དཔལ་ལྡན་དུ་གསོལ་ནས་རྗེས་སུ་རྔ་ཡུལ་ཀིརྟི་དགོན་ཆེན་གྱི་གྲྭ་སར་འཇོག་དགོས་པ་སོགས་ཀྱི་བཀའ་གནང་བ་ལྟར། དགུང་ལོ་བཅོ་ལྔའི་ཐོག་དགེ་བསྙེན་རབ་བྱུང་དགེ་ཚུལ་བཅས་དཀྱུས་གཅིག་ཏུ་བཞེས། ལོ་དེའི་དགའ་ལྡན་ལྔ་མཆོད་ཆེན་མོའི་ཉིན་མཁན་ཆེན་ཆོས་ཀྱི་རྒྱལ་པོ་རྗེ་༸སྐལ་བཟང་ལུང་རིགས་རྒྱ་མཚོ་དཔལ་བཟང་པོའི་དྲུང་ནས་འབྲི་ཀློག་དང་དཔེ་ཆར་གཟིགས་པ་དབུ་དུས་གཅིག་ཏུ་བཟུང་སྟེ། མི་རིང་བར་དགེ་བཤེས་ཀྱི་མཚན་གནས་བཞེས། ཁོང་གིས་འཇམ་བཞད་བསྡུས་གྲྭའི་རྩ་ཚིག་དང་། སྐྱབས་མགོན་ལམ་སྔགས་གཉིས་ཀ། སྡོམ་གསུམ་བསླབ་བྱ། དྲང་ངེས་ལེགས་བཤད་སྙིང་པོ། མཛོད་རྩ། རྩ་ཤེས། རྭ་སྟོད་བློ་རྟགས་བསྡུས་གསུམ་སོགས་གཞུང་ཆེན་མང་པོ་བློར་འཛིན་གནང་སྟེ། ཕྱི་ལོ་ ༡༩༨༦ ལོའི་ས་ཟླའི་དུས་ཆེན་ཉིན་བསྙེན་རྫོགས་ཀྱི་སྡོམ་པ་བཞེས། ཕྱི་ལོ་ ༡༩༨༧ ནས་འཛིན་གྲྭའི་བླ་མའི་འཁུར་བཞེས་ཏེ་ནང་རྒྱུགས་དང་དབྱངས་ཆགས་དཔེ་ཁྲིད་གནང་བ་མ་ཟད། ཕྱི་ལོ་ ༡༩༩༥ ལོར་ཕར་ཕྱིན་དམ་བཅའ་ཆེན་མོ་བཞག་སྟེ་མཁས་པའི་མཚན་སྙན་རྒྱས། བསྡུས་གྲྭ་དང་། པཎ་ཆེན་རྣམ་འགྲེལ། དྲང་ངེས་ལེགས་བཤད་སྙིང་པོ་སོགས་ཀྱི་ཆེད་མཁས་པ་ལྟ་བུར་གྱུར། ཕྱི་ལོ་ ༡༩༩༧ ཡས་མས་ནས་དབང་ལུང་ཁྲིད་གསུམ་མན་ངག་སོགས་ཆེད་གཉེར་གྱིས་སེམས་རྒྱུད་ལ་ཕན་པའི་གསུང་བཤད་མང་པོ་གནང་། ཕྱི་ལོ་ ༡༩༩༨ ལོ་ནས་བཟུང་དགོན་པ་མང་པོའི་མཁན་པོ་དང་དཔེ་ཁྲིད་དགེ་རྒན་གྱི་ཁུར་བཞེས་ཏེ། སློབ་མ་མཁས་ཆེན་མང་པོ་སྐྱེད་སྲིང་གནང་བ་མ་ཟད། ཕྱི་ལོ་ ༡༩༩༩ ནས་ཕྱོགས་གཞན་དག་ནས་ཕེབས་པའི་གྲྭ་རྐྱང་སློབ་གཉེར་བ་ཚོའི་ཆེད་དུ་ལུགས་གཉིས་ཀྱི་བྱ་བ་རླབས་ཆེན་བསྒྲུབས་གནང་ཡོད་པ་རེད།
ཕྱི་ལོ་ ༢༠༠༡ ནས་ཁོང་ནས་རྔ་ཡུལ་ཕྱོགས་སུ་མང་ཚོགས་ལ་ནང་ཆོས་ངོ་སྤྲོད་གནང་བ་དང་། ༢༠༠༣ ནས་ཁྲི་ཆེན་རྣམ་གཉིས་ཀྱི་བཀའ་དགོངས་ལྟར་གཞན་ལ་བསྙེན་གནས་དང་རབ་བྱུང་དགེ་ཚུལ་བཅས་བསྒྲུབ་རྒྱུའི་དབུ་འཛུགས་ཡོད་འདུག་ལ། ཕྱི་ལོ་ ༢༠༠༦ ནས་༧མཁན་ཆེན་ཁྲི་ཐོག་སོ་བདུན་པས་བཀའ་གནང་བ་ལྟར། ཕྱོགས་རིས་མེད་ཀྱི་བསྙེན་རྫོགས་ཀྱི་མཁན་པོའི་ཁུར་ཡང་བཞེས། ༢༠༠༧ ལོར་རོང་ཆེན་བསྟན་པའི་སྒྲོན་མེ་༧སྐྱབས་རྗེ་ཀིརྟི་རིན་པོ་ཆེ་མཆོག་གི་བཀའ་ལུང་ལྟར། ལོ་ལྔའི་རིང་ཚོ་བདུན་ཀིརྟིའི་དགོན་གྱི་མཁན་པོ་དང་ཁྲི་བ་དགེ་རྒན་གཅིག་ལྕོགས་ཀྱི་ཁུར་བཞེས་པ་མ་ཟད། ཀིརྟི་ཚང་གི་གདན་ས་གོང་འོག་གི་ཚད་མའི་དགུན་ཆོས་ཀྱི་དགེ་རྒན་ཆེན་མོའང་གནང་སྟེ་མཛད་པ་རྒྱ་ཆེར་བསྐྱངས། ༢༠༡༡ ལོར་རྔ་ཡུལ་ཀིརྟིའི་དགོན་ནས་ཉིན་གསུམ་རིང་སྔགས་རིམ་དམ་བཅའ་ཆེན་མོ་བཞག་སྟེ་མདོ་སྔགས་རབ་འབྱམས་སྨྲ་བའི་མཚན་རྟགས་བཞེས། ༢༠༡༢ ལོར་རྔ་ཡུལ་ཀིརྟིའི་དགོན་གྱི་འཆད་ཉན་ཉམས་ཞིབ་ཚོགས་པའི་ཚོགས་གཙོ་དང་། ༢༠༡༣ ནས་རྔ་ཡུལ་ཀིརྟིའི་དགོན་ཆེན་གྱི་ནང་བསྟན་ཤེས་ཡོན་འགན་འཛིན་གྱི་རྒྱུན་ལས་གནང་། ཕྱི་ལོ་ ༢༠༡༩ བོད་ཟླ་ ༤ པའི་ཚེས་ ༢༡ ནས་དུས་འཁོར་གྲྭ་ཚང་གི་མཁན་པོའི་ཁུར་བཞེས་ཡོད་འདུག
གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
