བོད་གཞུང་དམངས་གཉིས་ནས་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ལ་ཕེབས་བསུའི་མཛད་སྒོ་འཚོགས།

ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ལ་ཕེབས་བསུའི་གཞུང་འབྲེལ་མཛད་སྒོའི་ཐོག་གྲོས་ཚོགས་འོག་མའི་ཚོགས་གཙོ་ཟུར་པ་དང་བོད་དོན་རྒྱབ་སྐྱོར་བ་གྲགས་ཅན་ལྕམ་སྐུ་ནན་སི་པེ་ལོ་སི་མཆོག་ནས་ཨ་རིའི་གྲོས་ཚོགས་གོང་འོག་གཉིས་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེར་སྲིད་འཛིན་མཆོག་ནས་མཚན་རྟགས་བསྐྱོན་པར་རེ་སྒུག་གནང་བསྡད་ཡོད་སྐོར་གསུངས་སོང་།

དེ་རིང་སྔ་དྲོའི་ཆུ་ཚོད་ ༩།༣༠ ཐོག་དྷ་ས་ཐེག་ཆེན་ཆོས་གླིང་གཙུག་ལག་ཁང་གི་ཆོས་རའི་ནང་དུ། བོད་མིའི་སྒྲིག་འཛུགས་ཀྱི་གོ་སྒྲིག་འོག བོད་གཞུང་མང་གཉིས་ནས་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ལ་ཕེབས་བསུའི་མཛད་སྒོ་ཞིག་འཚོགས་ཡོད་ཅིང་། མཛད་སྒོའི་ཐོག་ཨ་རིའི་གྲོས་ཚོགས་འོག་མའི་ཕྱི་འབྲེལ་ཚོགས་ཆུང་གི་ཚོགས་གཙོ་སྐུ་ཞབས་མཱ་ཡེ་ཀལ་མེ་ཁོལ་མཆོག་དང་། ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པེ་ལོ་སི་མཆོག་གི་དབུས་པའི་ཨ་རིའི་གྲོས་ཚོགས་འོག་མའི་རྒྱ་ནག་སྐོར་གྱི་ཚོགས་ཆུང་གི་ཚོགས་གཙོ་ཟུར་པ་སྐུ་ཞབས་ཇེམ་མེག་གྷོ་ཝུན་མཆོག་སོགས་ཆེས་མཐོའི་སྐུ་ཚབ་ཚོགས་ཆུང་གི་སྐུ་ཚབ་རྣམ་པ་དང་། རྒྱ་གར་ནང་རྟེན་གཞི་བྱས་པའི་ཨ་རིའི་གཞུང་ཚབ་མི་སྣ། དེ་བཞིན་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་བསྟན་འཛིན་ལུང་རྟོགས་མཆོག་དང་། སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་དབུས་མཛད་གཙོ་རྣམ་པ་དང་སྲི་ཞུ་ལས་བྱེད། དྷ་ས་ཁུལ་གྱི་སེར་སྐྱ་མི་མང་དང་སློབ་ཕྲུག་སོགས་འཛོམས་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས། དེ་རིང་བཞུགས་སྒར་དྷ་རམ་ས་ལར་ཨ་རིའི་གྲོས་ཚོགས་འོག་མའི་ཆེས་མཐོའི་སྐུ་ཚབ་ཚོགས་ཆུང་ཞབས་སོར་འཁོད་ཡོད། སྐུ་ཚབ་ཚོགས་ཆུང་གོ་སྒྲིག་ཞུ་སྐབས་ཟླ་བ་མང་པོ་འགོར་གྱི་ཡོད། ངས་དྲན་ཚོད་བྱས་ན། ཕྱི་ལོ་ ༢༠༡༧ ཟླ་ ༥ ནང་ལྕམ་སྐུ་ནན་སི་ཕི་ལོ་སིའི་སྣེ་ཁྲིད་པའི་ཆེས་མཐོའི་སྐུ་ཚབ་ཚོགས་ཆུང་ཞིག་གདན་འདྲེན་ཞུ་ཐུབ་ཡོད། ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་གི་ངོ་བོའི་ཐོག་ནས་ཆིབས་བསྒྱུར་བསྐྱངས་བ་ལོ་བདུན་གྱི་རྗེས་སུ་གཅིག་ཆགས་ཀྱི་ཡོད། ཁོང་རྣམ་པ་ཕེབས་དོན་ཡང་ཨ་རིའི་གྲོས་ཚོགས་ནང་བོད་རྒྱའི་དཀའ་རྙོག་སེལ་བའི་ཁྲིམས་འཆར་ཐོག ཨ་རིའི་གྲོས་ཚོགས་འོག་མའི་ནང་ཤུགས་རྒྱག་མཁན་གཙོ་བོ་སྐུ་ཚབ་ཚོགས་ཆུང་གི་མགོ་ཁྲིད་ཨ་རིའི་གྲོས་ཚོགས་འོག་མའི་ཕྱི་འབྲེལ་ཚོགས་ཆུང་གི་ཚོགས་གཙོ་སྐུ་ཞབས་མཱ་ཡེ་ཀལ་མེ་ཁོལ་མཆོག་ཡིན། སྔོན་མ་མེ་ཁོལ་མཆོག་བོད་དོན་དང་འབྲེལ་བ་དེ་ཙམ་མེད་ཀྱང་། ཨ་རིའི་གྲོས་ཚོགས་འོག་མའི་ཕྱི་འབྲེལ་ཚོགས་ཆུང་གི་ཚོགས་གཙོ་ཡིན་པའི་ཆ་ནས་སྐུ་ཞབས་ཇིམ་མེག་གྷོ་ཝན་ལགས་ཀྱིས་ཟིན་བྲིས་བཟོས་པར་བརྟེན། ཨ་རིའི་གྲོས་ཚོགས་འོག་མའི་ནང་བོད་དོན་རྒྱབ་སྐྱོར་གྱི་ཁྲིམས་འཆར་ལ་ཐུགས་འགན་བཞེས་ཏེ། ད་ལྟ་བར་གྲོས་ཚོགས་འོག་མའི་ཕྱི་འབྲེལ་ཚོགས་ཆུང་དང་གྲོས་ཚོགས་འོག་མའི་ལྷན་ཚོགས་ནང་ཐོན་ཐུབ་པ་བྱུང་བ་རེད། དེ་རིང་འདིར་སྐུ་ཚབ་ཚོགས་ཆུང་ནང་ཕེབས་མཁན་ཡང་མགོ་ཁྲིད་གནད་ཡོད་མི་སྣ་རྐྱང་རྐྱང་ཕེབས་ཡོད། ཨ་རིའི་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་དང་། སྤྱི་མཐུན་ཚོགས་པའི་འཐུས་མི་སྐུ་ཞབས་མ་ཧི་ཀལ་མེག་ཀོལ་ལགས་ཕེབས་པའི་མཚོན་དོན་ཡང་སྲིད་དོན་ཚོགས་པ་གཉིས་ཀྱིས་རྒྱབ་སྐྱོར་ཤུགས་ཆེན་ཡོད་པའི་རྣམ་པ་སྟོན་གྱི་ཡོད་པ་རེད། སྐུ་ཞབས་མེ་ཁོལ་ལགས་ཀྱིས་ཨ་རིའི་གྲོས་ཚོགས་ནང་བོད་དོན་རྒྱབ་སྐྱོར་གྱི་ཁྲིམས་འཆར་བཏོན་པར་འགན་འཁུར་བ་ཙམ་མིན་པར། ཕྱི་ལོ་ ༢༠༠༦ ལོར་ཨ་རིའི་གྲོས་ཚོགས་ནང་༧གོང་ས་རྒྱལ་བ་རིན་པོ་ཆེ་མཆོག་ལ་ཨ་རིའི་གསེར་གྱི་གཟེངས་རྟགས་ཐོབ་པར་རྒྱབ་སྐྱོར་ཞུས་ཡོད། ཅེས་གསུངས་སོང་།

ཡང་སྲིད་སྐྱོང་མཆོག་ནས། ཨ་རིའི་གྲོས་ཚོགས་ཀྱི་ཚོགས་གཙོ་ཟུར་པ་ལྕམ་སྐུ་ནན་སི་པེ་ལོ་སི་ཕེབས་ཡོད། ཁོང་གི་སྐོར་ལ་ཞེ་དྲགས་ཞུ་དགོས་པ་མ་རེད། ཚང་མའི་མཁྱེན་གྱི་རེད། ཕྱི་ལོ་ ༡༩༨༧ ལོར་༧གོང་ས་རྒྱལ་བ་རིན་པོ་ཆེ་མཆོག་ནས་ཨ་རིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་ཆུང་ནང་ཞི་བའི་དོན་ཚན་བཏོན་གནང་མཛད་སྐབས། ༧གོང་ས་མཆོག་དང་ལྕམ་སྐུ་མཆོག་ཐོག་དང་པོ་མཇལ་འཕྲད་བྱུང་བ་ནས་བཟུང་སྐུ་ཚེ་ཧྲིལ་བོར་བོད་དོན་ཐོག་རྒྱབ་སྐྱོར་དང་། ༧གོང་ས་མཆོག་སྐུ་སྒེར་ལ་ཐུགས་ཁྲལ་གནང་མཁན་ཞིག་ཆགས་ཡོད། ད་ལྟའི་བར་དུ་ཨ་རིའི་གྲོས་ཚོགས་ནང་ཁྲིམས་འཆར་ག་རེ་ཕྱིན་ཡོད་ཀྱང་། ཁོང་གི་ལམ་སྟོན་དང་། མཉམ་ཞུགས། དབུ་ཁྲིད་མ་ཞུས་པ་གང་ཡང་མེད།  ཅེས་དང་། ཨ་རིའི་གྲོས་ཚོགས་གོང་འོག་གཉིས་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་སྲིད་འཛིན་མཆོག་ནས་མཚན་རྟགས་བསྐྱོན་པར་རེ་སྒུག་གནང་བསྡད་ཡོད་སྐོར་གསུངས་སོང་།

དེ་བཞིན་སྲིད་སྐྱོང་མཆོག་ནས། གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་དམངས་གཙོ་ཚོགས་པའི་མགོ་ཁྲིད་སྐུ་ཞབས་གྷེ་རེ་གྷེ་རི་མེ་ཁི་སི་ (Gregory Meeks) ལགས་ཀྱིས་ཤུགས་བརྒྱབ་མེད་ཚེ། གྲོས་ཚོགས་ནང་གསུམ་ཆ་གཉིས་ཀྱི་རྒྱབ་སྐྱོར་ཐོབ་རྒྱུ་ཁག་པོ་ཆགས་ཡོད། ཁོང་གི་རྒྱབ་སྐྱོར་བྱས་པར་བརྟེན་རིམ་པ་དང་པོའི་སྐབས་དེར་གྲོས་ཚོགས་ནང་འཐུས་མི་ ༤༣༡ ཡོད་པའི་ཁྲོད་ ༣༩༢ རྒྱབ་སྐྱོར་གནང་ཡོད། དེའི་རྗེས་སུ་གྲོས་ཚོགས་གོང་མའི་ཚིག་གཞི་དང་མཐུན་པ་བཟོ་བའི་ཁྲིམས་འཆར་ཐད་གྲོས་ཚོགས་འཐུས་མི་ ༤༢༩ ནང་ ༣༩༡ གི་རྒྱབ་སྐྱོར་ཐོབ་ཡོད། དེ་བཞིན་བོད་དོན་ཀྱི་ལས་དོན་གང་ཞིག་ཡིན་ཡང་ཨ་རིའི་གྲོས་ཚོགས་འོག་མའི་སྒྲིག་ཁྲིམས་ཚོགས་ཆུང་གི་ཚོགས་གཞོན་སྐུ་ཞབས་ཇིམ་མེག་གྷོ་ཝན་ལགས་མེད་ཐབས་མེད་པ་ཞིག་རེད། ལྕམ་སྐུ་ནན་སི་པེ་ལོ་སི་དགུང་ལོ་བགྲེས་བཞིན་ཡོད་པར་བརྟེན། གྲོས་ཚོགས་འོག་མའི་ནང་བོད་དོན་ལས་དོན་བྱེད་ཕྱོགས་ཀྱི་འགན་ཡོངས་རྫོགས་ཁོང་ལ་གནང་གི་ཡོད། ཁོང་ནི་ཨ་རིའི་གྲོས་ཚོགས་ནང་ཁྲིམས་འཆར་གལ་ཆེ་བ་གསུམ་འདོན་མཁན་ཆགས་ཡོད། ཅེས་དང་། དེ་བཞིན་གྲོས་ཚོགས་འཐུས་མི་གཞན་དང་སྐུ་ཞབས་རི་ཆར་ཌི་གྷི་རི་སོགས་ཀྱིས་གྲོས་ཚོགས་ནང་ཞུ་གཏུགས་ཀྱི་ལས་འགུལ་མང་པོ་སྤེལ་ཡོད་ལ། བོད་དོན་ལས་འགུལ་ཁང་དང་། ཨ་རིའི་སྐུ་ཚབ་དོན་གཅོད་སོགས་འབྲེལ་ཡོད་ལས་བྱེད་རྣམས་ཀྱིས་སྐུ་ལས་མང་པོ་བསྐྱོན་ཡོད།  ཅེས་གསུངས་སོང་།

ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་མའེ་ཁེལ་མཆོག་གིས། དེ་རིང་ཨ་རིའི་གྲོས་ཚོགས་འཐུས་མི་རྣམས་ཀྱི་སྣེ་འཁྲིད་ནས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་པ་སྐལ་བ་བཟང་པོ་ཞིག་བྱུང་། ངས་ཁྱེད་ཚོའི་ཕ་ཡུལ་བོད་ལ་བདེ་སྐྱིད་ལྡན་པ་ཞིག་ཡོང་བའི་རེ་བ་བཅང་གི་ཡོད། མི་ལོ་དྲུག་ཅུ་རེ་ལྔ་ཙམ་གྱི་གོང་དུ་རྒྱ་ནག་དམར་ཤོག་གཞུང་གིས་བོད་སར་བཙན་འཛུལ་བྱས་ནས། ཉེས་མེད་བོད་མི་སྟོང་ཕྲག་མང་པོ་དམར་གསོད་བཏང་ཡོད་པ་རེད། བོད་ཀྱི་ཆོས་རིག་སྲུང་སྐྱོབ་ཀྱི་སླད། ༧གོང་ས་རྒྱལ་བ་རིན་པོ་ཆེ་མཆོག་ནས་དབུ་འཁྲིད་པའི་བོད་མི་བརྒྱད་སྟོང་ལྷག་ཧི་མ་ཡ་ལ་བརྒལ་ནས་ལེ་བར་བཞི་སྟོང་ཕྱིན་ཏེ་བདེ་འཇགས་ཀྱི་ས་གནས་ཤིག་བཙལ་བའི་ཁྲོད། བྱེས་འབྱོར་བ་དེ་དག་གིས་རང་གི་ཕ་ས་ཕ་ཡུལ་དང་། གྲོགས་པོ། ཁ་ཤས་ཀྱིས་རང་གི་ནང་མི་སོགས་ཀྱང་རྒྱབ་ལ་བསྐྱུར་ནས་བོད་ཀྱི་མ་འོངས་པའི་མི་རབས་ཤིག་གི་ཆེད་དུ་རེ་སྙེག་བྱས་པ་རེད། ཅེས་དང་། དེང་སྐབས་༧གོང་ས་རྒྱལ་བ་རིན་པོ་ཆེ་མཆོག་གཙོས་བོད་མི་ཚོས་གནས་འདི་ནས་ཞེད་སྣང་གང་ཡང་མེད་པར་རང་མོས་བཞིན་རང་གི་ཆོས་ལུགས་ལ་ཉམས་ལེན་གནང་མུས་ཡིན་ཡང་། ངས་རེ་བར་༧གོང་ས་རྒྱལ་བ་རིན་པོ་ཆེ་མཆོག་དང་བོད་མི་རྣམས་ནམ་ཞིག་ཞི་བདེ་ལྡན་པའི་ངང་ནས་བོད་དུ་ལོག་ཐུབ་པའི་རེ་བ་ཡོད་ཀྱི་ཡོད། ཅེས་གསུངས་སོང་།

ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པེ་ལོ་སི་མཆོག་གིས། དེ་རིང་ཞོགས་པར་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་རྒྱུ་བྱུང་བ་ནི་སྐལ་བ་བཟང་པོ་དང་བྱིན་རླབས་ཅན་ཞིག་ཡིན་པ་རེད། ཁྱེད་ཅག་གིས་ང་ཚོར་ཐུགས་རྗེ་ཆེ་ཞུ་ཡི་ཡོད་ཀྱང་། ང་ཚོས་ཁྱེད་ཅག་ལ་བཀའ་དྲིན་ཆེ་ཞུ་ཡི་ཡོད། རྒྱུ་མཚན་ནི། བདུན་ཕྲག་གཅིག་གི་གོང་དུ་ཁྱེད་ཅག་གིས་ང་ཚོས་ཨ་རིའི་གྲོས་ཚོགས་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ཐད་ལ་གླེང་སློང་གནང་ཡོད་པ་དེ་གོ་ཐོས་བྱུང་། ང་ཚོས་ཁྲིམས་འཆར་དེའི་ཆེད་ཡུན་རིང་པོར་འཐབ་རྩོད་བྱས་པ་ཡིན། ཞེས་དང་། ད་ལྟ་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་གཏན་འབེབས་བྱས་ཡོད་པ་དེས་རྒྱ་ནག་གཞུང་ལ་ཨ་རིར་བོད་མིའི་རང་དབང་གི་གནད་དོན་དང་འབྲེལ་བའི་ཐད་ལ་གོ་རྟོགས་དང་གསལ་ཁ་ཡོད་པའི་བརྡ་ལན་གསལ་པོ་སྤྲད་ཡོད་པ་རེད། ཅེས་གསུངས་སོང་། ཡང་ཁོང་མོས། རྒྱ་ནག་གཞུང་གིས་བོད་ནང་བོད་ཕྲུག་རྣམས་ལ་སྐད་ཡིག་དང་། ཆོས་རིག་སྦྱང་སྤྱོད་བྱེད་པར་དམ་དྲག་དང་རྒྱ་ནག་གི་ཁ་ཕྱོགས་དང་མཐུན་པའི་སློབ་གསོ་ཟེར་བ་ཞིག་སྤྲོད་ཀྱིན་ཡོད་ཅིང་། བོད་ནང་གི་བོད་མི་རྣམས་ཀྱི་འགྲོ་འདུག་སྤྱོད་གསུམ་ལ་དམ་དྲག་ཆེན་པོ་བྱེད་ཀྱི་ཡོད་སྐོར་སོགས་གསུངས་སོང་།

དེ་བཞིན་མཛད་སྒོའི་ཐོག་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་མེག་སི་(Gregory Meeks) མཆོག་དང་། ཇེམ་མེག་གྷོར་ཝན་(Jim McGovern) མཆོག གྲོས་ཚོགས་འཐུས་མི་མི་ལར་མིག་སི་(Mariannette Miller-Meeks) མཆོག་དང་། གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གི་རྒྱ་གར་ཞི་བདེ་རྒྱ་མཚོའི་ཁུལ་གྱི་ལས་དོན་ཚོགས་ཆུང་གི་ཚོགས་གཞོན་ཨེ་མི་བྷི་རཱ་(Ami Bera) མཆོག་སོགས་ཀྱིས་བོད་ནང་རྒྱ་ནག་གཞུང་གིས་སྡུག་སྦྱོང་མནར་གཅོད་གཏོང་བཞིན་ཡོད་ཀྱང་ནམ་ཞིག་ན་རང་དབང་འཐོབ་སྟེ་བཙན་བྱོལ་བོད་མི་རྣམས་ཕ་ཡུལ་བོད་དུ་ལོག་ཐུབ་པ་ཞིག་ཡོང་རྒྱུ་ཡིན་སྐོར་སོགས་གསུངས་སོང་།  མཇུག་ཏུ་སྲིད་སྐྱོང་སྤེན་པ་ཚེ་རིང་མཆོག་གིས་ངས་གོ་སྐབས་འདི་བརྒྱུད་ནས་རྒྱ་གར་གཞུང་དམངས་གཉིས་ཀྱིས་འདས་པའི་མི་ལོ་དྲུག་ཅུ་ལྷག་གི་རིང་ལ་བོད་མི་རྣམས་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་ཡི་ཡོད། རྒྱ་གར་གཞུང་དམངས་གཉིས་ཀྱི་རྒྱབ་སྐྱོར་དེ་མེད་ན་ང་ཚོར་དེ་རིང་འདི་འཆར་མི་སྲིད། ཅེས་གསུངས་སོང་།

གསར་འགོད་པ། བྱམས་པ་ཚེ་རིང་། དཔལ་ལྡན།

རྩོམ་སྒྲིག་པ། པདྨ་མཚོ།