དབུས་འོས་བསྡུ་ལྷན་ཁང་གི་སྤྱི་ཁྱབ་འགན་འཛིན་བགྲེས་ཡོལ་དུ་ཕེབས།

དབུས་འོས་བསྡུ་ལྷན་ཁང་གི་འགན་འཛིན་དང་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་གཅིག་ལྕོགས་དཔེ་ཟུར་དབང་འདུས་ཚེ་རིང་མཆོག་བགྲེས་ཡོལ་དུ་ཕེབས་པར་བཀའ་ཤག་ནས་ཕེབས་སྐྱེལ་གསོལ་སྟོན་འདེགས་འབུལ་ཞུས།

དེ་རིང་འདི་གའི་གསར་འགོད་པས་ལས་བྱེད་འདེམས་བསྐོ་ལྷན་ཁང་གི་འབྲེལ་ཡོད་སྲི་ཞུའི་ལས་བྱེད་པར་བཀའ་འདྲི་ཞུས་ཏེ་ཤེས་རྟོགས་བྱུང་བའི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༡ ཉིན་དབུས་འོས་བསྡུ་ལྷན་ཁང་གི་འགན་འཛིན་དང་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་གཅིག་ལྕོགས་དཔེ་ཟུར་དབང་འདུས་ཚེ་རིང་མཆོག་བགྲེས་ཡོལ་དུ་ཕེབས་ཡོད་པ་དང་། ཁ་སང་ཕྱི་ཚེས་ ༢ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་ཚེ་རིང་མཆོག་དང་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག་བཅས་འཛོམས་ཐོག་བཀའ་ཤག་གིས་དཔེ་ཟུར་དབང་འདུས་ཚེ་རིང་མཆོག་ལ་བགྲེས་ཡོལ་ཕེབས་སྐྱེལ་གྱི་གསོལ་སྟོན་འདེགས་འབུལ་ཞུས་འདུག

འདི་ལོའི་ཕྱི་ཟླ་ ༣ པའི་ནང་གི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་ ༡༡ སྟེ། ཟླ་ ༣ ཚེས་ ༢༩ གྲོས་ཚོགས་ཀྱི་ལས་ཉིན་མཐའ་མར་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམས་ནས་དམ་འབུལ་ཞུ་ཕྱོགས་དང་འབྲེལ་བའི་བཅའ་ཁྲིམས་དོན་ཚན་ ༨ གཏན་འབེབ་གནང་ཡོད་ལ། དེའི་ཁྲོད་བཅའ་ཁྲིམས་དོན་ཚན་གོ་བདུན་པའི་ནང་གསེས་ ༡ པོའི་ཀ་བར། དབུས་འོས་བསྡུ་ལས་ཁང་ལ་སྤྱི་ཁྱབ་འགན་འཛིན་གཅིག་དགོས་པར། གོ་ཡུལ་སྟོང་པ་ནམ་ཐོན་ལ་ཆེས་མཐོའི་ཁྲིམས་ཞིབ་པ་ཆེ་བ་དང་། སྤྱི་འཐུས་ཚོགས་གཙོ་ཚོགས་གཞོན། སྲིད་སྐྱོང་བཅས་ཚང་འཛོམས་བྱུང་ན་སྨོས་མེད་དང་། གལ་ཏེ་ཚང་འཛོམས་མ་ཐུབ་ཚེ་ངོ་ཡོད་ལྷན་ཚོགས་ཀྱིས་སྐབས་དེའི་འོས་མི་འདེམས་སྒྲུག་ཁོ་ནའི་ཆེད་མི་འགྲོ་གསུམ་དམིགས་འཛུགས་བྱས་པའི་ཚོགས་ཆུང་དེས་ཉིས་ལྡབ་ལས་མ་ཉུང་བའི་འོས་འཆར་ཕུལ་བར་སྤྱི་འཐུས་ལྷན་ཚོགས་སུ་འོས་བསྡུ་བྱས་ཏེ་མང་མོས་སུ་ཐོབ་ལ་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དུ་འོས་ཐོན་བྱུང་བར་ངོས་འཛིན་བྱ་རྒྱུ། དེ་མིན་ལས་བྱེད་ཇི་དགོས་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་གྱིས་བཀའ་ཤག་ལ་གོ་བསྡུར་དང་འབྲེལ་བཀའ་ཤག་ནས་སྐབས་སོ་སོར་བསྐོ་གཞག་བཀོད་སྒྲིག་བྱེད་ཆོག་པ་ཡིན་ཞེས་པའི་བཟོ་བཅོས་ཁྲིམས་འཆར་སྤྱི་མོས་ཀྱིས་གཏན་ལ་ཕབ་ཡོད།

ཡང་དོན་ཚན་གོ་བདུན་པའི་ནང་གསེས་ ༡ པོའི་ཁ་བར། གལ་ཏེ་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་གྲོས་ཚོགས་མ་འཚོགས་པའི་སྐབས་འོས་འདེམས་བྱེད་དགོས་བྱུང་ཚེ། གོང་གསལ་འདེམས་སྒྲུག་ཚོགས་ཆུང་གིས་འཆར་འབུལ་ཞུས་པའི་ནང་ནས་སྤྱི་འཐུས་རྒྱུན་ལས་ཀྱི་རྩ་འབོར་གསུམ་ཆ་གཉིས་ཡན་གྱི་མོས་མཐུན་ཐོབ་དགོས་ཞེས་པའི་བསྐྱར་བཅོས་སྤྱི་མོས་ཀྱིས་གཏན་འབེབས་གནང་ཡོད།

ལས་བྱེད་འདེམས་བསྐོ་ལྷན་ཁང་ནས་གསར་འགོད་པའི་ཞུ་སྙན་བཞིན་འབྱོར་བའི་གནས་ཚུལ་ལྟར་ན། དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དང་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་གཅིག་ལྕོགས་སྐབས་གཞི་དཔེ་ཟུར་དབང་འདུས་ཚེ་རིང་མཆོག་ནི།  ཕྱི་ལོ་ ༡༩༨༣   ནས་གནས་དགུ་པ་ཚོད་ལྟའི་ཐོག་དཔལ་འབྱོར་འདུ་འགོད་ཁང་གི་གཞོན་དྲུང་དུ་བསྐོ་གཞག་བསྩལ་བ་དང་། ཕྱི་ལོ་ ༡༩༨༤  ནས་སྦེལ་ཀོབ་ཕྱུགས་བཟོའི་དངུལ་གཉེར།  ཕྱི་ལོ་ ༡༩༨༨   ནས་འབུམ་ལ་བསྟན་སྒང་གི་ལས་དྲུང་། ཕྱི་ལོ་ ༡༩༩༢  ནས་ལས་དོའི་གནས་རིམ་དུ་བསྐོ་གཞག  ཕྱི་ལོ་ ༡༩༩༣  ནས་འབུམ་ལ་བདེ་དོན་དང་བསྟན་སྒང་གཞིས་མགོ་གཅིག་ལྕོགས་སུ་བསྐོ་གཞག ཕྱི་ལོ་ ༡༩༩༣  ནས་སྡེ་འགན་གནས་རིམ་དུ་གནས་སྤར་གྱིས་ལས་འགན་རང་འཇགས།  ཕྱི་ལོ་ ༡༩༩༦   ནས་དྲུང་ལས་གནས་རིམ་དུ་གནས་སྤར་གྱིས་ལས་འགན་རང་འཇགས། ཕྱི་ལོ་ ༡༩༩༧   ནས་སྤོན་ཊ་ཆོལ་གསུམ་བཟོ་གཞིས་མགོ་འཛིན།  ཕྱི་ལོ་ ༡༩༩༨   ནས་མན་སྤར་ས་གནས་མགོ་འཛིན། ཕྱི་ལོ་ ༡༩༩༩  ནས་དྲུང་གཞོན་གནས་རིམ་དུ་གནས་སྤར་དང་འབྲེལ་ལས་འགན་རང་འཇགས། ཕྱི་ལོ་ ༢༠༠༣  ནས་ཀོ་ལི་གྷལ་ས་གནས་མགོ་འཛིན། ཕྱི་ལོ་ ༢༠༠༥   ནས་ཟུང་དྲུང་གནས་རིམ་དུ་གནས་སྤར་གྱིས་ལས་འགན་རང་འཇགས། ཕྱི་ལོ་ ༢༠༠༩   ནས་དཔལ་འབྱོར་ལས་ཁུངས་ཀྱི་ཟུང་དྲུང་། ཕྱི་ལོ་ ༢༠༡༣   ནས་དྲུང་འཕར་གནས་རིམ་དུ་གནས་སྤར་གྱིས་ལས་འགན་རང་འཇགས། ཕྱི་ལོ་ ༢༠༡༤  ནས་བོད་ཀྱི་ཟློས་གར་ཚོགས་པའི་འགན་འཛིན། ཕྱི་ལོ་ ༢༠༡༨  ནས་དྲུང་ཡིག་ཆེན་མོའི་གནས་རིམ་དུ་གནས་སྤར། ཕྱི་ལོ་ ༢༠༡༨   ནས་ནང་སྲིད་ལས་ཁུངས་ཀྱི་དྲུང་ཆེ། ཕྱི་ལོ་ ༢༠༡༩    ནས་ལོ་གཅིག་རིང་བགྲེས་ཡོལ་ཕར་འགྱངས་ཐོག་ལས་འགན་ཞུས། ཕྱི་ལོ་ ༢༠༡༩།༡༠།༠༧ ནས་བགྲེས་ཡོལ་ཕར་འགྱངས་དུས་ཚེས་མ་ཚང་གོང་ལས་དོན་མཚམས་བཞག ཕྱི་ལོ་ ༢༠༡༩།༡༠།༠༧ ནས་ ༢༠༢༤།༠༦།༣༠ བར་དབུས་འོས་བསྡུ་ལས་ཁང་གི་འགན་འཛིན་དང་ལས་བྱེད་འདེམས་ལྷན་གྱི་ཚོགས་གཙོ་གཅིག་ལྕོགས་བཅས་ལ་བསྐོ་གཞག་བྱུང་འདུག

གསར་འགོད་པ། སྐལ་བཟང་སྦྱིན་པ།