དེ་རིང་ཕྱི་ཟླ་ ༠༧ ཚེས་ ༡༣ ཉིན་ཨ་རིའི་སྲིད་འཛིན་རྗོ་བྷའེ་ཌིན་མཆོག་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་མཚན་རྟགས་བསྐྱོན་ཏེ་ཁྲིམས་སུ་ཆགས་པར་བོད་གཞུང་མང་གཉིས་ནས་དགའ་བསུ་ཞུ་བཞིན་འདུག
![](https://tibettimes.net/wp-content/uploads/2024/07/IMG_9251-scaled.jpeg)
སྲིད་འཛིན་བྷའེ་ཌིན་མཆོག་ནས་དེ་འབྲེལ་བསྒྲགས་གཏམ་ནང་དུ། ཁོང་གིས་ཁྲིམས་ཡིག་འདི་ལ་མཚན་རྟགས་བཀོད་ཡོད་ལ། བོད་མིའི་འགྲོ་བ་མིའི་ཐོབ་ཐང་གོང་མཐོར་གཏོང་རྒྱུ་དང་། བོད་མིའི་སྐད་ཡིག་དང་རིག་གཞུང་། ཆོས་ལུགས་བཅས་ཀྱི་ཐུན་མོང་མ་ཡིན་པའི་ཤུལ་བཞག་རྒྱུན་འཛིན་བྱེད་ཐབས་ལ་རྒྱབ་སྐྱོར་བྱེད་པའི་གྲོས་ཚོགས་གོང་འོག་གཉིས་ཀྱི་ལངས་ཕྱོགས་རྒྱབ་སྐྱོར་གནང་གི་ཡོད་ལ། ཁོང་གི་འཛིན་སྐྱོང་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་༧གོང་ས་ཏཱ་ལའི་བླ་མ་དང་ཡང་ན་ཁོང་གི་སྐུ་ཚབ་ཚོའི་དབར་ལ་བསྐྱར་དུ་གྲོས་མོལ་བྱེད་དགོས་པའི་འབོད་སྐུལ་མུ་མཐུད་གནང་རྒྱུ་ཡིན་ལ། དེ་ལྟར་བྱུང་ན་དཀའ་རྙོག་སེལ་བའི་ཐབས་ལམ་ཞིག་རྙེད་དེ་བོད་ཀྱི་སྐོར་ལ་གྲོས་མཐུན་ཞིག་འཇོག་ཐུབ་སྐོར་དང་། ཁྲིམས་ཡིག་འདིས་བོད་རང་སྐྱོང་ལྗོངས་དང་བོད་ཀྱི་ས་ཁུལ་གཞན་རྣམས་རྒྱ་ནག་གི་ཆ་ཤས་སུ་ངོས་འཛིན་བྱེད་པའི་ཨ་རིའི་དུས་ཡུན་རིང་པོའི་ལངས་ཕྱོགས་ལ་འགྱུར་བ་ཕྱིན་མེད་སྐོར་གསུངས་འདུག
ཨ་རིའི་གྲོས་ཚོགས་འོག་མའི་འཐུས་མི་དང་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་མཱ་ཡི་ཀེལ་མེག་ཁོལ་ (Michael McCaul) མཆོག་དང་། གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག གྲོས་ཚོགས་གོང་མའི་འཐུས་མི་སྐུ་ཞབས་ཇེ་ཧྥི་མག་ལེ་ (Jeff Merkley) མཆོག གྲོས་ཚོགས་གོང་མའི་འཐུས་མི་སྐུ་ཞབས་ཊོ་ཌི་ཡང་ (Todd Young) མཆོག་བཅས་ཀྱིས། དེ་རིང་ཨ་རིའི་སྲིད་འཛིན་བྷའེ་ཌིན་མཆོག་གིས་བོད་རྒྱའི་གཀའ་རྙོག་སེལ་ཐབས་ཀྱི་ཁྲིམས་འཆར་ལ་མཚན་རྟགས་དངོས་སུ་བསྐྱོན་ནས་ཁྲིམས་འཆར་དེ་ཨ་རིའི་ཁྲིམས་ཀྱི་ངོ་བོར་གྱུར་བ་ནི་དགའ་འོས་པ་ཞིག་ཡིན་པ་སོགས་ཀྱི་འཚམས་འདྲི་གནང་བ་དང་སྦྲགས། རྒྱ་ནག་གཞུང་གིས་བོད་ཀྱི་ལོ་རྒྱུས་ལ་འཁྱོག་བརྗོད་བྱེད་མཚམས་གཞག་དགོས་པ་མ་ཟད། བོད་ཀྱི་སྐད་ཡིག་དང་རིག་གཞུང་སོགས་རྨེག་མེད་དུ་གཏོང་མཚམས་གཞག་དགོས་སྐོར་དང་། ཨ་རི་གཞུང་གིས་ཆོད་སེམས་བརྟན་པོས་བོད་ཀྱི་གནད་དོན་དང་བོད་མིར་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་སྐོར་སོགས་གསུངས་འདུག
དེ་རིང་ཁྲིམས་དངོས་སུ་གཏན་འབེབ་བྱུང་རྗེས། ལ་དྭགས་བྱང་ཐང་སུམ་མདོ་ནས་སྲིད་སྐྱོང་སྤེན་པ་ཚེ་རིང་མཆོག་གིས། སྲིད་འཛིན་བྷའེ་ཌན་མཆོག་གིས་བོད་དོན་ཁྲིམས་འཆར་ལ་མཚན་རྟགས་བཀོད་ནས། ཁྲིམས་འཆར་དེ་ཁྲིམས་ཀྱི་ངོ་བོར་གྱུར་བ་གོ་ཐོས་བྱུང་བས་དགའ་སྤོབས་ཤིན་ཏུ་ཆེན་པོ་བྱུང་ལ། ངའི་བོད་ཀྱི་མཐའ་འཚམས་ལ་དྭགས་བྱང་ཐང་ཁུལ་གྱི་གཞུང་འབྲེལ་སྐོར་སྐྱོད་ཉིན་མཐའ་མ་དེར། སྔར་མེད་ཀྱི་རེ་བ་གསར་པ་ཞིག་སྦྱིན་བྱུང་། ངས་སྐུ་ཞབས་བྷའེ་ཌན་མཆོག་གིས་ཆེས་གནད་ཆེ་བའི་གོམ་པ་ཞིག་སྤོས་པར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་འདུག
ཨ་རིའི་གྲོས་ཚོགས་གོང་འོག་གཉིས་ནས་ཁྲིམས་འཆར་དེ་གཏན་འབེབ་གནང་རྗེས། ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་མའེ་ཁིལ་མག་ཁོལ་(Michael McCaul) མཆོག་དང་། གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་ནན་སི་པེ་ལོ་སི་མཆོག གྲོས་ཚོགས་འཐུས་མི་རྗེམ་མེག་གྷོ་ཝིན་(Jim McGovern) མཆོག་བཅས་ཀྱི་དབུས་པའི་ཆེས་མཐོའི་སྐུ་ཚབ་ཚོགས་ཆུང་ཞིག་རྒྱ་ནག་གཞུང་གིས་རྒོལ་གཏམ་བསྒྲགས་མིན་ལ་མ་ལྟོས་པར་ཆེད་དུ་བཞུགས་སྒར་དྷ་རམ་ས་ལར་ཕེབས་ཏེ། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཏེ་གྲོས་ཚོགས་གོང་འོག་གཉིས་ནས་གཏན་འབེབ་གནང་བའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་སྤྱན་འབུལ་ཞུས་ཡོད་པ་དང་། ༧གོང་ས་མཆོག་ནས་ཁྲིམས་འཆར་ངོ་བཤུས་ལ་གཟིགས་ནས་ཧ་ཅང་གལ་ཆེན་པོ་རེད། བཀའ་དྲིན་ཆེ་ཞེས་སོགས་གསུངས་ཡོད་པ་རེད།
བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ (The Promoting a Resolution to the Tibet-China Dispute Act)དེ་ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་ (Michael McCaul) མཆོག་དང་། གྲོས་ཚོགས་འཐུས་མི་རྗེམ་མེག་གྷོ་ཝིན་(Jim McGovern) མཆོག གྲོས་ཚོགས་འཐུས་མི་རྗེ་ཧྥུ་མེར་ལི་ (Jeff Merkley) མཆོག གྲོས་ཚོགས་འཐུས་མི་ཊོ་ཌི་ཡོང་(Todd Young) མཆོག་སོགས་ཀྱིས་ཐུགས་འགན་བཞེས་ཏེ། ཐོག་མར་ཕྱི་ལོ་ ༢༠༢༢ ཟླ་ ༧ ཚེས་ ༡༣ ཉིན་གྲོས་ཚོགས་འོག་མའི་ནང་དུ་ཁྲིམས་འཆར་དེ་ངོ་སྤྲོད་གནང་ཡོད་པ་དང་། དེ་ནས་ཕྱི་ལོ་ ༢༠༢༣ ཟླ་ ༡ ཚེས་ ༣༠ ཉིན་གྲོས་ཚོགས་གོང་མའི་ནང་ངོ་སྤྲོད་གནང་། ཕྱི་ལོ་ ༢༠༢༤ ཟླ་བ་ ༢ ཚེས་ ༡༥ ཉིན་ཨ་རིའི་གྲོས་ཚོགས་འོག་མའི་ནང་ཚད་མཐོའི་མང་མོས་རྒྱབ་སྐྱོར་ཐོབ་ཡོད་པ་དང་། ཕྱི་ཟླ་ ༥ པའི་ཚེས་ ༢༣ བོད་ལུགས་ཀྱི་ས་ག་ཟླ་བའི་ཚེས་པ་ ༡༥ ཉིན། ཨ་རིའི་གྲོས་ཚོགས་གོང་མའི་ནང་སྤྱི་མོས་རྒྱབ་སྐྱོར་ཐོབ། ཕྱི་ཟླ་ ༦ ཚེས་ ༡༢ ཉིན་ཨ་རིའི་གྲོས་ཚོགས་འོག་མའི་ནང་ཁྲིམས་འཆར་གྱི་བསྐྱར་བཅོས་ཚིག་བརྗོད་ལ་དམངས་གཙོ་ཚོགས་པ་དང་སྤྱི་མཐུན་ཚོགས་པའི་འཐུས་མི་ ༣༩༡གིས་རྒྱབ་སྐྱོར་གནང་སྟེ་གྲོས་ཚོགས་གོང་འོག་གཉིས་ནས་གཏན་འབེབ་གནང་བ་ལྟར། ཨ་རིའི་སྲིད་འཛིན་གཞོན་པ་ཀ་མ་ལ་ཧེ་རི་སི(Kamala Harris) མཆོག་དང་། གྲོས་ཚོགས་འོག་མའི་ཚོགས་གཙོ་མེག་ཇོན་སོན་ (Mike Johnson) མཆོག་རྣམ་གཉིས་ནས་མཚན་རྟགས་བསྐྱོན་གྲུབ་སྟེ། ཟླ་འདིའི་ཕྱི་ཚེས་ ༡༡ ཉིན་ཨ་རིའི་སྲིད་འཛིན་ཕོ་བྲང་དུ་ཕུལ་བ་ལྟར་དེ་རིང་ཕྱི་ཚེས་ ༡༣ ཉིན་སྲིད་འཛིན་རྗོ་བྷའེ་ཌིན་མཆོག་བས་དངོས་སུ་མཚན་རྟགས་བསྐྱོན་ཡོད་པ་རེད།
འབྲེལ་ཡོད་གནས་ཚུལ།
བོད་རྒྱའི་བཀའ་རྙོག་སེལ་ཐབས་ཀྱི་ཁྲིམས་འཆར་བཏོན་ཡོད་འདུག
བོད་དོན་བསྐྱར་བཅོས་ཁྲིམས་འཆར་གཏན་འབེབས་གནང་བའི་འབོད་སྐུལ་ཞུས།
ཨ་རིའི་གྲོས་ཚོགས་འོག་མའི་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་གཏན་འབེབས་གནང་།
བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་སྤྱི་མོས་རྒྱབ་སྐྱོར་ཐོབ།
གསར་འགོད་པ། དཔལ་ལྡན།
རྩོམ་སྒྲིག་བྱེད་མཁན། པདྨ་མཚོ།
མཛང་བཟང་གཏམ་བཟང་འདི་ལ་ནམ་ཡང་དགའ་བསུ་ཡོད། ཆབ་སྲིད་ཀྱི་ལས་དོན་བསྒྲུབས་ཚད་མཐོན་པོ་འདི་ལྟ་བུ་ཞིག་ལ་སླེབས་ཐུབ་པར་ལས་སླ་པོ་ཁྱོན་ནས་མེད། སྲིད་སྐྱོང་མཆོག་གི་དབུས་པའི་སྣེ་མོ་ལས་བྱེད་ཆེ་ཕྲ་ཆུང་གསུམ་དང་། ཕྱི་ནང་མི་དམངས་ལྷག་བསམ་རྣམ་དག་གིས་རམ་འདེགས་གནང་མཁན་ཡོངས་ལ་སྙིང་ཐག་པ་ནས་ཐུགས་རྗེ་བཀྲིན་བླ་མེད་དུ་ཆེ་ཆེ་ཆེ་ཞེས་ཞུས་ཡག་ཡིན། འདིས་རྐྱེན་པས་ད་ནས་བཟུང་སླར་ཡང་། རྩ་བའི་ཆ་ནས་རྒྱལ་སྤྱིའི་གདེང་ཆའི་སྒང་ལ་བོད་རྒྱའི་དཀའ་རྙོགས་ཀྱི་ལོ་རྒྱུས་ལ་བལྟ་སྟངས་ཁྱད་པར་ཆེན་པོ་བཟོ་ཐུབ་པའི་རེ་བ་ཡོད་པ་དང་། གཏམ་གླེང་གསར་འགྱུར་བགྲོ་གླེང་སོགས་ཀྱང་སྣ་ཚོགས་ཤིག་འབྱུང་སྲིད་པའི་རེ་བ་ཡོད་པ་དང་མཐོང་ཐུབ་རྒྱུ་ཡིན་པ་ནི་སྨོས་མེད་རེད། འོན་ཀྱང་། གཙོ་ཆེ་ཤོས་བོད་པས་དཀའ་རྙོགས་བོད་པ་རང་གིས་དངོས་སུ་ལངས་ཕྱོགས་བརྟན་པོས་སེལ་དགོས་པ་ཞིག་ཡིན་དུས། ད་ཆ་འཕྲལ་དུ་ང་ཚོས་བྱེད་ཐུབ་པ་ཞིག་ནི། གོམས་པ་དང་པོ་སྤོ་འདོད་ན། བོད་མི་ཚོས་རང་གི་ཕ་ཡུལ་བོད་དང་བོད་མིའི་རྒྱལ་རབས་ལོ་རྒྱུས་ལ་ཐོས་བསམ་བགྲོ་གླེང་དང་། དཔྱད་གླེང་གི་ལས་རིམ་ཆེ་ཕྲ་སྣ་ཆོགས་ཤིག་གཞུང་སྒེར་གཉིས་ཀས་ཕྱི་ནང་ས་གནས་ས་ཐོག་བོད་མིའི་འདུས་སྡོད་གང་སར་བོད་རྒྱའི་རྒྱལ་རབས་ལོ་རྒྱུས་ཀྱི་གོ་རྟོགས་འཕེལ་བའི་ལས་རིམ་ཚ་ཚ་འུར་འུར་ངང་སྤེལ་གནང་ཐུབ་ན་འཕྲལ་ཕུགས་གཉིས་ཀར་ཧ་ཅང་དགེ་མཚན་ཆེན་པོ་ཡོད། ད་ཤུགས་རྒྱོབས་དང་། སྒོར་གཞས་ཉུང་ཙམ་བྱས། འདི་ནས་དུས་ཚོད་ཆ་ཤས་ཤིག་ཟུར་འཇོག་བྱས་ན་ལས་རིམ་གསར་པ་འདི་གནང་མི་ཐུབ་པ་མེད། འདིས་གཞོན་སྐྱེས་ཚོའི་སེམས་ཁམས་ནང་། ངོ་མ་བོད་ཞེན་རིགས་ཞེན་རྒྱལ་ཞེན་ཞིག་གི་བག་ཆགས་བསྲ་བརྟན་བཟོ་ཐུབ་པ་ཞིག་ཡོང་རྒྱུ་གདོན་མི་ཟ་བ་རེད། ངས་རྨོངས་འཆར་རྣམ་དག་ཙམ་ཞིག་འབུལ་བ་ཡིན་ལགས།།
མཛང་བཟང་གཏམ་བཟང་འདི་ལ་ནམ་ཡང་དགའ་བསུ་ཡོད། ཆབ་སྲིད་ཀྱི་ལས་དོན་བསྒྲུབས་ཚད་མཐོན་པོ་འདི་ལྟ་བུ་ཞིག་ལ་སླེབས་ཐུབ་པར་ལས་སླ་པོ་ཁྱོན་ནས་མེད། སྲིད་སྐྱོང་མཆོག་གི་དབུས་པའི་སྣེ་མོ་ལས་བྱེད་ཆེ་ཕྲ་ཆུང་གསུམ་དང་། ཕྱི་ནང་མི་དམངས་ལྷག་བསམ་རྣམ་དག་གིས་རམ་འདེགས་གནང་མཁན་ཡོངས་ལ་སྙིང་ཐག་པ་ནས་ཐུགས་རྗེ་བཀྲིན་བླ་མེད་དུ་ཆེ་ཆེ་ཆེ་ཞེས་ཞུས་ཡག་ཡིན། འདིས་རྐྱེན་པས་ད་ནས་བཟུང་སླར་ཡང་། རྩ་བའི་ཆ་ནས་རྒྱལ་སྤྱིའི་གདེང་ཆའི་སྒང་ལ་བོད་རྒྱའི་དཀའ་རྙོགས་ཀྱི་ལོ་རྒྱུས་ལ་བལྟ་སྟངས་ཁྱད་པར་ཆེན་པོ་བཟོ་ཐུབ་པའི་རེ་བ་ཡོད་པ་དང་། གཏམ་གླེང་གསར་འགྱུར་བགྲོ་གླེང་སོགས་ཀྱང་སྣ་ཚོགས་ཤིག་འབྱུང་སྲིད་པའི་རེ་བ་ཡོད་པ་དང་མཐོང་ཐུབ་རྒྱུ་ཡིན་པ་ནི་སྨོས་མེད་རེད། འོན་ཀྱང་། གཙོ་ཆེ་ཤོས་བོད་པས་དཀའ་རྙོགས་བོད་པ་རང་གིས་དངོས་སུ་ལངས་ཕྱོགས་བརྟན་པོས་སེལ་དགོས་པ་ཞིག་ཡིན་དུས། ད་ཆ་འཕྲལ་དུ་ང་ཚོས་བྱེད་ཐུབ་པ་ཞིག་ནི། གོམས་པ་དང་པོ་སྤོ་འདོད་ན། བོད་མི་ཚོས་རང་གི་ཕ་ཡུལ་བོད་དང་བོད་མིའི་རྒྱལ་རབས་ལོ་རྒྱུས་ལ་ཐོས་བསམ་བགྲོ་གླེང་དང་། དཔྱད་གླེང་གི་ལས་རིམ་ཆེ་ཕྲ་སྣ་ཆོགས་ཤིག་གཞུང་སྒེར་གཉིས་ཀས་ཕྱི་ནང་ས་གནས་ས་ཐོག་བོད་མིའི་འདུས་སྡོད་གང་སར་བོད་རྒྱའི་རྒྱལ་རབས་ལོ་རྒྱུས་ཀྱི་གོ་རྟོགས་འཕེལ་བའི་ལས་རིམ་ཚ་ཚ་འུར་འུར་ངང་སྤེལ་གནང་ཐུབ་ན་འཕྲལ་ཕུགས་གཉིས་ཀར་ཧ་ཅང་དགེ་མཚན་ཆེན་པོ་ཡོད། ད་ཤུགས་རྒྱོབས་དང་། སྒོར་གཞས་ཉུང་ཙམ་བྱས། འདི་ནས་དུས་ཚོད་ཆ་ཤས་ཤིག་ཟུར་འཇོག་བྱས་ན་ལས་རིམ་གསར་པ་འདི་གནང་མི་ཐུབ་པ་མེད། འདིས་གཞོ་སྐྱེས་ཚོའི་སེམས་ཁམས་ནང་། ངོ་མ་བོད་ཞེན་རིགས་ཞེན་རྒྱལ་ཞེན་ཞིག་གི་བག་ཆགས་བསྲ་བརྟན་བཟོ་ཐུབ་པ་ཞིག་ཡོང་རྒྱུ་གདོན་མི་ཟ་བ་རེད། ངས་རྨོངས་འཆར་རྣམ་དག་ཙམ་ཞིག་འབུལ་བ་ཡིན་ལགས།།