བོད་ནང་གདུང་སེམས་མཉམ་སྐྱེད་ཞུ་བའི་མར་མེ་ཁྲོམ་སྐོར་གྱི་ལས་འགུལ་ཞིག་སྤེལ།

རྒྱ་ནག་གཞུང་གིས་རྭ་རྒྱ་ཤེས་རིག་ནོར་བུའི་སློབ་གླིང་སྒོ་བརྒྱབ་བཅུག་པ་དང་གྲྭ་ཕྲུག་རྣམས་དགོན་པར་ཞུགས་པར་དམ་དྲག་བྱས་པར་གདུང་སེམས་མཉམ་སྐྱེད་ཞུ་པའི་མར་མེ་ཁྲོམ་སྐོར་གྱི་ངོ་རྒོལ་ལས་འགུལ་ཞིག་སྤེལ་སོང་།

ཉེ་ལམ་རྒྱ་ནག་གཞུང་གིས་ཤེས་རིག་ནོར་བུའི་གླིང་གི་སློབ་མ་ཚོས་བཙུགས་པའི་ཕ་སྐད་གཙང་མའི་ཚོགས་པའི་ལས་རྟགས་ཀྱི་ནོར་བུ་དང་སེངྒེ་ནི་བོད་ཀྱི་རྒྱལ་དར་གྱི་མཚོན་རྟགས་ཤིག་ཡིན་པའི་བསྙོན་འཛུགས་སོགས་བྱས་ཏེ། རྭ་རྒྱ་ཤེས་རིག་ནོར་གླིང་སྒོ་བརྒྱབ་བཅུག་ཡོད་པ་ལྟར། ཁ་སང་ཕྱི་ཚེས་༡༧ ཉིན་གྱི་དགོང་མོར་གཞུང་ཁོངས་མ་ཡིན་པའི་ཚོགས་པ་བརྒྱད་ཀྱི་གོ་སྒྲིག་འོག བཞུགས་སྒར་དྷ་སར་རྒྱ་ནག་གཞུང་གིས་ཐབས་ཇུས་སྣ་མང་གི་ཐོག་ནས། བོད་ནང་གི་སྐད་ཡིག་དང་། རིག་གཞུང་། བོད་མིའི་ཆོས་ལུགས་དད་མོས་རང་དབང་གཙོས། གྲྭ་ཕྲུག་རྣམས་དགོན་པར་ཞུགས་པར་དམ་དྲག་བྱས་པར་གདུང་སེམས་མཉམ་སྐྱེད་ཞུ་བའི་མར་མེ་ཁྲོམ་སྐོར་གྱི་ངོ་རྒོལ་ལས་འགུལ་ཞིག་སྤེལ་ཡོད་ཅིང་། ལས་འགུལ་དེའི་ཁྲོད་དྷ་སའི་ཁུལ་གྱི་སྐྱ་སེར་མང་དག་ཅིག་གིས་མཉམ་ཞུགས་གནང་འདུག

གཞུང་ཁོངས་མ་ཡིན་པའི་ཚོགས་པ་ཁག་བརྒྱད་ཀྱི་མཉམ་འབྲེལ་བསྒྲགས་གཏམ་ཁྲོད། ཕྱི་ལོ་ ༡༩༥༩ ལོ་ནས་རྒྱ་ནག་དམར་གཞུང་གིས་བོད་ས་ཡོངས་རྫོགས་ཧམ་བཟུང་བྱས་པ་ནས་བཟུང་བོད་མི་རིགས་རྩ་མེད་བཟོ་ཆེད་གདན་ས་སེ་འབྲས་དགེ་གསུམ་གཙོས་བོད་ཁུལ་གྱི་དགོན་སྡེ་ཁག་གི་དགེ་བཤེས་མཁན་པོ་དང་། གྲྭ་བཙུན་སློབ་གཉེར་བ། སྤྱི་ཚོགས་ཀྱི་སྣེ་ཁྲིད་བྱེད་མཁན་གྱི་ཤེས་ཡོན་པ། བོད་མི་རིགས་ལ་དུང་ཞེན་ཡོད་པའི་སྐྱ་སེར་ཕོ་མོ་དབྱེར་མེད་ཀྱི་མི་སེར་དཀྱུས་མ་བཅས་ལ་མ་ཉེས་ཁག་གཡོག་ནས་འཛིན་བཟུང་བཙོན་འཇུག་བྱས་ཏེ་དམྱལ་བ་མི་ཡུལ་དུ་འཕོས་པ་ལྟ་བུའི་གསོད་རྡུང་ཚད་ལས་བརྒལ་བ་བཏང་བ་མ་ཟད། བོད་ཀྱི་ཤེས་ཡོན་གྱི་བལྟི་གནས་དགོན་སྡེ་ཁག་དང་། སློབ་གྲྭ་ཁག་སྒོ་བརྒྱབ་པ་སོགས་ཀྱི་ལས་འགུལ་འདྲ་མིན་སྤེལ་ཀྱང་གཞིས་བཞུགས་བོད་མི་རྣམས་ཀྱི་སེམས་ཤུགས་དང་། ལྷག་བསམ། སྙིང་སྟོབས་བཅས་པ་སྔར་ལས་ལྷག་པའི་གསོན་ཤུགས་རྒྱས་ཏེ་བོད་ཁུལ་གང་སར་རྒྱ་ནག་གཞུང་ལ་ངོ་རྒོལ་དང་། རྒྱལ་གཅེས་དཔའ་བོ་དཔའ་མོ་གྲངས་ ༡༥༧ ཙམ་ནས་རྒྱ་གཞུང་གིས་བོད་ས་ཡོངས་རྫོགས་ལ་དྲག་གནོན་དང་། བོད་མི་རིགས་ཀྱི་འགྲོ་བ་མིའི་ཐོབ་ཐང་དང་ཆོས་དད་རང་དབང་། སྨྲ་བརྗོད་རང་དབང་སོགས་མེད་པ་རང་སྲོག་གིས་བདེན་དཔང་བྱས་ཏེ་འཛམ་གླིང་ལ་དངོས་བདེན་ར་སྤྲོད་བྱས་པར་བརྟེན། རྒྱ་ནག་གཞུང་གིས་བོད་ཀྱི་རིག་གཞུང་དང་། བསམ་བློ། འདུ་ཤེས་སོགས་མ་ཉམས་རྒྱུན་ཆགས་སུ་གནས་པ་ནི་དགོན་སྡེ་ཁག་དང་། སྒེར་བཙུགས་སློབ་གྲྭ་སོགས་ཤེས་ཡོན་གྱི་བསྟི་གནས་ཁག་ཡིན་པར་ངོས་འཛིན་གྱིས་ཕྱི་ལོ་ ༢༠༡༨ ལོ་ནས་བཟུང་། བོད་ས་ཡོངས་རྫོགས་ཀྱི་དགོན་སྡེ་ཁག་ཏུ་གྲྭ་བཙུན་གསར་ཞུགས་གཏན་འགོག་བྱས་ཏེ། བོད་ཀྱི་དགོན་སྡེ་ཁག་རྩ་སྟོང་བཟོ་ཐབས་ལ་དམིགས་ཏེ། གདན་ས་ཁག་ཏུ་ལོ་བཅོ་བརྒྱད་མན་གྱི་གྲྭ་བཙུན་རྣམས་འཛུལ་ཞུགས་མི་ཆོག་པའི་སྲིད་བྱུས་བཙན་གྱིས་ལག་བསྟར་བྱས་དང་བྱེད་མུས་ཡིན། ཞེས་གསལ་འདུག

ཡང་བསྒྲགས་གཏམ་ནང་། མདོ་སྨད་རྔ་པ་ཀིརྟིའི་དགོན་དང་། སྟག་ཚང་ལྷ་མོ་ཀིརྟིའི་དགོན། སྒོ་མང་དགོན། རྨ་ཆུ་རྫོང་མཚན་སྒྲོགས་དགོན། བསང་ཆུ་རྫོང་བླ་བྲང་དགོན་སོགས་ལ་དམ་དྲག་ཤུགས་ཆེའི་འོག་གྲྭ་བཙུན་ལོ་གཞོན་རྣམས་ཀྱི་ནང་མི་ལའང་གྲྭ་བཙུན་ཆུང་གྲས་རིགས་དགོན་པར་བཏང་མི་ཆོག་པའི་བཙན་བཀའ་ཕབ་སྟེ་དཀའ་ངལ་མང་པོ་སྤྲད་དང་སྤྲོད་མུས་དང་། གཞན་ཡང་སྒེར་བཙུགས་སློབ་གྲྭ་ཁག་ཀྱང་བཙུགས་མི་ཆོག་པའི་བཙན་བཀའ་བཏང་སྟེ། སློབ་གྲྭ་མང་པོ་སྒོ་བརྒྱབ་ཡོད་པ་མ་ཟད། ལྷག་དོན་བོད་ཀྱི་སློབ་གསོ་བ་ཆེན་མོ་རྭ་རྒྱ་འཇིགས་མེད་རྒྱལ་མཚན་མཆོག་གིས་ཕྱི་ལོ་ ༡༩༩༤ ལོར་ཁུལ་མི་མང་སྲིད་གཞུང་གི་ཆོག་མཆན་འོག་བཙུགས་པའི་རྭ་རྒྱ་ཤེས་རིག་ནོར་བུའི་སློབ་གླིང་ཡང་རྒྱ་ནག་དམར་གཞུང་གི་བཙན་འོག་ཏུ་ཕྱི་ལོ་ ༢༠༢༤ ཟླ་ ༠༧ ཚེས་ ༡༤ ཉིན་སྒོ་རྒྱག་དགོས་བྱུང་བའི་ཡིད་སྐྱོའི་གནས་ཚུལ་བྱུང་བ་སོགས་ནི། བོད་མི་རིགས་ཀྱི་སློབ་གསོ་དང་། རིག་གནས། སེམས་ཁམས། འདུ་ཤེས་སོགས་སྐྱེད་སྲིང་བྱེད་སའི་ཁོར་ཡུག་དང་བཅས་བོད་མི་རིགས་ཀྱི་ངོ་བོ་རྩ་བརླག་གཏོང་བའི་སྲིད་བྱུས་ངན་པ་ཞིག་སྒྲུབ་བཞིན་པར་མཐའ་གཅིག་ཏུ་ངོ་རྒོལ་དང་།  རྒྱལ་སྤྱིའི་དྲང་བདེན་ཉིན་མོར་ (Internationl Justice Day) རྒྱ་ནག་དམར་གཞུང་གིས་ཉེས་མེད་བཙོན་འཇུག་བྱས་པའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་དྲང་བདེན་ལ་རྒྱལ་སྤྱིའི་སྤྱི་ཚོགས་ནས་རྒྱབ་སྐྱོར་དང་། རྒྱ་ནག་དམར་གཞུང་གིས་ཉེས་མེད་འཛིན་བཟུང་བཙོན་འཇུག་བྱས་པ་རྣམས་འཕྲལ་དུ་ཀློད་གྲོལ་དང་། བོད་ནང་ལག་བསྟར་བྱེད་མུས་ཀྱི་བྱ་ངན་དེ་རིགས་མྱུར་དུ་མཚམས་འཇོག་དགོས་པའི་ནན་སྐུལ་བྱ་རྒྱུ་ཡིན། ཞེས་གསལ་འདུག

མི་མང་རང་བཞིན་གྱི་ལས་འགུལ་དེ་གོ་སྒྲིག་ཞུ་མཁན་གྱི་ཚོགས་པ་བརྒྱད་ནི། བོད་ཀྱི་གཞོན་ནུ་ལྷན་ཚོགས་དང་། བོད་ཀྱི་བུད་མེད་ལྷན་ཚོགས། བོད་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ།   རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་། དབུས་གཙང་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་།   མདོ་སྨད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་། མདོ་སྟོད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་བཅས་ཡིན་འདུག

གསར་འགོད་པ། དཔལ་ལྡན།