སྲིད་སྐྱོང་མཆོག་ནས་བོད་ཀྱི་བུད་མེད་ལྷན་ཚོགས་ཀྱིས་སྒྲིག་འཛུགས་བཙུགས་ཏེ་ཆབ་སྲིད་ཀྱི་ལས་འགན་མང་པོ་འཁུར་ཡོད་པ་མ་ཟད། མ་འོངས་པར་ཐབས་ཇུས་དང་ལྡན་པའི་ཐོག་ནས་ལས་ཀ་བྱ་རྒྱུ་གལ་ཆེན་པོ་རེད་ཅེས་གསུངས་སོང་།
ཁ་སང་ཕྱི་ཚེས་ ༡༠ ཉིན་དགོང་མོ་དྷ་ས་བོད་ཀྱི་ཟློས་གར་ཚོགས་ཁང་དུ། བོད་ཀྱི་བུད་མེད་ལྷན་ཚོགས་བཙན་བྱོལ་དུ་སླར་གསོ་ཞུས་ཏེ་ལོ་ངོ་ ༤༠ འཁོར་བའི་དུས་ཆེན་སྲུང་གཙི་གནང་ཡོད་ཅིང་། མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་བཀའ་ཟུར་རིན་ཆེན་མཁའ་འགྲོ་མཆོག བོད་མི་མང་སྤྱི་འཐུས་ཁག་ཅིག གཞུང་ཁོངས་དང་གཞུང་ཁོངས་མིན་པའི་ཚོགས་སྡེ་ཁག་གི་མི་སྣ་དང་སེར་སྐྱ་མི་མང་བཅས་མཉམ་ཞུགས་གནང་འདུག
སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས། སྒྲིག་འཛུགས་གང་འདྲ་ཞིག་ཡིན་ཡང་ཐོག་མར་མགོ་འཛུགས་དུས་དཀའ་ངལ་ཆེ་ཤོས་རེད། ཐོག་མར་མགོ་འཛུགས་མཁན་གྱི་རྒན་རབས་པ་དང་། བར་དུ་མཇུག་སྐྱོང་ལས་ཀ་བྱེད་མཁན། མ་འོངས་པའང་བུད་མེད་ཀྱི་མགོ་ཁྲིད་གསོ་སྐྱོང་བྱེད་པར་བུད་མེད་ལྷན་ཚོགས་ལ་འགན་ཡོད། བོད་མིའི་སྒྲིག་འཛུགས་ཀྱིས་ལས་དོན་གང་བྱས་ཀྱང་བུ་དང་བུ་མོ་ཁྱད་མེད་ཐོག་འགྲོ་དགོས་པ་རེད། མ་འོངས་པར་བུད་མེད་ཀྱི་མགོ་ཁྲིད་མང་ཙམ་དགོས་ཚེ། བོད་ཀྱི་བུད་མེད་ལྷན་ཚོགས་ཀྱིས་སྣེ་ཁྲིད་དགོས། ངས་ཀྱང་གཞིས་ཆགས་ཚང་མར་བསྐོར་བ་རྒྱག་སྐབས། གྲོང་སྡེ་སོ་སོར་བཅར་ཏེ་ཆེད་དུ་རྒན་རབས་པ་རྣམས་མཇལ་ནས་ཐུགས་རྗེ་ཆེ་ཞུ་བཞིན་ཡོད། ཅེས་གསུངས་སོང་།
སྲིད་སྐྱོང་མཆོག་གིས། བོད་བཙན་པོའི་རྒྱལ་རབས་སྐབས་ཀྱི་མངའ་དབང་དང་། དེ་ནས་༧དཔལ་ས་སྐྱ་བའི་སྲིད་དབང་། ༧རྒྱལ་དབང་སྐུ་ཕྲེང་ལྔ་བའི་རྗེས་སུ་བོད་ཆོལ་ཁ་གསུམ་གཅིག་ཏུ་སྒྲིལ་བའི་བོད་མི་རིགས་ཀྱི་ངོ་བོ་སྐྲུན་མཁན་༧རྒྱལ་དབང་སྐུ་ཕྲེང་བཅུ་བཞི་བ་མཆོག་རེད། ང་ཚོས་ངེས་པར་དུ་ལོ་རྒྱུས་ཀྱི་རྒྱབ་ལྗོངས་ལ་སྦྱོང་དགོས། ང་ཚོའི་སྤྱི་ཚོགས་ནང་མཐུན་མ་མཐུན་གྱི་གནས་ཚུལ་མང་པོ་ཞིག་ལོ་རྒྱུས་གནས་བབ་མ་ཤེས་པའི་རྐྱེན་གྱིས་ཡོང་བཞིན་འདུག ཁམས་དང་ཨ་མདོའི་གནས་སྟངས་གང་འདྲ་ཆགས་ཡོད་པ་དང་། དགའ་ལྡན་ཕོ་བྲང་གཞུང་གི་འོག་ག་འདྲ་ཡོད་མིན་སོགས་ཤེས་དགོས་པ་རེད། བོད་ཀྱི་ལོ་རྒྱུས་ནང་ཅུང་ཙམ་མ་འགྲིག་པ་བྱུང་ཚེ་སྦས་གསང་བྱས་ཏེ། ཕྱིའི་འཛམ་གླིང་གིས་ཤེས་ཀྱི་མ་རེད་བསམས་ན་ང་ཚོ་གླེན་པ་རེད། མི་ཚང་མས་ཞིབ་འཇུག་བྱེད་བཞིན་ཡོད། ང་ཚོས་ཀྱང་དངོས་ཡོད་གནས་ཚུལ་ཁས་བླངས་ཏེ་བཟང་ཕྱོགས་ཀྱི་རྣམ་པ་ཤུགས་ཆེ་རུ་གཏོང་རྒྱུ་གལ་ཆེན་པོ་རེད། བོད་པ་བཙན་བྱོལ་དུ་འབྱོར་རྗེས་ཆོས་དང་། རིག་གཞུང་། སྐད་ཡིག་སོགས་ཀྱི་སྒྲིག་འཛུགས་གང་འདྲ་ཞིག་ཡོད་ཀྱང་། ༧རྒྱལ་དབང་སྐུ་ཕྲེང་བཅུ་བཞི་བ་མཆོག་གི་ཐུགས་རྗེ་བཀའ་དྲིན་མེད་ཐབས་མེད་པ་ཞིག་རེད། ད་ལྟའི་སྤྱི་ཚོགས་ནང་དུ་༧གོང་ས་རྒྱལ་བ་རིན་པོ་མཆོག་ལས་ལྷག་པའི་ཆབ་སྲིད་ཤེས་མདོག་བསམ་གྱི་ཡོད་ཚེ། སྐུ་མཁྱེན་དགོངས་དག་ཞུ་རྒྱུ་ཡིན། ༧གོང་ས་མཆོག་ནས་འཛམ་གླིང་གི་བྱུང་རབས་ལ་དགུང་ལོ་ ༩༠ རིང་གཟིགས་ཏེ་དངོས་སུ་མཉམ་ཞུགས་གནང་ཡོད། བོད་ནང་གི་གནས་ཚུལ་སྙན་སེང་ཞུ་དགོས་པ་ཚང་མ་༧གོང་ས་མཆོག་ལ་ཞུས་ཡོད། རྒྱལ་ཁབ་སོ་སོའི་སྲིད་ཇུས་འཛིན་ཕྱོགས་ཐད་ཆེས་མཐོ་མི་སྣར་སྙན་སེང་ཞུ་བཞིན་ཡོད། དེ་ཚོ་ཚང་མ་གཞི་བཅོལ་བའི་ཐོག་ནས་དབུ་མའི་ལམ་གྱི་སྲིད་ཇུས་འགྲོ་དགོས་པ་རྒྱ་ཆེ་བའི་དགོངས་པ་ཞིག་རེད། ཅེས་གསུངས་སོང་།
ཡང་སྲིད་སྐྱོང་མཆོག་ནས། ཉེ་ལམ་ཧྥ་རན་སིའི་འགྲེམས་སྟོན་ཁང་གཉིས་ནང་གནས་ཚུལ་ཞིག་བྱུང་བ་རེད། ཧྥ་རན་སི་དང་རྒྱ་ནག་གཉིས་བར་གཞུང་འབྲེལ་གྱི་འབྲེལ་ལམ་བཙུགས་ཏེ་ལོ་ངོ་ ༦༠ འཁོར་བའི་དུས་དྲན་སྲུང་གཙི་བྱས་ཡོད། ཕན་ཚུན་འབྲེལ་བ་བྱེད་བཞིན་པའི་སྐབས་སུ་བོད་ཀྱི་མིང་ཞིས་ཙང་ལ་བསྒྱུར་བ་རེད། ཧྥ་རན་སི་ལྟ་བུའི་རྒྱལ་ཁབ་སྟོབས་ཆེན་ལའང་རྒྱ་གཞུང་གིས་ཤུགས་རྐྱེན་སྤྲད་དེ་བོད་ཀྱི་མིང་འགྱུར་བ་བཏང་ཡོད། དེ་ནི་མིང་གི་འགྱུར་བ་ཙམ་བཏང་བ་མིན་པར་རྒྱ་གཞུང་གིས་འགྲེལ་བཤད་གང་འདྲ་རྒྱག་བཞིན་པ་ཤེས་དགོས། ཞིས་ཙང་ཟེར་དུས་རང་སྐྱོང་ལྗོངས་ཀྱི་ས་ཁུལ་གཅིག་པོར་གོ་ཡི་ཡོད། ༧གོང་ས་མཆོག་གིས་བོད་ཅེས་པ་ཆོལ་ཁ་གསུམ་ལ་གོ་ཡི་ཡོད་ལ། རྒྱ་ནག་འཐབ་ཕྱོགས་གཅིག་ཁང་གིས་ཀྱང་དེ་ལྟར་འགྲེལ་བཤད་བརྒྱབ་ཡོད། བོད་ཀྱི་བུད་མེད་ལྷན་ཚོགས་ཀྱིས་སྒྲིག་འཛུགས་ཤིག་བཙུགས་ཏེ་ཆབ་སྲིད་ལས་འགན་མང་པོ་འཁུར་ཡོད་པ་མ་ཟད། གཞིས་ཆགས་དང་སྤྱི་ཚོགས་ཀྱི་བདེ་སྡུག་ལ་བལྟས་ཡོད། བོད་ཀྱི་ཆབ་སྲིད་ཀྱི་ལས་དོན་བྱེད་པའི་སྐབས་ཐབས་ཇུས་དང་ལྡན་པའི་ཐོག་ནས་ལས་ཀ་བྱ་རྒྱུ་གལ་ཆེན་པོ་རེད། ཅེས་གསུངས་སོང་།
དམིགས་བསལ་སྐུ་མགྲོན་བཀའ་ཟུར་རིན་ཆེན་མཁའ་འགྲོ་ལགས་ཀྱིས། བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་ཀྱི་བྱུང་རབས་དང་། བོད་ཀྱི་ཆབ་སྲིད་དང་སྤྱི་ཚོགས་ཀྱི་བདེ་སྡུག་སླད་འབད་བརྩོན་བྱས་པའི་བརྒྱུད་རིམ། མ་འོངས་བའི་ལས་དོན་བྱེད་ཕྱོགས་སོགས་ཀྱི་གལ་གནད་སྐོར་ལ་གསུང་བཤད་གནང་སོང་། དེ་བཞིན་བཀའ་ཟུར་རིན་ཆེན་མཁའ་འགྲོ་མཆོག་ལ་བོད་ཀྱི་བུད་མེད་ལྷན་ཚོགས་དབུ་བརྙེས་ནས་ལོ་ངོ་ ༤༠ འཁོར་བའི་བཀའ་དྲིན་རྗེས་དྲན་གྱི་ཕྱག་རྟགས་དང་། སྒྲིག་འཛུགས་འདིའི་ནང་དུ་ཕྱག་ལས་གནང་མྱོང་བའི་དབུས་རྒྱུན་ཟུར་བ་རྣམས་ལ་དྲན་རྟེན་གྱི་ཕྱག་རྟགས་རེ་ཕུལ་སོང་།
བོད་ཀྱི་བུད་མེད་ལྷན་ཚོགས་བཙན་བྱོལ་དུ་སླར་གསོ་ཞུས་ཏེ་ལོ་ངོ་ ༤༠ འཁོར་བའི་བསྒྲགས་གཏམ་ནང་། བོད་ཀྱི་བུད་མེད་ལྷན་ཚོགས་ཀྱི་འདས་པའི་ལོ་ངོ་ ༤༠ རིང་ལ་གཙོ་བོ་མགོན་པོ་གང་ཉིད་མཆོག་གི་དབུས་བཙན་བྱོལ་སྒྲིག་འཛུགས་གོང་བཀུར་ཐོག་བོད་ཀྱི་བུད་མེད་ལྷན་ཚོགས་ཀྱི་སྒྲིག་གཞི་རྩ་འཛིན་འོག་འཛམ་གླིང་འཕོ་འགྱུར་དང་བསྟུན། ཆབ་སྲིད་དང་ཤེས་ཡོན། སྤྱི་ཚོགས་ཀྱི་ཕན་བདེ་སྐྲུན་པ་ལ་སོགས་ཀྱིས་བོད་མིའི་སྣེ་ཁྲིད་པ་དང་། ཡར་ཐོན་ཅན་གྱི་བུད་མེད་གཞན་དང་མཚུངས་པར་མུ་མཐུད་མདུན་བསྐྱོད་ཀྱི་ལམ་དུ་འབད་བརྩོན་ཞུ་མུས་ཡིན། བོད་ཀྱི་རྩ་དོན་ཆེད་ཆབ་སྲིད་ཐོག་གཞིས་བཞུགས་སྤུན་ཟླ་རྣམས་ཀྱི་མགྲིན་ཚབ་མཚོན་ཆེད་ལས་འགུལ་ཆེ་ཕྲ་ཆུང་གསུམ་སྣ་མང་ཞིག་སྤེལ་དང་སྤེལ་མུས་ཡིན། ལྷག་པར་དུ་བཙན་བྱོལ་དུ་སྤྱི་ཚོགས་ཁྲོད་ཞབས་ཞུ་ཐད་རྒྱ་ཆེ་ཤོས་འགྲུབ་མཁན་གྱི་ལྷན་ཚོགས་ཤིག་ཡིན། བོད་ཀྱི་བུད་མེད་ལྷན་ཚོགས་ནི་གཞུང་ཁོངས་མ་ཡིན་པའི་ཚོགས་པ་ཆེ་ཤོས་དང་རྙིང་ཤོས་ཤིག་དང་གླིང་ཕྲན་བཞིའི་ནང་ཁྱོན་སྡོམ་ཡན་ལག་ལྔ་བཅུ་ང་བརྒྱད་དང་ཚོགས་མི་གྲངས་ཉིས་ཁྲི་བརྒལ་བ་ཡོད། བོད་ཀྱི་བུད་མེད་ལྷན་ཚོགས་ཀྱི་ལངས་ཕྱོགས་ནི་དབུ་མའི་ལམ་ལ་ཤར་བསྐྱོད་ཞུ་མཁན་ཞིག་ཡིན་པ་དང་། བོད་ཀྱི་བུད་མེད་ཀྱི་ཚོགས་པ་གཅིག་པུ་དེ་ཆགས་ཀྱི་ཡོད་ལ་ཆོལ་ཁ་ཆོས་ལུགས་རིམ་མེད་ཀྱི་བུད་མེད་སྒྲིག་འཛུགས་ཞིག་ཡིན། དོལ་རྒྱལ་བརྟེན་སྲོལ་བྱེད་མཁན་དང་སྤྱིར་༸གོང་ས་མཆོག་ལ་གཞི་མེད་སྐྱོན་བརྗོད་བྱེད་མཁན་རིགས་ལ་མཐའ་གཅིག་ཏུ་འགག་པ་ཡོད། ཅེས་གསལ་འདུག
ཡང་བསྒྲགས་གཏམ་ནང་། དམིགས་བསལ་གྱི་བོད་མིའི་ལྟ་བའི་མིག་དང་ཁོག་པའི་སྙིང་ལྟ་བུ་ྋགོང་ས་མཆོག་གི་སྐུ་ཕྱྭ་དང་ཡང་སྒོས་བོད་བསྟན་སྲིད་མི་རིགས་ཀྱི་ཆེད་དུ་ལོ་ལྟར་དགྲ་ལྷའི་གཙོ་བོར་གནས་ཆུང་ཆོས་རྒྱལ་ཆེན་པོར་སྐུ་གསོལ་ཞུས་ནས་དབུས་དང་ས་གནས་ཡན་ལག་ཡོངས་ནས་ཞབས་རིམས་འབད་སྒྲུབ་ཞུ་མུས་ཡིན། མ་འོངས་པའང་སྤྱི་ནོར་ྋགོང་ས་ཆེན་པོ་མཆོག་གི་སྙུང་གཞི་སྙིང་བཅང་དང་བོད་མིའི་སྒྲིག་འཛུགས་གོང་བཀུར་ཐོག་རྒྱལ་སྤྱིའི་བུད་མེད་རྣམས་དང་དཔུང་པ་འདྲ་མཉམ་འགྲོ་ཐུབ་པ་དང་། བོད་ཀྱི་བདེན་མཐའ་མ་གསལ་བར་བོད་དང་བོད་མིའི་བདེན་དོན་འཐབ་རྩོད་ཀྱི་ལས་འགུལ་མུ་མཐུད་སྤེལ་རྒྱུ་མ་ཟད། བཙན་བྱོལ་ནང་གི་སྤྱི་ཚོགས་ལ་སྨིན་པའི་ཞབས་ཞུ་གང་ཐུབ་འགྲུབ་རྒྱུའི་དབུས་ས་གཉིས་ཀྱི་ཆོད་སེམས་བརྟན་པོ་ཡིན། ཞེས་གསལ་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
