གཞི་རིམ་མི་མང་རེ་འབོད་ཚོགས་པས་གྲོས་ཚོགས་ཚོགས་དུས་བརྒྱད་པའི་སྟེང་བཅའ་ཁྲིམས་བསྐྱར་བཅོས་དགོས་པ་དང་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱིས་དཔལ་རྒྱལ་བ་ཇོ་ནང་པའི་ཆོས་བརྒྱུད་ལ་འདྲ་མཉམ་གྱི་ཐོབ་ཐང་དགོས་པའི་རེ་སྐུལ་སྙན་ཞུ་ཕུལ་སོང་།
དེ་རིང་ཕྱི་ཚེས་ ༡༡ ནས་ ༡༩ བར་ཉིན་གྲངས་བརྒྱད་རིང་དབུས་བོད་མིའི་སྒྲིག་འཛུགས་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༣ དང་ ༢༠༢༤ ཡི་ལས་བསྡོམས་སྙན་སྒྲོན་གྱི་གྲོས་ཚོགས་ཚོགས་དུས་བརྒྱད་པ་དེ་དངོས་སུ་འཚོགས་མགོ་བཙུགས་ཡོད་པ་མ་ཟད། གཞི་རིམ་མི་མང་རེ་འབོད་ཚོགས་པས་བཅའ་ཁྲིམས་བསྐྱར་བཅོས་བྱ་དགོས་པའི་ཞུ་འབོད་ཀྱི་ལས་འགུལ་སྤེལ་མགོ་བཙུགས་ཡོད་པའི་ཁར། རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱིས་བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་བཞིན། དཔལ་རྒྱལ་བ་ཇོ་ནང་པའི་ཆོས་བརྒྱུད་ལ་ཐོབ་ཐང་འདྲ་མཉམ་དགོས་པའི་རེ་སྐུལ་སྙན་ཞུ་ཞིག་ཀྱང་ཕུལ་སོང་། དེ་རིང་ལས་ཉིན་དང་པོའི་ཉིན་སྤྱི་འཐུས་བརྒྱད་ཀྱིས་དགོངས་པ་ཞུས་ཡོད་པའི་ཁྲོད། སྤྱི་འཐུས་གཅིག་གིས་ཚོགས་དུས་བརྒྱད་པ་ཆ་ཚང་ལ་དགོངས་པ་ཞུས་འདུག
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གྲོས་ཚོགས་དབུ་འབྱེད་ཀྱི་གསུང་བཤད་གནང་སྐབས། དེ་རིང་ང་ཚོའི་གྲོས་ཚོགས་དེ་ཕྱི་ཟླ་ ༩ པའི་གྲོས་ཚོགས་ཆགས་ཀྱི་ཡོད། ང་ཚོ་ལོ་གཅིག་ལ་གྲོས་ཚོགས་ཐེངས་གཉིས་འཚོག་གི་ཡོད་པ་དང་། ཕྱི་ཟླ་ ༣ པའི་གྲོས་ཚོགས་དེ་དངུལ་རྩིས་དང་། ཕྱི་ཟླ་ ༩ པ་དེ་ལས་སྡོམ་གྱི་གྲོས་ཚོགས་ཆགས་ཡོད། འཛིན་སྐྱོང་གིས་ཕྱི་ལོ་ ༢༠༢༣་་༢༤ ཡི་མཇུག་སྡོམ་ཐོག་ལ་ལས་ཉིན་མང་བ་གཏོང་དགོས་པས། ལས་རིམ་གྱི་སྐོར་དེ་འོག་ལ་ཞིབ་ཕྲ་ཞུ་རྒྱུ་ཡིན། ཞེས་དང་། བར་སྐབས་༧གོང་ས་རྒྱལ་བ་རིན་པོ་ཆེ་མཆོག་ཞབས་པུས་སྨན་བཅོས་ཆེད་དུ་ཨ་རིར་ཆིབས་བསྒྱུར་གནང་ནས་ཞབས་པུས་སྨན་བཅོས་ལེགས་གྲུབ་བྱུང་སྟེ། ཨ་རིར་ཟླ་བ་ ༢ ཙམ་རིང་སྐུ་ངལ་གསོས་པ་དང་། ལུས་རྩལ་གནང་ནས་ཨ་རི་ནས་སུད་སི་བརྒྱུད་བཞུགས་སྒར་དྷ་རམ་ས་ལར་བདེ་བླག་གི་ཐོག་ནས་ཆིབས་བསྒྱུར་གནང་ཐུབ་ཡོད། ཅེས་དང་། ང་ཚོས་མུ་མཐུད་ནས་ཁོང་ཉིད་དགུང་ལོ་བརྒྱ་དང་བཅུ་གྲངས་ལྷག་བཞུགས་ཐུབ་རྒྱུའི་གསོལ་འདེབས་ཞུ་རྒྱུ་དང་། དེ་བཞིན་བོད་མི་སྤྱི་དོན་གྱི་བསོད་ནམས་གོང་མཐོར་གཏོང་ཐུབ་དགོས་རྒྱུ་ནི་གལ་ཆེན་རེད་འདུག དེ་བས་ཀྱང་༧གོང་ས་མཆོག་གི་ཐུགས་བསྐྱེད་དམ་བཅའ་བཞིའི་མཚོན་པའི་མགོན་པོ་གང་ཉིད་ཀྱི་མཛད་འཕྲིན་ཁག་བོད་མི་རིགས་དང་འཛམ་གླིང་སྤྱི་ཡོངས་ལ་འབྲེལ་བ་ཆགས་ཡོད་དུས། ང་ཚོས་དུས་དང་རྣམ་པ་ཀུན་ཏུ་ཁོང་ཉིད་ཀྱི་དགོངས་གཞི་འགྲུབ་རྒྱུར་འབད་བརྩོན་དང་ཐབས་ལམ་གང་ཡོད་པ་རྣམས་ལ་ཞུམ་པ་མེད་པའི་ཐོག་ནས་འགན་ཁུར་དགོས་པ་ནི་གལ་ཆེན་པོ་རེད། དེ་རིང་སྐལ་བ་བཟང་པོ་ཞེ་དྲགས་རེད། ཅེས་གསུངས་སོང་།
ཡང་སྤྱི་འཐུས་ཚོགས་གཙོ་མཆོག་གིས། བཙན་བྱོལ་གྱི་གནས་བབ་ཐོག་ནས་ལོ་ ༦༥ ཙམ་འགྲོ་ཡི་ཡོད་ཅིང་། སྤྱི་ཡོངས་ཀྱི་རྒྱལ་སྤྱིའི་གཞུང་ཁག་དང་། ལྷག་པར་དུ་རྒྱ་གར་གཞུང་གི་མཐུན་འགྱུར། དེ་བཞིན་མི་མང་གི་རྒྱབ་སྐྱོར་ལ་བརྟེན་ནས་ང་ཚོའི་སྒྲིག་འཛུགས་འདི་ཡུན་གནས་ཐུབ་ཡོད། བར་སྐབས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་སར་ཕེབས་པ་དང་། ཨ་རིའི་གྲོས་ཚོགས་ཀྱི་ཚད་མཐོའི་མང་མོས་ཀྱི་ཐོག་ནས་བོད་དོན་དཀའ་རྙོག་གསལ་རྒྱུའི་ཁྲིམས་ཡིག་གཏན་འབེབས་གནང་བ། དེ་བཞིན་ཁེ་ན་ཌའི་གྲོས་ཚོགས་ནས་གྲོས་ཆོད་བཞག་པ། ཉེ་ཆར་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པ་དེ་བདེ་བླག་ངང་སླར་གསོ་ཐུབ་པ། ཉིན་ཤས་གོང་ཨོ་གླིང་གི་གྲོས་ཚོགས་ནང་བོད་དོན་ཐོག་ལ་བགྲོ་གླེང་ཤུགས་ཆེན་གནང་ཡོད། ཅེས་དང་། ད་ལན་ཁྲིམས་འཛིན་ལས་དོན་དང་འབྲེལ་ནས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་འཕོ་འགྱུར་དང་འབྲེལ་བའི་སྒྲིག་གཞི་བསྐྱར་བཅོས་ཁྲིམས་འཆར་ཐོག་ལ་གྲོས་ཚོགས་ཀྱི་ཆེས་མཐོའི་ཚོགས་ཆུང་གི་སྙན་ཐོ་དང་། སྒྲིག་གཞི་བསྐྱར་བཅོས་འཆར་ཟིན་ཡོང་རྒྱུ་དང་། སྤྱི་འཐུས་རྒྱུན་ལས་ཀྱིས་ཆེད་འཛུགས་གནང་བའི་བོད་ཀྱི་གསོ་བ་རིག་པའི་གནས་བབ་དང་འབྲེལ་བའི་གསོ་རིག་གི་ཁྲིམས་ཡིག་ཤར་སྐྱོད་དང་འབྲེལ་བའི་ཁྲིམས་འཆར་དང་སྙན་ཐོ་ཡོང་རྒྱུ། ཁྲིམས་སྒྲིག་བསྐྱར་བཅོས་ཁག་ཅིག་ཐད་ལ་གླེང་སློང་གནང་རྒྱུ་ཡིན་སྐོར་སོགས་གསུངས་སོང་།
དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་ལས་ཉིན་དང་པོའི་ཉིན། དབུས་བོད་མིའི་སྒྲིག་འཛུགས་ཆོས་རིག་ལས་ཁུངས་མ་ལག་དང་བཅས་པའི་རྩིས་ལོའི་ལས་བསྡོམས་སྙན་སྒྲོན་དང་། བོད་མི་མང་སྤྱི་འཐུས་རྒྱུན་ལས་ཀྱིས་ཆོས་རིག་ལས་ཁུངས་ཀྱི་ལས་སྡོམ་དང་འབྲེལ་ནས་གཟིགས་ཞིབ་བྱས་པའི་དྲི་བ་དག་ལ་ལན་འདེབས་གསལ་བཤད་གནང་སོང་། དེ་བཞིན་ཆོས་རིག་ལས་ཁུངས་ཀྱི་ལས་སྡོམ་ཐོག་སྤྱི་འཐུས་ཉི་ཤུ་ལྷག་གིས་ཆ་ཤས་བླངས་ནས་བགྲོ་གླེང་ལྷུག་པོ་གནང་བའི་ཁྲོད། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཕྲོད་སྦྱོར་གྱི་གནད་དོན་དང་། སླད་མར་མཛད་འཆར་རིགས་ཉུང་དུ་བཏང་ནས་སྐུ་ངལ་གསོ་བཅུག་དགོས་པའི་སྐོར། སྐུའི་ཡང་སྲིད་ཀྱི་གནད་དོན་དེ་ནི་༧མགོན་པོ་གང་ཉིད་གཅིག་པུའི་བདག་དབང་ཡིན་པའི་སྐོར། དེ་བཞིན་ཉེ་ལམ་༧གོང་ས་རྒྱལ་བ་རིན་པོ་ཆེ་མཆོག་དང་༧རྒྱལ་དབང་ཀརྨ་པ་མཆོག་རྣམ་གཉིས་མཇལ་འཕྲད་སྐབས། ༧རྒྱལ་དབང་ཀརྨ་པ་མཆོག་གིས་བོད་མི་རྣམས་མཐུན་སྒྲིལ་བྱ་དགོས་པའི་ཐད་ལ་གསུང་འཕྲིན་སྩལ་བ་བཞིན་ལག་བསྟར་བྱ་དགོས་པའི་སྐོར་ལ་གླེང་སློང་བྱས་སོང་། དེ་བཞིན་༧རྒྱལ་དབང་ཀརྨ་པ་མཆོག་རྒྱ་གར་དུ་ཕེབས་རྒྱུའི་ཐད་ཆོས་རིག་ལས་ཁུངས་ཀྱིས་འགན་དབང་བཞེས་དགོས་པའི་ཐོག་གླེང་སློང་ཤུགས་ཆེན་གནང་བ་དང་འབྲེལ། ཆོས་རིག་བཀའ་བློན་དང་སྲིད་སྐྱོང་གཅིག་ལྕོགས་སྤེན་པ་ཚེ་རིང་མཆོག་གིས། ༧རྒྱལ་དབང་ཀརྨ་པ་མཆོག་གི་སྐོར་དང་འབྲེལ་ནས་རྒྱ་གར་གཞུང་དང་དཀའ་ངལ་འཕྲད་ཀྱི་ཡོད་པར་བརྟེན། རྒྱ་གར་གཞུང་དང་༧ཀརྨ་པ་མཆོག་གཉིས་ཀྱི་དབར་ལ་དཔང་པོའི་ཚུལ་དུ་བསྡད་དེ་ཕན་ཚུན་གླེང་སློང་གང་བྱུང་བ་རྣམས་རྒྱུས་ལོན་བྱས་ན། མ་འོངས་པར་ཕུགས་བརྟན་པོ་ཡོང་གི་རེད་བསམ་པའི་བསམ་ཚུལ་བཏོན་པ་རེད། ད་ལྟ་ང་ཚོ་ལ་འགྲིག་གི་འདུག་ཟེར་བའི་ལན་གཅིག་ཕྱོགས་གཉིས་ཀ་ནས་བྱུང་མ་སོང་། གནད་དོན་དེའི་ཐད་རྩོད་གླེང་མང་པོ་ཞིག་འདུག འོན་ཀྱང་གྲོས་ཚོགས་སུ་ཞུ་སྟབས་བདེ་པོ་མི་འདུག ཅེས་གསུངས་སོང་།
རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱིས་སྤྱི་འཐུས་རྣམས་ལ་ཕུལ་བའི་རེ་སྐུལ་སྙན་ཞུའི་ཁྲོད། བཙན་བྱོལ་བོད་མིའི་བཅའ་ཁྲིམས་སུ་ཆོས་བརྒྱུད་བར་ལ་དབྱེ་འབྱེད་ཁ་གསལ་བྱས་ཡོད་པས། བཙན་བྱོལ་ཁྲོད་ཀྱི་ཇོ་ནང་པ་རྣམས་ལ་ཐོབ་ཐང་འདྲ་མཉམ་མེད་པའི་གནད་དོན་རབ་དང་རིམ་པ་བྱུང་སྟབས། ཕྱི་ལོ་ ༡༩༩༧ ལོ་ནས་བཟུང་ཐོག་མར་ཇོ་ནང་བསྟན་པ་ཡོངས་རྫོགས་ཀྱི་མངའ་བདག་༧སྐྱབས་མགོན་ཁལ་ཁ་རྗེ་བཙུན་དམ་པ་སྐུ་ཕྲེང་དགུ་བ་ཆེན་པོ་མཆོག་གིས་ཐོབ་ཐང་འདྲ་མཉམ་ཡོང་སླད། རང་གཞུང་བཀའ་ཤག་དང༌། གྲོས་ཚོགས་ལ་སྙན་ཞུ་ཐེངས་ལྔ། དེ་བཞིན་སིམ་ལ་ཇོ་ནང་མ་དགོན་སོགས་འཛམ་གླིང་གང་སར་ཡོད་པའིི་ཇོ་ནང་པའི་ཚོགས་སྒེར་གཉིས་ནས་དེ་ལུགས་ཀྱིས་སྙན་ཞུ་དང་རེ་འབོད་གྲངས་ལས་འདས་པ་ཕུལ་ཟིན་པ་མ་ཟད། ཕྱི་ལོ་ ༢༠༡༥ ལོར་གྲོས་ཚོགས་འཚོགས་སྐབས། བཙན་བྱོལ་ཁྲོད་ཀྱི་ཇོ་ནང་པ་རྣམས་ལ་ཁྲིམས་ཐོག་ནས་ཐོབ་ཐང་འདྲ་མཉམ་གནང་སྐྱོང་ཡོང་བའི་ཞུ་གསོལ་ལས་འགུལ་དང་། ཐ་ན་ཞི་བའི་ཟས་བཅད་སོགས་ཀྱང་སྤེལ་ཡོད། དེ་ལྟ་ན་ཡང་གྲོས་ཚོགས་ཀྱི་ངོས་ནས་བཅའ་ཁྲིམས་ལ་འགྱུར་བ་གཏོང་རྒྱུ་ལྟ་ཅི། ཡ་ལན་ཙམ་ཡང་མེད་ཁར་མཐོང་ཆུང་དང་ཁྱད་གསོད་བྱས་པ་ཉུང་ཉུང་མིན་མོད། འདས་ལོའི་ནང་གྲོས་ཚོགས་ནས་ཁྲིམས་སྒྲིག་ཚོགས་ཆུང་ཟེར་བ་བཙུགས་ཏེ། བཙན་བྱོལ་བོད་མིའི་བཅའ་ཁྲིམས་ལ་བསྒྱུར་བཅོས་གཏོང་དགོས་རིགས་བཙན་བྱོལ་བོད་མི་ཡོངས་ཀྱི་བསམ་ཚུལ་ཞུ་འབུལ་ཆོག་པའི་གོ་སྐབས་སྤྲད་པས། ཕྱི་སྡོད་ཇོ་ནང་པ་རྣམས་ཀྱིས་ཀྱང་། དེ་ལུགས་གོ་སྐབས་དམ་འཛིན་བྱས་ཏེ་འཛམ་གླིང་ཁྱོན་ཡོངས་ནས་ཚོགས་སྡེ་ ༥༠ ལྷག་དང་། མི་སྒེར་བ་ ༢༠༠ ལྷག་གིས། བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་ ༣༧ པར་འགྱུར་བ་བཏང་ནས། བཙན་བྱོལ་བོད་མི་ཡོད་དོ་ཅོག་ཁྲིམས་ཀྱི་མདུན་སར་ཐོབ་ཐང་འདྲ་མཉམ་ཡོང་བའི་གསོལ་འདེབས་ཞུས་ཀྱང་། དེ་མཐུན་གྱི་ཡ་ལན་གང་ཡང་མ་བྱུང༌། ཞེས་གསལ་འདུག
ཡང་རེ་སྐུལ་སྙན་ཞུའི་ཁྲོད། ད་ལན་སྐབས་ ༡༧ པའི་གྲོས་ཚོགས་ཚོགས་དུས་བརྒྱད་པའི་ཐོག གོང་གསལ་བཅའ་ཁྲིམས་ཀྱི་དོན་ཚན་ཁག་ལ་ངེས་པར་དུ་འགྱུར་བ་བཏང་ནས། བཙན་བྱོལ་ཁྲོད་ཀྱི་བོད་མི་དང་ཆོས་ལུགས་ཡོངས་རྫོགས་ཁྲིམས་ཀྱི་མདུན་སར་འདྲ་མཉམ་བྱས་ཏེ། ཀུན་ཁྱབ་ཀྱིས་བདག་སྐྱོང་གནང་རྒྱུ་དང་། བཙན་བྱོལ་བོད་མིའི་བཅའ་ཁྲིམས་འདི་ཡང་། ཡང་དག་པའི་དམངས་གཙོའི་སྒྲིག་འཛུགས་ཤིག་གི་ཁྲིམས་ཡིག་ཚད་ལྡན་ཞིག་ཏུ་བསྒྱུར་གནང་ཡོང་བའི་གསོལ་བ་ཤུགས་དྲག་ཏུ་འདེབས་པ་ལགས། གལ་ཏེ་ད་ལན་ཡང་སྔར་བཞིན་ང་ཚོའི་རེ་བ་ཆུད་ཟོས་སུ་བཏང་བ་ཡིན་ན། ང་ཚོས་ངོས་ནས་ཀྱང་ནང་གི་གནད་དོན་ནང་ནས་མི་སེལ་བ་ཤེས་པར་བྱས་ཏེ། ཁྲིམས་གཏུགས་དང་། སྙན་ཞུ། རེ་སྐུལ། གསར་འགོད་གསལ་བསྒྲགས་སོགས་ཀྱི་ཁ་ཕྱོགས་ལ་འགྱུར་བ་མི་གཏོང་ཐབས་མེད་ཡིན་པས། དེ་དུས་གནད་དོན་ཅི་ཞིག་བྱུང་ན། དེའི་འགན་ཡོངས་རྫོགས་བཙན་བྱོལ་བོད་མིའི་གྲོས་ཚོགས་རང་ནས་ཁུར་དགོས་པའི་གསལ་འདེབས་བཅས། ཞེས་གསལ་འདུག
གསར་འགོད་པ། བསྟན་འཛིན་ཕུར་བུ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
བོད་མི་གཅིག་གི་གཅིག་ལ་རོགས་རམ་དང་ལྷག་བསམ་དགོས་པའོ་དུས་ནམ་ཡང་།