གངས་ལྗོངས་དཔལ་འབྱོར་ཞབས་ཞུ་ཁང་དེ་རང་སྐྱོང་ཁེ་གཉེར་ཁང་ཞིག་ཏུ་བསྒྱུར་ཟིན་པ་དང་བཤེར་བདག་བརྒྱ་ཆ་ ༦༣ གྱིས་མ་རྩ་ཕྱིར་འཐེན་བྱས་པ་སོགས་ཀྱི་གནས་སྟངས་འོག་ཕྱི་ལོ་ ༢༠༢༦ ལོར་སྒོ་རྒྱག་དགོས་ཁེལ་སྲིད་ཀྱི་ཡོད་འདུག
དེ་རིང་གྲོས་ཚོགས་ཚོགས་དུས་བརྒྱད་པའི་ལས་ཉིན་གསུམ་པའི་སྟེང་དཔལ་འབྱོར་ལས་ཁུངས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༣ དང་༢༠༢༤ ལོའི་ལོ་འཁོར་ལས་བསྡོམས་སྙན་སྒྲོན་དང་བགྲོ་གླེང་གསལ་བཤད་སྐབས། དཔལ་འབྱོར་བཀའ་བློན་སྤེན་པ་ཚེ་རིང་མཆོག་གིས། གངས་ལྗོངས་དཔལ་འབྱོར་ཞབས་ཞུ་ཁང་གི་ད་ལྟའི་གནས་བབ་ལ་གཞིགས་ན་ཕྱི་ལོ ༢༠༢༦ ལོར་སྒོ་རྒྱག་དགོས་པའི་གནས་སྟངས་ཆགས་སྲིད་སྐོར་སོགས་གསུངས་སོང་།
བོད་མི་མང་སྤྱི་འཐུས་དཀོན་མཆོག་ཡར་འཕེལ་ལགས་དང་དབུ་དཀར་ཚང་གཡུ་སྒྲོན་ལགས་སོགས་ཀྱིས་གངས་ལྗོངས་དཔལ་འབྱོར་ཞབས་ཞུ་ཁང་གི་རང་སྐྱོང་ཁེ་ལས་མུ་མཐུད་གཉེར་ཐུབ་ཐབས་སྐོར་ལ་འབོད་སྐུལ་གནང་བ་དང་འབྲེལ། སྲིད་སྐྱོང་དང་དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས། གངས་ལྗོངས་དཔལ་འབྱོར་ཞབས་ཞུ་ཁང་གི་གནད་དོན་ཡོངས་རྫོགས་གྲོས་ཚོགས་ནང་ཇི་མ་ཇི་བཞིན་བགྲོ་གླེང་བྱས་ནས་གྲོས་ཆོད་གཏན་འབེབས་བྱུང་རྗེས། ཐོག་མར་དཔལ་འབྱོར་ལས་ཁུངས་ཀྱིས་འགན་འཛིན་ལྷན་ཚོགས་གསར་པ་བཟོས་པ་དེས་ཚོགས་མི་མ་བཤེར་བདག་པོ་ཡོངས་ལ་འབྲེལ་བ་བྱས་ཀྱང་། མ་བཤེར་བདག་པོའི་ནང་ནས་སུས་ཀྱང་འགན་འཛིན་དུ་སྡོད་རྒྱུ་དང་དུ་བླངས་མེད་པ་མ་ཟད། ཚོགས་འདུ་འཚོགས་སྐབས་དུས་ཚོད་སོགས་གང་ཐུབ་བསྟུན་ཐབས་བྱས་ནའང་། མ་བཤེར་བདག་པོ་མང་པོ་ཞིག་མཉམ་ཞུགས་བྱེད་ཀྱི་མེད་པས། མཐར་དོ་བདག་སོ་སོ་ལ་ཡི་གེ་བསྐུར་ནས་ཁོང་ཚོའི་དགོངས་ཚུལ་དང་འབྲེལ་ནས་ཞབས་ཞུ་ཁང་དེ་སྒོ་རྒྱག་དགོས་པའམ། ཐབས་ལམ་གཞན་བཏོན་དགོས་སྐོར་དྲིས་པར། དེའི་ནང་ནས་མ་རྩ་བརྒྱ་ཆ་ ༦༣ ་ཕྱིར་འཐེན་བྱེད་ཀྱི་ཡིན་བརྗོད་དེ་སྒོ་རྒྱག་དགོས་པའི་དགོངས་ཚུལ་བྱུང་བའི་སྐོར་དང་། བཤེར་བདག་ནང་ནས་མ་རྩ་ཆེ་ཤོས་འཇོག་མཁན་སུད་སི་ནས་ཡིན་པས། ད་ལོ་སུད་སིར་སྐོར་སྐྱོད་དུ་འགྲོ་སྐབས་གསོལ་ཚིགས་ཞིག་གི་སྐབས་མཇལ་བ་བརྒྱུད། ཁོང་གི་ཐོག་མའི་དམིགས་ཡུལ་ནི་གངས་ལྗོངས་དཔལ་འབྱོར་ཞབས་ཞུ་ཁང་སྒོ་རྒྱག་ན། ཁོང་གི་དངུལ་དེ་སྐྱེད་མེད་ཀྱི་ཐོག་ནས་བོད་པའི་སྤྱི་ཚོགས་ནང་གཡར་རོགས་བྱེད་དགོས་སྐོར་གསུངས་སོང་། དེ་བཞིན་མ་བཤེར་བ་རྣམས་ཀྱིས་གངས་ལྗོངས་དཔལ་འབྱོར་ཞབས་ཞུ་ཁང་དེ་སྒོ་རྒྱག་དགོས་སྐོར་བཤད་ཚེ། དེ་ལུགས་ཀྱིས་འཛིན་སྐྱོང་བཀའ་ཤག་གིས་ལག་བསྟར་བྱ་དགོས། ཞེས་གསུངས་སོང་།
ཡང་དཔལ་འབྱོར་བཀའ་བློན་སྤེན་པ་ཚེ་རིང་མཆོག་གིས། ད་ལྟའི་ཆར་བཤེར་བདག་ནང་ནས་བརྒྱ་ཆ་ ༦༣ གྱིས་མ་རྩ་ཕྱིར་འཐེན་བྱ་རྒྱུའི་དགོངས་ཚུལ་ཡོད་པར་བརྟེན། ད་ལྟའི་གནས་སྟངས་ལ་ཕྱི་ལོ་ ༢༠༢༦ ལོར་གངས་ལྗོངས་དཔལ་འབྱོར་ཞབས་ཞུ་ཁང་སྒོ་བརྒྱག་རྒྱུའི་ཐོག་ལ་བསམ་བློ་གཏོང་བཞིན་ཡོད། དེ་འདྲའི་འགྱུར་བ་ཤུགས་ཆེན་པོ་མ་ཕྱིན་ན་བྱེད་ཐབས་གཞན་མི་འདུག དེ་བཞིན་འགན་འཛིན་ལྷན་ཚོགས་ཁོངས་ནས་སྐུ་ཞབས་པར་ས་ཌི་(Alok Prasad) ལགས་ཀྱིས་དགོངས་པ་ཞུས་སོང་བས། ད་ལྟ་དཔལ་འབྱོར་ལས་ཁུངས་ཀྱིས་འགན་འཁུར་གྱིན་ཡོད། ཅེས་གསུངས་སོང་།
དེ་བཞིན་བོད་མིའི་སྒྲིག་འཛུགས་དཔལ་འབྱོར་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༣ ཟླ་ ༤ ཚེས་ ༡ ནས་ཕྱི་ལོ་ ༢༠༢༤ ཟླ་ ༣ ཚེས་ ༣༡ བར་གྱི་ལོ་འཁོར་ལས་བསྡོམས་རྒྱས་པར་སྤྱི་འཐུས་རྒྱུན་ལས་ནས་གཟིགས་ཞིབ་ཀྱིས་དོགས་འདྲི་ཁག་ལ་ལན་འདེབས་གསལ་བཤད་ཁྲོད། ལོ་འཁོར་བཤེར་བདག་ཚོགས་ཆེན་སྐབས་བཤེར་བདག་ཁག་ཅིག་ནས་ཆ་ཤས་ལེན་མི་ཐུབ་པའི་རྒྱུ་མཚན་གཙོ་བོ་བཤེར་བདག་སྒེར་གྱི་དུས་ཚོད་སྟབས་བདེ་ཡིན་མིན་གྱི་གནས་སྟངས་ཆགས་ཡོད་པ་ལས་གཞན་གང་ཡང་མིན། འོན་ཀྱང་བཤེར་བདག་མང་ཚོགས་ཁྲོད་ནས་བརྒྱ་ཆ་ ༦༣ གྱིས་ཚོགས་པ་སྒོ་རྒྱག་དགོས་པའི་བསམ་ཚུལ་སླེབས་ཡོད་པ་དེའི་རྒྱུ་མཚན་ནི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༥ པའི་གྲོས་ཆོད་ཡིག་ཆ་ཨང་། ༣༤ པའི་དགོངས་དོན་བཞིན། གངས་ལྗོངས་དཔལ་འབྱོར་ཞབས་ཞུ་ཁང་དེ་རང་སྐྱོང་ཁེ་གཉེར་ཞིག་ཏུ་བསྒྱུར་རྒྱུའི་ཐག་གཅོད་ཟིན་ཡོད་པ་དེ་ལ་བཤེར་བདག་ཁག་ཅིག་ནས་མོས་མཐུན་མེད་པའི་སྐོར་དང་། ཁག་ཅིག་ནས་སོ་སོའི་མ་འཛུགས་ཡོད་པ་དེ་དགོས་མཁོ་ཆགས་པར་ཕྱིར་འཐེན་ཞུ་རྒྱུ་ཡིན་གནས་འགྲེལ་བརྗོད་བྱུང༌། ཞེས་གསལ་འདུག
ཕྱི་ལོ་ ༢༠༢༢ ཟླ་ ༦ ཚེས་ ༢ ཉིན་བོད་མི་མང་སྤྱི་འཐུས་སྐབས་ ༡༧ པའི་གྲོས་ཚོགས་ཚོགས་དུས་གསུམ་པའི་གྲོས་ཆོད་༢༠༢༢།༡༧།༣།༢༦ དང་། ཡིག་ཆ་ཨང་ ༢༦ པའི་དགོངས་དོན་གཞིར་བཟུང་། ཚོགས་གཙོ་སྦྲེལ་པོས་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཁྱབ་ཁོངས་གངས་ལྗོངས་དཔལ་འབྱོར་ཞབས་ཞུ་ཁང་གི་ཁེ་ཉེན་གྱི་གནས་སྟངས་ཇི་ཆགས་སྐོར་ལ་རྟོག་ཞིབ་ཆེད། སྤྱི་འཐུས་ཟླ་བ་ཕུན་སྐྱིད་ལགས་དང་། སྤྱི་འཐུས་གསེར་རྟ་ཚུལ་ཁྲིམས་ལགས། སྤྱི་འཐུས་དཀོན་མཆོག་ཡང་འཕེལ་ལགས། སྤྱི་འཐུས་ཀརྨ་དགེ་ལེགས་ལགས། དེ་བཞིན་དཔལ་འབྱོར་རིག་པའི་ཆེས་མཁས་པ་ར་ཧུལ་ཇོ་ཤི་ (Rahul Joshi) བཅས་ལས་གྲུབ་པའི་ཞིབ་འཇུག་ཚོགས་ཆུང་ཞིག་བསྐོ་འཛུགས་ཀྱིས། ཕྱི་ལོ་ ༢༠༢༢ ཟླ་ ༩ ཚེས་ ༦ ཉིན་གངས་ལྗོངས་དཔལ་འབྱོར་ཞབས་ཞུ་ཁང་གི་ཁེ་ཉེན་གྱི་གནས་སྟངས་ཇི་ཆགས་སྐོར་གྱི་ཞིབ་འཇུག་སྙན་ཐོ་བཏོན་ཡོད། ཕྱི་ལོ་ ༢༠༢༢ ཟླ་ ༩ ཚེས་ ༡༦ ཉིན་བོད་མི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པའི་ལས་ཉིན་བརྒྱད་པའི་ཉིན། གངས་ལྗོངས་དཔལ་འབྱོར་ཞབས་ཞུ་ཁང་ཁེ་ལས་རང་བཞིན་ཅན་ཞིག་ཏུ་བསྒྱུར་རྒྱུ་དེ་སྤྱི་འཐུས་ལྷན་ཚོགས་སུ་མང་མོས་ཐོག་ནས་གཏན་འབེབས་བྱུང་།
གངས་ལྗོངས་དཔལ་འབྱོར་ཞབས་ཞུ་ཁང་དེ་ཐོག་མར་ཕྱི་ལོ་ ༢༠༡༥ ལོར་བཙན་བྱོལ་བོད་མིའི་སྤྱི་ཚོགས་ཀྱི་དཔལ་འབྱོར་གནས་བབ་མཐོར་འདེགས་དང་རང་ཁ་རང་གསོའི་ཆེད་དུ་གསར་འཛུགས་གནང་བ་ཞིག་ཡིན་ཞིང་། ཕྱི་ལོ་ ༢༠༡༧ ལོའི་ཟླ་ ༡༡ ཚེས་ ༢༨ ཉིན་ཁེ་ཡོད་ཀྱི་ཚོགས་པའི་ངོ་བོར་དེབ་སྐྱེལ་བྱས་ཡོད་པ་མ་ཟད། ཕྱི་ལོ་ ༢༠༡༨ ཟླ་ ༡༢ ཚེས་ ༡༣ ཉིན་དངོས་སུ་རྒྱ་གར་དབུས་དངུལ་ཁང་ཆེན་མོ་ (Reserve Bank of India) ནས་དངུལ་ཁང་ལྟ་བུའི་ངོ་བོར་(Non-Banking Finance Company) དེབ་སྐྱེལ་ལག་ཁྱེར་ཐོབ་སྟེ་དངོས་སུ་བུ་ལོན་གཡར་གཏོང་བྱེད་མགོ་བརྩམས་ཡོད་པ་རེད།
གསར་འགོད་པ། བསྟན་འཛིན་ཕུར་བུ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
