བོད་ནང་གི་གནས་སྟངས་མཚོན་པའི་བྱིས་པའི་རི་མོའི་སྒྱུ་རྩལ་འགྲེམས་སྟོན།

ཁ་དོག་སྒྱུ་རྩལ་ཚོགས་པས་བོད་སློབ་ཁག་ལྔའི་སློབ་ཕྲུག་རྣམས་ཀྱིས་བྲིས་པའི་བོད་ནང་གི་གནས་སྟངས་མཚོན་པའི་བྱིས་པའི་རི་མོ་གྲངས་ ༥༠ འགྲེམས་སྟོན་བྱེད་བཞིན་འདུག

དེ་རིང་ཕྱི་ཚེས་ ༡༣ ནས་ ༡༩ བར་ཉིན་གྲངས་བདུན་རིང་དྷ་ཤོད་ཀང་ར་སྒྱུ་རྩལ་འགྲེམས་སྟོན་ཁང་དུ། ཁ་དོག་བོད་པའི་སྒྱུ་རྩལ་ཚོགས་པའི་གོ་སྒྲིག་འོག  ཧི་མ་ཅལ་མངའ་སྡེའི་ཁོངས་ཀྱི་བོད་སློབ་ཁག་ལྔའི་སློབ་ཕྲུག་གིས་བྲིས་པའི་བྱིས་པའི་སྒྱུ་རྩལ་འགྲེམས་སྟོན་བྱེད་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་ཀང་ར་རྫོང་དཔོན་གཞོན་པ་མཆོག་དང་། བོད་ཁྱིམ་སྤྱི་ཁྱབ་འགན་འཛིན་བསོད་ནམས་སྲི་ཆོས་ལགས། སྒྱུ་རྩལ་བ་བཀྲ་ཤིས་ཉི་མ་ལགས། གཞུང་ཁོངས་མིན་པའི་ཚོགས་སྡེ་ཁག་གི་མི་སྣ། དྷ་ས་ཁུལ་གྱི་བོད་སློབ་ཁག་གི་སློབ་ཕྲུག རྒྱ་གར་བ་སོགས་མཉམ་ཞུགས་གནང་སོང་།

འདི་གའི་གསར་འགོད་པར་བྱིས་པའི་སྒྱུ་རྩལ་འགྲེམས་སྟོན་སྐོར་ལ་སྒྱུ་རྩལ་བ་བཀྲ་ཤིས་ཉི་མ་ལགས་ཀྱིས། བོད་པ་རྒྱ་གར་དུ་བཙན་བྱོལ་ལ་འབྱོར་ནས་ལོ་ངོ་ ༦༥ ལྷག་འགྲོ་བཞིན་ཡོད་ཅིང་། བཙན་བྱོལ་དུ་བོད་པ་མང་པོ་འཚར་ལོངས་འབྱུང་བཞིན་ཡོད། མང་ཆེ་ཤོས་ནི་མི་ཐོག་གསར་བའི་བུ་ཕྲུག་ཆགས་ཡོད། ང་ཚོའི་ངོས་ནས་ཁོང་ཚོའི་སྐད་དང་སྒྱུ་རྩལ་ལ་སྡིངས་ཆ་ཞིག་སྤྲོད་པའི་ཐབས་ཤེས་བྱེད་ཀྱི་ཡོད། ཁོང་ཚོ་བོད་དུ་འགྲོ་མྱོང་མེད་ཀྱང་། གལ་སྲིད་ང་རང་བོད་དུ་ཡོད་ན་ཞེས་རང་ཉིད་ཀྱི་སྒྲུང་དང་། ཚོར་བ། རྨི་ལམ། ཉམས་མྱོང་སོགས་རི་མོའི་ཐོག་ནས་བཤད་སའི་སྡིངས་ཆ་ཞིག་བསྐྲུན་ཡོད། ཐེངས་འདིར་བྱིས་པའི་སྒྱུ་རྩལ་འགྲེམས་སྟོན་ནི་ཧི་མ་ཅལ་མངའ་སྡེའི་ཁོངས་ཀྱི་བོད་ཁྱིམ་སློབ་གྲྭ་བཞི་དང་མེས་དབོན་དཔེ་སྟོན་སློབ་གྲྭ་བཅས་ཀྱི་སློབ་ཕྲུག་གྲངས་ ༢༠༠ ལྷག་གིས་རི་མོ་བྲིས་ནས་མཉམ་ཞུགས་བྱས་པའི་ཁྲོད། རྒྱ་གར་བ་དང་བོད་པ་དཔྱད་འདེམས་པ་ལྔས་བདམས་ཐོན་བྱུང་བའི་རི་མོ་གྲངས་ ༥༠ འགྲེམས་སྟོན་བྱེད་བཞིན་ཡོད། ཅེས་འགྲེལ་བརྗོད་གནང་བྱུང་།

མ་འོངས་འགྲེམས་སྟོན་གྱི་འཆར་གཞིའི་སྐོར་ལ་ཁོང་གིས། ད་ལན་ལས་འགུལ་འདི་ནི་འགྲེམས་སྟོན་ཆུང་ཆུང་ཞིག་ཡིན། ང་ཚོའི་ཚོགས་པའི་ངོས་ནས་ལོ་ལྟར་འགྲེམས་སྟོན་རེ་བྱེད་བཞིན་ཡོད་ཅིང་། འདི་ལོ་ཕྱི་ཟླ་ ༡༡ ནང་བོད་པའི་ཆེད་ལས་བའི་རི་མོའི་སྒྱུ་རྩལ་འགྲེམས་སྟོན་ཞིག་བྱ་འཆར་ཡོད། དེའི་ནང་ཆེད་ལས་རི་མོ་སྒྱུ་རྩལ་བའི་བརྩམས་ཆོས་ ༢༠ ལྷག་འགྲེམས་སྟོན་བྱ་རྒྱུ་ཡིན། ང་ཚོའི་ལས་གཞི་ལ་ཕྱོགས་གང་ཅིའི་ཐད་ནས་རྒྱབ་སྐྱོར་ཡག་པོ་བྱུང་ཚེ་མུ་མཐུད་ལས་འགུལ་སྤེལ་རྩིས་ཡོད། ཅེས་འགྲེལ་བརྗོད་གནང་བྱུང་།

བྱིས་པའི་སྒྱུ་རྩལ་འགྲེམས་སྟོན་གྱི་གལ་གནད་སྐོར་ལ་ལྡུམ་ར་བུ་ཆུང་བསོད་ནམས་ལགས་ཀྱིས། བྱིས་པའི་སྒྱུ་རྩལ་འགྲེམས་སྟོན་ཧ་ཅང་གལ་ཆེན་པོ་རེད། བོད་པ་མཚོན་ན་བཙན་བྱོལ་གྱི་སྤྱི་ཚོགས་ཤིག་རེད། རི་མོ་འབྲི་མཁན་ནང་མཉམ་ཞུགས་བྱེད་མཁན་ཚང་མ་བཙན་བྱོལ་དུ་འཚར་ལོངས་བྱུང་བ་དང་བོད་མཐོང་མྱོང་མེད། ཁོང་ཚོར་བསམ་བློའི་འཆར་སྒོ་མང་པོ་ཡོད། བསམ་བློའི་འཆར་སྣང་དེ་སྒྱུ་རྩལ་གྱི་ལམ་ནས་ཕབ་རྒྱུ་དྲི་བ་ཆེན་པོ་ཞིག་རེད། འཛིན་རིམ་བདུན་པ་ཡན་གྱི་སློབ་ཕྲུག་རྣམས་ཀྱིས་རི་མོ་ཧ་ཅང་ཡག་པོ་བྲིས་འདུག དེ་ནི་ངས་གལ་ཆེན་པོ་མཐོང་གི་ཡོད། བསམ་བློའི་འཁོར་རྒྱ་དེ་སྒྱུ་རྩལ་གྱི་སྣེ་གཅིག་ལ་ཕབ་ཐུབ་པ་ཙམ་གྱིས་རྒྱལ་ཁ་ཆེན་པོ་ཞིག་རེད་བསམ་གྱི་འདུག ལྷག་པར་དུ་བོད་པར་མཚོན་ན་སྒྲུང་མང་པོ་ཡོད། ཡིན་ནའང་དེ་བརྒྱུད་ལམ་གང་དུ་བཤད་ན་འགྲིག་གི་རེད། ཐེངས་འདིའི་རི་མོར་བལྟས་ཚེ་དེའི་ནང་གི་ཁོར་ཡུག་དང་ཆབ་སྲིད་སོགས་གལ་སྲིད་ང་བོད་དུ་ཡོད་ན་ཞེས་པ་དེ་ཤོག་ལྷེ་གཅིག་གི་ཐོག་ཏུ་མཚོན་ཡོད། ཡིག་ཐོག་ཏུ་ཡིན་ཚེ་དེབ་མང་པོ་བཀླག་དགོས། རི་མོར་མཚོན་ན་ལམ་སེང་མཐོང་བ་དང་ཡིད་དུ་འཆར་ཐུབ་ཀྱི་འདུག བརྒྱུད་ལམ་དེ་ཧ་ཅང་གལ་ཆེན་པོ་ཞིག་རེད། ཅེས་འགྲེལ་བརྗོད་གནང་བྱུང་།

བྱིས་པའི་སྒྱུ་རྩལ་འགྲེམས་སྟོན་སྐོར་ལ་བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས། ཐེངས་འདིའི་རི་མོ་སྒྱུ་རྩལ་འགྲེམས་སྟོན་ནང་གི་རི་མོ་འབྲི་སྟངས་དང་བསམ་བློ་ཧ་ཅང་ཕྱུག་པོ་རེད། ཧ་ཅང་ཡག་པོ་མཐོང་སོང་། གལ་གནད་ཆེན་པོ་ཞིག་ལ་རི་མོའི་ནང་དོན་མང་ཆེ་ཤོས་བོད་ནང་བོད་ཡིག་སློབ་སྦྱོང་བྱེད་ཐུབ་ཀྱི་མེད་པ་དང་། རྒྱ་ཡིག་སློབ་ཁྲིད་བྱེད་ཀྱི་ཡོད་དུས། བཙན་བྱོལ་དུ་རང་དབང་ཐོག་བོད་ཀྱི་ཆོས་དང་རིག་གཞུང་སློབ་སྦྱོང་བྱེད་པའི་གོ་སྐབས་ཡོད་པ་དང་། བོད་ནང་དུ་འདི་འདྲའི་རང་དབང་མེད་པ་མངོན་གསལ་མཚོན་གྱི་འདུག རི་མོ་མང་པོའི་ནང་བོད་ནང་གི་སློབ་གྲྭ་ཁག་གི་གནས་སྟངས་མཚོན་པའི་རྣམ་པ་འདུག སློབ་ཕྲུག་མང་པོས་རི་མོ་བྲིས་ཏེ་འགྲེམས་སྟོན་བྱེད་པའི་གོ་སྐབས་ཐོབ་པ་གལ་གནད་ཆེན་པོ་རེད། འདི་འདྲའི་སྒྱུ་རྩལ་ལ་ཆེ་མཐོང་སྤྲོད་རྒྱུ་གལ་ཆེན་པོ་རེད། ང་ཚོའི་སྤྱི་ཚོགས་ནང་འབྲི་ཀློག་གཅིག་པོའི་ཐོག་ནས་མདུན་ལམ་ལ་བསམ་བློ་གཏོང་བཞིན་འདུག རྩེད་མོ་དང་སྒྱུ་རྩལ་རིགས་འདྲ་མིན་ཐོག་ཤུགས་རྒྱག་རྒྱུ་ཡང་གལ་ཆེན་པོ་རེད། རི་མོའི་ཐོག་ནས་བོད་དོན་དྲིལ་བསྒྲགས་བྱ་རྒྱུ་གལ་ཆེན་རེད། ཤོག་ལྷེ་གཅིག་གི་ཐོག་ཏུ་སྒྲུང་སོགས་ཀྱི་རྣམ་དཔྱོད་སྟོན་ཐུབ་པའི་ནུས་པ་ཡོད། ཧང་སངས་བ་དང་ཧོན་ཐོར་བ། ཡིད་མ་ཚིམས་པ་བཟོ་བའི་ནུས་པ་ཡོད་པས། རི་མོ་སྒྱུ་རྩལ་ལ་ཤུགས་རྒྱག་རྒྱུ་ཡང་གལ་ཆེན་པོ་རེད། ཅེས་འགྲེལ་བརྗོད་གནང་བྱུང།

ང་སུ་རེད་ཅེས་པའི་རི་མོ་འབྲི་མཁན་སུ་ཇཱ་བོད་ཁྱིམ་གྱི་སློབ་ཕྲུག་བསྟན་ནོར་བསམ་སྐྱིད་ལགས་ཀྱིས་ཁོང་མོའི་རི་མོའི་སྐོར་འདི་གའི་གསར་འགོད་པར། རི་མོ་འདི་ནི་བུ་ཕྲུག་གིས་ཤེས་ཀྱི་མེད་པའི་གནས་སྟངས་ཤིག་ཡིན། ང་རང་བོད་པ་དང་རྒྱ་མི་རེད་བསམ་གྱི་ཡོད། བོད་ནང་དུ་ཕ་མ་རྣམས་ལ་རང་དབང་མེད་པར་སོ་སོའི་བུ་ཕྲུག་རྒྱ་མིའི་སློབ་གྲྭར་གཏོང་དགོས་ཀྱི་ཡོད། རྒྱ་མིའི་སློབ་གྲྭར་རྒྱ་ཡིག་མ་གཏོགས་བོད་ཡིག་སྦྱོང་ས་མེད། ཆུང་དུས་ཁྱིམ་ནས་ཤེས་པའི་བོད་ཀྱི་སྐད་ཡིག་ཀྱང་བརླག་འགྲོ་བའི་གནས་སྟངས་ཤིག་མཚོན་གྱི་ཡོད། ཅེས་འགྲེལ་བརྗོད་གནང་བྱུང་། ཡང་སུ་ཇཱ་བོད་ཁྱིམ་གྱི་སློབ་ཕྲུག་མུན་སེལ་ལགས་ཀྱིས་ཁོང་གི་རི་མོའི་སྐོར་ལ། རྒྱ་ནག་གཞུང་གིས་བོད་ཀྱི་ཕྲུ་གུ་རྣམས་རྒྱ་མིའི་གཏན་འཇགས་སློབ་གྲྭར་བཏང་སྟེ་བོད་པ་རྣམས་རྒྱ་མིར་བསྒྱུར་བཞིན་ཡོད་པ་མ་ཟད། རྒྱ་ཡིག་སྦྱོང་བའི་ཆེད་དུ་བོད་ཀྱི་སློབ་ཕྲུག་རྣམས་ལ་གནོན་ཤུགས་སྤྲོད་ཀྱི་ཡོད། སློབ་གྲྭའི་ནང་མའོ་ཙེ་ཏུང་སོགས་ཀྱི་སྐོར་ལས་བོད་ཀྱི་སྐོར་ཅི་ཡང་བཤད་ཀྱི་མེད། ངའི་རི་མོའི་མཐའ་རུ་དམར་པོ་ཡོད་པ་རྒྱ་མིའི་གནོན་ཤུགས་ཆེན་པོ་ཡོད་པ་མཚོན་ཡོད། ཅེས་འགྲེལ་བརྗོད་གནང་བྱུང་། དེ་བཞིན་རི་མི་འབྲི་མཁན་དྷ་སྟེང་བོད་ཁྱིམ་གྱི་སློབ་ཕྲུག་བསྟན་འཛིན་འོད་གསལ་ལགས་ཀྱིས། ངས་གལ་སྲིད་ང་རང་བོད་དུ་ཡོད་ན་ཞེས་པའི་བརྗོད་གཞིའི་ཐོག་རི་མོ་བྲིས་ཡོད། རི་མོའི་ནང་མི་གསུམ་གྱི་རྒྱལ་དར་གསུམ་ཉར་བའི་ཐོག་ནས་བོད་ཀྱི་གནས་སྟངས་མཚོན་ཡོད། ཅེས་འགྲེལ་བརྗོད་གནང་བྱུང་།

གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།