དེ་རིང་ཉིན་རྒྱབ་ཀྱི་གྲོས་ཚོགས་འཚོགས་ཐུབ་མ་སོང་།

དེ་རིང་ཉིན་རྒྱབ་ཀྱི་སྤྱི་འཐུས་གྲོས་ཚོགས་ནང་སྤྱི་འཐུས་ཉེར་གསུམ་གྱིས་ཆ་ཤས་བླངས་པ་དང་སྤྱི་འཐུས་ཉེར་གཉིས་ཀྱིས་ཆ་ཤས་བླངས་མེད་སྟབས་གྲུབ་ཆ་མ་ཚང་བའི་དབང་གིས་ཉིན་རྒྱབ་ནས་གྲོས་ཚོགས་འཚོགས་མ་སོང་།

དེ་རིང་གཞི་རིམ་མི་མང་རེ་འབོད་ཚོགས་པས་གྲོས་ཚོགས་ར་བའི་མདུན་ཐང་དུ་ཁྲིམས་ཞིབ་ཁང་བསྐྱར་གསོ་དགོས་ཞེས་འབོད་ཚིག་བསྒྲགས་ནས་ཞི་རྒོལ་བྱས་ཏེ། བོད་མི་མང་སྤྱི་འཐུས་ཚོགས་གཙོ་སྦྲེལ་བོ་ཐུག་དགོས་པའི་རེ་སྐུལ་ཞུས་རྗེས། བདེ་སྲུང་བཀའ་བློན་མཆོག་གི་རེ་སྐུལ་བཞིན་མི་མང་དག་ཕྱིར་འཐེན་བྱས་ཡོད་ཀྱང་། ཉིན་རྒྱབ་ཀྱི་ཚོགས་ཐུན་དེ་གྲོས་ཚོགས་ཀྱི་གྲུབ་ཆ་མ་ཚང་ནས་འཚོགས་ཐུབ་མེད་པ་རེད། དེ་རིང་གྲོས་ཚོགས་ཚོགས་དུས་བརྒྱད་པའི་ལས་ཉིན་བཞི་པའི་ཚོགས་ཐུན་གཉིས་པའི་སྟེང་། སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ད་ལྟ་གྲོས་ཚོགས་ཀྱི་གྲུབ་ཆ་ལོན་གྱི་མི་འདུག འཚོགས་ཐུབ་པའི་གནས་བབ་ག་དུས་བསླེབས་ན། ཚོགས་མི་ཚང་མ་ལ་འབྲེལ་བ་ཞུ་ཡི་ཡིན། ཞེས་གསུངས་སོང་།

གནད་དོན་དེའི་ཐད་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས། བཙན་བྱོལ་བོད་མིའི་བཅའ་ཁྲིམས་ཀྱི་གནད་དོན་དེ་འགྱུར་བ་གཏོང་དགོས་ཀྱི་ཡོད་པ་དང་། ཁྲིམས་ཞིབ་པ་བསྐོ་དགོས་པ་དེ་ཚང་མ་ང་ཚོའི་ལས་འགན་ཡིན་ཡང་། དེའི་ཆ་རྐྱེན་དང་གནད་དོན་ཁ་ཤས་ཤིག་གི་ཐོག་ནས་འགྲོ་མ་ཐུབ་པ་ཞིག་ཆགས་ཡོད། ད་ལན་བཅའ་ཁྲིམས་བསྐྱར་བཅོས་འཁུར་ཡོད་ལབ་ཀྱི་ཡོད་རེད་དེ། ད་ལྟ་གྲོས་ཚོགས་སུ་བསླེབ་རྒྱུ་རེད། ཡིན་ན་ཡང་། གཞི་རིམ་མི་མང་གིས་རེ་འབོད་དང་ཞི་བའི་ལས་ཀ་ཡིན་གསུང་གི་ཡོད་ནའང་། དེ་རིང་ཚང་མས་གཟིགས་ཡོད་པའི་རྣམ་པ་འདི་རེད། དངོས་གནས་བྱས་ན་ལས་འགུལ་སྤེལ་མཁན་རྣམས་མར་བཞུགས་དགོས་པ་དང་། ཁོང་ཅག་གིས་ཡི་གེ་རྣམས་ང་ཚོའི་ལག་ཏུ་སྤྲད་ཡོད་པ་དེར་ལྟ་རྟོག་བྱ་དགོས་ཀྱི་ཡོད་རེད། ཡིན་ཡང་། ཉིན་མ་གསུམ་གྱི་ལས་རིམ་ལ་བལྟས་ནས། གཞི་རིམ་མི་མང་ལ་བདག་པོ་རྒྱག་གི་མི་འདུག་ཟེར་ནས་དེ་རིང་འདིར་ཤོར་ཡོང་གི་ཡོད་པས། བདེ་སྲུང་བཀའ་བློན་དང་དྲུང་ཆེ། བདེ་སྲུང་ལས་བྱེད་ལྷན་སྐད་ཆ་བཤད་སྐབས། ཁོང་ཚོར་ཡུལ་ཁྲིམས་ཀྱི་ཐོག་ནས་དབང་ཆ་སྤྲད་ཡོད་ཟེར་བ་ལས། བདེ་སྲུང་གིས་དབང་ཆ་སྤྲད་པ་མིན་པས་བདེ་སྲུང་ལས་ཁུངས་ཀྱིས་འགན་ཁུར་ཐུབ་ཀྱི་མི་འདུག་གསུང་གི་ཡོད་པས། བདེ་སྲུང་ལས་ཁུངས་ཀྱིས་འགན་ཁུར་ཐུབ་ཀྱི་མེད་པ་ཡིན་ན། ང་ཚོ་གྲོས་ཚོགས་ལ་ཡོང་ཐུབ་ཀྱི་མེད་པའི་གནས་སྟངས་ལ་བསླེབས་ཡོད། ཅེས་བརྗོད་སོང་། 

གཞི་རིམ་མི་མང་རེ་འབོད་ཚོགས་པའི་ཚོགས་གཙོ་བསྟན་འཛིན་གཡང་དཀར་ལགས་ཀྱིས། གཞི་རིམ་མི་མང་གི་ལས་འགུལ་བ་རྣམས་ཀྱིས་ཉིན་གྲངས་བཞིའི་རིང་ཡ་རབས་བཟང་སྤྱོད་དང་ལྡན་པའི་ཐོག་ནས་བཞུགས་ཡོད་པས། ན་ནིང་ལོར་གཞི་རིམ་མི་མང་སྣང་མེད་དུ་བཞག་ཡོད་ཀྱང་།  ད་ལོ་བོད་མི་སྤྱི་འཐུས་ལྷན་ཚོགས་སུ་བཅའ་ཁྲིམས་བསྐྱར་བཅོས་ཀྱི་སྐོར་གྱི་ལས་རིམ་ཞིག་ཡོད་སྟབས། མི་མང་རྣམས་མུ་མཐུད་བཟང་སྤྱོད་ཐོག་བཞུགས་རོགས་གནང་ཞེས་བཤད་ན་མི་མང་དག་སེམས་བདེ་བ་ཡོང་གི་རེད། འོན་ཀྱང་། གོང་ནས་ཉིན་གྲངས་བཞིའི་རིང་ཨ་ལན་བརྡ་ལན་གང་ཡང་མ་སྤྲད་སྟབས། མི་མང་གཅིག་རྗེས་གཉིས་མཐུད་ཀྱིས་གྲོས་ཚོགས་མདུན་ཐང་དུ་ཕེབས་དགོས་པ་ཞིག་ཆགས་འདུག ཅེས་དང་། ད་ནངས་ཚོགས་གཙོ་མཆོག་གིས་ལས་རིམ་གཙོ་སྐྱོང་གནང་གི་ཡོད་སྟབས། བདེ་སྲུང་ལས་ཁུངས་བཀའ་བློན་དང་ཚོགས་གཞོན། ས་གནས་སྐོར་སྲུང་ལས་བྱེད་སོགས་ཐུག་འཕྲད་ཀྱིས། ཚོགས་གཙོ་སྦྲེལ་པོས་གཞི་རིམ་མི་མང་ལ་ཐུག་འཕྲད་བྱ་རྒྱུའི་ཁས་ལེན་གནང་ཡོད་གསུངས་པ་ལྟར་མི་མང་ཞི་བའི་ངང་ནས་ཕྱིར་ལོག་བྱས་ཡོད་སྐོར་སོགས་བརྗོད་སོང་། 

ཉིན་རྒྱབ་ལས་རིམ་སྐབས་མདོ་སྨད་སྤྱི་འཐུས་བདུན་དང་།  ཕྱོགས་བཞུགས་ཕྱི་རྒྱལ་སྤྱི་འཐུས་ལྔ། དབུས་གཙང་སྤྱི་འཐུས་བཅུ་བཅས་སྤྱི་འཐུས་གྲངས་ཉེར་གསུམ་གྱིས་མཉམ་ཞུགས་བྱས་ཡོད་ཀྱང་། ཆོས་བརྒྱུད་སྤྱི་འཐུས་དགུ་དང་མདོ་སྟོད་སྤྱི་འཐུས་བཅུ། དེ་བཞིན་མདོ་སྨད་སྤྱི་འཐུས་གསུམ་ནས་དགོངས་པ་ཞུས་ཏེ་བསླེབས་མེད་པ་སོགས་ཀྱི་དབང་གིས་གྲོས་ཚོགས་ཀྱི་གྲུབ་ཆ་ཚང་མེད་པ་རེད་ལ། གསར་འགོད་པས་རྒྱུས་ལོན་བྱས་པ་ལྟར་ན། མདོ་སྨད་སྤྱི་འཐུས་གཉིས་ཀྱིས་རེས་གཟའ་ཟླ་བའི་བར་དང་སྤྱི་འཐུས་གཅིག་གིས་ཚོགས་དུས་ཧྲིལ་པོར་དགོངས་པ་ཞུས་ཡོད་འདུག 

གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།