དབུ་མའི་ལམ་གྱི་ཉིན་མོའི་དུས་དྲན་སྲུང་གཙི་དང་བསྟུན་རྒྱལ་སྤྱིའི་དབུ་མའི་ལམ་ལས་འགུལ་ཁང་གིས་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་བོད་ཡིག་གི་ཡིག་རྒྱུགས་གྲུབ་འབྲས་རྩེ་སོན་སློབ་མ་གྲངས་ ༡༤ ལ་ཆེ་བསྟོད་གཟེངས་རྟགས་ཕུལ་སོང་།
དེ་རིང་ཕྱི་ཚེས་ ༡༨ ཉིན་གྱི་ཕྱི་དྲོའི་ཆུ་ཚོད་ ༢།༣༠ ཐོག་དྷ་ས་ས་གནས་མགོ་འཛིན་ཚོགས་ཁང་དུ། རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་གོ་སྒྲིག་འོག དབུ་མའི་ལམ་གྱི་ཉིན་མོའི་དུས་དྲན་སྲུང་གཙིའི་མཛད་སྒོ་ཞིག་འཚོགས་སོང་། ཚོགས་འདུའི་ཐོག་སྐུ་མགྲོན་གཙོ་བོ་བཀའ་ཟུར་འབྲོང་ཆུང་དངོས་གྲུབ་ལགས་དང་། སྤྱི་ཟུར་པད་སྒྲོན་ལགས། སྤྱི་ཟུར་སྒྲོལ་མ་མཚོ་མོ་ལགས། དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས། རྒྱལ་སྤྱིའི་དབུ་མའི་ལམ་ལས་འགུལ་ཁང་གི་འགན་འཛིན་དང་འབྲེལ་ཡོད་ལས་བྱེད། གཞུང་ཁོངས་མིན་པའི་ཚོགས་སྡེ་ཁག་གི་མི་སྣ། དྷ་སའི་སེར་སྐྱ་མི་མང་བཅས་མཉམ་ཞུགས་གནང་སོང་།
སྐབས་དེར་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་བོད་ཡིག་གི་ཡིག་རྒྱུགས་གྲུབ་འབྲས་རྩེ་ཕུད་ལོན་པའི་སློབ་མ་གྲངས་ ༡༤ ལ་ཆེ་བསྟོད་གཟེངས་རྟགས་དང་ཧིན་སྒོར་ ༧༡༤༣ རེའི་གསོལ་རས་བྱ་དགའ་ཕུལ་སོང་། བོད་ཡིག་ཡིག་རྒྱུགས་རྩེ་སོན་གྱི་ཆེ་བསྟོད་གཟེངས་རྟགས་ཀྱི་གལ་གནད་སྐོར་ལ་རྒྱལ་སྤྱིའི་དབུ་མའི་ལམ་ལས་འགུལ་ཁང་གི་འགན་འཛིན་དགེ་བཤེས་བློ་བཟང་ཆོས་འཕེལ་ལགས་ཀྱིས་འདི་གའི་གསར་འགོད་པར། བོད་མི་རིགས་ཀྱི་རིག་གཞུང་གནས་ཐུབ་མིན་ཛ་དྲག་གི་གནས་སྟངས་ཤིག་ཆགས་ཡོད་པའི་སྐབས། དབུ་མའི་ལམ་གྱི་ཐབས་ཤེས་ལ་བརྟེན་ནས་བོད་མི་རིགས་ཀྱི་རིག་གཞུང་དང་བཅས་པར་རྒྱལ་ཁ་ཐོབ་པ་དང་། བོད་གཞིས་བྱེས་གཉིས་མཉམ་འཛོམས་བྱུང་བའི་བསམ་བློ་ཡོད། དབུ་མའི་ལམ་གྱི་རྩ་དོན་གཅིག་ནི་སྐད་ཡིག་དང་། རིག་གཞུང་། ནང་བསྟན་དང་བཅས་པའི་བོད་མི་རིགས་ཀྱི་བླ་སྲོག་སྲུང་སྐྱོབ་བྱ་རྒྱུ་དེ་ཡིན་པས། མ་འོངས་བའི་སོན་རྩ་རྣམས་སེམས་ཤུགས་རྒྱས་པའི་ཆེད་དུ་གལ་ཆེན་ཞིག་ཏུ་བརྩིས་ཡོད་པས། ད་ལོ་ནས་བཟུང་རྒྱལ་སྤྱིའི་དབུ་མའི་ལམ་ལས་འགུལ་ཁང་གིས་ལས་འགུལ་འདི་མགོ་ཚུགས་ཡོད། ཅེས་འགྲེལ་བརྗོད་གནང་སོང་།
བོད་ཡིག་རྒྱུགས་འབྲས་རྩེ་སོན་གྱི་གཟེངས་རྟགས་ཀྱི་མ་འོངས་བའི་ལས་འགུལ་སྐོར་ལ་ཁོང་གིས། ད་ལོ་ནས་མགོ་ཚུགས་ཏེ་རྒྱ་གར་རྒྱལ་ཡོངས་ཀྱི་འཛིན་རིམ་བཅུ་གཉིས་པའི་ཡིག་རྒྱུགས་ཁྲོད་བོད་ཡིག་གི་རྒྱུགས་འབྲས་རྩེ་སོན་བྱུང་བའི་སློབ་མ་བཅུ་རེར་ལོ་ལྟར་ཧིན་སྒོར་ཁྲི་གཅིག་དང་ཆེ་བསྟོད་གཟེངས་རྟགས་འབུལ་རྒྱུའི་འཆར་གཞི་ཡོད། ད་ལོ་མཚོན་ན་ལས་འགུལ་འདི་ཐེངས་དང་པོ་ཡིན་པ་མ་ཟད། འདི་ལོ་རྒྱ་གར་རྒྱལ་ཡོངས་འཛིན་རིམ་བཅུ་གཉིས་པའི་ཡིག་རྒྱུགས་ནང་བོད་ཡིག་གི་ཡིག་རྒྱུགས་བརྒྱ་ཆ ༩༩ སོན་པའི་སློབ་མ་གཅིག་དང་། བརྒྱ་ཆ་ ༩༨ སོན་པའི་སློབ་མ་གྲངས་གཉིས། བརྒྱ་ཆ་ ༩༧ སོན་པའི་སློབ་མ་གྲངས་ ༡༡ བྱུང་ཡོད་པས། ཧིན་སྒོར་འབུམ་གཅིག་དེ་སློབ་མ་གྲངས་ ༡༤ ལ་བགོ་བཤའ་བརྒྱབ་སྟེ་བྱ་དགའ་ཕུལ་ཡོད། ཅེས་འགྲེལ་བརྗོད་གནང་བྱུང་།
བཀའ་ཟུར་འབྲོང་ཆུང་དངོས་གྲུབ་ལགས་ཀྱིས། སྤྱི་ཚོགས་ནང་དབུ་མའི་ལམ་གྱིས་གྲུབ་འབྲས་ཐོན་མེད་པ་དང་འགྲིག་གི་མེད་པ་སོགས་ཀྱི་བསམ་ཚུལ་བརྗོད་ཡོད། དེ་ནི་སོ་སོའི་བསམ་ཚུལ་གྱི་དོན་དག་ཞིག་རེད་མ་གཏོགས། བསམ་བློ་ཞིབ་ཚགས་བཏང་ནས་ཕྱིར་བལྟས་བྱས་ཚེ། ད་ལྟ་བར་དབུ་མའི་ལམ་ལ་གྲུབ་འབྲས་མ་བྱུང་བ་གཏན་ནས་མ་རེད། གྲུབ་འབྲས་ཡག་ཐག་ཆོད་བྱུང་ཡོད། ད་ལྟའི་བོད་ནང་རྒྱ་གཞུང་གི་མགོ་ཁྲིད་ཚོས་སྲིད་ཇུས་དང་བྱེད་བབ་ལ་བལྟས་པ་ཡིན་ན། དབུ་མའི་ལམ་གྱི་གལ་གནད་ཇི་ཙམ་ཡིན་མིན་གསལ་གསལ་ཐང་ཐང་གིས་ངེས་པ་ངོ་འཕྲོད་ཀྱི་འདུག་ལ། བོད་མི་རིགས་ཞེས་ལ་རྒྱ་དང་སྤོབས་པ་ཡོང་དགོས་པ་གལ་ཆེན་རེད། འཛམ་གླིང་སྟེང་བོད་མི་རིགས་ཞེས་མཛུབ་མོ་བཙུགས་ས་ཞིག་དགོས་ཚེ། གོམས་གཤིས་དང་། ལེགས་བྱང་། ཐུན་མོང་མ་ཡིན་པའི་ཆོས་དང་རིག་གཞུང་། ལྷག་པར་དུ་སྐད་དང་ཡི་གེ་ཉར་ཚགས་དང་། སློབ་སྦྱོང་བྱ་དགོས་པ་གལ་ཆེན་པོ་རེད། ཅེས་བརྗོད་སོང་།
དབུ་མའི་ལམ་ཉིན་མོའི་བསྒྲགས་གཏམ་ནང་། དབུ་མའི་ལམ་ནི་ྋགོང་ས་རྒྱལ་བ་རིན་པོ་ཆེ་མཆོག་གིས་བོད་རྒྱའི་དཀའ་རྙོག་ཞི་བའི་ལམ་ནས་སེལ་ཐུབ་པ་དང་། བོད་རྒྱ་མི་རིགས་གཉིས་འདྲ་མཉམ་དང་གཅིག་ཕན་གཅིག་གྲོགས་ཀྱིས་བརྟན་ལྷིང་མཉམ་གནས་ཡོང་ཆེད་འདོན་གནང་མཛད་པའི་ཐབས་ལམ་ཞིག་དང་། བཙན་བྱོལ་བོད་གཞུང་མང་གཉིས་མང་གཙོའི་ལམ་སྲོལ་གྱི་ཐོག་ནས་གོ་བསྡུར་རིམ་པར་བྱས་ཏེ་གཏན་འབེབས་བྱས་པའི་བྱུས་ཤིག་ཡིན། དེ་ནི་བོད་མི་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་དབང་སྒྱུར་བའི་བོད་ཀྱི་ད་ལྟའི་གནས་བབ་ཁས་ལེན་མི་བྱེད་པ་དང་། ཡང་བོད་ཀྱི་ལོ་རྒྱུས་དངོས་དོན་རང་བཙན་ཡིན་པ་ཡང་རྩོད་གླེང་མི་བྱེད་པར་དེ་གཉིས་ཀྱི་དབུས་ཏེ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྒྲོམ་གཞིའི་ནང་ཆོལ་གསུམ་བོད་རིགས་ཡོངས་རྫོགས་ལ་མིང་དོན་མཚུངས་པའི་རང་སྲིད་རང་སྐྱོང་ཞིག་ཡོང་ཐབས་བྱ་རྒྱུའི་སྲིད་བྱུས་དང་ཐབས་ལམ་ལ་དབུ་མའི་ལམ་ཞེས་བརྗོད། དེ་ལྟ་བུའི་དབུ་མའི་ལམ་གྱི་བྱུང་རིམ་ནི། ྋགོང་ས་རྒྱལ་བ་རིན་པོ་ཆེ་མཆོག་གིས་སྔ་མོ་ནས་དགོངས་པར་འཁོར་ཡོད་ཀྱང་། དེ་འཕྲལ་བརྒྱ་ཁ་གཅིག་གཅོད་ཀྱིས་ཐག་གཅོད་མ་གནང་བར་ལོ་རབས་དྲུག་ཅུའི་སྨད་ཙམ་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཚོགས་གཞོན་དང་། བཀའ་ཤག འབྲེལ་ཆགས་མཁྱེན་རྒྱ་ཡངས་པའི་ཤེས་མྱོང་ཅན་མང་པོར་བཀའ་བསྡུར་དང་། དགོངས་འཆར་བསྡུ་བཞེས་རིམ་པར་གནང་ཡོད་པ་ལྟར། ཕྱི་ལོ་ ༡༩༧༩ ལོར། སྐབས་དེའི་བོད་མི་མང་སྤྱི་འཐུས་ལྷན་ཚོགས་དང་། བཀའ་ཤག མཁྱེན་རྒྱ་ཡངས་པའི་མི་སྣ་བཅས་པར་བཀའ་བསྡུར་གནང་འོས་གནང་སྟེ། བབ་ལྷིང་བརྟན་གསུམ་གྱི་དགོངས་པ་གཏིང་ཟབ་བཞེས་ནས་ཐག་གཅོད་གནང་བ་ཞིག་ལས་གློ་བུར་དུ་བྱུང་བ་ཞིག་དང་། ཡང་ན་ྋགོང་ས་རྒྱལ་བ་རིན་པོ་ཆེ་མཆོག་སྐུ་རྐྱང་གིས་ཐུགས་ཐག་བཅད་དེ་གཞུང་དང་། མི་མང་ལ་བཙན་འགེལ་གནང་བ་ཞིག་མིན་པར་ཞིབ་ཕྲའི་བྱུང་རབས་ངེས་ཅན་ཡོད་པ་ཞིག་ཡིན། ཞེས་གསལ་འདུག
ཡང་བསྒྲགས་གཏམ་ནང་། བོད་དོན་དཀའ་རྙོག་སེལ་ཐབས་སུ་དབུ་མའི་ལམ་འདི་དངོས་ཡོད་གནས་ཚུལ་དང་མཐུན་ཞིང་། ད་ལྟའི་དུས་རབས་འདིར་གཅིག་ལ་གཅིག་བརྟེན་མ་བྱས་པར་ཁེར་རྐྱང་སྡོད་ཐབས་མེད་པའི་གནས་སྟངས་དང་། སྐད་ཡིག་གཅིག་དང་གོམས་སྲོལ་གཅིག མདོར་ན་བོད་རིགས་ཡོངས་རྫོགས་རང་སྐྱོང་གཅིག་གི་འོག་ཏུ་ཚུད་ནས་མི་རིགས་ཀྱི་ལས་དོན་འཛིན་སྐྱོང་སྤེལ་གསུམ་ཚགས་ཚུད་དང་རྒྱུན་འཁྱོངས་ཡོང་རྒྱུར་ཕན་པ། དཔལ་འབྱོར་དང་། དངོས་པོའི་ཡར་རྒྱས། དེང་རབས་ཀྱི་དཔལ་ཡོན་ཡར་རྒྱས་ཡོང་རྒྱུར་ཕྱི་དངོས་པོའི་ཕན་ཡོན་ཡོད་པ་དང༌། བོད་དོན་བདེན་མཐའ་གསལ་ཐབས་ཀྱི་གཞི་རྒྱ་ཆེ་བའི་ལས་དོན་ཁག་ལ་རྒྱལ་སྤྱིའི་ནང་རྒྱབ་སྐྱོར་ཐོབ་དང་ཐོབ་བཞིན་པ་རྒྱུན་གནས་ཡོང་བར་ཕན་པ་ཡོད་པ། ལྷག་པར་བོད་ནང་ལེགས་བྱང་དང་། ཁོར་ཡུག མི་རིགས་ཀྱི་ངོ་བོ་དང་བཅས་པ་རྩ་གཏོར་འགྲོ་གཞིའི་ཛ་དྲག་གི་དཀའ་ངལ་ལས་སྐྱོབ་ཐུབ་པའི་ཕན་པ་ཡོད་པ་སོགས་མདོ་དོན་དབུ་མའི་ལམ་གྱི་སྲིད་བྱུས་ལ་མོས་མཐུན་རྒྱབ་སྐྱོར་གནང་མཁན་ཚོས་རྒྱུ་མཚན་གྱི་ལམ་ནས་སྲིད་བྱུས་འདི་ལ་རྒྱབ་སྐྱོར་དང་། མོས་མཐུན། གོ་རྟོགས་རྙེད་པ་བཅས་གནང་ནས་དུས་རྒྱུན་ནས་མི་རིགས་གཞན་དང་། རང་རེའི་མི་མང་རྣམས་ལ་གོ་རྟོགས་སྤེལ་ཐབས་གནང་ནས་གང་མགྱོགས་གཞིས་བྱེས་མཉམ་འཛོམས་ཀྱི་སྐྱིད་པའི་ཉི་མ་ཤར་བར་བརྩོན་པ་མི་དོར་བའི་སྒོ་ནས་ནུས་པ་འདོན་སྤེལ་གནང་དགོས། ཞེས་གསལ་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
