གཞི་རིམ་མི་མང་རེ་འབོད་ཚོགས་པས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་དང་འབྲེལ་བའི་བཅའ་ཁྲིམས་བསྐྱར་བཅོས་གནང་བ་ནི་ལོ་རྒྱུས་ཀྱི་ཟིན་ཐོ་གསར་པ་ཞིག་ཡིན་པས་བོད་མི་མང་སྤྱི་འཐུས་ཚང་མར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན་སྐོར་བརྗོད་སོང་།
དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་ལས་ཉིན་མཐའ་མའི་ཉིན། འཛིན་སྐྱོང་བཀའ་ཤག་དང་སྤྱི་འཐུས་རྒྱུན་ལས་ཀྱིས་ཁུར་འོང་བའི་ཁྲིམས་ཞིབ་པ་དང་འབྲེལ་བའི་བཅའ་ཁྲིམས་དོན་ཚན་རེ་གསུམ་པའི་ནང་གསེས་བསྐྱར་བཅོས་གཉིས་དེ་སྤྱི་འཐུས་ ༣༥ ཡི་ཚད་མཐོའི་རྒྱབ་སྐྱོར་ཐོག་མང་མོས་ཀྱིས་གཏན་འབེབས་གནང་སོང་བ་དང་། བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ་དང་འབྲེལ་བའི་བཅའ་ཁྲིམས་དོན་ཚན་སོ་བདུན་པ་སྟེ། དཔལ་རྒྱལ་བ་ཇོ་ནང་པའི་ཆོས་བརྒྱུད་ལ་ཆོས་བརྒྱུད་གཞན་དང་གཅིག་མཚུངས་ཀྱི་ཐོབ་ཐང་དགོས་པའི་བསྐྱར་བཅོས་ཁྲིམས་འཆར་དེ་མར་ཟགས་སོང་།
ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་འོས་ཆོས་དང་འབྲེལ། བཅའ་ཁྲིམས་དོན་ཚན་རེ་གསུམ་པའི་ནང་གསེས་ ༢ པའི་ག་བ་བསྐྱར་བཅོས་ཀྱི་ཚིག་བརྗོད་གསར་བའི་ནང་། ཁྲིམས་ཁང་ཞིག་ནང་ལོ་ལྔའི་རིང་མུ་མཐུད་ཁྲིམས་དཔོན་གྱི་ལས་འཁུར་བྱས་མྱོང་བའམ། ཡང་ན་ཉུང་མཐར་ལོ་བཅུའི་རིང་ཁྲིམས་རྩོད་མཁས་པའི་གྲས་སུ་ཚུད་པ་བཅས་ལ་མ་གཏོགས་འོས་བབ་ཡོད་པ་མ་ཡིན། འོན་ཀྱང་བཅའ་ཁྲིམས་འདི་ཉིད་ལག་ལེན་འགོ་འཛུགས་བྱས་པ་ནས་བཟུང་ལོ་བཞི་བཅུའི་རིང་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་བཅས་བསྐོ་གཞག་དགོས་རིགས་ནང་གསེས་འདིའི་ཆ་རྐྱེན་ཁག་ལ་བསྟུན་གནང་མི་དགོས་ཞེས་པ་མང་མོས་ཐོག་ནས་གཏན་འབེབས་གནང་སོང་།
ཁྲིམས་ཞིབ་པ་འཕོ་འགྱུར་དང་འབྲེལ་ནས་བཅའ་ཁྲིམས་དོན་ཚན་རེ་གསུམ་པའི་ནང་གསེས་ ༤ བ་བསྐྱར་བཅོས་ཀྱི་ཚིག་བརྗོད་གསར་བའི་ནང་། སྤྱི་འཐུས་ལྷན་ཚོགས་ཀྱི་སྤྱི་འཐུས་རྩ་འབོར་གསུམ་ཆ་གཉིས་ཡན་གྱིས་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་བཅས་སུ་རུང་འཕོ་འགྱུར་དགོས་པའི་གྲོས་ཆོད་བཞག་སྟེ་འཕོ་འགྱུར་བྱེད་དགོས་བྱུང་ན་ལས་དེ་མིན་ཁྲིམས་ཞིབ་པ་ཆེ་བའི་ལས་རྒྱུན་ལོ་ལྔའམ། རང་ལོ་དྲུག་ཅུ་རེ་ལྔ་ཧྲིལ་པོ་ལོན་པ་གང་སྔའི་བར་ཡིན། ཁྲིམས་ཞིབ་པ་གཞན་གཉིས་ལས་རྒྱུན་ལོ་ལྔའམ་རང་ལོ་དྲུག་ཅུ་རེ་ལྔ་ཧྲིལ་པོ་ལོན་པ་གང་སྔའི་བར་ལས་འཁུར་རྒྱུན་འཛིན་བྱ་རྒྱུ། འོན་ཀྱང་རང་ལོ་དྲུག་ཅུ་རེ་ལྔ་ཧྲིལ་པོ་མ་བརྒལ་བར་ཁྲིམས་ཞིབ་པ་ཆེ་བར་འོས་འདེམས་བྱུང་ན་དགག་བྱ་མེད། ཅེས་གསལ་འདུག
དེ་བཞིན་འཛིན་སྐྱོང་བཀའ་ཤག་གིས་ཁུར་འོང་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ་དང་འབྲེལ་བའི་བཅའ་ཁྲིམས་དོན་ཚན་སོ་བདུན་པ་བསྐྱར་བཅོས་ཐད། སྤྱི་འཐུས་ཆོས་གྲགས་རྒྱ་མཚོ་ལགས་དང་། དགེ་བཤེས་གངས་རི་ལགས་སོགས་ཀྱིས། ཇོ་ནང་ཆོས་བརྒྱུད་དེ་རང་སྐྱ་འཕེལ་བའི་ཐུན་མོང་མ་ཡིན་པའི་ཆོས་བརྒྱུད་ཅིག་ཡིན་པའི་ཁར། བཙན་བྱོལ་བོད་མིའི་དམངས་གཙོའི་ལམ་ལུགས་ཀྱི་དགོངས་དོན་བཞིན་ཆོས་བརྒྱུད་གཞན་དག་དང་གཅིག་མཚུངས་ཀྱི་ཐོབ་ཐང་དང་སྤྱི་འཐུས་ལྷན་ཚོགས་སུ་ཞབས་སྟེགས་གནང་དགོས་པའི་རེ་སྐུལ་དང་རྒྱབ་སྐྱོར་སོགས་བྱས་ཏེ། སྤྱི་འཐུས་ཁག་ཅིག་གིས་དྲང་ལྡོག་གཉིས་ཀྱི་ཐོག་ནས་གླེང་སློང་བྱས་མཐར། སྤྱི་འཐུས་ ༢༡ གི་རྒྱབ་སྐྱོར་ལས་མ་ཐོབ་པར་རྩ་འབོར་གྱི་བརྒྱ་ཆ་གསུམ་ལས་གཉིས་མ་ལོན་སྟབས་མར་ཟགས་སོང་། བཅའ་ཁྲིམས་དོན་ཚན་སོ་བདུན་པ་བསྐྱར་བཅོས་གྲོས་འཆར་ནང་། བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ་གཤམ་གསལ། རྙིང་མ་དང་། བཀའ་བརྒྱུད། ས་སྐྱ། དགེ་ལུགས། གཡུང་དྲུང་བོན། ཇོ་ནང་བཅས་དྲུག་པོ་རེ་རེ་ནས་འོས་བསྡུ་བྱས་པའི་སྤྱི་འཐུས་གཉིས་རེ། ཅེས་གསལ་འདུག
བཅའ་ཁྲིམས་དོན་ཚན་རེ་གསུམ་པ་སྟེ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་དང་འབྲེལ་བའི་བཅའ་ཁྲིམས་བསྐྱར་བཅོས་གཉིས་ལ་མང་མོས་ཀྱིས་རྒྱབ་སྐྱོར་ཐོབ་རྗེས། དྷ་སའི་ཁུལ་དུ་ལས་འགུལ་སྤེལ་མུས་ཡིན་པའི་གཞི་རིམ་མི་མང་རེ་འབོད་ཚོགས་པའི་ཚོགས་གཙོ་བསྟན་འཛིན་གཡང་དཀར་ལགས་ཀྱིས། དམངས་གཙོའི་ཀ་བ་གསུམ་བརྟན་པོ་བཟོ་བའི་རེ་བ་བརྒྱབ་པ་བཞིན་དེ་རིང་འགྲུབ་པ་རེད། འདི་ནི་ལོ་རྒྱུས་ཤིག་ཆགས་ཡོད། མི་མང་རྒན་གཞོན་བར་གསུམ་གྱིས་ལྷག་བསམ་རྣམ་དག་གིས་ཕྱག་ལས་གནང་བར་ཐུགས་རྗེ་ཆེ། དེ་བཞིན་བཀའ་ཤག་དང་བོད་མི་མང་སྤྱི་འཐུས་ཡོངས་ཀྱིས་འགན་ཁུར་པར་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། དེ་བཞིན་གཞི་རིམ་མི་མང་རེ་འབོད་ཚོགས་པའི་རྒྱུན་ལས་ཚེ་བརྟན་ཕུན་ཚོགས་ལགས་ཀྱིས། དེ་རིང་བཙན་བྱོལ་བོད་མིའི་ཉིན་མ་བཟང་པོ་ཞིག་རེད། ལོ་ཤས་རིང་ཁྲིམས་ཞིབ་པ་དང་ཁྲིམས་ཞིབ་པ་གཞན་ཕེབས་ཐུབ་མེད་པའི་དཀའ་ངལ་བྱུང་བ་རེད། དེ་རིང་ཁྲིམས་ཞིབ་པ་དང་གཞན་ཕེབས་ཐུབ་པ་བྱུང་ཡོད་པ་དང་བསྟུན། གཞི་རིམ་མི་མང་དང་རྒྱུན་ལས་ཚང་མས་ཚབ་བྱས་ཏེ་བོད་མི་མང་སྤྱི་འཐུས་ཚང་མར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། བོད་ཆོལ་ཁ་གསུམ་སྐྱིད་ན་སྐྱིད་མཉམ་དང་སྡུག་ན་སྡུག་མཉམ་ཡིན། ༧གོང་ས་རྒྱལ་བ་རིན་པོ་ཆེ་མཆོག་གི་དགོངས་པ་བཞིན་གོམ་པ་མདུན་སྤོ་བྱ་རྒྱུ་ཡིན། ཞེས་བརྗོད་བྱུང་།
གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
