དེ་རིང་གྲོས་ཚོགས་ཀྱི་ལས་ཉིན་བརྒྱད་པའི་ཐོག་དྷ་སྟེང་བོད་ཁྱིམ་གྱི་འགན་འཛིན་ཚུལ་ཁྲིམས་རྡོ་རྗེ་ལགས་ལས་བྱེད་འདེམས་ལྷན་གྱི་ཚོགས་མིར་བསྐོ་གཞག་གནང་སོང་།
དྷ་སྟེང་བོད་ཁྱིམ་གྱི་འགན་འཛིན་ཚུལ་ཁྲིམས་རྡོ་རྗེ་ལགས་ལས་བྱེད་འདེམས་ལྷན་གྱི་ཚོགས་མིར་བསྐོས། བོད་ཀྱི་དུས་བབ་གསར་ཁང་གི་པར། ༢༠༢༤།༩།༡༩
དེ་རིང་བོད་མི་མང་སྤྱི་འཐུས་སྐབས་བཅུ་བདུན་པའི་གྲོས་ཚོགས་ཚོགས་དུས་བརྒྱད་པའི་ལས་ཉིན་བརྒྱད་པའི་ཚོགས་ཐུན་དང་པོའི་སྟེང་། ལས་བྱེད་འདེམས་བསྐོ་ལྷན་ཁང་གི་ཚོགས་མི་འོས་བསྡུ་བྱས་པའི་ཁྲོད། རྣམ་རྒྱལ་གྲྭ་ཚང་གི་གྲྭ་ཐུབ་བསྟན་ཡར་འཕེལ་ལགས་སུ་འོས་གྲངས་ ༡༨ དང་། དྷ་སྟེང་བོད་ཁྱིམ་གྱི་འགན་འཛིན་ཚུལ་ཁྲིམས་རྡོ་རྗེ་ལགས་སུ་འོས་གྲངས་ ༢༤ ། འོས་གྲངས་གཉིས་རྩིས་མེད་དུ་བཏང་ནས། དྷ་སྟེང་བོད་ཁྱིམ་གྱི་འགན་འཛིན་ཚུལ་ཁྲིམས་རྡོ་རྗེ་ལགས་ལས་བྱེད་འདེམས་བསྐོ་ལྷན་ཁང་གི་ཚོགས་མིར་འདེམས་ཐོན་བྱུང་སོང་།
ཚུལ་ཁྲིམས་རྡོ་རྗེ་ལགས་ནི་བོད་ནང་གི་གྲོང་གསེབ་ཆུང་ཆུང་ཞིག་ནས་ཡིན་ཞིང་། ཕྱི་ལོ་ ༡༩༩༢ ལོར་འཛིན་རིམ་བཅུ་གཉིས་ཐོན། ཕྱི་ལོ་ ༡༩༩༤ ལོར་ (ST. Xavier’s College) མཐོ་སློབ་ནས་དཔལ་འབྱོར་རིག་པ་སློབ་ཐོན་དང༌། ཕྱི་ལོ་ ༡༩༩༤ ལོར་དགེ་རྒན་དང་དགེ་རྒན་འོས་སྦྱོང་རྗེས་ ༡༩༩༦ ནས་ ༢༠༠༥ བར་དྷ་སྟེང་བོད་ཁྱིམ་གཞི་རིམ་སློབ་གྲྭའི་སྤྱི་ཚོགས་རིག་གནས་ཀྱི་སློབ་དགེ་དང༌། ཕྱི་ལོ་ ༢༠༠༦ ནས་ ༢༠༡༢ བར་སློབ་གྲྭ་ཆེ་བའི་དགེ་ཆེ། ཕྱི་ལོ་ ༢༠༡༢ ལོར་བོད་ཁྱིམ་སྤྱི་ཁྱབ་ཡིག་ཚང་གིས་གྷོ་པལ་པུར་བོད་ཕྲུག་ཁྱིམ་སྡེའི་འགན་འཛིན་དུ་བསྐོ་གཞག་གནང་སྟེ། ཕྱི་ལོ་ ༢༠༡༧ བར་འགན་འཛིན་གྱི་ལས་འཁུར་ཞུས། ཕྱི་ལོ་ ༢༠༡༧ ལོར་དྷ་སྟེང་བོད་ཕྲུག་ཁྱིམ་སྡེའི་འགན་འཛིན་དུ་བསྐོ་གཞག་གནང་ནས། ད་བར་དྷ་སྟེང་བོད་ཕྲུག་ཁྱིམ་སྡེའི་འགན་འཛིན་གྱི་ལས་འཁུར་ཞུ་མུས་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
