སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་སྐབས་བཅའ་ཁྲིམས་བསྐྱར་བཅོས་ཀྱི་ལས་དོན་རིགས་ཚགས་ཚུད་གྲུབ་ནས་ཚོགས་དུས་མཇུག་སྒྲིལ་སོང་།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་མཇུག་སྡོམ་གསུང་བཤད་གནང་སྐབས། བོད་ཀྱི་སྒྲ་བརྙན་ཐད་གཏོང་ནས་བླངས། ༢༠༢༤།༩།༡༩
དེ་རིང་དབུས་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༣ དང་ ༢༠༢༤ ལོའི་ལས་བསྡོམས་ཚོགས་དུས་བརྒྱད་པ་དེ་དངོས་སུ་མཇུག་བསྒྲིལ་ཡོད་ཅིང་། ད་ལན་གྱི་ཚོགས་དུས་ཐོག་འདས་པའི་མི་ལོ་གསུམ་ཙམ་རིང་འགག་པའི་ཆེས་མཐོའི་ཁྲིམས་ཞིབ་ཁང་གི་བཅའ་ཁྲིམས་དེ་བསྐྱར་བཅོས་ཐུབ་པ་ནི། བོད་མི་རྣམས་ལ་དགའ་དགོས་པའི་གནད་དོན་དམིགས་བསལ་ཞིག་ཡིན་པའི་ཁར། ༧རྒྱལ་བ་དགྱེས་པའི་མཆོད་སྤྲིན་ཞིག་ཡིན་སྐོར་དང་། ཚོགས་ཐུན་འདིའི་རིང་སྤྱི་འཐུས་རྣམས་ཀྱིས་ལུས་ངག་གཉིས་ཀྱི་ཐོག་ནས་གང་གཟབ་གཟབ་གནང་སྟེ་བོད་སྤྱི་པའི་ལས་དོན་ཐད་ཧུར་ཐག་གནང་ཡོད་སྐོར་སོགས་གསུངས་སོང་།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་མཇུག་སྡོམ་གསུང་བཤད་གནང་སྐབས། ད་རེས་ཁྲིམས་བཟོ་ལས་དོན་ནང་བཀའ་ཤག་གི་བཅའ་ཁྲིམས་བསྐྱར་བཅོས་གཅིག་དང་སྤྱི་འཐུས་རྒྱུན་ལས་ནས་གཞུང་འབྲེལ་བཅའ་ཁྲིམས་གཅིག་འཁུར་ཡོད་པ་རེད། བཅའ་ཁྲིམས་དེ་གཉིས་བརྒྱུད་ནས་ང་ཚོའི་སྤྱི་ཚོགས་ནང་དཀའ་ངལ་འཕྲད་པ་དེ་དག་གཙང་མ་ཆགས་ཡོད། དེའི་ཐོག་ལ་བཀུར་འོས་སྤྱི་འཐུས་རྣམ་པ་དང་འཛིན་སྐྱོང་བཀའ་ཤག་གིས་མཉམ་རུབ་ཀྱིས་འགན་ཆེན་པོ་བཞེས་པར་ཐུགས་རྗེ་ཆེ་ཞུ་རྒྱུ་དང་། དེའི་ཐད་ལས་རིམ་རྣམ་གཞག་བཏོན་པའི་ནང་༧གོང་ས་རྒྱལ་བ་རིན་པོ་ཆེ་མཆོག་ལ་སྙན་གསེང་ཞུ་དགོས་པ་དེ་གོ་སྐབས་ཤིག་ཞུས་ནས་ཞུ་ཆོག ༧གོང་ས་མཆོག་སྐུ་ཚེ་སྐལ་བརྒྱར་བཞུགས་སླད་ཐུགས་སྨོན་གནང་ཐུབ་ན་ཏན་ཏན་ཐུགས་ཕན་གསོ་ཡི་རེད་བསམ་གྱི་འདུག་ལ། དེ་རིང་གི་ལས་དོན་དེ་རླབས་ཆེན་པོ་རེད་བསམ་གྱི་ཡོད། གནད་དོན་དེ་སྤྱི་ཚོགས་སྤྱི་ཡོངས་ཀྱི་དཀའ་ངལ་ཞིག་ཆགས་སོང་བས། ཉམས་མྱོང་དེ་གཞིར་བཞག་ནས་མ་འོངས་པར་གནད་དོན་དེ་འདྲ་མི་ཡོང་རྒྱུའི་འགན་ཁུར་དགོས་གལ་ཆེ་བ་དང་། དམངས་གཙོ་གོང་འཕེལ་དང་ཚགས་ཚུད་ཡོང་བར་ཚང་མས་དགོངས་པ་ཆེན་པོ་བཞེས་དགོས། ཞེས་གསུངས་སོང་།
ཡང་ཁོང་གིས། དེ་སྔ་ཚོགས་ཆུང་གིས་མཛད་གཙོ་རྣམ་པ་འཕོ་འགྱུར་དང་འབྲེལ་བའི་སྒྲིག་གཞི་བསྐྱར་བཅོས་ཤིག་བསྣམས་པ་རེད། དེར་ཚོགས་ཆུང་ལ་བསྐྱར་དུ་བཏང་ནས་ད་ལྟ་སྙན་ཐོ་དང་འཆར་ཟིན་བསླེབས་ཡོད་པ་རེད། ད་ལན་གྲོས་ཚོགས་ཀྱི་དུས་ཚོད་འདི་དོག་པོ་ཞེ་དྲགས་ཆགས་ནས། དེའི་ཐོག་བགྲོ་གླེང་དང་དྲི་བ་དྲི་ལན་དེ་དག་ཚོགས་གཙོར་འདོད་བློ་ཁེངས་པ་མ་བྱུང་ཞུས་པ་ཡིན་ན་ཏག་ཏག་སྡོད་ཀྱི་མི་འདུག འདོད་བློ་ཁེངས་པ་ཞིག་མ་བྱུང་བར་བརྟེན་ཐབས་ལམ་ཞིག་བཙལ་ནས་བསྐྱར་དུ་ཚོགས་ཆུང་ལ་གཏང་རྒྱུ་བྱས་པ་ཡིན། མ་འོངས་པར་ཚོགས་ཆུང་ནང་ལོགས་ལ་ཕྱག་ལས་གནང་མཁན་རྣམ་པས་ཕྱག་ལས་འདི་ལ་ཏན་ཏན་གྲུབ་འབྲས་ཐོན་ཐུབ་ཀྱི་རེད་བསམ་ནས་བསྐོ་གཞག་བྱེད་དུས་ཡིན་ཅིག་མིན་ཅིག་ཞལ་བཞེས་གནང་རོགས་གནང་ཞུ་རྒྱུ་ཡིན། གང་ཡིན་ཟེར་ན། དེས་གྲོས་ཚོགས་ནང་ལས་དོན་ཚགས་ཚུད་པོ་དང་ཚད་ལྡན་ཡོང་བར་ཕན་ཐོགས་འདུག གཞན་ཡང་། སྤྱི་འཐུས་རྒྱུན་ལས་ཀྱི་ཕོགས་ཀྱི་ཚད་རིམ་གྱི་སྒྲིག་གཞི་དེ་གཏན་འབེབས་བྱས་ཏེ། དེ་རིང་གྲོས་ཚོགས་ལ་སྙན་གསེང་བཀའ་འཁྲོལ་ཞུས་ནས་ལག་ལེན་བསྟར་བཞིན་པའི་གནས་སྟངས་ཆགས་ཡོད། ད་ལན་གྲོས་ཚོགས་ནང་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དང་འདེམས་ལྷན་ཚོགས་མི་གཉིས་འདེམས་ཐོན་བྱུང་བར་འཚམས་འདྲི་ཞུ་རྒྱུ་དང་། མ་འོངས་པར་ལས་དོན་ཐམས་ཅད་ལམ་ལྷོང་ཡོང་རྒྱུའི་སྨོན་འདུན་ཞུ་རྒྱུ་ཡིན། ཞེས་གསུངས་སོང་།
ཡང་སྤྱི་འཐུས་ཚོགས་གཙོ་མཆོག་གིས་བདེ་སྲུང་ལས་ཁུངས་ཀྱི་ལས་བསྡོམས་དང་འབྲེལ་བའི་ཐོག་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཕྱྭ་སྐོར་ལ་བགྲོ་གླེང་མང་པོ་བྱུང་ཡོད་ཅིང་། འཛིན་སྐྱོང་ནས་འགན་ཁུར་བཞེས་རྒྱུ་གལ་ཆེན་པོ་རེད། ༧གོང་ས་མཆོག་ནི་བོད་པ་ཙམ་མ་ཟད་འཛམ་གླིང་གི་ལྟ་བའི་མིག་དང་ཁོག་པའི་སྙིང་ལྟ་བུ་ཆགས་ཡོད་པས། བོད་པ་སྤྱི་བོ་གནམ་བསྟན་ཡོངས་ཀྱིས་བཀའ་དྲིན་དྲིན་བཟོ་བྱ་ཤེས་རྒྱུ་གལ་ཆེན་པོ་རེད། ལོ་རྗེས་མར་ཕྱི་ལུགས་ལྟར་དགུང་ལོ་དགུ་བཅུར་ཕེབས་ཀྱི་ཡོད་པས་བཀའ་ཤག་གི་ངོས་ནས་ལས་འཆར་མང་པོ་ཡོད་པ་མ་ཟད། གྲོས་ཚོགས་ཀྱིས་ཀྱང་དེའི་ཐད་དགོངས་པ་བཞེས་རྒྱུ་གལ་ཆེན་རེད། ཅེས་དང་། དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་སྐོར་གལ་གནད་དུ་བརྩི་དགོས། རྒྱ་གཞུང་གིས་༧སྐུའི་ཡང་སྲིད་སྐོར་ལ་སྲིད་ཇུས་མང་པོ་ལག་བསྟར་བྱས་ཏེ་དྲིལ་བསྒྲགས་བྱེད་བཞིན་འདུག དཔལ་ལྡན་ལྷ་མོའི་བཀའ་ལུང་ཕེབས་ཡོད་པ་བཞིན་བོད་པའི་སྤྱི་ཚོགས་ནང་དུ་མ་འོངས་བའི་ལས་དོན་བྱེད་ཕྱོགས་ཐོག་ཁ་གསལ་ཚད་ལྡན་ཞིག་བཟོ་དགོས་ཀྱི་འདུག ཅེས་གསུངས་སོང་།
མཇུག་ཏུ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། དེང་གི་ཆར་རྒྱལ་སྤྱིའི་ཁྱོན་ཡོངས་ཀྱི་ཆབ་སྲིད་ཀྱི་འགྱུར་འགྲོས་དང་། ལྷག་པར་དེང་གི་ཆར་རྒྱ་ནག་ནང་ཆབ་སྲིད་ཀྱི་འགྱུར་བ་ཧ་ཅང་ཆེན་པོ་འགྲོ་མུས་ཡིན་པའི་ཁར། རྒྱལ་སྤྱིའི་སྤྱི་ཚོགས་ནང་བོད་པ་ལ་རྒྱབ་སྐྱོར་བྱེད་མཁན་ཇེ་མང་དུ་འགྲོ་མུས་ཡིན་སྟབས། བོད་མི་རྣམས་ལ་བོད་དོན་འཐབ་རྩོད་ཀྱི་ཐད་ནས་གོ་སྐབས་ཤིག་ཡོང་ངེས་ཡིན་པས། བོད་མི་རྣམས་ཀྱིས་མཐུན་ལམ་ལྡན་པའི་ཐོག་ནས་མཉམ་རུབ་ཀྱི་ནུས་པ་བསྟན་རྒྱུ་དེ་ཧ་ཅང་གལ་ཆེན་པོ་ཡིན་པས། ཚང་མས་མཉམ་རུབ་ཀྱིས་བོད་དོན་བདེན་མཐའ་སེལ་ཐབས་དང་། བཙན་བྱོལ་སྤྱི་ཚོགས་ཀྱི་བདེ་ཐབས་ཀྱི་གནད་དོན་ཐད་འགན་འཁྲི་དང་ལེན་བྱ་རྒྱུ་དེ་ཧ་ཅང་གལ་ཆེན་ཡིན་སྐོར་དང་། འདི་ལོའི་ཕྱི་ཟླ་ ༡༠ ནང་སྤྱི་འཐུས་རྣམས་ལ་ཡུ་རོབ་ཁུལ་དུ་བོད་དོན་ཞུ་གཏུག་གི་ལས་གཞི་ཞིག་བསྒྲིགས་ཡོད་པ་མ་ཟད། འདི་ལོའི་ཕྱི་ཟླ་ ༡༢ ནང་རྒྱ་གར་རྒྱལ་ས་ལྡི་ལི་རུ་སྤྱི་འཐུས་ཆ་ཚང་ཚང་འཛོམས་ཀྱིས་ཐབས་ཇུས་ཚོགས་འདུ་དང་རྒྱ་གར་གྲོས་ཚོགས་འཐུས་མི་རྣམས་ལ་བོད་དོན་ཞུ་གཏུག་གི་ལས་འགུལ་ཞིག་བསྒྲིགས་ཡོད་སྐོར་སོགས་གསུངས་སོང་།
གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
