༧ཏཱའི་སི་ཏུ་རིན་པོ་ཆེ་མཆོག་གིས་བདུན་ཕྲག་གཉིས་རིང་ཨ་རུ་ན་ཅལ་མངའ་སྡེའི་མོན་རྟ་དབང་ཁུལ་དུ་ཆོས་ཕྱོགས་ཀྱི་མཛད་འཕྲིན་སྐྱོང་མུས་ཡིན་འདུག
ཟླ་འདིའི་ཕྱི་ཚེས་ ༢༠ ནས་ཕྱི་ཟླ་ ༡༠ ཚེས་ ༣ བར་བདུན་ཕྲག་གཉིས་རིང་༧བྱམས་མགོན་ཀྭན་ཏིང་ཏཱི་ཏཱའི་སི་ཏུ་རིན་པོ་ཆེ་མཆོག་རྒྱ་གར་ཨ་རུ་ན་ཅལ་མངའ་སྡེར་ཆིབས་བསྒྱུར་ཐོག་མར་བསྐྱངས་ཏེ་ཆོས་ཕྱོགས་ཀྱི་མཛད་འཕྲིན་སྐྱོང་བཞིན་ཡོད་པ་ལྟར། དེ་རིང་ཕྱི་ཚེས་ ༢༣ ཉིན་མོན་རྟ་དབང་ཡིད་དགའ་ཆོས་འཛིན་དགོན་པ་རུ། ༧ཏཱའི་སི་ཏུ་རིན་པོ་ཆེ་མཆོག་ནས་མོན་རྟ་དབང་ཁུལ་གྱི་དད་ལྡན་མི་མང་ལ་ཚེ་དབང་དང་བཀའ་ཆོས་བསྩལ་འདུག
སི་ཏུ་རིན་པོ་ཆེ་མཆོག་ནས། མོན་རྟ་དབང་ནི་༧གོང་ས་རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་བ་མཆོག་བོད་ནས་རྒྱ་གར་ནང་ཕེབས་སའི་ས་ཚིགས་ཤིག་དང་། རྒྱལ་དབང་སྐུ་ཕྲེང་དྲུག་པ་ཚངས་དབྱངས་རྒྱ་མཚོ་མཆོག་འཁྲུངས་སའི་ཡུལ། དེ་བཞིན་གཏེར་སྟོན་པདྨ་གླིང་པ་དང་། རྒྱལ་བོ་ཀཱ་ལཱ་དབང་བོ། མཁའ་འགྲོ་འགྲོ་བ་བཟང་མོ་སོགས་བྱོན་སའི་ཡུལ་ཆགས་ཡོད་པས། ཐོག་མཐའ་བར་གསུམ་དུ་དགེ་བའི་ཡུལ་རྩ་ཆེན་པོ་རེད། ཁྱེད་ཚོས་ང་ལ་ཆོས་བཤད་དགོས་ལབ་ཀྱི་ཡོད། ཡིན་ནའང་། ༧གོང་ས་རྒྱལ་བ་རིན་པོ་ཆེ་མཆོག་ནས་ཁྱེད་ཚོར་བཀའ་ཆོས་མང་པོ་གསུངས་ཚར་ཡོད། ༧མགོན་པོ་མཆོག་ལས་ང་ལ་གང་ཡང་བཤད་རྒྱུ་མེད། ངས་ཁྱེད་ཚོར་དྲན་གསོ་ཚུལ་དུ་བཤད་རྒྱུ་ཡིན། ཞེས་གསུངས་སོང་།
ཡང་རིན་པོ་ཆེ་མཆོག་ནས། ང་ཚོའི་མི་ཚེ་ནང་གི་དཀའ་ངལ་ཚང་མ་ཆུང་ཆུང་རེད། དཀའ་ངལ་ཆུང་ཆུང་སེལ་མ་ཐུབ་པར་ཆེན་པོ་ཆགས་པ་རེད། མི་གསོན་པོ་བསྡད་ཚེ་དཀའ་ངལ་ཆུང་བ་སླ་བོའི་ཐོག་ནས་སེལ་ཐུབ་པ་ཞིག་རེད། དཔེར་ན་མིག་གིས་ས་ཆ་རྒྱ་ཆེན་པོ་མཐོང་ཐུབ་ཡོད་ཀྱང་། མཛུབ་མོས་བཀབས་ཚེ་ཅི་ཡང་མཐོང་གི་མེད། མཛུབ་མོས་མ་བཀབས་ཚེ་མིག་གིས་ཆ་ཚང་མཐོང་ཐུབ་ཀྱི་ཡོད། ཅེས་དང་། འཕགས་པ་སྤྱན་རས་གཟིགས་ནི་དུས་གསུམ་གྱི་སངས་རྒྱས་ཐམས་ཅད་ཀྱི་ཡབ་རེད། སངས་རྒྱས་བའི་རྩ་བ་དེ་སྟོང་པ་དང་སྙིང་རྗེ་ཟུང་དུ་འཇུག་པའི་བྱང་ཆུབ་ཀྱི་སེམས་རེད། ༧གོང་ས་རྒྱལ་བ་རིན་པོ་ཆེ་མཆོག་སྤྱན་རས་གཟིགས་ཀྱི་སྤྲུལ་བ་རེད། ༧གོང་ས་མཆོག་ནས་རྟག་ཏུ་སེམས་པ་བཟང་པོ་བྱོས་གསུང་གིན་ཡོད། དོན་དུ་བྱང་ཆུབ་སེམས་བསྐྱེད་སྲུང་དགོས་པ་དྲན་གསོ་བྱེད་ཀྱི་ཡོད། ཅེས་གསུངས་སོང་།
ཁ་སང་ཕྱི་ཚེས་ ༢༢ ཉིན་མོན་རྟ་དབང་ཀཱ་ལཱ་དབང་པོ་ཚོགས་ཁང་དུ། རྟ་དབང་རྫོང་སྲིད་གཞུང་དང་། མོན་པ་མི་མང་ཚོགས་པ། མོན་པ་སློབ་ཕྲུག་མཐུན་ཚོགས་བཅས་ཀྱི་གོ་སྒྲིག་འོག ༧ཏཱའི་སི་ཏུ་རིན་པོ་ཆེ་མཆོག་ནས་བཟང་སྤྱོད་ཀྱིས་དཀའ་ངལ་གདོང་ལེན་བྱེད་ཕྱོགས་སྐོར་ནས་བླང་དོར་བཀའ་སློབ་བསྩལ་ཡོད་ཅིང་། སྐབས་དེར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་དང་། མངའ་སྡེའི་གནད་ཡོད་མི་སྣ། གཞུང་ཞབས་པ། གཞོན་སྐྱེས་སློབ་ཕྲུག དད་ལྡན་སེར་སྐྱ་མི་མང་བཅས་འཛོམས་ཡོད་འདུག
༧ཏཱའི་སི་ཏུ་རིན་པོ་ཆེ་མཆོག་ནས། ང་རང་ཨ་རུ་ན་ཅལ་མངའ་སྡེའི་ནང་ཡོང་བ་ཐེངས་དང་པོ་ཡིན། བོད་དུ་སྐྱེས་ཏེ་ལོ་ལྔའི་ཐོག་འབྲུག་ཡུལ་དུ་ཡོང་བ་ཡིན། འབྲུག་རྒྱལ་བོའི་ཁྱིམ་རྒྱུད་དང་མི་མང་བཅས་སུ་ཐུག་པའི་གོ་སྐབས་བྱུང་ལ། སྐབས་དེར་བརྙན་ཞིག་ལས་༧གོང་ས་རྒྱལ་བ་རིན་པོ་ཆེ་མཆོག་མོན་རྟ་དབང་དུ་ཆིབས་བསྒྱུར་བསྐྱངས་བ་གོ་ཞིང་། མོན་རྟ་དབང་གི་དད་ལྡན་མི་མང་དང་གནས་ཆེན་སོགས་ཀྱི་སྐོར་ནས་གོ་མྱོང་། དེའི་རྗེས་ང་རང་རྒྱ་གར་ནང་འཚར་ལོངས་བྱུང་བ་རེད། ད་ལྟ་ང་རང་ལོ་ ༧༡ ཡིན། དེ་ནི་ལོ་ངོ་མང་པོའི་སྔོན་ལ་རེད། ཅེས་གསུངས་སོང་། དེ་བཞིན་ཁོང་གིས། ཆོས་ལུགས་ལ་མ་བརྟེན་པའི་བཟང་སྤྱོད་དང་། སློབ་གཉེར་བའི་མི་ཚེ་ཁྲོད་ཆོས་ལུགས་ཀྱི་གལ་གནད། བཟང་སྤྱོད་ཀྱིས་དཀའ་ངལ་ལ་གདོང་ལེན་བྱེད་ཕྱོགས་ཐོག་བཀའ་སློབ་བསྩལ་སོང་།
མཛད་རིམ་ལྟར་ན། ཟླ་འདིའི་ཕྱི་ཚེས་ ༢༤ ཉིན་ཏཱའི་སི་ཏུ་རིན་པོ་ཆེ་མཆོག་རྟ་དབང་ནས་བྱང་མོན་དཔལ་སྤུངས་དགོན་པར་ཕེབས་རྒྱུ་དང་། ཕྱི་ཚེས་ ༢༥ ཉིན་མོན་སྐྱིད་ལྷ་དགོན་ཀརྨ་པ་གསུམ་པ་རང་བྱུང་རྡོ་རྗེའི་ལྷ་ཁང་དུ་གནས་གཟིགས། ཕྱི་ཚེས་ ༢༦ ཉིན་མོན་དཔལ་སྤུངས་བྱང་ཆུབ་ཆོས་འཁོར་གླིང་དགོན་པ་གསར་བཞེངས་ཕྱི་ནང་རྟེན་བཅས་ལ་བཀྲ་ཤིས་པའི་རབ་གནས་དང་ཐུགས་སྨོན་གནང་རྒྱུ། ཕྱི་ཚེས་ ༢༧ ཉིན་མོན་དཔལ་སྤུངས་དགོན་པ་དང་དད་ལྡན་མི་མང་ནས་བརྟན་བཞུགས་འབུལ་རྒྱུ། ཕྱི་ཚེས་ ༢༨ ཉིན་མོན་དཔལ་སྤུངས་དགོན་པ་ནས་འབུམ་སྡེ་ལར་ཕེབས་རྒྱུ། ཕྱི་ཚེས་ ༢༩ ཉིན་འབུམ་སྡེ་ལ་དད་ལྡན་མི་མང་ཡོངས་ལ་ཚེ་དབང་དང་གསུང་ཆོས་བཀའ་དྲིན་བསྐྱང་རྒྱུ། ཕྱི་ཚེས་ ༣༠ ཉིན་འབུམ་སྡེ་ལར་དགོན་རྩེ་དགའ་ལྡན་རབ་རྒྱས་གླིང་དུ་གནས་གཟིགས། དེ་བཞིན་ཕྱི་ཟླ་ ༡༠ ཚེས་ ༡ ཉིན་བསྟན་འཛིན་སྒང་དད་ལྡན་མི་མང་ལ་ཚེ་དབང་གནང་རྒྱུ། ཕྱི་ཚེས་ ༢ བསྟན་འཛིན་སྒང་དཔལ་ལྡན་རྒྱུད་སྟོད་གྲྭ་ཚང་ནས་གྷོ་ཧ་ཊིར་ཕེབས་གནང་རྒྱུ། ཕྱི་ཚེས་ ༣ ཉིན་གྷོ་ཝ་ཧ་ཊི་ནས་མཁའ་ལམ་བརྒྱུད་རྒྱལ་ས་ལྡི་ལིར་ཕེབས་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་།
