བོད་རྒྱའི་དཀའ་རྙོག་སེལ་བར་རྒྱ་ནག་དང་མཉམ་དུ་སྐད་ཆ་མ་བཤད་པར་འགྲོ་ས་མེད།

བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་རྒྱ་གར་བྱང་ཤར་གྱི་བོད་མིའི་གཞིས་ཁུལ་དུ་འཚམས་གཟིགས་ཐེངས་གཉིས་པ་གནང་བཞིན་འདུག

ཟླ་འདིའི་ཕྱི་ཚེས་ ༢༤ ནས་ཕྱི་ཟླ་ ༡༠ ཚེས་ ༥ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་ཨུཏྟརཱ་ཁནྜ་ཁུལ་བོད་མིའི་ས་ཁུལ་ཁག་དང་། ཧི་མ་ཅལ་མངའ་སྡེའི་སིར་མོར་རྫོང་ཁོངས་བོད་མིའི་གཞིས་ཆགས་ཁག་ལ་གཞུང་འབྲེལ་འཚམས་གཟིགས་དང་།  ༸སྐྱབས་མགོན་ས་སྐྱ་༸གོང་ས་ཁྲི་ཆེན་རྡོ་རྗེ་འཆང་མཆོག་གི་༸སྐུའི་གྱ་སྟོན་བརྟན་བཞུགས་མཛད་སྒོར་ཕེབས་བཞུགས་གནང་རྒྱུ་ཡིན་པ་ལྟར། ཁ་སང་སྔ་དྲོ་སྲིད་སྐྱོང་མཆོག་ཧི་མ་ཅལ་མངའ་སྡེའི་སིར་མོར་རྫོང་ཁོངས་སྤུ་རུ་ཝ་ལ་ས་སྐྱ་གཞིས་ཆགས་ལ་འཚམས་གཟིགས་སུ་ཕེབས་སྐབས་ས་གནས་མགོ་འཛིན་བསྟན་འཛིན་རྣམ་རྒྱལ་ལགས་དང་། ས་གནས་འཐུས་ཚོགས་ཀྱི་ཚོགས་གཙོ་ན་རྫི་ཚེ་རིང་བསྟན་པ་ལགས། ས་གནས་ཀྱི་གཞུང་དང་གཞུང་ཁོངས་མ་ཡིན་པའི་ཚོགས་སྡེ་ཁག་གི་མི་སྣ། དེ་བཞིན་ས་གནས་མི་མང་བཅས་ནས་ཕེབས་བསུ་ཞུས་ཡོད་འདུག སྲིད་སྐྱོང་མཆོག་གིས་སྤུ་རུ་ཝ་ལར་རྟེན་གཞི་བྱས་པའི་མ་དགོན་བཤད་གྲྭ་དང་། དཔལ་ས་སྐྱའི་སྒྲོལ་མ་ཕོ་བྲང་།  སྤུ་རུ་ཝ་ལ་སཾ་བྷོ་ཊ་ཉིན་སློབ། ས་གནས་འཕྲོད་བསྟེན་སྨན་ཁང་། ས་གནས་མགོ་འཛིན་ལས་ཁུངས་བཅས་སུ་གཟིགས་སྐོར་གནང་འདུག

སྐབས་དེར་ས་གནས་མི་མང་ཚོགས་ཁང་དུ་སྲིད་སྐྱོང་སྤེན་པ་ཚེ་རིང་མཆོག་ནས། ༧གོང་ས་རྒྱལ་བ་རིན་པོ་ཆེ་མཆོག་ནས་དགུང་ལོ་ ༡༡༣ ལྷག་བཞུགས་པའི་ཐུགས་བསྐྱེད་བརྟན་པོའི་བཀའ་གནང་བཞིན་ཡོད་པ་ལྟར། ང་ཚོ་མང་ཚོགས་ཀྱི་ངོས་ནས་བླ་མའི་བཀའ་བཞིན་བསྒྲུབ་ཚེ། དངོས་གནས་རྒྱལ་བ་དགྱེས་བའི་མཆོད་སྤྲིན་ཆགས་འགྲོ་བ་རེད། བླ་མས་ཀྱང་སྐུ་ཚེ་བརྟན་ཚེ་འགྲོ་བ་རིགས་དྲུག་ལ་ཕན་ཐོགས་པར་དགོངས་ཀྱི་རེད། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་བཞིན་ལས་དོན་མ་བསྒྲུབ་ཚེ། བླ་མ་ཡིན་ཡང་ཐུགས་ཕམ་ཡོང་སྲིད་པ་རེད། མང་ཚོགས་ཀྱི་ངོས་ནས་བསྟན་བདག་བླ་ཆེན་རྣམ་པའི་བཀའ་དགོངས་བཞིན་བསྒྲུབ་རྒྱུ་གལ་ཆེན་པོ་རེད། ཅེས་དང་། བོད་པ་བཙན་བྱོལ་དུ་འབྱོར་ནས་བོད་མི་ཡོངས་རྫོགས་བོད་མི་རིགས་ཀྱི་ངོ་བོ་གཅིག་ཏུ་སྐྲུན་མཁན་ནི་རྒྱལ་དབང་སྐུ་ཕྲེང་བཅུ་བཞི་བ་ཆགས་ཡོད། འཛམ་གླིང་གི་བཙན་བྱོལ་སྤྱི་ཚོགས་ནང་དམངས་གཙོ་ཀ་བ་གསུམ་གྱི་ཆ་རྐྱེན་ཚང་བ་བོད་པ་གཅིག་པོ་ལས་མེད་པས། དེ་ནི་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་ཉག་གཅིག་ཡིན་པ་མ་བརྗེད་རོགས། ཞེས་གསུངས་སོང་།

ཡང་སྲིད་སྐྱོང་མཆོག་ནས། བོད་རྒྱའི་དཀའ་རྙོག་དེ་དབུ་མའི་ལམ་དང་འཚེ་བ་མེད་པའི་ཐོག་ནས་སེལ་དགོས་ཚེ། རྒྱ་ནག་དང་མཉམ་དུ་སྐད་ཆ་མ་བཤད་པར་འགྲོ་ས་མེད་པ་ཞིག་རེད། བོད་མི་ཚང་མས་རྒྱ་ནག་དང་དམག་འཁྲུག་བརྒྱབ་ཀྱང་ཐོབ་རྒྱུ་གང་ཡང་མེད། རྒྱ་ནག་གཞུང་གིས་སོ་སོའི་མི་རིགས་གནམ་སྡེ་སྒོ་མོ་ཆེ་ནས་གསོད་སྐབས་ཐེ་ཚོམ་བྱུང་མེད། ད་ལྟའི་དུས་སུ་བོད་ནང་དུ་རྒྱ་གཞུང་གིས་མི་བསད་པ་ཉུང་དུ་ཕྱིན་ཡོད་ཀྱང་། རྒྱ་གཞུང་གི་སྲིད་ཇུས་ཀྱིས་བོད་མི་རིགས་ཀྱི་ངོ་བོ་རྩ་མེད་དུ་གཏོང་བཞིན་ཡོད། རྒྱ་གཞུང་དང་མཉམ་དུ་སྐད་ཆ་མ་བཤད་པར་ཐབས་ལམ་མེད་པ་ཤེས་དགོས། གནས་སྟངས་རྒྱུས་ལོན་བྱས་པའི་ཐོག་ནས་རེ་བ་འོས་འཚམ་ཞིག་རྒྱག་དགོས། རེ་བ་མཐོ་བའི་ཐོག་དཀའ་ངལ་བརྒྱབ་སྟེ་ལས་དོན་མ་འགྲུབ་ཚེ་བློ་ཞུམ་པའི་གནས་སྟངས་ཤིག་ལ་ཆགས་འགྲོ་བ་རེད། དེ་སྔོན་བྷི་བྷི་སི་གསར་ཁང་ལ་རྒྱ་གཞུང་དང་འབྲེལ་བ་བྱེད་བཞིན་ཡོད་ཀྱང་རེ་བ་གང་ཡང་མེད་པར་བཤད་ཡོད། ད་ལྟའི་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་བོད་མི་རིགས་ཀྱི་སྐད་ཡིག་དང་། ཆོས་ལུགས། རིག་གཞུང་བཅས་རྩ་གཏོར་གཏོང་བའི་སྲིད་ཇུས་འཛིན་གྱི་འདུག རེ་བ་མེད་ཀྱང་རྒྱ་གཞུང་དང་འབྲེལ་བ་བྱེད་དོན་ནི་ཕུགས་རྒྱང་རིང་པོའི་ཐོག་བསམ་བློ་གཏོང་བཞིན་ཡོད། བོད་པ་བཙན་བྱོལ་དུ་འབྱོར་ནས་ལོ་ངོ་ ༦༥ ཕྱིན་ཡོད་པ་དང་། རྒྱ་གཞུང་གིས་བོད་ནང་བཙན་འཛུལ་བྱས་ཏེ་ལོ་ ༧༠ ལྷག་ཕྱིན་ཡོད་ཀྱང་། འཛམ་གླིང་སྟེང་དུ་བོད་ཀྱི་གནད་དོན་འཇའ་བཞིན་མ་ཡལ་བར་ལྷག་བསྡད་ཡོད། རྒྱ་གཞུང་དང་འབྲེལ་བ་བྱེད་བཞིན་ཡོད་ཀྱང་རེ་བ་གང་ཡང་མེད། དུས་ཚོད་ཀྱིས་རྒྱུ་རྐྱེན་ཡག་པོ་འཛོམས་ཚེ་ལམ་ཁ་དེའི་ཐོག་གོམ་པ་བརྒྱབ་ཆོག་པའི་བསམ་བློ་གཏོང་བཞིན་ཡོད། ཅེས་གསུངས་སོང་། དེ་བཞིན་སྲིད་སྐྱོང་མཆོག་གིས་མི་མང་ཁག་ཅིག་གི་དྲི་བར་ལན་འདེབས་གསལ་བཤད་གནང་འདུག

ཉིན་རྒྱབ་སྲིད་སྐྱོང་སྤེན་པ་ཚེ་རིང་མཆོག་གིས་སྤོན་ཊ་ཆོལ་གསུམ་གཞིས་ཆགས་སུ་རྟེན་གཞི་བྱས་པའི་དཔལ་ཞྭ་ལུ་དགོན་པ་དང་། སྤོན་ཊ་སཾ་བྷོ་ཊ་ཉིན་སློབ། ས་གནས་མགོ་འཛིན་ལས་ཁུངས། ས་འཐུས་ཚོགས་ཁང་། བཟོ་ཚོགས་ལས་ཁུངས་སོགས་སུ་གཟིགས་སྐོར་གནང་སྟེ། ས་གནས་ཚོགས་ཁང་དུ་ས་གནས་མི་མང་ལ་གསུང་བཤད་གནང་ཡོད། སྲིད་སྐྱོང་མཆོག་ནས། བོད་མིའི་སྒྲིག་འཛུགས་ཀྱི་དབུས་ཀྱི་ལས་ཁུངས་ཁག་གི་སྒྲོམ་གཞི་དང་ལས་དོན་བྱེད་ཕྱོགས་ལ་ལེགས་བཅོས་དང་། དུས་རབས་ཀྱི་འགྱུར་བ་དང་བསྟུན་ནས་ཡིག་ཆ་ཁག་གྲངས་འཛིན་འཕྲུལ་རིག་ཏུ་བཤེར་འབེབས་གནང་གི་ཡོད་པ་མ་ཟད། ཆོས་རིག་ལས་ཁུངས་ཀྱི་ལས་འཆར་འོག་བོད་བརྒྱུད་ནང་བསྟན་གྱི་གཞུང་ལུགས་དཔེ་ཆ་ཇི་ཡོད་བཤེར་འབེབས་ཀྱིས་གྲངས་འཛིན་དཔེ་མཛོད་ཀྱི་ངོ་བོར་སྐྲུན་བཞིན་ཡོད་པ་གསལ་བཤད་གནང་བའི་ཐོག ས་གནས་ཀྱི་ལས་ཁུངས་སོ་སོས་ཀྱང་ས་ཆ་དང་ཁྲིམས་མཐུན་དེབ་སྐྱེལ་ཡིག་ཆ་ཁག་གཅེས་ཉར་དགོས་གལ་དང་། ཡུལ་ཁྲིམས་བརྩི་སྲུང་དང་ཡུལ་མི་མཉམ་འཆམ་མཐུན་དགོས་རྒྱུ་གལ་ཆེན་པོ་ཡིན། ཞེས་གསུངས་འདུག

དེ་བཞིན་ཨོ་གླིང་གི་བོད་མི་ཞིག་གིས་༧གོང་ས་མཆོག་ལ་མཚན་སྨད་ཞུས་བའི་སྐོར་ལ་སྲིད་སྐྱོང་མཆོག་ནས། ༧གོང་ས་མཆོག་ལ་གཞི་མེད་མཚན་སྨད་བྱེད་མཁན་སུ་ཡིན་རུང་བོད་མིའི་སྒྲིག་འཛུགས་ནས་གདོང་ལེན་བྱ་རྒྱུ་ཡིན། ཨོ་གླིང་གི་བོད་མི་ཞིག་གིས་༧མགོན་པོ་མཆོག་ལ་མཚན་སྨད་ཚབས་ཆེ་ཞུས་པར་བོད་མིའི་སྒྲིག་འཛུགས་ནས་ཡུལ་ཁྲིམས་དང་བསྟུན་ནས་གདོང་ལེན་བྱ་རྒྱུ་ཡིན་པ་མ་ཟད། བོད་མིའི་སྒྲིག་འཛུགས་ཀྱི་དཀའ་ཉེན་གདོང་ལེན་ཚོགས་ཆུང་བསྐོ་འཛུགས་ཀྱིས་གནད་དོན་དེའི་སྐོར་དཔྱད་ཞིབ་བྱ་རྒྱུ་ཡིན་ལ། བོད་མི་རྣམས་ཀྱིས་གཏམ་འཆལ་རིགས་ལ་ཉན་འཇོག་དང་བརྒྱུད་བསྐུར་མི་བྱེད་པའི་ལམ་སྟོན་གནང་འདུག

གསར་འགོད་པ། བྱམས་པ་ཚེ་རིང་།