འཕགས་བོད་འབྲེལ་མཐུད་ལས་ཁང་གིས་རྒྱ་གར་གྱི་གྲོང་ཁྱེར་མོམ་བྷའེ་རུ་བོད་དོན་གོ་རྟོགས་ཀྱི་ལས་འགུལ་སྤེལ་ཡོད་འདུག
Tashi Dekyi, Coordinator of the ITCO, giving a courtesy call to Shri Varsha Eknath Gaikwad ji, Congress Member of Parliament from Mumbai.
རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁང་གི་གོ་སྒྲིག་འོག རྒྱ་གར་གྱི་གྲོང་ཁྱེར་མོམ་བྷའེ་རུ་ཆབ་སྲིད་པ་དང་ཤེས་ཡོན་མི་སྣ། གསར་འགོད་པ། གློག་བརྙན་བཟོ་སྐྲུན་པ་སོགས་དང་ཐུག་འཕྲད་ཀྱིས་བོད་དོན་ཞུ་གཏུག་དང་། མང་ཚོགས་ལ་བོད་དོན་གོ་རྟོགས་ཀྱི་ལས་འགུལ་སྤེལ་ཡོད་འདུག
བོད་ཀྱི་ཆེད་ཉིན་གཅིག་ (A Day for Tibet Program) ཅེས་པའི་ལས་གཞིའི་འོག་མོམ་བྷའེ་གསར་པའི་ (Navi Mumbai) ནང་རྟེན་གཞི་བྱས་པའི་ཆཱ་ཏྲ་པ་ཏི་ཤི་ཝ་ཇི་མཐོ་རིམ་སློབ་གྲྭ་ (Chhatrapati Shivaji High School) རུ་བོད་དེ་རྒྱ་གར་ལ་གལ་ཆེན་པོ་ཡིན་པའི་རྒྱུ་མཚན་ཞེས་པའི་བརྗོད་གཞིའི་ཐོག་བོད་དོན་གོ་རྟོགས་ཀྱི་ལས་འགུལ་སྤེལ་འདུག སྐབས་དེར་སྐུ་མགྲོན་གཙོ་བོ་རྒྱ་གར་གྱི་ཀོང་རེ་སི་ཆབ་སྲིད་ཚོགས་པའི་ (Nationalist Congress Party) སྤྱི་ཁྱབ་དྲུང་ཆེ་སན་ཏོ་ཤི་རོ་ཧི་དྷ་སི་ (Santosh Rohidas Gharat) ལགས་དང་། སློབ་གྲྭ་དེའི་སློབ་སྤྱི་ཀོང་གྷི་རི་ (Kongere) ལགས་གཙོས་པའི་དགེ་ལས་རྣམ་པ། དེ་བཞིན་སློབ་ཕྲུག་ ༧༠ ཙམ་མཉམ་ཞུགས་གནང་ཡོད་འདུག བོད་དེ་རྒྱ་གར་ལ་གལ་ཆེན་པོ་ཡིན་པའི་རྒྱུ་མཚན་ཞེས་པའི་བརྗོད་གཞི་དང་འབྲེལ་ནས་འཕགས་བོད་འབྲེལ་མཐུད་ལས་ཁང་གི་འབྲེལ་མཐུད་པ་བཀྲ་ཤིས་བདེ་སྐྱིད་ལགས་ཀྱིས། བོད་དང་རྒྱ་གར་བར་གྱི་ཆོས་དང་རིག་གཞུང་། ཆབ་སྲིད་ཀྱི་འབྲེལ་ལམ་སྐོར་དང་། རྒྱ་གར་ལ་བོད་མཐོ་སྒང་གི་ཁོར་ཡུག་གི་གལ་གནད། དེ་བཞིན་བོད་དོན་ལ་རྒྱ་གར་གྱི་རྒྱབ་སྐྱོར་གནང་རྒྱུ་གལ་ཆེན་ཡིན་སྐོར་འགྲེལ་བརྗོད་གནང་ཡོད་འདུག
འཕགས་བོད་འབྲེལ་མཐུད་ལས་ཁང་གིས་མོམ་བྷའེ་ནང་ཡོད་པའི་མེ་བྷུབ་གློག་བརྙན་བཟོ་སྐྲུན་ཁང་ (Mehboob Studios) དུ་རྒྱ་གར་གྱི་གློག་བརྙན་བཟོ་སྐྲུན་པ་དང་། འཁྲབ་སྟོན་པ། གློག་བརྙན་འགྲེམས་སྤེལ་པ་སོགས་དང་ཐུག་འཕྲད་ཀྱིས། རྒྱ་གར་མང་ཚོགས་ལ་བོད་དོན་གོ་རྟོགས་སྤེལ་བར་གློག་བརྙན་གྱི་བརྒྱུད་ལམ་གལ་ཆེན་པོ་ཡིན་པར་བརྟེན། གློག་བརྙན་བརྒྱུད་བོད་དོན་བསྟན་ཐབས་གནང་རྒྱུའི་འབོད་སྐུལ་ཞུས་ཡོད་འདུག་ལ། རྒྱ་གར་གྱི་ཀོང་རེ་སི་ཆབ་སྲིད་ཚོགས་པའི་ (Nationalist Congress Party) སྤྱི་ཁྱབ་དྲུང་ཆེ་སན་ཏོ་ཤི་རོ་ཧི་དྷ་སི་ (Santosh Rohidas Gharat) ལགས་དང་། རྒྱ་གར་གྲོས་ཚོགས་འཐུས་མི་ཝར་ཤ་ (Varsha Eknath Gaikwad) ལགས་དང་ཐུག་འཕྲད་གནང་ཡོད་འདུག
སྐབས་དེར་གྲོས་ཚོགས་འཐུས་མི་ཝར་ཤ་ལགས་ཀྱིས། འགྲོ་བ་མིའི་ཐོབ་ཐང་དང་བོད་ཀྱི་རིག་གཞུང་སྲུང་སྐྱོབ་བྱེད་ཕྱོགས་ཐད་བོོད་དོན་ལ་རྒྱབ་སྐྱོར་ཤུགས་ཆེན་གནང་རྒྱུའི་འདོད་པ་ཡོད་པ་དང་། བོད་དོན་རྒྱབ་སྐྱོར་མུ་མཐུད་གནང་རྒྱུ་ཡིན་སྐོར་སོགས་བརྗོད་འདུག དེ་རྗེས་འབྲེལ་མཐུད་པ་བཀྲ་ཤིས་བདེ་སྐྱིད་ལགས་ཀྱིས། མོམ་བྷའེ་རུ་ཡོད་པའི་བོད་མི་སུད་ཚོང་བ་རྣམས་ཀྱི་བདེ་སྡུག་ཞུ་འབོད་བྱས་ཏེ། བོད་མི་སུད་ཚོང་བའི་དཀའ་ངལ་སེལ་བའི་འབོད་སྐུལ་ཞུས་ཡོད་འདུག
གསར་འགོད་པ། བསྟན་འཛིན་ཕུར་བུ།
