རྒྱ་གར་གྱི་དགུན་དུས་གྲོས་ཚོགས་དང་བསྟུན་བོད་ཀྱི་གཞུང་ཁོངས་མ་ཡིན་པའི་ཚོགས་པ་དྲུག་གིས་གྲུབ་པའི་བོད་དོན་ཞུ་གཏུག་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་གིས་ལྡི་ལི་ཁུལ་དུ་ཞུ་གཏུག་གི་ལས་འགུལ་སྤེལ་བཞིན་འདུག
བོད་ཀྱི་གཞུང་ཁོངས་མ་ཡིན་པའི་ཚོགས་པ་དྲུག་གི་སྐུ་ཚབ་ཀྱིས་གྲུབ་པའི་ཚོགས་ཆུང་ཞིག་གིས་ལྡི་ལི་རུ་བོད་དོན་ཞུ་གཏུག་གི་ལས་འགུལ་སྤེལ་མུས་ཡིན་འདུག པར་འབྲེལ་ཡོད་ཀྱིས་བསྐུར། ༢༠༢༤།༡༡།༢༨
རྒྱ་གར་གྱི་རྒྱལ་ས་ལྡི་ལི་རུ་གྲོས་ཚོགས་གོང་འོག་གཉིས་དགུན་དུས་ཀྱི་གྲོས་ཚོགས་འཚོག་མུས་ཡིན་པ་དང་བསྟུན། ཟླ་འདིའི་ཕྱི་ཚེས་ ༢༥ ནས་ ༢༩ བར་བོད་ཀྱི་གཞུང་ཁོངས་མ་ཡིན་པའི་ཚོགས་པ་དྲུག་སྟེ། དབུས་བོད་ཀྱི་གཞོན་ནུ་ལྷན་ཚོགས་དང་དབུས་བོད་ཀྱི་བུད་མེད་ལྷན་ཚོགས། བོད་རང་བཙན་སློབ་ཕྲུག་ཚོགས་པ། རྒྱལ་སྤྱིའི་བོད་དོན་འབྲེལ་མཐུད་ལས་ཁང་། བོད་རྒྱལ་ཡོངས་མང་གཙོ་ཚོགས་པ། འཚེ་བ་མེད་པའི་ཐབས་ལམ་གྱི་གདམ་གའི་ཐེབས་རྩ་ཁང་བཅས་ཀྱིས་གྲུབ་པའི་ཚོགས་ཆུང་ཞིག་གིས་དགོས་འདུན་ཚན་གསུམ་གྱི་ཐོག་ནས་བོད་དོན་ཞུ་གཏུག་གི་ལས་འགུལ་སྤེལ་བཞིན་འདུག་ལ། དེ་རིང་ཕྱི་ཚེས་ ༢༨ བར་རྒྱ་གར་གྱི་ཆབ་སྲིད་ཚོགས་པ་ཁག་ ༧ ལྷག་གི་གྲོས་ཚོགས་འཐུས་མི་ ༢༡ ལ་མཇལ་འཕྲད་ཀྱིས་བོད་དོན་ཞུ་གཏུག་གནང་འདུག
དེའི་ཐད་དབུས་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསོད་ནམས་ཚེ་རིང་ལགས་ཀྱིས་འདི་གའི་གསར་འགོད་པར། ད་ལན་བོད་དོན་ཞུ་གཏུག་མཐུན་ཚོགས་ཀྱིས་རྒྱ་གར་རྒྱལ་ས་ལྡི་ལི་ཁུལ་དུ་བོད་དོན་ཞུ་གཏུག་གི་ལས་འགུལ་སྤེལ་མུས་ཡིན། ཞུ་གཏུག་དེ་ཐོག་མ་བདུན་འདིའི་རེས་གཟའ་ཟླ་བ་ནས་མགོ་བཙུགས་ཡོད་ཅིང་། དེ་རིང་ཕྱི་ཚེས་ ༢༨ བར་རྒྱ་གར་གྱི་གྲོས་ཚོགས་གོང་འོག་གཉིས་ཀྱི་ཆབ་སྲིད་ཚོགས་པ་བདུན་གྱི་འཐུས་མི་ ༢༡ དང་མཇལ་འཕྲད་དང་རྒྱ་གར་གྲོས་ཚོགས་སུ་བོད་དོན་གླེང་སློང་གནང་དགོས་པའི་རེ་སྐུལ་ཞུ་ཡོད། ཅེས་བརྗོད་བྱུང་།
ཡང་ཁོང་གིས། ད་ལན་གྱི་ཞུ་གཏུག་སྐབས་བོད་དེ་རྒྱ་ནག་གཞུང་གིས་བཙན་འཛུལ་བྱས་པའི་རྒྱལ་ཁབ་ཅིག་གི་ངོ་བོའི་ཐོག་ནས་རྒྱབ་སྐྱོར་དང་རྒྱ་གར་གྲོས་ཚོགས་སུ་བོད་དོན་གླེང་སློང་དང་། ལྷག་པར་གྲོས་ཚོགས་འཐུས་མི་དག་གིས་བོད་དང་རྒྱ་གར་གྱི་མཐའ་མཚམས་ཡིན་པ་ལས་རྒྱ་དཀར་ནག་གི་མཐའ་མཚམས་མིན་པའི་ཐད་ལ་གླེང་སློང་དགོས་པ། དེ་བཞིན་སང་ལོ་༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་གཏོང་གི་ཡོད་སྟབས། རྒྱ་གར་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་མཛད་རྗེས་དང་། ལྷག་པར་དུ་རྒྱ་གར་གྱི་གནའ་བོའི་རིག་གཞུང་གོང་སྤེལ་གྱི་སླད་དུ་ངལ་བ་འཛད་མེད་བསྐྱོན་པར་རྒྱ་གར་གྲོས་ཚོགས་སུ་གླེང་སློང་དང་ངོས་འཛིན་དགོས་པ། དེ་བཞིན་བོད་ནང་གི་ཛ་དྲག་གི་གནས་བབ་དང་། རྒྱ་ནག་གཞུང་གིས་བོད་ཀྱི་རིག་གཞུང་རྩ་གཏོར་གཏོང་བའི་སྲིད་ཇུས་ཐད་སེམས་འཚབ་ཆེན་པོས་གླེང་སློང་དང་། རྒྱ་ནག་གཞུང་ལ་གནོན་ཤུགས་སྤྲོད་དགོས་པ་སོགས་དགོས་འདུན་དོན་ཚན་གསུམ་གྱི་ཐོག་ནས་བོད་དོན་ཞུ་གཏུག་མུ་མཐུད་དུ་བྱེད་མུས་ཡིན། ཞེས་བརྗོད་བྱུང་།
བོད་དོན་ཞུ་གཏུག་གི་ཚོགས་ཆུང་དེའི་དམིགས་ཡུལ་གཙོ་བོ་ནི་རྒྱ་གར་གྱི་གྲོས་ཚོགས་འཐུས་མི་དང་གནད་ཡོད་མི་སྣའི་ཁྲོད་བོད་དོན་གོ་རྟོགས་སྤེལ་ཐབས་བྱ་རྒྱུ་ཡིན་པའི་མུར། ད་ལན་རྒྱ་གར་གྱི་དགུན་དུས་ཀྱི་གྲོས་ཚོགས་ཚོགས་དུས་དང་བསྟུན་བོད་དོན་ཞུ་གཏུག་གི་ལས་འགུལ་ཐོག་མ་དེ་སྤེལ་མུས་ཡིན་པའི་ཁར། ད་ལན་གྱི་ཞུ་གཏུག་ལས་འགུལ་དེའི་ཁྲོད། རྒྱལ་སྤྱིའི་བོད་དོན་འབྲེལ་ལས་ཁུངས་ཀྱི་ཁོར་ཡུག་རིག་པའི་འབུམ་རམས་པ་བློ་བཟང་དབྱངས་འཛོམས་ལགས་དང་། དབུས་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསོད་ནམས་ཚེ་རིང་ལགས། དབུས་བོད་ཀྱི་བུད་མེད་ལྷན་ཚོགས་ཀྱི་ཟུང་དྲུང་ཆོས་ཉིད་སྒྲོལ་མ་ལགས། བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་དགེ་འདུན་ཚེ་དཔལ་ལགས། བོད་རང་བཙན་སློབ་ཕྲུག་ཚོགས་པའི་ལས་འགུལ་འགན་འཛིན་བསྟན་འཛིན་ལེགས་ལྡན་ལགས། འཚེ་བ་མེད་པའི་ཐབས་ལམ་གྱི་གདམ་གའི་ཐེབས་རྩ་ཁང་གི་ཉམས་ཞིབ་པ་རྒན་པ་བསྟན་འཛིན་དགྲ་འདུལ་ལགས་བཅས་ཀྱིས་མཉམ་ཞུགས་གནང་གི་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
