བོད་ཀྱི་གཞོན་ནུ་ལྷན་ཚོགས་ཀྱི་སྦག་སྦག་སྐོར་སྐྱོད་པ་རྣམས་ཀྱིས་ཉིན་གྲངས་བདུན་རིང་སྤྱི་ལེ་ ༣༥༠ ལྷག་ལ་སྐོར་སྐྱོད་བྱས་ཏེ་ཨི་ཊ་ན་གྷར་ནང་འབྱོར་སྐབས་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་ནས་ཐུག་འཕྲད་གནང་ཡོད་འདུག
ཟླ་འདིའི་ཕྱི་ཚེས་ ༢༢ ཉིན་ནས་ཟླ་གཉིས་རིང་དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག འཕགས་བོད་གཉིས་ཀྱི་ས་མཚམས་མོན་རྟ་དབང་གི་འབུམ་ལ་ནས་མགོ་བཙུགས་ཏེ་རྒྱ་གར་གྱི་མངའ་སྡེ་ཉི་ཤུའི་ནང་ལམ་ཐག་སྤྱི་ལེ་ ༡༥༠༠༠ རིང་བོད་དོན་དྲིལ་བསྒྲགས་ཀྱི་སྦག་སྦག་སྐོར་སྐྱོད་གནང་བཞིན་ཡོད་པ་ལྟར། ཁ་སང་དགོང་མོར་ཨ་རུ་ན་ཅལ་མངའ་སྡེའི་མེའོ་ཆོས་འཕེལ་གླིང་ས་གནས་སུ་འབྱོར་སྟེ། དེ་རིང་ས་གནས་གཞོན་ནུའི་གོ་སྒྲིག་འོག་བོད་རིགས་མང་ཚོགས་ལ་ཐེངས་འདིའི་ལས་འགུལ་གྱི་རྒྱབ་ལྗོངས་དང་། དམིགས་ཡུལ། དེ་བཞིན་བོད་ནང་གི་ཛ་དྲག་གི་གནས་སྟངས་ཐོག་ངོ་སྤྲོད་གནང་། ད་ལྟ་ལས་འགུལ་བ་རྣམས་ཏི་ཛུ་ས་གནས་སུ་འབྱོར་འདུག
དབུས་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས་འདི་གའི་གསར་འགོད་པར། ད་ལྟའི་བར་དུ་སྦག་སྦག་སྐོར་སྐྱོད་ཀྱི་ལས་འགུལ་ཧ་ཅང་ཡག་པོ་བྱུང་སོང་། ཐེངས་འདིའི་ལས་འགུལ་འཕགས་བོད་གཉིས་ཀྱི་ས་མཚམས་འབུམ་ལ་ནས་མགོ་བཙུགས་པ་རེད། དེ་ཡང་ང་ཚོས་རྒྱ་ནག་གི་དམག་མིའི་མདུན་དུ་ལངས་ཏེ་༧གོང་ས་མཆོག་སྐུ་ཚེ་ཁྲི་ལོར་བརྟན་པར་ཤོག བོད་ཀྱི་བདག་པོ་བོད་མི་ཡིན། བོད་རྒྱལ་ལོ། ཞེས་སྐད་འབོད་དང་། ཕ་ཡུལ་བོད་ཀྱི་ཕྱོགས་སུ་གང་བློ་མའི་ཞལ་འདོན་སྐྱོར་བ་སོགས་མགོ་འཛུགས་ཡག་པོ་བྱུང་སོང་། དེ་བཞིན་ལས་འགུལ་ནང་རྒྱ་གར་བྱང་ཤར་ཁུལ་གྱི་བློན་ཆེན་གཉིས་དང་། མངའ་སྡེའི་གྲོས་ཚོགས་འཐུས་མི་གཅིག འཕགས་བོད་མཛའ་འབྲེལ་ཚོགས་པའི་སྤྱི་ཁྱབ་དྲུང་ཆེ་བཅས་འཛོམས་ཏེ་བོད་དོན་འཐབ་རྩོད་ཐོག་མུ་མཐུད་རྒྱབ་སྐྱོར་དང་། བོད་ཀྱི་གཞོན་ནུ་ལྷན་ཚོགས་ཀྱིས་དུས་དང་འཚམ་པའི་ལས་འགུལ་སྤེལ་བར་བསྔགས་བརྗོད་གནང་སོང་། ཞེས་འགྲེལ་བརྗོད་གནང་བྱུང་།
ཡང་ཁོང་གིས། ཁ་སང་སྦག་སྦག་སྐོར་སྐྱོད་ཀྱི་ཉིན་དྲུག་པའི་ཉིན་ཨ་རུ་ན་ཅལ་མངའ་སྡེའི་ཨེ་ཊ་ན་གྷར་ས་གནས་འབྱོར་སྐབས། སྦག་སྦག་སྐོར་སྐྱོད་པ་རྣམས་ཀྱིས་༧གོང་ས་མཆོག་ལ་དམ་ཚིག་གཡོ་བ་མེད་པ་དང་། བོད་དོན་ཐོག་རྒྱབ་སྐྱོར་བྱེད་མཁན་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་ལ་མཇལ་བཅར་ཞུས་ཏེ། བོད་དོན་འཐབ་རྩོད་དང་སྦག་སྦག་སྐོར་སྐྱོད་སྐོར་ལ་བཀའ་མོལ་ཞུ་རྒྱུ་བྱུང་ལ། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་ངོས་ནས་བོད་དོན་འཐབ་རྩོད་དང་བོད་མི་ཡོངས་ལ་ཁ་ཞེ་གཉིས་མེད་ཀྱིས་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད་ཅིང་། མངའ་སྡེའི་སྤྱི་ཁྱབ་བློན་ཆེན་མཆོག་ནས་ཨེ་ཊ་ན་གྷར་ནས་སྦག་སྦག་སྐོར་སྐྱོད་ཀྱི་ལས་འགུལ་དབུ་འབྱེད་གནང་སོང་། དེ་བཞིན་རྟ་དབང་གི་གྲོས་ཚོགས་འཐུས་མིར་མཇལ་བཅར་ཞུས་ཏེ་ལས་འགུལ་དང་འབྲེལ་བའི་ལས་འཆར་སྙན་སེང་ཞུས་ཡོད། ཟླ་གཉིས་རིང་རྒྱ་གར་གྱི་མངའ་སྡེ་ཁག་ ༢༠ ནང་མངའ་སྡེའི་སྤྱི་ཁྱབ་བློན་ཆེན་དང་། མངའ་སྡེའི་གྲོས་ཚོགས་འཐུས་མི། དབུས་གྲོས་ཚོགས་འཐུས་མི་སོགས་སུ་མཇལ་བཅར་ཞུ་རྒྱུ་ཡིན་པ་མ་ཟད། ས་གནས་མང་ཚོགས་ལ་ཐུག་འཕྲད་བྱས་ཏེ་བོད་དོན་འཐབ་རྩོད་དང་། བོད་ནང་གི་ཛ་དྲག་གནས་སྟངས་ངོ་སྤྲོད། གཞན་གསར་འགྱུར་བརྒྱུད་ལམ་ཁག་ཏུ་བོད་དོན་དྲིལ་བསྒྲགས་བྱ་རྒྱུ་ཡིན། ཞེས་འགྲེལ་བརྗོད་གནང་བྱུང་།
ཐེངས་འདིའི་སྦག་སྦག་སྐོར་སྐྱོད་ལས་འགུལ་ཁྲོད་རྒྱ་གཞུང་གིས་ཁྲིམས་མེད་ལུགས་མེད་ཀྱི་ཐོག་ནས་བོད་ཀྱི་ཆོས་དང་རིག་གཞུང་རྩ་མེད་བཟོ་ཐབས་ཀྱི་སྲིད་ཇུས་ལག་བསྟར་བྱེད་བཞིན་ཡོད་པས། བོད་ཕྲུག་རྣམས་རྒྱ་གཞུང་གི་གཏན་འཇགས་སློབ་གྲྭར་བཙན་གྱིས་གཏོང་བའི་གནད་དོན་སོགས་ཀྱི་ཐོག་རྒྱལ་སྤྱིའི་སྤྱི་ཚོགས་ནས་རྒྱ་གཞུང་ལ་གནོན་ཤུགས་སྤྲོད་དགོས་པའི་དགོས་འདུན་དང་། རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུ་བ་དང་མཉམ་དུ་རྒྱ་གར་གྱི་བདེ་འཇགས་ལ་དམིགས་པའི་བོད་རང་བཙན་གྱི་བདེན་པའི་ལོ་རྒྱུས་ལ་རྒྱབ་སྐྱོར་བྱས་ཏེ་གྲོས་ཆོད་གཏན་འབེབས་གནང་བའི་འབོད་སྐུལ། དེ་བཞིན་རྒྱ་གཞུང་གིས་བོད་ནང་ཆུ་མཛོད་གསར་རྒྱག་དང་། འཛུགས་སྐྲུན་ལས་གཞི། གཏེར་ཁ་སྔོག་འདོན། ཁོར་ཡུག་གཏོར་སྐྱོན་གཏོང་བཞིན་པ་མཚམས་འཇོག་ཡོང་ཐབས་དགོས་པའི་དོན་ཚན་གསུམ་གྱི་ཐོག་ནས་འབོད་སྐུལ་ཞུ་བཞིན་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
