སང་ལོ་ནས་རྒྱ་ནག་ནང་ལོ་ ༡༨ སོན་པའི་སྐྱེས་པ་རྣམས་དམག་མིར་མ་ཞུགས་ཚེ་མཐོ་སློབ་ཀྱི་སློབ་སྦྱོང་དང་ལས་ཀ་འཚོལ་བར་དཀའ་ངལ་ཡོད་ལུགས་བསྒྲགས་འདུག
ཉེ་ལམ་རྒྱ་ནག་གི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་ནག་གཞུང་གིས་བརྩེ་བའི་དྲན་སྐུལ་ཟེར་བའི་གསལ་བསྒྲགས་ཤིག་སྤེལ་ནས། ཕྱི་ལོ་ ༢༠༢༥ ཟླ་ ༡ ཚེས་ ༡ ཉིན་ནས་བཟུང་རྒྱ་ནག་གིས་དམག་མི་བསྡུ་བའི་མགོ་འཛུགས་རྒྱུ་ཡིན་པ་དང་། དེའི་ཁོངས་སུ་ལོ་ ༡༨ སོན་པའི་སྐྱེས་པ་རྣམས་ཀྱིས་དམག་ཞུགས་ཐོ་འགོད་ངེས་པར་བྱ་དགོས་པ་དང་། གལ་སྲིད་དམག་ཞུགས་ཐོ་འགོད་མ་བྱས་ཚེ། མཐོ་སློབ་དུ་སློབ་སྦྱོང་བའི་གོ་སྐབས་དང་ལས་ཀ་འཚོལ་རྒྱུ་ཐད་དཀའ་ངལ་འཕྲད་པ་སོགས་ཀྱི་མཇུག་འབྲས་ངན་པ་སློང་སྲིད་སྐོར་བརྗོད་འདུག
བརྩེ་བའི་དྲན་སྐུལ་ཟེར་བའི་གསལ་བསྒྲགས་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༢༥ ཟླ་ ༡ ཚེས་ ༡ ཉིན་ནས་བཟུང་དམག་ཞབས་བཅའ་ཁྲིམས་ཟེར་བའི་སྒྲིག་གཞི་ཟེར་བའི་འོག་ནས། ལོ་ ༡༨ སོན་པའི་རྒྱ་ནག་གི་སྐྱེས་པ་ཚང་མས་དམག་ཞབས་ཐོ་འགོད་ངེས་པར་དུ་བྱ་དགོས་པའི་ལམ་ལུགས་ཤིག་ལག་བསྟར་བྱ་རྒྱུ་ཡིན་ཞིང་། དེ་ནི་དམག་ཞབས་བཅའ་ཁྲིམས་ཟེར་བའི་ནང་ལོ་བཅོ་བརྒྱད་ལོན་པའི་སྐྱེས་པ་ཚོས་དམག་ཞབས་ཐོ་འགོད་ཀྱི་འོས་འགན་ལག་བསྟར་བྱེད་དགོས་པའི་གཏན་འབེབས་བྱས་ཡོད་པ་ཞིག་ཡིན་འདུག་ལ། ཐོ་འགོད་བྱེད་པར་རྒྱ་ནག་གི་རྒྱལ་ཡོངས་དམག་བསྡུའི་དྲ་བ་ཟེར་བ་ནས་ཐོ་འགོད་བྱེད་དགོས་ཡོད་པ་སོགས་བརྗོད་འདུག
དམག་མིའི་ཁོངས་སུ་ཐོ་འགོད་བྱས་པའི་གཞོན་སྐྱེས་ཚོ་ངེས་པར་དུ་དམག་དཔུང་ནང་དངོས་སུ་ཞུགས་མི་དགོས་པར། ཁྲིམས་ལྟར་ལོ་ཚད་ལོན་པའི་སྤྱི་དམངས་ལ་ཐོ་འགོད་དོ་དམ་བྱེད་པའི་ལས་དོན་སྤེལ་ནས། རྒྱ་གཞུང་གིས་དམག་ཤུགས་རྒྱ་བསྐྱེད་པའི་ཁོངས་སུ་བཞག་སྟེ་ཛ་དྲག་གི་གནས་ཚུལ་བྱུང་བའི་སྐབས་སུ་བེད་སྤྱོད་བྱ་རྒྱུ་ཡིན་ལུགས་བསྒྲགས་འདུག་པ་མ་ཟད། ཁྲིམས་ལྟར་དམག་ཞབས་ནང་ཞུགས་པ་དང་དམག་ཞབས་ཐོ་འགོད་བྱ་རྒྱུ་ནི་ལོ་ཚད་ལོན་པའི་སྤྱི་དམངས་ཚང་མས་སྒྲུབ་དགོས་པའི་གཟི་བརྗིད་ལྡན་པའི་འོས་འགན་དང་བླ་ན་མེད་པའི་འགན་འཁྲི་ཡིན་སྐོར་སོགས་བརྗོད་འདུག
འདས་པའི་ལོ་ཤས་གོང་ནས་རྒྱ་ནག་གཞུང་གིས་བོད་ཕྲུག་རྣམས་གུང་སེང་སོགས་ཀྱི་སྐབས། སྐད་ཡིག་ཟབ་སྦྱོང་དང་ཆོས་ཕྱོགས་ཀྱི་བྱེད་སྒོར་ཞུགས་པར་དམ་དྲག་ཤུགས་ཆེན་བྱེད་ཀྱི་ཡོད་ལ། ཕྱི་ལོ་ ༢༠༢༠ ཡི་ལོ་མཇུག་ཙམ་ནས་རྒྱ་ནག་གཞུང་གིས་རྒྱ་དཀར་ནག་གི་མཐའ་མཚམས་ས་ཐིག་ (LAC) ཕྱོགས་སུ་ཁེལ་བའི་བོད་ཀྱི་གྲོང་ཚོ་ཁག་གི་བྱིས་པ་དང་རྒས་འཁོགས་ཕུད་པའི་ཕོ་མོ་དབྱེར་མེད་ཀྱིས་གྲོང་མི་ཡོངས་ལ་དམག་སྦྱོང་སྤྲད་དེ། མཐའ་མཚམས་སྲུང་སྐྱོབ་སླད་དམག་འཁྲུག་རྒྱག་དགོས་ཟེར་བའི་དམག་དོན་ལས་འགུལ་སྤེལ་ཡོད་པ་ལྟར། རྒྱ་ནག་གཞུང་གིས་བོད་ཀྱི་ས་མཚམས་ཁག་གི་ཁྱིམ་ཚང་རེའི་ཁྱིམ་མི་གཅིག་ངེས་པར་དུ་བཅིངས་གྲོལ་དམག་མིར་ཞུགས་བཅུག་སྟེ། རྒྱ་དཀར་ནག་བར་རྩོད་རྙོག་ཏུ་གྱུར་བའི་ས་མཚམས་སྲུང་སྐྱོབ་བྱེད་སླད་དམག་ཤུགས་རྒྱ་སྐྱེད་གཏོང་ཐབས་བྱས་དང་བྱེད་མུས་ཡིན་འདུག་ལ། ད་རེས་རྒྱ་ནག་གི་དམག་ཞབས་ཐོ་འགོད་ཟེར་བའི་སྲིད་ཇུས་དེའི་ནང་བོད་མི་གཞོན་སྐྱེས་རྣམས་ཚུད་ཡོད་མེད་གསལ་ཁ་མི་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
