བོད་མི་མང་སྤྱི་ཟུར་དང་ལས་ཐོག་ལ་སྤྱི་དོན་གྲུབ་བཀྲིས་ལགས་ཀྱིས་གཞུང་འབྲེལ་གྱི་སྡིངས་ཆ་བེད་སྤྱོད་གཏོང་ནོར་བྱས་སྟབས། ལ་སྤྱི་སྐབས་ ༢༣ པའི་དངོས་གཞིའི་འོས་བསྡུའི་སྐབས་འོས་འཕེན་པའི་ཐོབ་ཐང་འཕྲོག་ཡོད་འདུག
ལ་དྭགས་ལྷོ་བྱང་ས་གནས་འོས་བསྡུ་ལས་ཁང་གིས་བཀའ་ཁྱབ་ཅིག་བཏང་བར་གཞིགས་ན། ཟླ་འདིའི་ཕྱི་ཚེས་ ༡༠ ཉིན་ཏེ་༧གོང་ས་རྒྱལ་བ་རིན་པོ་ཆེ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་མི་ལོ་ ༣༥ ཧྲིལ་པོ་འཁོར་བའི་དུས་དྲན་གྱི་གཞུང་འབྲེལ་མཛད་སྒོའི་སྟེང་། ལ་དྭགས་བསོད་ནམས་གླིང་མི་མང་ཚོགས་ཁང་དུ་ལ་སྤྱི་དོན་གྲུབ་བཀྲིས་ལགས་ཀྱིས་གསུང་བཤད་གནང་སྐབས། ལ་སྤྱི་སྐབས་ ༢༣ པའི་དངོས་གཞིའི་འོས་མི་དོན་གྲུབ་ཚེ་རིང་ལགས་སུ་འོས་བླུག་རྒྱུ་ཡིན་ཞེས་མི་མང་འདུ་འཛོམས་སྟེང་མིང་འདོན་བྱས་པའི་ཐོག གཞུང་འབྲེལ་མཛད་སྒོའི་ཐོག་ལ་སྤྱིའི་འོས་བསྡུ་དང་འབྲེལ་བའི་བཀའ་མོལ་གནང་བར་བརྟེན། ཟླ་འདིའི་ཕྱི་ཚེས་ ༡༣ ཉིན་ས་གནས་འོས་བསྡུ་ལས་ཁང་གིས་ལ་སྤྱི་ལས་ཐོག་དོན་གྲུབ་བཀྲིས་ལགས་ཀྱིས་ཡུལ་དུས་ལ་མ་གཟིགས་པར་གཞུང་འབྲེལ་སྡིངས་ཆ་བེད་ལོག་སྤྱད་པའི་ནོར་འཁྲུལ་འགལ་འཛོལ་ཤོར་བར་ངོས་འཛིན་གྱིས། ལ་སྤྱི་སྐབས་ ༢༣ པའི་དངོས་གཞིའི་འོས་བསྡུའི་ནང་དོན་གྲུབ་བཀྲིས་ལགས་ཀྱི་འོས་འཕེན་རྒྱུའི་ཐོབ་ཐང་འཕྲོག་རྒྱུ་ཡིན་པའི་ཐག་གཅོད་གནང་ཡོད་འདུག
དེ་འབྲེལ་ཕྱི་ཚེས་ ༡༣ ཉིན་གྱི་ཕྱི་དྲོ་ཆུ་ཚོད་ ༤།༥༡ སྟེང་ལས་ཐོག་ལ་སྤྱི་དོན་གྲུབ་བཀྲིས་ལགས་ཀྱིས་དོན་ཚན་ཁག་གསུམ་གྱི་གནས་སྟངས་གསལ་བཤད་ཞུ་རྒྱུ་དང་འབྲེལ་ནས་ལ་དྭགས་བསོད་ནམས་གླིང་ས་གནས་འོས་བསྡུ་ཚོགས་ཆུང་གི་ཚོགས་གཙོ་མཆོག་གི་མཚན་ཐོག་ལ་སྙན་ཞུ་ཞིག་ཕུལ་ཡོད་པའི་ནང་། དང་པོ། ང་རང་མི་མང་གི་འོས་འདེམས་བྱས་པའི་ལ་སྤྱི་ཞིག་ཡིན་པའི་ཆ་ནས་ད་བར་འོས་བསྡུ་སྒྲིག་གཞི་དང་བཅའ་ཁྲིམས་ཀྱི་སྒྲིག་གཞི་གང་ཡང་འགལ་འཛོལ་བྱས་མེད་པས་གོང་གསལ་ཐག་གཅོད་དེར་ངོས་ལེན་ཞུ་ཐབས་མེད། གཉིས་པ། ཚོགས་ཆུང་གི་ཐག་གཅོད་དེ་མང་མོས་ཀྱི་ཐག་གཅོད་ཡིན་ནམ་སྤྱི་མོས་ཀྱི་ཐག་གཅོད་ཡིན། གསུམ་པ། དོ་བདག་མི་མང་གི་རེ་བ་བྱས་ཏེ་ལ་སྤྱི་སྐབས་གསུམ་ ༢༠༡༠ དང༌། ༢༠༡༣། ༢༠༢༣ ལོ་དུས་སོ་སོར་བྱས་པ་དང༌། སྤྱི་འཐུས་ལོ་ ༥ དང་ཟླ་བ་དྲུག ས་གནས་ཁྲིམས་ཞིབ་ལོ་ ༢ དང་ཟླ་བ་དྲུག་བྱས་པའི་ཐོག་ནས་ཁྲིམས་སྒྲིག་གང་ཡང་འགལ་མེད། ཐེངས་འདིའི་ལ་སྤྱི་སྐབས་ ༢༣ པའི་དངོས་གཞི་འོས་མི་སུ་ལའང་དམའ་འབེབས་བྱ་རྒྱུ་མ་བྱུང་ལ། གནོན་ཤུགས་ཡང་སྤྲད་རྒྱུ་མ་བྱུང༌། བརྒྱུད་བསྐུལ་ཡང་བྱ་རྒྱུ་མ་བྱུང༌། ཞེས་བཀོད་འདུག
ད་དུང་ལ་སྤྱི་དོན་གྲུབ་བཀྲིས་ལགས་ཀྱིས་ཉིན་དེའི་དགོང་མོའི་ཆུ་ཚོད་ ༧།༥༥ སྟེང་སྙན་ཞུ་ཕུལ་ཡོད་པའི་ནང་། དོ་བདག་ལ་མི་མང་གི་འོས་འདེམས་བྱས་པའི་ལ་སྤྱིའི་འགན་ཞིག་ཡོད་པའི་ཆ་ནས་ལ་དྭགས་བསོད་ནམས་གླིང་གི་མི་མང་དང་སྤྱི་བ་ཁོ་ནར་ཕན་པའི་སྒེར་གྱི་བསམ་ཚུལ་ཞིག་བཤད་པ་ལས་ཁྲིམས་སྒྲིག་གང་ཡང་འགལ་འཛོལ་བྱས་མེད་སྟབས། གོང་གསལ་ཐག་གཅོད་དེར་མོས་མཐུན་ཞུ་ཐུབ་ཐབས་མི་འདུག ངོས་ནས་ད་བར་མི་ཚེ་ཧྲིལ་པོ་དྲང་བདེན་དང་ཕྱི་གསལ་ནང་གསལ་ཐོག་སྤྱི་པ་ཁོ་ནར་བསམ་ནས་མི་མང་གི་ཞབས་འདེགས་ཞུས་པ་དེར་དགའ་སྤོབས་དང་བསོད་ནམས་གསོག་རྒྱུའི་སྐལ་བཟང་གི་གོ་སྐབས་ཐོབ་བྱུང་སྙམ་བཞིན་ཡོད་ལ། ད་ནས་རྩིས་པའི་ལ་སྤྱིའི་ལས་ཡུན་ལྷག་བསྡད་ཟླ་བ་གཅིག་དང་ཕྱེད་ཀ་དེ་ཡང་ཐོག་མའི་དམ་བཅའ་ལྟར་ལྷག་བསམ་ཆེ་བསྐྱེད་ཀྱིས་ལས་དོན་གཉེར་རྒྱུ་ཡིན། འོན་ཀྱང་ངོས་ལ་ཡིག་ཆུང་གནང་བའི་ཐག་གཅོད་དེ་མི་ཚེ་གཅིག་ནག་པོ་བཟོས་བྱུང་སྙམ་པའི་ཚོར་སྣང་ཞིག་བྱུང་ཡང་། ངོས་ནས་ལས་དོན་བྱས་པ་ཐམས་ཅད་དྲང་བདེན་དང་ལྷག་བསམ་རྣམ་དག་ཐོག་བྱས་པར་སོང་འགྱོད་གནོང་ཏིལ་འབྲུ་ཙམ་ཡང་མེད། ཅེས་འཁོད་འདུག
ཟླ་འདིའི་ཕྱི་ཚེས་ ༡༤ ཉིན་ལ་དྭགས་ལྷོ་བྱང་ས་གནས་འོས་བསྡུ་ལས་ཁང་གིས་ལན་འདེབས་གནང་བའི་ནང་། ལ་སྤྱི་དོན་གྲུབ་བཀྲིས་ལགས་ཀྱིས་ས་གནས་འོས་བསྡུ་ཚོགས་ཆུང་གི་ཐག་གཅོད་ལ་མོས་མཐུན་མེད་པའི་ལན་འདེབས་ཡིག་ཆུང་ཕུལ་འབྱོར་བྱུང་བའི་ནང་། ཚོགས་ཆུང་གི་ཐག་གཅོད་དེ་མང་མོས་ཀྱི་ཐག་གཅོད་ཡིན་ནམ་སྤྱི་མོས་ཀྱི་ཐག་གཅོད་ཡིན་ཞེས་བཀའ་འདྲི་གནང་བར་བརྟེན། ཚོགས་ཆུང་གི་ཐག་གཅོད་དེ་མང་མོས་ཐག་གཅོད་ཅིག་ཡིན་ཞེས་ལན་འདེབས་ཁ་གསལ་གནང་ཡོད་སྟབས། ཉིན་དེའི་སྔ་དྲོའི་ཆུ་ཚོད་ ༡༡།༡༥ ཐོག་ལ་སྤྱི་དོན་གྲུབ་བཀྲ་ཤིས་ལགས་ཀྱིས་ཡིག་ལན་གནང་བའི་ནང་། ས་གནས་འོས་བསྡུ་ཚོགས་ཆུང་གི་ཐག་གཅོད་དེ་མང་མོས་ཐག་གཅོད་ཅིག་ཡིན་ཞེས་གསལ་ཡོད་པར་བརྟེན། ངོས་ཀྱི་ཡིག་ལན་དང་པོའི་ནང་རྒྱས་བཤད་ཞུས་པ་ལྟར་སྤྱི་པའི་ལས་དོན་ལ་འཐུས་ཤོར་མི་ཡོང་བ་དང་། སྤྱི་ཚོགས་བརྟན་ལྷིང་ལ་གཙོ་བོར་དམིགས་ཏེ་ས་གནས་འོས་བསྡུ་ཚོགས་ཆུང་གི་ཐག་གཅོད་ལ་བརྩི་བཀུར་དང་ལེན་ཞུ་རྒྱུ་ཡིན། ཞེས་གསལ་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
