ཉི་ཧོང་གྲོས་ཚོགས་བོད་དོན་རྒྱབ་སྐྱོར་བ་གཉིས་ལ་འཚམས་འདྲི་གནང་།

སྲིད་སྐྱོང་མཆོག་གིས་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་དྲུང་ཆེ་གཉིས་གསར་འདེམས་བྱུང་བར་འཚམས་འདྲི་གནང་འདུག

ཟླ་འདིའི་ཕྱི་ཚེས་ ༢༦ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོར་ལྕམ་སྐུ་ཨེ་རི་ཀོ་ཡ་མ་ཏ་ནི་ (Eriko Yamatani) ལགས་དང་། དྲུང་ཆེར་སྐུ་ཞབས་ཧི་རོ་ཤི་ཡ་མ་དྷ་ (Hiroshi Yamada)རྣམ་གཉིས་བདམས་ཐོན་བྱུང་བར་འཚམས་འདྲི་གནང་།

འཚམས་འདྲིའི་ནང་སྲིད་སྐྱོང་མཆོག་གིས། ངས་བོད་མིའི་སྒྲིག་འཛུགས་དང་བོད་མི་རྣམས་ཀྱི་ཚབ་ཞུས་ཏེ།  ལྕམ་སྐུ་ཨེ་རི་ཀོ་ཡ་མ་ཏ་ནི་ (Eriko Yamatani) ལགས་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོར་བསྐོ་བཞག་གནང་བར་འཚམས་འདྲི་ཞུ་རྒྱུ་ཡིན། ཉི་ཧོང་སྐུ་ཚབ་དོན་གཅོད་བརྒྱུད་ཁྱེད་ཀྱི་དབུ་ཁྲིད་དང་། བོད་དོན་ཞུ་གཏུག་ཐོག་སྐུ་ལས་གནང་བཞིན་པ་ནི་སེམས་འགུལ་ཐེབས་འོས་པ་ཞིག་ཡིན། ཁྱེད་ཀྱིས་ཡུན་རིང་སྲིད་དབང་རིང་ལུགས་ཀྱི་གཉའ་གནོན་ཐོག་ངོ་རྒོལ་གསལ་པོ་དང་། བདེན་པ་བརྗོད་ཐུབ་པའི་སྙིང་སྟོབས་བཅས་ནི་འཛམ་གླིང་གི་དབུ་ཁྲིད་རྣམས་ལ་མིག་དཔེ་བཟང་པོ་ཞིག་ཡིན། འདས་པའི་ལོ་མང་རིང་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་ཉི་ཧོང་ནང་བོད་དོན་ལ་རྒྱབ་སྐྱོར་དང་། གོ་རྟོགས་སྤེལ་བའི་གལ་ཆེའི་ལས་དོན་མང་དག་གནང་ཡོད་པ་དང་། ད་ཆ་ཁྱེད་ཀྱི་དབུ་ཁྲིད་འོག་དེ་ལྟར་མཇལ་རྒྱུ་བྱུང་བ་ནི་བློ་སྤོབས་སྐྱེས་འོས་པ་ཞིག་ཡིན། ཞེས་གསུངས་འདུག

ཡང་སྲིད་སྐྱོང་མཆོག་གིས། ཕྱི་ལོ་ ༢༠༢༥ ཟླ་ ༦ ནང་ཉི་ཧོང་དུ་ཚོགས་གཏན་འཁེལ་བའི་འཛམ་གླིང་གྲོས་ཚོགས་འཐུས་མིའི་ཚོགས་ཆེན་སྐབས་ཁྱེད་ཀྱི་མཉམ་ལས་དང་རྒྱབ་སྐྱོར་མུ་མཐུད་ཐོབ་པའི་རེ་བ་ཡོད། ཚོགས་ཆེན་འདི་ནི་གྲོས་ཚོགས་འཐུས་མི་རྣམས་མཉམ་མཛོམས་ཀྱིས་བོད་དོན་ཐོག་རྒྱལ་སྤྱིའི་རྒྱབ་སྐྱོར་ཤུགས་ཆེ་རུ་གཏོང་རྒྱུའི་སྡིངས་ཆ་ཞིག་ཡིན་པ་དང་། ཚོགས་ཆེན་འདི་ལམ་ལྷོངས་ཡོང་བར་ཁྱེད་ཀྱི་དབུ་ཁྲིད་ལམ་སྟོན་གལ་ཆེན་པོ་ཆགས་ཡོད། ཅེས་དང་། མཇུག་ཏུ་ཁྱེད་ཀྱི་ཚོགས་གཙོའི་ལས་ཡུན་རིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དང་ལྷན་དུ་དྲང་བདེན་དང་། རང་དབང་། འགྲོ་བ་མིའི་ཐོབ་ཐང་ཆེད་ནུས་པ་མཉམ་སྤུངས་ཀྱིས་བསྐྱོད་ཐུབ་པའི་རེ་བ་ཡོད་ཅེས་གསུངས་འདུག

དེ་བཞིན་སྲིད་མཆོག་གིས་སྐུ་ཞབས་ཧི་རོ་ཤི་ཡ་མ་དྷ་ལགས་ལ་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་དྲུང་ཡིག་ཏུ་བདམས་ཐོན་བྱུང་པར་འཚམས་འདྲི་གནང་བའི་ནང་། ངས་བོད་མིའི་སྒྲིག་འཛུགས་དང་བོད་མི་རྣམས་ཀྱི་ཚབ་ཞུས་ཏེ།  སྐུ་ཉིད་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་པའི་དྲུང་ཡིག་བསྐོ་བཞག་གནང་བར་འཚམས་འདྲི་ཞུ་རྒྱུ་ཡིན། སྐུ་ཞབས་ཡ་མ་དྷ་ལགས་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་དྲུང་ཆེ་གསར་འདེམས་བྱུང་བར་བོད་ཀྱི་ཐབས་རྩོད་དང་། ལྷག་པར་ད་ལྟའི་གནད་འགག་ཆེ་བའི་དུས་སྐབས་འདིར་ཉི་ཧོང་གྲོས་ཚོགས་ངོས་ནས་རྒྱབ་སྐྱོར་གནང་རྒྱུའི་ཐུགས་རེ་ཆེན་པོ་ཡོད་པ་དང་། དེ་བཞིན་སྐུ་ཞབས་ཧི་རོ་ཤི་ཡ་མ་དྷ་ལགས་ཀྱིས་ལོ་མང་རིང་ཉི་ཧོང་གྲོས་ཚོགས་ནང་བོད་དོན་ཐོག་རྒྱབ་སྐྱོར་དང་། ཐུགས་ཁུར་གནང་བ་སོགས་ལ་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། ཕྱི་ལོ་ ༢༠༢༥ ཕྱི་ཟླ་ ༦ ནང་ཉི་ཧོང་དུ་ཚོགས་གཏན་འཁེལ་བའི་འཛམ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་སྐབས་མུ་མཐུད་རྒྱབ་སྐྱོར་དང་འབྲེལ་ལམ་བཟང་དུ་གཏོང་རྒྱུའི་རེ་བ་ཡོད་ཅེས་དང་། མཇུག་ཏུ་ཁྱེད་ཀྱི་དབུ་ཁྲིད་ལམ་སྟོན་འོག་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་ཉི་ཧོང་དུ་བོད་ཀྱི་མགྲིན་ཚབ་བྱེད་ཐུབ་པའི་ཡིད་ཆེས་ཡོད། ཅེས་གསུངས་འདུག

ལྕམ་སྐུ་ཨེ་རི་ཀོ་ཡ་མ་ཏ་ནི་ལགས་ནི་ཕྱི་ལོ་ ༡༩༥༠ ལོར་ཉི་ཧོང་ཌོ་ཀོ་(Tokyo)དུ་སྐྱེས་ཡོད་ཅིང་། ཕྱི་ལོ་ ༡༩༧༣ ལོར་ཌོག་ཀོ་ཡི་ཤུ་ཆོས་ལུགས་ཀྱི་གཙུག་ལག་སློབ་གཉེར་ཁང་ (the University of the Sacred Heart) ནས་ཉེ་བའི་གཙུག་ལག་རབ་འབྱམས་པའི་བསླབ་པ་མཐར་སོན། ཕྱི་ལོ་ ༡༩༨༥ ལོ་ནས་ཉི་ཧོང་ཉིན་རེའི་ཚགས་པར་གྱི་(Sankei Living Shimbun )སྤྱི་ཁྱབ་རྩོམ་སྒྲིག་པའི་ཕྱག་ལས་གནང་། ཕྱི་ལོ་ ༡༩༨༩ ལོར་དམངས་གཙོ་སྤྱི་ཚོགས་རིང་ལུགས་ཚོགས་པའི་གྲོས་ཚོགས་འཐུས་མི་རུ་ལངས། ཕྱི་ལོ་ ༢༠༠༠ ནས་ ༢༠༠༣ ཉི་ཧོང་གྲོས་ཚོགས་འཐུས་མི་གནང་། ཕྱི་ལོ་ ༢༠༠༦ ནས་ ༢༠༠༧ བར་ཤེས་རིག་བློན་ཆེན་གྱི་སློབ་སྟོན་པ་གནང་། ཕྱི་ལོ་ ༢༠༡༤ རྒྱལ་ཁབ་ནུས་སྟོབས་འཛུགས་སྐྲུན་དང་། ཉི་ཧོང་རྒྱལ་ཡོངས་བདེ་སྲུང་ལྷན་ཁང་གི་སྤྱི་ཁྱབ་པ་སོགས་ཀྱི་ཕྱག་ལས་གནང་། དེ་བཞིན་ཧི་རོ་ཤི་ཡ་མ་དྷ་ལགས་ནི་ཕྱི་ལོ་ ༡༩༥༨ ལོར་ཉི་ཧོང་གི་ཆབ་སྲིད་པའི་ཁྱིམ་རྒྱུད་ཞིག་ཏུ་སྐྱེས་ཤིང་། ཌོག་ཀོ་གཙུག་ལག་སློབ་གཉེར་ཁང་ནས་ཁྲིམས་ལུགས་ཐོག་བསླབ་པ་མཐར་སོན། ཕྱི་ལོ་ ༢༠༡༠ ལོར་ཉི་ཧོང་གསར་གཏོད་སྲིད་དོན་ཚོགས་པའི་(Spirit of Japan Party) ཚོགས་གཙོ་གནང་། ཕྱི་ལོ་ ༢༠༡༦ གུ་ཡངས་དམངས་གཙོ་སྲིད་དོན་ཚོགས་པའི་གྲོས་ཚོགས་འཐུས་མིར་བདམས་ཐོན་བྱུང་།

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།