ལྔ་གཅིག་བདུན་གྱི་ས་ཡོམ་གོད་ཆག་ལས་འཕྲོས་པའི་གཏམ།

ཆབ་མདོ་ངག་ཕུན།

དེ་རིང་ངས་དིང་རི་ས་འགུལ་སྐོར་ལ་རོབ་ཙམ་ཞིག་གླེང་པར་འདོད། དེ་ཡང་རང་རེའི་ཁ་བ་གངས་ཅན་གྱི་ལྗོངས་སུ་གློ་བུར་དུ་རྐྱེན་ངན་གོད་ཆག་དེ་འདྲ་བྱུང་ཞིག་བྱུང་བ་ནི་ཡིད་སྐྱོ་དགོས་པའི་གནད་དོན་ཞིག་རེད་སྙམ། མི་ཚང་མ་ཞོགས་པ་ནམ་ལངས་ཤིང་། ངོ་གདོང་ཚང་མ་འཁྲུ་བ་དང་། སྒོ་ཕྱུག་ལ་རྩྭ་སྟེར་བ། ཡོན་ཆབ་འབུལ་བ་སོགས་ཞོགས་ལས་བྲེལ་བཞིན་པའི་སྐབས་དེ་འདྲའི་ས་ཡོམ་ཞིག་བརྒྱབ་ཡོང་བ་སུ་ཞིག་དྲན། གཏན་ནས་མི་དྲན། གང་ལྟར་གློ་བུར་དུ་ས་ཡོམ་ཤུགས་ཆེན་པོ་དེ་འདྲ་ཞིག་བརྒྱབ་ནས་མི་རྒྱུ་ཟོག་གསུམ་ལ་གནོད་འཚེ་བསམ་ཡུལ་ལས་འདས་པ་ཞིག་བྱུང་ཡོད། མི་ལུས་རིན་པོ་ཆེ་དང་། མི་རབས་ནས་མི་རིགས་གསོགས་སྲུང་གནང་བའི་ཁང་ཁྱིམ་དྲོད་མོ་དེ་དག་གློ་བུར་འཇིགས་རུང་འབྱུང་བའི་མེད་པ་བཟོས་པ་མཐོང་དུས་བྲང་སྟོད་དབུགས་ཀྱིས་རྒྱངས་ཡོང་གི་འདུག །ཡིན་ནའང་སྨོན་ལམ་བརྒྱབ་རྒྱུ་ཙམ་ལས་ལས་དབང་གིས་བྱ་ཐབས་གང་ཡང་མི་འདུག་གོ། སྤུན་ཟླ་ཚོ་སེམས་མ་ཕམ་རོགས་ཞུ་ཙམ་ལས་གང་ཡང་བྱེད་མི་ཐུབ་ཀྱིན། ང་ཚོའི་མི་རིགས་འདི་ལ་འདི་འདྲ་ཞིག་མྱོང་དགོས་དོན་གང་ཞིག་ཡིན་ནམ།

རྒྱ་གཞུང་གིས་ག་དུས་ཡིན་ན་བོད་ལ་འོད་སྟོང་འབར་བ་འཕེལ་རྒྱས་གཏོང་ཡོད་ཚུལ་འུར་སྒྲོག་བྱས་དང་བྱེད་བཞིན་ཡོད་མོད། དོན་དག་ཡང་སྙིང་བོད་ཀྱི་གྲོང་གསེབ་ཁག་གི་ཁང་གཞིས་དེ་དག་གི་གནས་སྟངས་མཐོང་དུས་རྒྱ་གཞུང་གི་བཤད་པའི་སྐད་ཆ་དེ་དག་རྫུན་གཏམ་ཞིག་ཡིན་པ་རྫ་མ་མཐིལ་བརྡོལ་ནང་བཞིན་གྱུར་ཡོད། བོད་ལ་ཡར་རྒྱས་ཡོད་བཏང་ཡོད་པ་ནི་འཁོར་ལམ་ཙམ་ཞིག་རེད། དེ་ནི་ཁོ་རང་ཚོའི་ཁེ་ཕན་ཆེད་དུ་ཡིན་པ་ལས་བོད་མི་རིགས་ཀྱི་བདེ་སྡུག་བསམ་ནས་ལམ་ཆེན་ཡར་རྒྱས་བཏང་བ་ཞིག་མིན་ནས་མིན་པ་གསལ་པོ་རེད། དོན་ངོ་མ་བོད་མི་རིགས་ཀྱི་ཞིང་འབྲོག་མི་མང་ལ་ཕན་ཐོགས་ཡོད་པ་ལས་དོན་གང་ཡང་བྱས་མེད་པ་ད་རེས་ས་ཡོམ་དེ་ལས་རོབ་ཙམ་རྟོག་ཐུབ་ཀྱི་འདུག །

གཞིས་རྩེ་དང་། དིང་རིའི་ས་ཁུལ་ཁག་ལ་འབྱུང་བའི་གནོད་འཚེ་དེ་འདྲ་ཞིག་བྱུང་དུས། མདོ་དབུས་ཁམས་གསུམ་གྱི་རང་རེའི་སྤུན་ཟླ་རྣམས་ཀྱིས་ཡིད་གཉིས་ཐེ་ཙམ་ཕྲ་མོ་ཙམ་ཡང་མེད་པས། དང་བླངས་ཀྱིས་གནོད་འཚེ་ཐེབས་ཁུལ་གྱི་ས་ཁུལ་ཁག་ལ་རོགས་མགོན་གཅིག་རྗེས་གཉིས་མཐུད་ཀྱིས་གནང་བའི་བརྙན་ཐུང་དེ་དག་མཐོང་དུས་རང་བཞིན་མེད་པའི་སེམས་ནང་དགའ་སྐྱོ་ཟུང་སྦྲེལ་ཞིག་སྐྱེ་ཡོང་གི་འདུག་ལ། སྐྱོ་དགོས་པ་ནི་རང་རེ་དུ་མ་ཞིག་དུས་མིན་འདས་གྲོངས་ཕྱིན་པ་དང་། མི་རྒྱུ་ཟོག་གསུམ་གྱོང་རྒྱུད་ཚད་མེད་ཐེབས་པ་སོགས་ལ་བརྟེན་ནས་སེམས་སྐྱོ་དགོས་པ་ཞིག་དང་། སེམས་དགའ་དགོས་པ་ཞིག་ནི་གཞིས་བཞུགས་རང་རེ་སྤུན་ཟླ་དུ་མ་ཞིག་མ་བསྐུལ་དང་བླངས་ཀྱིས་ཐོག་ནས་ཚ་ཚ་འུར་འུར་གྱིས་རོགས་མགོན་གནང་བ་སོགས་མཐོང་དུས་ཡིད་ནང་རང་བཞིན་མེད་པ་ང་ཚོ་སྤུན་ཟླ་ནང་ཁུལ་དཀའ་སྡུག་བྱུང་དུས་སྐྱིད་སྡུག་མཉམ་མྱོང་གནང་བ་མཐོང་དུས་སེམས་གཏིང་ནས་དགའ་བ་ཚད་མེད་སྐྱེས་བྱུང་། དེར་བརྟེན་རང་རེའི་གཞིས་ལུས་སྤུན་ཟླ་རྣམས་ལ་བཀའ་དྲིན་ཆེ་ཞུ་བ་འདོད།  ཁྱེད་རྣམ་པའི་ལྷག་བསམ་དང་ཆོད་སེམས་ལ་བརྟེན་ནས་ང་ཚོ་མི་ཡུལ་འདིར་འཚོ་བཞིན་ཡོད། དངོས་གནས་བཀའ་དྲིན་ཆེ་ཨང་། རང་རེའི་སྤུན་ཟླ་རྣམས། ཁྱེད་རྣམ་པ་ད་དུང་ཡིད་གཟབ་གནང་དགོས་པ་ཞིག་ཏུ་མཐོང་།

དེ་ཡང་བོད་ཀྱི་བང་ཆེན་ལས། ཕྱི་ལོ་༢༠༢༥ ཟླ་༡ ཚེས་༧ གྱི་ཞོགས་པ་བོད་ནང་གི་ཆུ་ཚོད་༩ པ་ཡོལ་ཙམ་ལ་བོད་ནང་གི་གཞིས་ཀ་རྩེ་གྲོང་ཁྱེར་དིང་རི་རྫོང་དུ་ས་ཡོམ་ལྟེ་བ་བརྒྱབས་འདུག་པ་དང་། གཞན་ཡང་གཞིས་རྩེ་གྲོང་ཁྱེར། ས་སྐྱ་རྫོང་། ལྷུན་རྩེ་རྫོང་། ངམ་རིམ་རྫོང་། གཏིང་སྐྱེས་རྫོང་བཅས་ལ་ཤུགས་རྐྱེན་ཐེབས་ཏེ་མི་རྒྱུ་ལ་གནོད་སྐྱོན་བྱུང་ཡོད་འདུག རྒྱ་གཞུང་གི་བརྒྱུད་ལམ་ཁག་ནས་༦.༨ ལབ་ཀྱི་འདུག་ཀྱང་། ཨ་རིའི་ས་ཁམས་བརྟག་དཔྱད་ཁང་དང་རྒྱལ་སྤྱིའི་གསར་ཁང་ཁག་ནས་༧.༡ བརྒྱབས་ཡོད་པར་བརྗོད་འདུག

ལྷག་པར་ད་རེས་ས་འགུལ་དེ་དག་ཤུགས་ཚད་རྒྱ་གཞུང་གིས་དྲུག་དང་ཚག་བརྒྱད་བརྒྱབ་ཡོད་ཚུལ་གླེང་གི་ཡོད་ནའང་། ཕྱིའི་ས་ཁམས་བརྟག་དཔྱད་ཁང་སོགས་ཀྱིས་ས་ཡོམ་ཤུགས་ཚད་བདུན་དང་ཚག་གཅིག་བརྒྱབ་ཡོད་ཚུལ་གླིང་གི་ཡོད། ག་རེ་བྱས་ནས་གཞུང་གིས་ས་ཡོམ་ཤུགས་ཚད་དྲུག་དང་བརྒྱད་ལས་བརྒྱབ་མེད་ཚུལ་བཤད་དོན་གང་ཞིག་ཡིན་ནམ། དངོས་ཡོད་མི་བཤད་པར་དེར་སྦས་སྐུང་བྱ་དགོས་དོན་གང་ཞིག་ཡིན་ནམ། འགའ་ཤས་ཀྱིས་བཤད་ན་རྒྱ་གཞུང་གིས་ས་ཡོམ་ཤུགས་ཚད་དྲུག་དང་བརྒྱད་བརྒྱབ་ཚུལ་བཤད་དགོས་དོན་ནི་དབུས་གཞུང་གིས་བོད་ཀྱི་ས་ཁུལ་ཁག་ལ་ཛ་དྲག་གིས་དམག་མི་མྱུར་སྐྱབས་གཏང་མི་དགོས་པ་ཆེད་དུ་ས་ཡོམ་ཤུགས་ཚད་དྲུག་དང་བརྒྱད་པ་བརྒྱབ་པ་རེད་སྒྲོག་གི་ཡོད་ཚུལ་དང་། ས་ཡོམ་ཤུགས་ཚད་བདུན་བརྒྱབ་པ་རེད་ལབ་པ་ཡིན་ན་རྒྱ་ནག་དབུས་གཞུང་གིས་མྱུར་སྐྱོབས་དམག་མི་ཛ་དྲག་གིས་བཏང་དགོས་ཀྱི་ཡོད་པ་ཡིན་དུས་དེ་ལབ་ཀྱི་མེད་པ་རེད་བཤད་ཀྱི་འདུག །གང་ལྟར་ལབ་སྟངས་མི་མཐུན་པ་དེའི་ལྐོག་ཏུ་གསང་བ་ཞིག་སྦས་ཡོད་པ་ཏན་ཏན་རེད་འདུག །

ལྷག་དོན་གནད་འཚེ་ཐེབས་ཁུལ་གྱི་ས་གནས་ཁག་ཏུ་རོགས་སྐྱོབས་ལ་བསྐྱོད་མཁན་ལྷག་བསམ་ཅན་གྱི་རང་རེའི་སྤུན་ཟླ་འགའ་ཤས་བརྙན་ལེན་མི་བཅུག་པ་སོགས་ཀྱིས་དམ་བསྒྲགས་བྱེད་ཀྱི་ཡོད་པ་དང་།  དེ་ཡང་བོད་ཀྱི་དུས་བབ་ལས། ཁ་སང་ཕྱི་ཚེས་ ༨ ཉིན་ས་གནས་ཀྱི་འབྲེལ་ཡོད་རྒྱ་གཞུང་དཔོན་རིགས་ཀྱིས། གནོད་འཚེ་ཐེབས་ཁུལ་དུ་ས་ཁུལ་གཞན་ནས་རོགས་སྐྱོར་ལེན་རྒྱུ་མིན་པའི་ཡོངས་ཁྱབ་གསལ་བསྒྲགས་བྱས་ཡོད་པ་མ་ཟད། དིང་རི་རྫོང་ཁོངས་ཀྱི་བོད་མི་རྣམས་ཀྱི་དྲ་ལམ་ལ་སྟངས་འཛིན་བྱས་ཏེ། བརྙན་པར་རིགས་བརྒྱུད་སྐུལ་བྱེད་མི་ཆོག་ཁར། ཕྱི་ཕྱོགས་སུ་འབྲེལ་བ་བྱེད་མི་ཆོག་པའི་བཙན་བཀའ་བཏང་ཡོད་འདུག་ལ། ས་གནས་ཁག་ཅིག་ལ་ད་དུང་ཡང་མྱུར་སྐྱོབ་སོགས་ཀྱི་རོགས་སྐྱོར་འབྱོར་མེད་པའི་དཀའ་ངལ་འཕྲད་ཀྱིན་ཡོད་འདུག ཅེས་བརྗོད་དོན་ལྟར་དུས་སྐབས་ཛ་དྲག་དེ་འདྲའི་གནས་སྟངས་སྐབས་སུ་རྒྱ་གཞུང་གིས་ཆབ་སྲིད་དེ་འདྲ་ཞིག་ཁྲབ་ཀྱི་ཡོད་པ་རེད།

ངོ་དེབ་སོགས་སུ་ད་དུང་གནོད་འཚེ་འཐེབ་ཁུལ་གྱི་ས་ཁུལ་ལ་མྱུར་སྐྱོབ་སླེབས་པ་དང་། གསོན་པོ་ལྷག་པ་རྣམས་ལ་རོགས་མགོན་མེད་པར་དཀའ་ངལ་གྱི་གནས་སུ་ལྷུང་ཡོད་པ་གནས་ཡོད་པ་གསུང་བརྙན་ནང་མཐོང་བ་དང་། དེ་དག་མཐོང་དུས་དངོས་གནས་སེམས་སྡུག་ཚད་ཡོང་གི་ཡོད་ནའང་བྱ་ཐབས་བྲལ་བ་རེད། ཡང་དུས་བབ་ལས།  ད་ལྟ་རྒྱ་ནག་གཞུང་གིས་ས་ཡོམ་རྒྱག་ས་ལྟེ་བ་མཚོ་སྒོར་རོགས་སྐྱོར་བྱེད་བཞིན་པ་ཡོངས་གྲགས་ཐོག་ཁྱབ་བསྒྲགས་བྱེད་བཞིན་ཡོད་ཀྱང་། གྲམ་མཚོ་དང་ཉི་ཤར། ངམ་རིང་དང་ལྷ་རྩེ་སོགས་ས་ཁུལ་མང་པོར་མྱུར་སྐྱོབ་ཀྱི་མཚོན་པའི་རོགས་སྐྱོར་བྱེད་མཁན་མེད་པའི་དཀའ་ངལ་ཆེན་པོ་འཕྲད་བཞིན་པ་རེད། ད་དུང་སྒོ་རུང་གཙོས་པའི་གྲམ་མཚོའི་རྫོང་ཕུག་དགོན་པ་སོགས་ནས་མི་མང་པོ་འདས་གྲོངས་སུ་ཕྱིན་ཡོད་པའི་ཁར། མྱུར་སྐྱོབ་སོགས་ཀྱི་རོགས་སྐྱོར་གང་ཡང་སླེབས་མི་འདུག ཅེས་བརྗོད་བྱུང་། གང་ལྟར་རྒྱ་གཞུང་གིས་བོད་མིའི་ཚེ་སྲོག་ལ་སྣང་མེད་གཏོང་བཞིན་ཡོད་པ་གསལ་པོ་རེད་འདུག་ཅིང་། ཛ་དྲག་གནས་སྟངས་དེ་འདྲའི་སྐབས་སུ་མྱུར་སྐྱོབས་བྱེད་དགོས་པ་གལ་ཆེ་པོ་ཞིག་རེད། ས་ཡོམ་འོག་བསྣན་པ་རྣམས་ཚུ་ཚོད་དང་སྐར་མ་འགའ་ཤས་ནང་བཏོན་ཐུབ་པ་གནང་དགོས་པ་དེ་རེད། དེ་འདྲའི་མ་ཡིན་ཉིན་འགྱང་ཞག་ཕུད་བྱས་ནས་བསྡད་ན་ས་འོག་ནས་བསྣན་པ་གལ་སྲིད་གསོན་པ་ལྷག་ཡོད་པ་ཡིན་ན་ག་ལ་གསོན་པོ་གནས་ཐུབ་གཏན་ནས་མི་ཐུབ་པ་རེད།

ལྷག་པར་རྒྱ་གཞུང་གིས་བཤད་སྟངས་དེ་དག་ཡིད་ཆེས་བྱེད་ཁག་པོ་ཞིག་རེད། དེ་སྔོན་ཏོག་དབྱིབས་ནད་གདུག་ཁྱབ་གདབ་འགྲོ་དུས་རྒྱ་གཞུང་གིས་དྲང་པོ་བཤད་ཡོད་མ་རེད་ལ། ནད་གདུག་དེ་ག་འདྲ་བྱས་ཁྱབ་གདབ་ཕྱིན་པ་དྲང་པ་ཞིག་བཤད་ཡོད་མ་རེད། དེ་བཞིན་རྒྱ་ནག་ནང་ཁུལ་དུ་སྐབས་དེ་དུས་མི་ཤི་ཚད་ཀྱང་དྲང་པོ་ཞིག་བཤད་ཡོད་མ་རེད། ད་རེས་ཀྱང་བོད་ནང་ས་ཡོམ་གྱི་ཤུགས་ཚད་དེ་ཡང་དེ་བཞིན་དྲང་པོ་བཤད་ཀྱི་ཡོད་མ་རེད།

ད་ནི་འདས་ཟིན་པ་ནི་འདས་ཟིན་པ་རེད། དེ་ལས་མ་འོངས་པ་ས་ཡོམ་དེ་འདྲའི་བྱུང་དུས་དེ་དག་སྔོན་འགོག་བྱ་ཐབས་ཀྱི་ཐོག་ཏུ་བསམ་བློ་གཏོང་རྒྱུ་གལ་ཆེ་ཤོས་ཡིན་པ་རེད་སྙམ། དེ་ཡིན་དུས་ས་གནས་སོ་སོ་འགོ་ཁྲིད་ཚོས་འགན་འགན་ཡག་པོ་བཞེས་ནས་ས་ཡོམ་བརྒྱབ་སའི་ཤུལ་ལུས་མི་དེ་དག་སྡོད་ཁང་མཚན་ཉིད་ཚང་བ་བསྐྲུན་ཐུབ་དགོས་རྒྱུ་དེ་གལ་ཆེན་པོ་རེད། དེ་བཞིན་ས་གནས་གཞུང་གིས་ཁང་པ་བརྒྱབ་ས་དང་། མི་མང་འཚོ་བའི་ཐོག་ཏུ་རོགས་མགོན་གནང་བ་དེ་དག་མི་སེར་དཀྱུས་མ་དེ་དག་གི་ལག་ཏུ་འབྱོར་ཐུབ་པ་བྱ་རྒྱུ་དེ་ཡང་ས་གནས་ཀྱི་འགོ་ཁྲིད་ཚོས་ལས་འགན་ཆེ་ཤོས་རེད་སྙམ། མཐའ་དོན་རང་རེའི་ས་ཡོམ་འོག་ཏུ་འདས་གསོན་ཡོངས་མྱུར་དུ་དཀའ་སྡུག་གི་ལས་གྲོལ་བའི་སྨོན་འདུན་ཞུ། རང་རེའི་སྤུན་ཟླ་རྣམས། ཁྱེད་རྣམས་ལ་དཀའ་ངལ་བྱུང་སོང་། དངོས་གནས་དཀའ་ངལ་མྱོང་སོང་། དཀོན་མཆོག་གིས་ཐུགས་རྗེ་གཟིགས་དང་། ཞེས་པ་འདི་ནི་ཆབ་མདོ་ངག་ཕུན་གྱིས་ཕུལ།