སྤྱི་འཐུས་ཚོགས་གཙོ་མཆོག་གིས་ཊོམ་ཕུའི་དམ་འབུལ་མཛད་སྒོར་འཚམས་འདྲི་གནང་།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྤྱི་འཐུས་ལྷན་ཚོགས་དང་བོད་མི་ཡོངས་ཀྱི་ཚབ་ཞུས་ཏེ་ཊོམ་ཕུའི་དམ་འབུལ་མཛད་སྒོར་འཚམས་འདྲི་གནང་འདུག

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་དང་བོད་ནང་དང་འཛམ་གླིང་གང་སར་གནས་པའི་བོད་མི་ཡོངས་ཀྱི་ཚབ་ཞུས་ཏེ། སྲིད་འཛིན་ཊོམ་ཕུ་མཆོག་ནས་ཨ་རིའི་སྲིད་འཛིན་གྱི་དམ་འབུལ་ཐེངས་གཉིས་པ་འབུལ་བཞིན་པར་འཚམས་འདྲི་ཞུས་འདུག

དེ་འབྲེལ་བོད་མི་མང་སྤྱི་འཐུས་ལྷན་ཚོགས་ཀྱི་དབྱིན་ཡིག་དྲ་རྒྱའི་སྟེང་དུ། ཨ་རིས་ཡུན་རིང་ནས་བོད་མིའི་ཐོབ་ཐང་དང་བོད་དོན་རྒྱལ་སྤྱིའི་སྟེང་བསྐྱལ་ཡོད། ཨ་རིའི་བློ་བརྟན་འགྱུར་མེད་ཀྱི་རྒྱབ་སྐྱོར་བརྒྱུད་དམངས་གཙོ་དང་འགྲོ་བ་མིའི་ཐོབ་ཐང་། མི་ཚང་མ་འདྲ་མཉམ་ཡིན་པ་གོང་སྤེལ་བྱས་ཡོད་ལ། ཁྱེད་ཀྱིས་མུ་མཐུད་དུ་དབུ་མའི་ལམ་ནས་རྒྱ་བོད་དཀའ་རྙོག་སེལ་ཐབས་སུ་རྒྱབ་སྐྱོར་གནང་བར་རེ་འདུན་བཅངས་བཞིན་ཡོད།

ངས་ཨ་རིའི་གཞུང་དམངས་གཉིས་ནས་འདས་པའི་ལོ་ངོ་མང་པོའི་རིང་བོད་མི་རྒྱབ་སྐྱོར་རྒྱུན་འཁྱོངས་བྱས་པར་ཐུགས་རྗེ་ཆེ་ཞུ་རྒྱུ་ཡིན། ང་ཚོའི་མཉམ་ལས་མུ་མཐུད་འཕེལ་རྒྱས་དང་ཤུགས་ཆེ་རུ་འགྲོ་རྒྱུར་ཡིད་ཆེས་ཡོད། ཁྱེད་ཀྱི་དབུ་ཁྲིད་ལམ་སྟོན་འོག ཁྱེད་ཀྱིས་ཨ་རིའི་མི་མང་གི་མངོན་འདོད་སྒྲུབ་པ་དང་འཛམ་གླིང་ནང་ཞི་བདེ་དང་དྲང་བདེན། འགྲོ་བ་མིའི་ཐོབ་ཐང་སོགས་གོང་སྤེལ་ཡོང་བར་རེ་བ་ཆེན་པོ་ཡོད། ཅེས་གསུངས་འདུག

ད་ལྟ་བདམས་ཐོན་སྲིད་འཛིན་ཊོམ་ཕུའི་དམ་འབུལ་མཛད་སྒོ་འཚོག་པར་ཆུ་ཚོད་འགའ་ཤས་ལས་མེད་ཅིང་། ཁ་སང་ཁོ་རྒྱལ་ས་ཝང་ཤི་ཊོན་དུ་འབྱོར་མ་ཐག་རང་ཉིད་ཀྱི་རྒྱབ་སྐྱོར་བ་སྟོང་ཕྲག་མང་པོར། དེ་རིང་གི་དམ་འབུལ་མཛད་སྒོར་སྲིད་འཛིན་གྱི་བཅད་ཁྲ་ ༡༠༠ ཙམ་ལ་མཚན་རྟགས་རྒྱག་རྒྱུ་ཡིན་པར་བཤད་འདུག ཕྱི་ལོ་ ༢༠༢༤ ལོའི་ཨ་རིའི་སྲིད་འཛིན་གྱི་རྒྱལ་ཡོངས་འོས་བསྡུའི་ཁྲོད། དམངས་གཙོ་ཚོགས་པའི་འོས་མི་ཀརྨ་ལ་ཧན་རེ་སིར་འོས་གྲངས་ ༢༢༦ དང་། སྤྱི་མཐུན་ཚོགས་པའི་འོས་མི་སྲིད་འཛིན་ཟུར་པ་ཊོམ་ཕུ་ལ་འོས་གྲངས་ ༢༩༥ ཐོབ་སྟེ། ཊོམ་ཕུ་སྐབས་ ༤༧ པའི་ཨ་རིའི་སྲིད་འཛིན་དུ་འོས་འདེམས་བྱུང་ཡོད་པ་ལྟར།  ད་རེས་ནི་ཊོམ་ཕུའི་སྲིད་འཛིན་གྱི་དམ་འབུལ་ཐེངས་གཉིས་པ་ཆགས་ཡོད།

གསར་འགོད་པ། སྐལ་བཟང་སྦྱིན་པ།