རྒྱ་གར་རྒྱལ་ཡོངས་ས་གཤིས་དཔྱད་རིག་ལྟེ་གནས་ཁང་གིས་ཞིས་ཙང་ཟེར་བའི་ཚབ་ཏུ་བོད་ཅེས་བསྒྱུར་བཅོས་བཏང་།

བོད་མིའི་སྒྲིག་འཛུགས་ཀྱི་དང་བླངས་བོད་དོན་ཞུ་གཏུག་ལས་འགུལ་ཚོགས་པས་ཞུ་གཏུག་བྱས་པ་བརྒྱུད་རྒྱ་གར་རྒྱལ་ཡོངས་ས་གཤིས་དཔྱད་རིག་ལྟེ་གནས་ཁང་གིས་བོད་དིང་རི་རྫོང་གི་ས་ཡོམ་དང་འབྲེལ་བའི་སྙན་ཐོའི་ནང་བཀོད་པའི་ཞིས་ཙང་གི་ཚབ་ཏུ་བོད་ཅེས་ཐ་སྙད་ལ་བསྒྱུར་བཅོས་བཏང་ཡོད་འདུག

Tenzing Dhamdul (second right), Dr. O.P. Mishra (center), Director of NCS, and Tenzin Lhatso during their meeting on January 21, 2025 (Photo/V-TAG India)

རྒྱ་གར་རྒྱལ་ཡོངས་ས་གཤིས་དཔྱད་རིག་ལྟེ་གནས་ཁང་ (National Centre for Seismology) གིས། ཟླ་འདིའི་ཕྱི་ཚེས་ ༧ ཉིན་བོད་དིང་རི་རྫོང་དུ་ས་ཡོམ་ཤུགས་ཚད་ ༧།༡ བརྒྱབ་པའི་གནས་ཚུལ་དང་འབྲེལ་ནས་སྙན་ཐོ་ཞིག་བཏོན་པའི་ནང་། བོད་ཅེས་པའི་ཚབ་ཏུ་རྒྱ་ནག་གི་ཐ་སྙད་ཞིས་ཙང་ (Xizang) ཟེར་བ་བཀོལ་སྤྱོད་བྱས་པར་བརྟེན། ཟླ་འདིའི་ཕྱི་ཚེས་ ༢༡ ཉིན་བོད་མིའི་སྒྲིག་འཛུགས་ཀྱི་ཁྱབ་ཁོངས་སུ་ཡོད་པའི་དང་བླངས་བོད་དོན་ཞུ་གཏུག་ལས་འགུལ་ཚོགས་པའི་འབྲེལ་མཐུད་པ་བསྟན་འཛིན་ལྷ་མཚོ་ལགས་དང་། ཚོགས་མི་བསྟན་འཛིན་དགྲ་འདུལ་ལགས་གཉིས་ཀྱིས་རྒྱ་གར་རྒྱལ་ཡོངས་ས་གཤིས་དཔྱད་རིག་ལྟེ་གནས་ཁང་གི་འགན་འཛིན་ཨོམ་ (Om Prakash Mishra) ལགས་དང་དངོས་སུ་ཐུག་འཕྲད་ཀྱིས། བོད་ཅེས་པའི་ཚབ་ཏུ་ཞིས་ཙང་ཟེར་བའི་ཐ་སྙད་བེད་སྤྱོད་བྱས་པར་བསྒྱུར་བཅོས་དགོས་པའི་ཞུ་གཏུག་གནང་ཡོད་པ་ལྟར། ཁ་སང་ཕྱི་ཚེས་ ༢༨ ཉིན་རྒྱ་གར་གྱི་ས་གཤིས་དཔྱད་རིག་ལྟེ་གནས་ཁང་གི་འགན་འཛིན་ཨོམ་ལགས་ཀྱིས་བསྒྱུར་བཅོས་བྱ་རྒྱུའི་ངོས་ལེན་གནང་ཡོད་འདུག

དེ་འབྲེལ་བོད་མིའི་སྒྲིག་འཛུགས་ཀྱི་དང་བླངས་བོད་དོན་ཞུ་གཏུག་ལས་འགུལ་ཚོགས་པའི་སྤྱི་ཚོགས་དྲ་ལམ་ཨིན་སི་ཊ་གྷ་རམ་ (Instagram) སྟེང་། རྒྱ་གར་རྒྱལ་ཡོངས་ས་གཤིས་དཔྱད་རིག་ལྟེ་གནས་ཁང་གི་འགན་འཛིན་ཨོམ་ (Om Prakash Mishra) ལགས་ཀྱིས། རྒྱ་གར་གྱིས་མུ་མཐུད་དུ་བོད་ལ་རྒྱབ་སྐྱོར་བྱ་རྒྱུའི་ངོས་ལེན་གནང་བ་མ་ཟད། ད་ལན་ལྟེ་གནས་ཁང་གིས་ཁས་ལེན་གནང་བ་གཞིར་བཟུང་ཐ་སྙད་བསྒྱུར་བཅོས་གནང་བར་ཐུགས་ཆེ་གནང་ཞུ་རྒྱུ་དང་། དེ་ནི་བོད་ཀྱི་ལོ་རྒྱུས་དང་རིག་གཞུང་གི་ངོ་བོ་ལ་བསྐྱར་དུ་ངོས་འཛིན་གནང་བ་ཞིག་རེད། ཅེས་དང་། སུད་སི་དང་། ནི་ཐར་ལན་ཌི། ཨ་རི། དབྱིན་ཡུལ་སོགས་རྒྱལ་ཁབ་མང་པོས་བོད་ཅེས་པའི་ཚབ་ཏུ་ཞིས་ཙང་ཟེར་བའི་ཐ་སྙད་བེད་སྤྱོད་བྱེད་བཞིན་པ་དེ་བསྒྱུར་བཅོས་གནང་དགོས་པའི་འབོད་སྐུལ་ཞུ་རྒྱུ་ཡིན། ཞེས་བཀོད་འདུག

གཞན་ཡང་། གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། དང་བླངས་བོད་དོན་ཞུ་གཏུག་ལས་འགུལ་ཚོགས་པའི་ཚོགས་མི་བསྟན་འཛིན་དགྲ་འདུལ་ལགས་ཀྱིས། འཛམ་གླིང་རྒྱལ་ཁབ་གཞན་དང་ཚོགས་སྡེ་ཁག་གིས་ཀྱང་རྒྱ་གར་ནས་དཔེ་བླངས་ཏེ་བོད་ཅེས་པའི་ཚབ་ཏུ་ཞིས་ཙང་ཟེར་བའི་ཐ་སྙད་བེད་སྤྱོད་གཏོང་མཚམས་འཇོག་དགོས་པའི་འབོད་སྐུལ་ཞུ་རྒྱུ་ཡིན། ཞེས་དང་། བོད་མི་རྣམས་མཉམ་རུབ་ཀྱིས་བོད་དོན་ལས་འགུལ་སྤེལ་དགོས་ལ། ང་ཚོ་བོད་ནང་གི་བོད་མི་རྣམས་ཀྱི་སྐུ་ཚབ་ཡིན་ཞིང་། ང་ཚོས་དང་བླངས་ཀྱི་ཐོག་ནས་བོད་དོན་ལས་འགུལ་ཆུང་ཆུང་ཞིག་སྤེལ་བ་དེས་འགྱུར་བ་གཏོང་ཐུབ་པ་དང་། ས་ཕྱོགས་གང་སར་ཁྱབ་སྤེལ་རྒྱ་ཆེར་འགྲོ་ཐུབ་ངེས་རེད། ཅེས་སོགས་བརྗོད་འདུག

རྒྱ་གར་རྒྱལ་ཡོངས་ས་གཤིས་དཔྱད་རིག་ལྟེ་གནས་ཁང་གིས། ཟླ་འདིའི་ཕྱི་ཚེས་ ༧ ཉིན་བོད་ལ་སྟོད་དིང་རིའི་ཁུལ་དུ་ས་ཡོམ་ཚད་རིམ་ ༧།༡ བྱུང་བ་དང་འབྲེལ་བའི་སྙན་ཐོ་ཞིག་བཏོན་ཡོད་པའི་ནང་། བོད་ཅེས་པའི་ཚབ་ཏུ་ཞིས་ཙང་ཟེར་བའི་ཐ་སྙད་ཐེངས་ ༥༨ ཙམ་བེད་སྤྱོད་བྱས་ཡོད་སྟབས། བོད་མིའི་སྒྲིག་འཛུགས་ཀྱི་དང་བླངས་ཞུ་གཏུགས་ལས་འགུལ་བས་ཞུ་གཏུགས་རིམ་པ་བྱས་མཐར། ཁ་སང་ཕྱི་ཚེས་ ༢༨ ཉིན་ལྟེ་གནས་ཁང་དེས་ཞིས་ཙང་ཟེར་བའི་ཐ་སྙད་བེད་སྤྱོད་ཀྱི་ཚབ་ཏུ་བོད་ཅེས་བྲིས་ནས་བསྒྱུར་བཅོས་བཏང་ཡོད་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།