བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་རྣམ་གཉིས་ནས་བོད་དོན་ལ་རྒྱབ་སྐྱོར་གནང་མཁན་རྒྱ་གར་གྱི་གྲོས་ཚོགས་འཐུས་མི་སྐུ་ཞབས་ཀི་ཤན་ཀ་པུར་ལགས་ཀྱི་ནང་མིར་ཐུགས་གསོ་གནང་།
ཟླ་འདིའི་ཕྱི་ཚེས་ ༡ ཉིན་རྒྱ་གར་གྱི་བྱང་ཕྱོགས་མངའ་སྡེ་པན་ཇབ་དང་ཧར་ཡ་ན་གཉིས་ཀྱི་རྒྱལ་ས་ཅན་དྷི་གྷར་ནས། ཡུན་རིང་བོད་དང་བོད་མིར་རྒྱབ་སྐྱོར་གནང་མཁན་བཞུགས་སྒར་དྷ་རམ་ས་ལ་ནས་ཡིན་པའི་རྒྱ་གར་གྱི་གྲོས་ཚོགས་འཐུས་མི་སྐུ་ཞབས་ཀི་ཤན་ཀ་པུར་ (kishan kapoor) ལགས་དགུང་གྲངས་ ༧༣ སྟེང་འདས་གྲོངས་སུ་གྱུར་བའི་གནས་ཚུལ་ཐོན་ཡོད་པ་ལྟར། དེ་རིང་ཕྱི་ཚེས་ ༣ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་རྣམ་གཉིས་ནས། བོད་དོན་ལ་རྒྱབ་སྐྱོར་གནང་མཁན་རྒྱ་གར་གྱི་གྲོས་ཚོགས་འཐུས་མི་སྐུ་ཞབས་ཀི་ཤན་ཀ་པུར་ལགས་སུ་ཐུགས་གསོའི་གསུང་འཕྲིན་ཕུལ་འདུག
སྲིད་སྐྱོང་སྤེན་པ་ཚེ་རིང་མཆོག་གིས། བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ། ༧གོང་ས་རྒྱལ་བ་རིན་པོ་ཆེ་མཆོག་ལ་ལྷག་བསམ་རྣམ་དག་གིས་རྒྱབ་སྐྱོར་གནང་མཁན་དང་རྒྱ་གར་གྱི་གྲོས་ཚོགས་འཐུས་མི་སྐུ་ཞབས་ཀི་ཤན་ཀ་པུར་ལགས་འདས་གྲོངས་སུ་གྱུར་བར་གདུང་སེམས་མཉམ་སྐྱེད་ཞུ་བཞིན་ཡོད། ཁོང་གིས་༸གོང་ས་མཆོག་ལ་གུས་བཀུར་གཏིང་ཟབ་བྱས་པའི་བཀའ་དྲིན་དྲན་ཤེས་དང་། དཀའ་ཚེགས་ཆེ་བའི་དུས་སྐབས་འདིར་ང་ཚོས་འདས་པོ་ཁོང་གི་ཤུལ་ལུས་ནང་མི་ཡོངས་ལ་གདུང་སེམས་མཉམ་སྐྱེད་དང་སྨོན་ལམ་འདེབས་བཞིན་ཡོད། ཅེས་གསུངས་འདུག
སྤྱི་འཐུས་ཚོགས་གཞོན་མཆོག་གི་ཐུགས་གསོའི་ནང་། ཕྱི་ལོ་ ༢༠༢༥ ཟླ་ ༢ ཚེས་ ༡ ཉིན་རྒྱ་གར་གྱི་གྲོས་ཚོགས་འཐུས་མི་ཟུར་པ་དང་ཡུན་རིང་བོད་དོན་ལ་རྒྱབ་སྐྱོར་གནང་མཁན་སྐུ་ཞབས་ཀི་ཤན་ཀ་པུར་ (Shri Kishan Kapoor) ལགས་འདས་གྲོངས་སུ་གྱུར་བར་བོད་མི་མང་སྤྱི་འཐུས་ལྷན་ཚོགས་དང་འཛམ་གླིང་ས་ཕྱོགས་གང་སར་ཡོད་པའི་བོད་མི་ཡོངས་ཀྱི་ཚབ་ཞུས་ཏེ། དཀའ་ཚེགས་ཆེ་བའི་དུས་སྐབས་འདིར་ཁྱེད་དང་ཁྱེད་ཀྱི་ནང་མི་ཡོངས་ལ་གདུང་སེམས་མཉམ་སྐྱེད་ཞུ་བཞིན་ཡོད།
ང་ལ་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གི་ཆ་ཤས་ཐོག་ནས་ཁོང་དང་ཐེངས་མང་རིང་མཇལ་རྒྱུའི་སྐལ་བ་བྱུང་། སྐབས་དེ་དག་རིང་ཁོང་གིས་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་བརྟན་པོ་གནང་བ་དེ་བསྔགས་བརྗོད་བྱེད་འོས་པ་ཞིག་ཡིན། ངས་ཀྱང་གོ་སྐབས་འདི་བརྒྱུད་ནས་སྐུ་ཞབས་ཀི་ཤན་མཆོག་ནས་ང་ཚོའི་རྩ་དོན་ལ་རྒྱབ་སྐྱོར་བརྟན་པོ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཁོང་གིས་རྒྱལ་ཁབ་དང་མི་དམངས་ལ་ཞབས་འདེགས་རླབས་ཆེན་ཞུས་པ་དུས་རྟག་ཏུ་དྲན་གསོ་ཞུ་རྒྱུ་ཡིན། ང་ཚོས། ཁོང་གིས་བདེན་པ་དང་དྲང་བདེན་ལ་ཕུལ་བའི་ཞབས་འདེགས་ལ་གཅེས་སྤྲས་བྱེད་ཀྱི་ཡོད། ཅེས་དང་། མཐར་ཁྱེད་ཀྱི་ནང་མིར་སྙིང་ཐག་པ་ནས་གདུང་སེམས་མཉམ་སྐྱེད་དང་སྨོན་ལམ་འདེབས་རྒྱུ་ཡིན། ཞེས་གསུངས་འདུག
ད་ལྟ་དགུང་ལོ་ ༧༣ ཡིན་པའི་སྐུ་ཞབས་ཀི་ཤན་ཀ་པུར་ལགས་ཕྱི་ལོ་ ༡༩༩༠ ལོ་ནས་ ༢༠༡༧ བར་སྐབས་ལྔའི་རིང་དྷ་རམ་ས་ལའི་བྷི་ཇི་པུ་སྲིད་དོན་ཚོགས་པའི་འཐུས་མི་བཞེངས། ཕྱི་ལོ་ ༢༠༡༩ ནས་ ༢༠༢༤ བར་རྒྱ་གར་དབུས་གྲོས་ཚོགས་འཐུས་མིར་གྱུར། ཕྱི་ལོ་ ༡༩༧༠ ཙམ་ནས་ཆབ་སྲིད་ནང་ཞུགས་ཏེ། ཧི་མ་ཅལ་མངའ་སྡེའི་བྷི་ཇི་པུ་སྲིད་དོན་ཚོགས་པའི་མགོ་ཁྲིད་དང་། འགྲིམས་འགྲུལ་དང་གྲོང་གསེབ་དར་རྒྱས། གྲོང་ཚོ་དང་རྒྱལ་ཁབ་འཕེལ་རྒྱས། བཟོ་སྐྲུན་དང་ངལ་རྩོལ། ཟས་རིགས་དང་འོས་བསྡུ་སོགས་གནས་བབ་འདྲ་མིན་གྱི་བློན་ཆེན་གནང་མྱོང་། ཁོང་དྷ་རམ་ས་ལ་ནས་འཁྲུངས་ཤིང་། ༧གོང་ས་མཆོག་དབུས་པའི་བོད་མིའི་སྒྲིག་འཛུགས་དང་གཞུང་འབྲེལ་མིན་པའི་ཚོགས་སྡེ་ཁག་སོགས་ལ་རྒྱུས་མངའ་ཟབ་ཅིང་འབྲེལ་ལམ་གཏིང་ཟབ་ཡོད་མཁན་ཞིག་ཡིན་པ་མ་ཟད། ཧི་མ་ཅལ་མངའ་སྡེའི་ནང་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་མཁན་གྱི་གྲས་དང་བོད་དོན་ལ་ཡུན་རིང་རྒྱབ་སྐྱོར་གནང་ཞིག་ཀྱང་ཡིན་པ་རེད།
གསར་འགོད་པ། སྐལ་བཟང་སྦྱིན་པ།
