རྒྱ་གར་ནང་ཡོད་པའི་བོད་མི་རྣམས་ལ་འོས་བླུག་པའི་ཐོབ་ཐང་ཡོད་ན་མི་སེར་ལ་རྩི་དགོས་པ་ཞིག་ཆགས་ཀྱི་ཡོད་འདུག

ཧི་མ་ཅལ་གྲོས་ཚོགས་ཀྱི་ཚོགས་གཙོ་མཆོག་ནས་ཕྱི་ལོ་ ༡༩༨༧ ལོའི་རྗེས་སུ་རྒྱ་གར་ནང་སྐྱེས་བའི་བོད་མི་རྣམས་ལའང་འོས་ཤོག་བླུག་པའི་ཐོབ་ཐང་ཡོད་སྐོར་གསུངས་ཡོད་ལུགས་ཀྱི་གནས་ཚུལ་དང་འབྲེལ་བའི་གནད་དོན་འགའ།

Himachal Pradesh Vidhan Sabha Speaker Shri Kuldeep Singh Pathania with member of Parliament of the Tibetan Parliament in Exile at Himachal Raj Bhawan (Photo/CTA)

བོད་མི་མང་སྤྱི་འཐུས་དོན་འགྲུབ་བཀྲ་ཤིས་ལགས་དང་སྤྱི་འཐུས་ཚེ་རིང་དབྱངས་ཅན་ལགས་རྣམ་གཉིས་ཧི་མ་ཅལ་ནང་ས་བགོས་སྐོར་སྐྱོད་དུ་ཕེབས་ཏེ། ཟླ་འདིའི་ཕྱི་ཚེས་ ༣ ཉིན་ཧི་མ་ཅལ་མངའ་སྡེའི་རྒྱལ་ས་སིམ་ལ་རུ། མངའ་སྡེའི་གྲོས་ཚོགས་ཀྱི་ཚོགས་གཙོ་ཀུལ་ཌིབ་སིང་ (Kuldeep Singh Pathania) མཆོག་དང་མཇལ་འཕྲད་གནང་ཡོད་འདུག་ལ། རྒྱ་གར་གྱི་གསར་འགྱུར་བརྒྱུད་ལམ་ཁག་ཅིག་ཏུ་དེ་འབྲེལ་གནས་ཚུལ་སྤེལ་བའི་ནང་། མཇལ་འཕྲད་སྐབས་ཀུལ་ཌིབ་སིང་མཆོག་གིས་༧གོང་ས་མཆོག་གི་དབུས་བཙན་བྱོལ་བོད་མི་རྣམས་ཧི་མ་ཅལ་མངའ་སྡེའི་ནང་གཞིས་ཆགས་ཏེ་མི་ལོ་ ༦༥ ལྷག་འགྲོ་བཞིན་ཡོད་ལ། རྒྱ་གར་གཞུང་གིས་མུ་མཐུད་བོད་དོན་ལ་རྒྱབ་སྐྱོར་གནང་རྒྱུ་ཡིན་ལ། གང་མགྱོགས་༧བོད་མིའི་བླ་ན་མེད་པའི་དབུ་འཁྲིད་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་འཆར་ཡོད་སྐོར་དང་། ཕྱི་ལོ་ ༡༩༨༧ ལོའི་རྗེས་ནས་རྒྱ་གར་ནང་སྐྱེས་པའི་བོད་མི་རྣམས་ལའང་རྒྱ་གར་གྱི་འོས་བསྡུ་ཆེན་མོའི་ནང་འོས་བླུགས་པའི་ཐོབ་ཐང་ཡོད་སྐོར་གསུངས་ཡོད་ལུགས་བརྗོད་འདུག

དེའི་ཐད་འདི་གའི་གསར་འགོད་པས་ཞལ་པར་བརྒྱུད་སྤྱི་འཐུས་རྣམ་པ་གཉིས་དང་འབྲེལ་ཡོད་མཉམ་བཅར་ཞུས་པ་རྣམས་ལ་འབྲེལ་བ་ཞུས་ཏེ་བཀའ་འདྲི་ཞུས་སྐབས། གསར་འགྱུར་བརྒྱུད་ལམ་ཁག་ཅིག་ཏུ་གནས་ཚུལ་དེ་འདྲ་སྤེལ་འདུག་ཀྱང་། མཇལ་འཕྲད་གནང་སྐབས་ཕྱི་ལོ་ ༡༩༨༧ ལོའི་རྗེས་སུ་རྒྱ་གར་ནང་སྐྱེས་བའི་བོད་མི་རྣམས་ལ་འོས་བླུགས་པའི་ཐོབ་ཐང་ཡོད་སྐོར་གྱི་བཀའ་མོལ་ཞིག་བྱུང་མེད་སྐོར་འགྲེལ་བརྗོད་གནང་བྱུང་།

སྤྱིར་བཏང་རྒྱ་གར་གྱི་མི་སེར་ཐོབ་ཐང་སྤྲོད་ཕྱོགས་ཀྱི་རྩ་ཁྲིམས་བསྐྱར་བཅོས་ནང་། ཕྱི་ལོ་ ༡༩༥༠ ཟླ་ ༡ ཚེས་ ༢༦ ཉིན་ནས་ ༡༩༨༧ ཟླ་ ༦ ཚེས་ ༣༠ ནང་ཚུད་དུ་རྒྱ་གར་ནང་སྐྱེས་བ་ཚང་མ་རྒྱ་གར་གྱི་མི་སེར་ཆགས་ཀྱི་ཡོད་ཅེས་འཁོད་ཡོད་ཀྱང་། ༡༩༨༧ ལོར་བསྐྱར་བཅོས་གནང་སྟེ། རྒྱ་གར་ནང་སྐྱེས་བ་མ་ཟད། ཕ་མ་གཉིས་གང་རུང་ཞིག་རྒྱ་གར་གྱི་མི་སེར་ཡིན་ན་རང་བཞིན་གྱིས་མི་སེར་ཆགས་ཀྱི་ཡོད་པ་གསལ་ཡོད་པ་རེད། དེ་བཞིན་ཕྱི་ལོ་ ༢༠༡༤ ཟླ་ ༢ ཚེས་ ༧ ཉིན་རྒྱ་གར་དབུས་འོས་བསྡུ་ལྷན་ཁང་གིས་གསལ་བསྒྲགས་ཤིག་སྤེལ་བའི་ནང་། རྒྱ་གར་ནང་ཡོད་པའི་བོད་མི་རྣམས་ལ་རྒྱ་གར་རྒྱལ་ཡོངས་འོས་བསྡུའི་ནང་འོས་བླུག་པའི་ཐོབ་ཐང་ཡོད། དེ་ནི་ལོ་ངོ་ ༥༥ རྗེས་སུ་རྒྱ་གར་ནང་བཙན་བྱོལ་དུ་ཡོད་པའི་བོད་མི་རྣམས་ལ་འོས་བླུག་པའི་ཐོབ་ཐང་སྤྲད་པ་ཐོག་མ་ཆགས་ཀྱི་ཡོད། ཅེས་གསུངས་ཡོད་པ་རེད།

ཉེ་བའི་ལོ་ཤས་ནང་རྒྱ་གར་ནང་དུ་གནས་སྡོད་བོད་མིའི་ནང་རྒྱ་གར་གྱི་འོས་བསྡུའི་ནང་ཆ་ཤས་ལེན་མཁན་གང་ཙམ་མང་པོ་ཡོང་གི་ཡོད་ལ། རྒྱ་གར་གྱི་འོས་བསྡུའི་དུས་མཚམས་རེ་རེ་བསླེབས་སྐབས་འོས་འཕེན་པའི་ལག་ཁྱེར་(Voter Card)བཟོ་བར་འབོད་སྐུལ་གནང་མཁན་ཡང་མང་པོ་ཡོད་པ་རེད། རྒྱ་གར་གྱི་མི་སེར་ཡིན་ན་འོས་བླུག་པའི་ཐོབ་ཐང་ཆ་ཚང་ཡོད་པ་སྨྲོས་མ་དགོས་པ་དང་། འོས་བླུག་པའི་ཐོབ་ཐང་ཡོད་ན་རྒྱ་གར་གྱི་མི་སེར་ལ་རྩི་དགོས་པ་ཞིག་ཀྱང་ཆགས་ཀྱི་ཡོད་འདུག གང་ཡིན་ཟེར་ན། འོས་བླུག་པའི་ཐོབ་ཐང་གི་ཆ་རྐྱེན་དང་པོའི་ནང་། འོས་བླུག་པའི་ཐོབ་ཐང་ཡོད་ན་རྒྱ་གར་གྱི་མི་སེར་ཡིན། ཞེས་གསལ་བསྡད་ཡོད་པ་རེད།

དེ་རིང་འདི་གའི་གསར་འགོད་པས་ཞལ་པར་བརྒྱུད་བོད་དོན་འཐབ་རྩོད་པ་དང་རྩོམ་པ་པོ་བསྟན་འཛིན་བརྩོན་འགྲུས་ལགས་སུ་ཉེ་སྔོན་གསར་འགྱུར་བརྒྱུད་ལམ་ཁག་ཏུ་ཐོན་པའི་གནས་ཚུལ་དང་འབྲེལ་ནས་གནད་དོན་ཁག་ཅིག་ཐོག་བཅར་འདྲི་ཞུ་སྐབས་ཁོང་གིས། ཕྱི་ལོ་་ ༢༠༡༤ ལོའི་ཡོངས་ཁྱབ་གསལ་བསྒྲགས་དེའི་ཐོག་ནས་རྒྱ་གར་གྱི་འོས་བསྡུ་ལྷན་ཁང་གིས་བོད་མི་རྣམས་རྒྱ་གར་གྱི་མི་སེར་ཡིན་པ་ཞིག་ལ་ངོས་འཛིན་བྱེད་ཀྱི་ཡོད་ཀྱང་། རྒྱ་གར་གྱི་ནང་སྲིད་ལས་ཁུངས་དང་ཕྱི་སྲིད་ལས་ཁུངས་ཀྱིས་བོད་མི་རྣམས་ལ་ (Registration Certificate &RC) གནང་གི་ཡོད་པ་དེས། བོད་མི་རྣམས་ཕྱི་རྒྱལ་གྱི་མི་སེར་ཆགས་ཀྱི་ཡོད་མེད་དང་། རྩ་ཁྲིམས་ཀྱི་ཐོག་ནས་དེ་གཉིས་འགལ་ཟླར་འགྲོ་ཡི་ཡོད་མེད་དེ་དྲི་བ་ཆེན་པོ་རེད་འདུག ཅེས་དང་། གནད་དོན་དེ་བཙན་བྱོལ་བོད་མིའི་སྒྲིག་འཛུགས་ཀྱི་ཆབ་སྲིད་དབུ་འཁྲིད་དང་གནད་ཡོད་མི་སྣ་རྣམས་ཀྱིས་རྩ་ཁྲིམས་དང་ཆབ་སྲིད་ཀྱི་ལག་བསྟར་བར་ལ་ཁྱད་པར་ག་རེ་ཡོད་མེད་བཀའ་འདྲི་ཞུས་ནས་གསལ་ཁ་འདོན་རྒྱུ་གལ་ཆེན་པོ་ཡིན་སྐོར་འགྲེལ་བརྗོད་གནང་བྱུང་།

ཕྱི་ལོ་ ༢༠༢༤ ཟླ་ ༥ ཚེས་ ༡༠ ཉིན་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་དེ་འབྲེལ་བཀོད་ཁྱབ་ཅིག་གནང་བའི་ནང་དུ། བོད་མི་ཚོས་རྒྱ་གར་གྱི་འོས་བླུག་པའི་ཐོབ་ཐང་ལག་ཁྱེར་ (Voter Card) ཞེས་འོས་འཕེན་པའི་ལག་ཁྱེར་དང་རྒྱ་གར་མི་སེར་གྱི་ཕྱི་བསྐྱོད་ལག་ཁྱེར་ (Passport) བཞེས་ཆོག་དང་མ་ཆོག་ཅེས་པ་ནི་རང་ཉིད་ཀྱི་རང་དབང་དང་ཐོབ་ཐང་ཞིག་ཡིན་པའི་ཆ་ནས་བོད་མིའི་སྒྲིག་འཛུགས་ཀྱི་ངོས་ནས་ལམ་སྟོན་གནང་རྒྱུ་ལས་ཆོག་དང་མ་ཆོག་གི་ཐོག་ལ་བཙན་བཀའ་གཏང་རྒྱུ་གང་ཡང་མེད་ནའང་། རྒྱ་གར་གཞུང་ནས་བཙན་བྱོལ་བོད་མི་རྣམས་ལ་རྒྱ་གར་གཏན་སྡོད་ལག་ཁྱེར་དང་ཕྱི་བསྐྱོད་ལག་དེབ་སེར་པོ་ཁོ་ན་གནང་བཞིན་ཡོད་པས། འོས་བླུག་པའི་ཐོབ་ཐང་དང་ཕྱི་བསྐྱོད་ལག་ཁྱེར་ཞེས་པ་གཉིས་ནི་རྒྱ་གར་མི་སེར་གྱི་ལག་ཁྱེར་ཞིག་ཆགས་ཀྱི་ཡོད་སྟབས་གཟབ་གཟབ་གནང་དགོས་པ་དང་། རྒྱ་གར་ཆབ་སྲིད་ནང་ཞུགས་པ་དེས་བོད་མི་སྤྱི་ཡོངས་ལ་དགེ་ཚན་ཅི་ཞིག་ཡོད་མེད་ཐོག་བོད་མི་ཚོས་འགན་བཞེས་དགོས། ཞེས་གསུངས་འདུག

ཡང་བཀོད་ཁྱབ་དེའི་ནང་དུ། རྩ་བའི་ཉེ་བའི་ལོ་ཤས་གོང་རྒྱ་གར་ཕྱི་སྲིད་ལས་ཁུངས་ཀྱི་ངོས་ནས་ཕྱི་ལོ་ ༡༩༥༠ ནས་ ༡༩༨༧ བར་གྱི་དུས་བཀག་ཁྲོད་རྒྱ་གར་ནང་སྐྱེས་པའི་བོད་མི་གང་རུང་དང་། དེ་དག་གི་བུ་ཕྲུག་སུ་འདྲ་ཞིག་ཡིན་ཡང་ཡུལ་དེའི་ཕྱི་བསྐྱོད་ལག་ཁྱེར་སྤྲོད་དགོས་པའི་བཀོད་ཁྱབ་བཏང་ཡོད་ཀྱང་། ཕྱི་བསྐྱོད་ལག་ཁྱེར་ཞུ་མཁན་གྱི་བོད་མི་དོ་བདག་ནས་སྐྱབས་བཅོལ་བོད་མིའི་གཞིས་ཆགས་ཐོབ་ཁུངས་ཁག་ནང་ཞུགས་མི་ཆོག་པ་མ་ཟད། བོད་མིའི་སྒྲིག་འཛུགས་ནས་མཐུན་རྐྱེན་གནང་བཞིན་པ་ཁག་ལོངས་སུ་སྤྱོད་མི་ཆོག་པ་སོགས་ཀྱི་ཆ་རྐྱེན་ཁག་ཅིག་བཏོན་ཡོད་པ་དང་། བོད་མིའི་སྒྲིག་འཛུགས་ཀྱི་ངོས་ནས་ཀྱང་གཞིས་ཆགས་ཀྱི་ཐོབ་ཁོངས་ཡོད་མེད་ལ་མ་ལྟོས་པར་བཙན་བྱོལ་བོད་མི་རྒྱ་གར་གྱི་མི་སེར་ལག་ཁྱེར་བཟོ་མཁན་ཚོས་སྐྱབས་བཅོལ་བོད་མིའི་ཁེ་དབང་ལེན་ཆོག་གི་མེད། ཅེས་གསུངས་ཡོད་ལ། རྒྱ་གར་གྱི་ཁྲིམས་ཐོག་ནས་ཀྱང་མི་གཅིག་གིས་མི་སེར་གྱི་ཐོབ་ཐང་དང་སྐྱབས་བཅོལ་བའི་ཐོབ་ཐང་གཉིས་ཀ་ལེན་ཆོག་གི་མེད་པ་རེད།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།