མཁས་དབང་བཙན་ལྷ་ངག་དབང་ཚུལ་ཁྲིམས་ལགས་སྐུ་གྲོངས།

བོད་ནང་གི་མཁས་དབང་བཙན་ལྷ་ངག་དབང་ཚུལ་ཁྲིམས་ལགས་དགུང་ལོ་ ༩༦ ཐོག་སྐུ་གྲོངས་བར་བོད་ནང་གི་ཤེས་ཡོན་པ་མང་པོས་རྗེས་དྲན་དང་མྱ་ངན་ཞུ་ཡི་འདུག

ཁ་སང་ཕྱི་ཚེས་ ༡༦ ཉིན་གྱི་མཚན་མོའི་ཆུ་ཚོད་ ༨།༥༠ ཡས་མས་ཤིག་ལ་བོད་ནང་གི་ལོ་རྒྱུས་མཁས་དབང་དང་སློབ་དཔོན་ཆེན་མོ་བཙན་ལྷ་ངག་དབང་ཚུལ་ཁྲིམས་ལགས་དགུང་ལོ་ ༩༦ སྟེང་སྐུ་གྲོངས་ཡོད་སྟབས། བོད་ནང་གི་རྩོམ་པ་པོ་དང་སྙན་ངག་པ། དེ་བཞིན་ཤེས་ཡོན་པ་མང་པོས་ཁོང་ཉིད་ལ་རྗེས་དྲན་དང་མྱ་ངན་ཞུ་བཞིན་འདུག

མཁས་དབང་ཁོང་སྐུ་གྲོངས་པའི་གནས་ཚུལ་ཐོན་རྗེས། རྒྱའི་བཙོན་ཁང་དུ་མི་ལོ་བཞི་ཡི་རིང་སྡུག་སྦྱོང་མནར་གཅོད་མྱོང་མཁན་རྩོམ་པ་པོ་དྷི་ལྷ་ལྡན་ལགས་ཀྱིས། སྐྱེས་བུ་ཁོང་ཅག་བགྲེས་ཤིང་ཕེབས་ཀྱིན་གང་ཞིག་ནས་ང་ཚོར་འཇིག་ཉེན་ཞིག་འབྱུང་གིན་པའི་ཚོར་བ་ཞིག་ཀྱང་ནམ་རྒྱུན་བླ་ལྷག་གིས་སྐྱེས་ཤིང་། སེམས་ལ་སྐྱོ་ཤས་ཐན་ཐུན་རེའང་ནར་མར་སྐྱེ། འོན་ཀྱང་འདི་ནི་བློ་ཆུང་བདག་གི་རི་བོང་གནམ་རྡིབ་ཀྱི་སེམས་ཁྲལ་ཙམ་ཡིན་ཡང་སྲིད། དམ་པ་ལགས་བདེ་བར་ཕེབས། ས་ལམ་ལ་བར་ཆད་མེད་པར་སྨོན། ཞེས་དང་། དེ་བཞིན་འདས་ལོའི་ལོ་མཇུག་ཙམ་ལ་ཀློད་གྲོལ་ཐོབ་པའི་ན་གཞོན་སྙན་ངག་པ་དཔལ་མགོན་ལགས་ཀྱིས། གངས་ཀྱི་བདེ་སྡུག་བཏེགས་པའི་ཀ་ཆེན་ཞིག་འགྱེལ་སོང་། ཡིད་ཕམ་པ། ཞེས་བརྗོད་འདུག

ཡང་བོད་ནང་གི་བོད་མི་ཞིག་གིས། གངས་དཀར་གྱི་གཤོག་པ་རེ་རེ།  ཆོམ་སྒྲ་དང་བཅས་ཉིལ་བའི་ཤུལ་དུ།  འཁྱག་རླུང་གིས་མནར་བའི་བྱ་ཁྱུའི་ཚོགས།  གྲང་ཤི་མི་ཐེབས་སམ་སྙམ་པའི་དངངས་སྐྲག་ཅིག་ངང་གིས་སྐྱེས་ཨང་། ཞེས་དང་། ཡང་བོད་མི་ཞིག་གིས། སྐད་དང་རིག་གནས་ཀྱི་རྒྱུན་ཐག་ཕྲ་ཞིང་ཕྲ་བའི་དུས་སྐབས་འདིར་རྒན་ཁོང་ལྟ་བུ་རིག་གནས་ཕུལ་བྱུང་ཅན་ཉམས་སུ་བླངས་བའི་ཞུམ་མེད་ཀྱི་སྙིང་སྟོབས་ཆེན་པོ་མངའ་ཞིང་། རིགས་ཀྱི་རྩ་ལག་སྦྲེལ་བར་སྐད་དང་ཡི་གེ་གལ་ཆེན་པོར་མཐོང་བའི་ཟད་མེད་ཀྱི་འདུ་ཤེས་ཟབ་མོ་ནམ་ཡང་ཐུགས་སུ་ཉར་བའི་སྐྱེས་ཆེན་དག་ཅི་འདྲའི་མཁོ་ཞིང་མཁོ་བ་ལའང་། མཁས་པའི་དབང་བོ་བཙན་ལྷ་ངག་དབང་ཚུལ་ཁྲིམས་མཆོག་སྐུ་གཤེགས་པར་གདུང་སེམས་དྲག་པོས་མྱ་ངན་ཞུ། ཞེས་བརྗོད་འདུག་ལ། དེ་བཞིན་བོད་ནང་གི་རྩོམ་པ་པོ་གྲགས་ཅན་ཞོགས་ལྗང་དང་སྙན་ངག་པ་སྐྱབས་ཆེན་བདེ་གྲོལ་སོགས་ཀྱིས་ཀྱང་སྒེར་གྱི་སྐད་འཕྲིན་དུ་རྗེས་དྲན་དང་མྱ་ངན་ཞུས་སོང་། 

སློབ་དཔོན་ཆེན་མོ་བཙན་ལྷ་ངག་དབང་ཚུལ་ཁྲིམས་ལགས་ནི་ཕྱི་ལོ་ ༡༩༣༠ ལོར་བོད་རྒྱལ་མོ་ཚ་བ་རོང་གི་བཙན་ལྷར་སྐྱེས་ཤིང་ ཕྱི་ལོ་ ༡༩༧༧ ལོར་ལྷོ་ནུབ་མི་རིགས་སློབ་ཆེན་གྱི་དགེ་རྒན་གནང་། ཕྱི་ལོ་ ༡༩༨༩ ལོར་སློབ་དཔོན་ཆེན་མོའི་མཚན་གནས་ཐོབ། ཕྱི་ལོ་ ༡༩༩༧ ལོར་ལས་ཁྱུར་ངལ་གསོ་གནང་། ཁོང་གི་གསུང་རྩོམ་ལ《བརྡ་དཀྲོལ་གསེར་གྱི་མེ་ལོང་།》དང་《རྒྱལ་རོང་ཞིབ་འཇུག་དཔྱད་ཡིག་ཕྱོགས་བསྒྲིགས།》 《རྒྱལ་རོང་ཁ་སྐད་ཚིག་མཛོད》 《ཨ་མདོའི་སྐད་དང་རྒྱལ་རོང་སྐད་དཔྱད་སྡུར་དབྱེ་ཞིབ།》 《བཙན་ལྷ་ངག་དབང་ཚུལ་ཁྲིམས་ཀྱི་དཔྱད་རྩོམ་ཕྱོགས་བསྒྲིགས།》 《རྒྱལ་རོང་གི་ལོ་རྒྱུས་དང་རིག་གནས།》(རྒྱ་ཡིག)སོགས་དང་། འགྱུར་ཡིག་ལ《རླངས་ཀྱི་པོ་ཏི་བསེ་རུ།》དང《བཀའ་ཆེམས་དེབ་ཐེར།》 《བོད་ཀྱི་ལོ་རྒྱུས་ཀུན་དགའ་མེ་ལོང་།》སོགས་དང་། གནའ་དཔེ་དཔེ་སྒྲིག་སྐོར་ལ《གེ་སར་སྒྲུང་བཤད་པ་རྣམ་བདུན》དང《གེ་སར་སྒྲུང་ཟངས་མདོག་དཔལ་རི།》 《ཇོ་ནང་ཆོས་འབྱུང་།》 《ཇོ་ནང་ཆོས་འབྱུང་གི་ལྷན་ཐབས།》སོགས་བོད་ཁམས་སུ་སྙན་གྲགས་ཆེན་པོ་རྒྱས་ཡོད་པ་རེད།