ཨ་རིའི་རླུང་འཕྲིན་ཁང་དང་ཨེ་ཤི་ཡ་རང་དབང་རླུང་འཕྲིན་ཁང་སྒོ་བརྒྱབ་པས་སུ་ལ་ཁེ་ཕན་དང་སུ་ལ་གྱོང་གུན་རེད་དམ།

རྩོམ་ཁུངས། བོད་ཀྱི་དུས་བབ།
རྩོམ་པ་པོ། རྒྱལ་མཚན་ཆོས་གྲགས། ཨ་རིའི་རླུང་འཕྲིན་ཁང་གི་རྒྱ་གར་ལྷོ་ཕྱོགས་ཁུལ་གྱི་གསར་འགོད་པ།

སྔོན་གླེང་།

ཕྱི་ལོ་ ༢༠༢༥ ་ཟླ་ ༣ ཚེས་ ༡༤ ཉིན།ཨ་རིའི་སྲིད་འཛིན་ཌོ་ནལ་ཊི་རམ་ཕ་ཡིས་གཞུང་གི་འགྲོ་གྲོན་གཅོག་འཕྲི་ཆེན་པོ་གཏོང་རྒྱུའི་སྲིད་འཛིན་གྱི་འཛིན་སྐྱོང་བཀོད་ཁྱབ་ཞིག་བཏང་བ་བརྒྱུད་རང་དབང་ཅན་གྱི་ཨ་རིའི་མངའ་འོག་ལས་ཁུངས་མང་པོའི་ནང་ཡོད་པའི་ཨ་རིའི་འཛམ་གླིང་བརྒྱུད་ལམ་ལས་ཁུངས་(USAGM)ཀྱི་ལས་དོན་ཉུང་དུ་གཏོང་ཆེད་ལས་ཁུངས་མང་པོའི་ཡན་ལག་མེད་པར་བཟོས་པ་དང་། ལས་བྱེད་མང་པོར་དགོངས་པ་སྤྲད། དེའི་རྐྱེན་པས། ཨ་རིའི་མ་དངུལ་གྱིས་རྒྱབ་སྐྱོར་བྱེད་པའི་ཨ་རིའི་དབྱིན་སྐད་རླུང་འཕྲིན་ཁང་(VOA) དང་ཨེ་ཤ་ཡ་རང་དབང་རླུང་འཕྲིན་ཁང་(RFA)ཡང་ཚུད་པའི་རྒྱལ་སྤྱིའི་རྒྱང་སྲིང་ཁང་ལྔའི་མ་དངུལ་མཚམས་འཇོག་བྱས་པ་དང་རྒྱང་སྲིང་ལས་དོན་མཚམས་འཇོག་བྱས། བོད་མི་ཚོ་དང་ཐད་ཀར་འབྲེལ་བ་ཡོད་པའི་ཨ་རིའི་རླུང་འཕྲིན་ཁང་ VOA དངཨེ་ཤི་ཡ་རང་དབང་རླུང་འཕྲིན་ཁང་ RFA གཉིས་ཀའི་བོད་སྐད་སྡེ་ཚན་ཡང་མ་དངུལ་གཅོག་འཕྲི་བྱས་པའི་ཤུགས་རྐྱེན་འོག་ཚུད་དེ། ཕྱི་ཟླ་ ༣ ཚེས་ ༡༤ ནས་བཟུང་ལས་དོན་སྒྲུབ་མ་ཐུབ་པར་གྱུར་ཡོད།  རྩོམ་ཡིག་འདིའི་ནང་། ངས་བོད་མི་མང་དང་རླུང་འཕྲིན་ཁང་གཉིས་ཀྱི་དབར་གྱི་ལོ་རྒྱུས་ཀྱི་འབྲེལ་བ་དང་། དེ་དག་གིས་བོད་མི་རྣམས་ལ་བསྐྲུན་པའི་ཁེ་ཕན། དེ་དག་སྒོ་བརྒྱབ་པ་ལས་བྱུང་བའི་གྱོང་གུན་སྐོར་གྱི་ངའི་ཉམས་མྱོང་དང་མཐོང་ཚུལ་རྣམས་གླེང་རྒྱུ་ཡིན།

བོད་མི་དང་ཨ་རིའི་རླུང་འཕྲིན་ཁང་བོད་སྐད་སྡེ་ཚན་(VOA)དང་ཨེ་ཤི་ཡ་རང་དབང་རླུང་འཕྲིན་ཁང་ (RFA) བོད་སྐད་སྡེ་ཚན་གཉིས་ཀྱི་འབྲེལ་བ།

ཨ་རིའི་རླུང་འཕྲིན་ཁང་བོད་སྐད་སྡེ་ཚན་(VOA)ནི་ཕྱི་ལོ་ ༡༩༩༡ ལོར་དབུ་བརྙེས་པ་དང་། ཨེ་ཤི་ཡ་རང་དབང་རླུང་འཕྲིན་ཁང་བོད་སྐད་སྡེ་ཚན་(RFA)ནི་ ༡༩༩༦ ལོར་དབུ་བརྙེས་པ་རེད། རླུང་འཕྲིན་ཁང་གཉིས་ཀའི་དམིགས་ཡུལ་གཙོ་བོ་ནི་རང་དབང་ལྡན་པའི་གསར་འགྱུར་དང་གནས་ཚུལ་མཁོ་སྤྲོད་བྱེད་རྒྱུ་དེ་ཡིན། ལྷག་པར་དུ་བོད་ནང་གི་བོད་མི་རྣམས་ལ་ཕྱི་ཕྱོགས་ཀྱི་གནས་ཚུལ་དང་། འཛམ་གླིང་གི་གནས་བབ། བཙན་བྱོལ་བོད་མིའི་གནས་ཚུལ་སོགས་མཁོ་སྤྲོད་བྱེད་ཀྱི་ཡོད།

ང་རང་ཚུད་པའི་བོད་དོན་ལ་དོ་སྣང་ཡོད་མཁན་བོད་མི་ཚོ་དང་རླུང་འཕྲིན་ཁང་གཉིས་པོ་དེའི་དབར་བརྗོད་མི་ཚར་བའི་དགའ་སྐྱོ་ཆགས་སྡང་གི་ལོ་རྒྱུས་རིང་པོ་ཞིག་ཡོད། སྙིང་སྟོབས་སྐྱེད་པ་དང་རེ་བ་སྐྲུན་པའི་གསར་འགྱུར། བློ་སྐྱེད་ལྡན་པའི་བགྲོ་གླེང་། ཆོས་དང་རིག་གཞུང་། ཡུལ་སྲོལ་གོམས་གཤིས། སྐད་ཡིག་མི་ཉམས་རྒྱུན་འཛིན་སོགས་ཀྱི་ལས་རིམ་དེ་དག་ནི་བོད་མིའི་སེམས་ཁམས་སུ་བརྩེ་སེམས་ཀྱིས་ཁྱབ་པའི་མེ་ཏོག་ཞིག་དང་འདྲ་བར་བོད་མིའི་འཚོ་བའི་ནང་མེད་དུ་མི་རུང་བའི་ཆ་ཤས་ཤིག་ཏུ་གྱུར་ཡོད།

བོད་མི་མང་ཆེ་བས་རླུང་འཕྲིན་ཁང་གཉིས་ཀྱི་ལས་དོན་ལ་བསྔགས་བརྗོད་ཞུ་བཞིན་ཡོད་ནའང་། རེ་ཟུང་གིས་སྐྱོན་བརྗོད་བྱེད་པའང་ཡོད། སྐྱོན་བརྗོད་གཙོ་བོ་ནི་ཕྱོགས་ལྷུང་ཆེ་དྲགས་པ་དང་།  ཆབ་སྲིད་ཀྱི་ལྟ་བའི་ཐད་དྲང་བདེན་མིན་པ་སོགས་བརྗོད་ཀྱི་ཡོད།

འོན་ཀྱང་སྤྱི་ཡོངས་ནས་བལྟས་ན། བོད་མི་མང་ཆེ་བས་རླུང་འཕྲིན་ཁང་གཉིས་ཀྱི་ལས་དོན་ལ་ཡིད་ཆེས་དང་གདེང་འཇོག་བྱེད་ཀྱི་ཡོད། ལྷག་པར་དུ་བོད་ནང་ཉེན་ཁའི་ཁྲོད་ནས་རླུང་འཕྲིན་ཉན་མཁན་བོད་མི་རྣམས་ཀྱིས། རླུང་འཕྲིན་ཁང་གཉིས་ནི་ཕྱི་ཕྱོགས་ཀྱི་གནས་ཚུལ་དང་། ༸གོང་ས་མཆོག་གི་བཀའ་སློབ། བཙན་བྱོལ་བོད་མིའི་གནས་སྟངས་སོགས་ཤེས་རྟོགས་ཐུབ་པའི་ཐབས་ལམ་གལ་ཆེ་ཞིག་ཏུ་བརྩི་བཞིན་ཡོད་ལ་རླུང་འཕྲིན་ཁང་གཉིས་ནི་བོད་མི་རིགས་ཀྱི་སྙིང་སྟོབས་དང་རེ་བ་མི་ཉམས་སྲུང་སྐྱོབ་བྱེད་པའི་ལྡེ་མིག་ལྟ་བུ་ཞིག་ཏུའང་གྱུར་ཡོད།

ངའི་རྒན་ལགས་ཀྱིས་གསང་བའི་སྒོ་ནས་ཕྱིའི་རླུང་འཕྲིན་ཉན་པའི་ལོ་རྒྱུས།

ང་རང་ཆུང་དུས་བོད་ཀྱི་རྒྱལ་ས་ལྷ་སའི་ཉེ་འཁྲིས་ཀྱི་སེ་ར་དགོན་པར་ནང་ཆོས་སློབ་གཉེར་བྱེད་ཆེད་ལོ་ཁ་ཤས་བསྡད། སེ་ར་དགོན་པའི་གཞུང་སྒོ་ནས་ཡར་ནང་དུ་འཛུལ་བ་ན་དགོན་པའི་ཚོང་ཁང་དུ་སླེབས། ང་ཚོའི་གྲྭ་ཤག་ནི་ཚོང་ཁང་གི་ཐོག་རྩེག་གཉིས་པ་དེར་ཡོད། ཚོང་ཁང་ཡོད་ས་དེ་ནི་སེར་སྨད་གྲྭ་ཚང་གི་གཞུང་པ་ཁང་ཚན་རེད། ང་ཚོའི་ཤག་གི་སྒེའུ་ཁུང་ནས་བལྟས་ན་དགོན་པར་མཆོད་མཇལ་ཞུ་མཁན་དད་ལྡན་མང་ཚོགས་དགོན་པའི་གཞུང་སྒོ་བརྒྱུད་ནས་ནང་དུ་འགྲོ་བ་དང་ཕྱིར་ཐོན་པ་མཐོང་ཐུབ།

༡༩༥༡ ལོར་རྒྱ་ནག་གཞུང་གིས་བོད་བཙན་བཟུང་མ་བྱས་གོང་ངའི་རྒན་ལགས་ཁོང་བོད་ཀྱི་རྒྱལ་ས་ལྷ་སའི་ཉེ་འཁྲིས་སུ་ཡོད་པའི་སེ་ར་བྱེས་གྲྭ་ཚང་གི་ཧར་གདོང་ཁང་ཚན་གྱི་དྲུང་ཡིག་གནང་འདུག ཁོང་ནི་བོད་ཀྱི་སྲོལ་རྒྱུན་ཡིག་གཟུགས་སྒྱུ་རྩལ་དང་སྤྱི་ཚོགས་ཡིག་བཟོའི་རིགས་ལ་བྱང་ཆུབ་པ་ཞིག་རེད། རྒྱ་མིས་བོད་བཙན་བཟུང་བྱས་རྗེས་བོད་ནང་དགོན་སྡེ་ལྷ་ཁང་སྟོང་ཕྲག་མང་པོ་རྩ་གཏོར་བཏང་བ་དང་གྲྭ་བཙུན་རྣམས་ཀྱང་དགོན་པ་ནས་ཕྱིར་ཕུད་བཏང་། ངའི་རྒན་ལགས་ཀྱང་རང་གི་འཁྲུངས་ཡུལ་གྲོང་གསེབ་ཏུ་ལོག་ནས་ལོ་བཅུ་ཕྲག་ཁ་ཤས་རིང་དཀའ་ཚེགས་ཆེ་བའི་ཞིང་པའི་འཚོ་བ་བསྐྱལ། ཕྱི་ལོ་༡༩༧༨ རྗེས་སུ་རྒྱ་ནག་གཞུང་གིས་བོད་དུ་ཆོས་ལུགས་སྲིད་ཇུས་ཅུང་ཟད་གུ་ཡངས་སུ་བཏང་རྗེས་ཁོང་རང་གི་འཁྲུངས་ཡུལ་གྲོང་གསེབ་ནས་སླར་ཡང་སེ་ར་དགོན་པར་ཕྱིར་ལོག་གནང་སྟེ་དྲུང་ཡིག་གི་ལས་འགན་བསྐྱར་དུ་བཞེས། ཁོང་གི་ལས་འགན་གཙོ་བོ་ནི་དགོན་པའི་རྒྱུ་དངོས་ཀྱི་བདག་གཉེར་གནང་མཁན་(ནོར་རྫས་གཉེར་བ)གནང་གི་འདུག

ངའི་དྲན་པ་གསལ་ཤོས་ཞིག་ནི་དགོང་མོའི་ཆུ་ཚོད་དགུ་པ་ནས་བཅུ་པའི་བར་ནི་ངའི་རྒན་ལགས་ཁོང་གི་དུས་ཚོད་ཆེས་གལ་ཆེ་ཤོས་དེ་ཡིན། དེ་ནི་ཁོང་གིས་ཕྱི་རྒྱལ་ནས་བཏང་བའི་བོད་སྐད་རླུང་འཕྲིན་ལེ་ཚན་ལ་གསན་པའི་དུས་ཚོད་རེད། ཐོག་མར་ཁོང་གིས་སྒོ་དང་སྒེའུ་ཁུང་ཚང་མ་ནན་ཏན་གྱིས་བརྒྱབ་ནས། གྲྭ་ཤག་གི་མཐའ་འཁོར་རམ་སྒེའུ་ཁུང་གི་འོག་ཏུ་མི་ཡོད་མེད་ཞིབ་ཕྲ་བརྟག་དཔྱད་གནང་རྗེས། རླུང་འཕྲིན་གྱི་ཨང་གྲངས་ཡར་མར་སྤོས་ཏེ། སྒྲ་གདངས་དམའ་མོ་བཟོས་ནས། སྒྲ་སྡུད་འཕྲུལ་ཆས་དེ་རང་གི་རྣ་བ་དང་ཉེ་པོར་བཟུང་སྟེ་ཧ་ཅང་གི་ཐུགས་སྣང་ཆེན་པོས་གསན་གྱི་རེད། དེ་དུས་ང་ཚོ་དགེ་ཕྲུག་རྣམས་ཀྱང་ཁུ་སིམ་མེར་སྡོད་དགོས་པ་ལས་ཁོང་ལ་བར་ཆད་གཏོང་མི་ཆོག

དེའི་སྐབས་སུ་ངས་ཁོང་གིས་རླུང་འཕྲིན་ཉན་རྒྱུ་དེ་ཅིའི་ཕྱིར་གལ་ཆེན་པོར་བརྩིས་པ་དང་། ཁོང་གིས་ག་རེ་ཉན་གྱི་ཡོད་མེད་ཀྱང་མ་ཤེས། སྐབས་རེར་ཁོང་གི་བཞིན་རས་ལ་འཛུམ་དང་སྤྲོ་སྣང་མངོན་པའི་གནས་སྟངས་ཡོང་གི་ཡོད་པ་དེ་ནི་གསར་འགྱུར་བཟང་པོ་ཐོས་པའི་རྟགས་མཚན་ཞིག་ཡིན་ངེས། རྗེས་སུ་ངས་ཁོང་གིས་ཉན་བཞིན་པའི་རླུང་འཕྲིན་ལེ་ཚན་གྱི་ཐོག་དོ་སྣང་བྱུང་།

ངས་ཤེས་རྟོགས་བྱུང་བ་ལྟར་ན། ཁོང་གིས་ཉན་བཞིན་པ་དེ་ནི་ཨ་རིའི་བོད་སྐད་རླུང་འཕྲིན་ལེ་ཚན་རེད་འདུག རྗེས་སུ་ངས་ཀྱང་རྒན་ལགས་མཉམ་དུ་ཨ་རིའི་རླུང་འཕྲིན་ཁང་གི་གསར་འགྱུར་ལ་ཐེངས་མང་ཉན་མྱོང་ཡོད། དགོན་པའི་ནང་ཨ་རིའི་རླུང་འཕྲིན་ཁང་གི་བོད་སྐད་ཚན་པའི་གསར་འགྱུར་ལ་ཉན་མཁན་ངའི་དགེ་རྒན་གཅིག་པུ་མིན་པར་དགེ་འདུན་པ་གཞན་མང་པོས་ཀྱང་ཉན་གྱི་ཡོད་པ་ངས་རྗེས་སུ་ཤེས་བྱུང་།  རླུང་འཕྲིན་འདི་དག་བརྒྱུད་ནས་གཤམ་གྱི་གནས་ཚུལ་རྣམས་ཤེས་ཐུབ་ཀྱི་ཡོད།

• ༧གོང་ས་སྐྱབས་མགོན་ཆེན་པོ་མཆོག་གི་མཛད་འཕྲིན།
• བོད་དང་འབྲེལ་བའི་གནད་དོན་ཁག
• ཕྱི་རྒྱལ་ནས་བོད་དོན་ཐད་རྒྱབ་སྐྱོར་བྱེད་ཀྱི་ཡོད་པའི་སྐོར།
• རྒྱལ་སྤྱིའི་གསར་འགྱུར་སོགས།

སྐབས་རེར་ཨ་རིའི་སྲིད་འཛིན་དང་༸གོང་ས་སྐྱབས་མགོན་ཆེན་པོ་མཆོག་མཇལ་འཕྲད་གནང་བ་དང་བོད་སྐོར་གསུང་བཤད་ཀྱང་ཐོས་ཐུབ། ༸གོང་ས་མཆོག་དང་བོད་དོན་སྐོར་གྱི་གསར་འགྱུར་གལ་ཆེན་ཤོད་སྐབས་རྒྱ་ནག་གཞུང་གིས་ཆེད་མངགས་རོལ་མོའི་སྒྲ་དང་སྐད་སྒྲ་ཤུགས་ཆེན་པོ་བཏང་ནས་གསར་འགྱུར་ལས་རིམ་ཉན་མ་ཐུབ་པའི་བར་ཆད་བཟོ་ཡི་ཡོད།

བོད་དང་འབྲེལ་བའི་གསར་འགྱུར་གལ་ཆེན་ཞིག་ཐོས་པའི་སྐབས་སུ་ངའི་རྒན་ལགས་ཀྱི་ཡིད་ཆེས་འཕེར་བའི་དགེ་འདུན་པ་རྒན་གྲས་དེ་འདྲ་ང་ཚོའི་གྲྭ་ཤག་ཏུ་ཕེབས་གནང་གི་ཡོད་ལ། ཁོང་ཚོས་མཉམ་དུ་གསར་འགྱུར་གྱི་ནང་དོན་ལ་གྲོས་བསྡུར་གནང་བ་དང་མྱོང་ཚོར་བརྗེ་རེས་བྱེད་པ། བོད་ཀྱི་མ་འོངས་པའི་མདུན་ལམ་ལ་སྤོབས་པ་དང་རེ་བ་ཡོད་པའི་སྐད་ཆ་ཤོད་པ་རྣམས་ཡང་ཡང་དྲན་གྱི་འདུག

ང་རྒྱ་གར་ནང་ཆབ་སྲིད་ཀྱི་བཙན་བྱོལ་དུ་འབྱོར་ནས་ལོ་ཁ་ཤས་སོང་བའི་རྗེས་སུ། ངའི་རྒན་ལགས་ཁོང་སྐུ་ཚེའི་འཕེན་པ་རྫོགས་སོང་། ཁོང་སྐུ་མ་གཤེགས་ཀྱི་བར་དུ་ཁོང་གིས་ཨ་རིའི་རླུང་འཕྲིན་ཁང་དང་ཨེ་ཤི་ཡ་རང་དབང་རླུང་ཁང་གཉིས་པོ་དེར་ཉན་རྒྱུ་ནམ་ཡང་མཚམས་བཞག་མི་འདུག

དུས་སྐབས་དེའི་ནང་རྒྱ་ནག་དམར་ཤོག་གཞུང་གི་དམ་དྲག་ཆེན་པོ་ཡོད་མིན་ལ་མ་ལྟོས་པར་བོད་ས་ཡོངས་ཀྱི་དགོན་པ་ཁག་དང་། ཞིང་པ་དང་འབྲོག་པ་བཅས་ཀྱི་ཁྲོད་དུ་ཨ་རིའི་རླུང་འཕྲིན་གྱི་བོད་སྐད་ཚན་པ་ཙམ་མ་ཟད་ད་དུང་རྗེས་སུ་ཨེ་ཤ་ཡའི་རང་དབང་རླུང་འཕྲིན་ཁང་དང་ནོར་ཝེ་བོད་ཀྱི་རླུང་འཕྲིན་ཁང་བཅས་ལ་གསང་བའི་ངང་ནས་བོད་དང་འབྲེལ་བའི་གསར་འགྱུར་ལ་ལྟ་ཉན་བྱ་རྒྱུ་ཁྱབ་ཆེན་པོ་ཡོད་འདུག་ལ། གསར་འགྱུར་ལྟ་ཉན་པའི་ཉམས་མྱོང་ཡང་གཅིག་པ་ཡིན་པ་འདྲ།

 རླུང་འཕྲིན་ཁང་གཉིས་ཀྱི་ལས་དོན་མཚམས་འཇོག་བྱས་རྗེས་བོད་ནང་གི་བོད་མི་ཚོའི་སེམས་འཚབ།

ཨ་རིའི་རྒྱལ་སྤྱིའི་བརྒྱུད་ལམ་ལས་ཁུངས་USAGM གྱི་ཐད་ཀའི་ལྟ་རྟོག་འོག་ཡོད་པའི་ཨ་རིའི་རླུང་འཕྲིན་VOA དང་ཨེ་ཤ་ཡ་རང་དབང་རླུང་འཕྲིན་RFA ནི་ཨ་རིའི་འཇམ་པོའི་སྟོབས་ཤུགས་ཀྱི་རྨང་གཞི་ཡིན་ཞིང་། དམངས་གཙོའི་རིན་ཐང་གོང་སྤེལ་གཏོང་བ་དང་། རྒྱ་ནག་(CGTN) དང་། ཨུ་རུ་སུ་(RT/Sputnik)། ཨི་རཱན་(PressTV) ལྟ་བུའི་སྲིད་གཞུང་གི་དྲིལ་བསྒྲགས་ལ་ཁ་གཏད་གཅོག་ཐབས་ཆེད་དུ་ཡིན་པ་རེད།

ཡིན་ན་ཡང་ད་རེས་གློ་བུར་དུ་རླུང་འཕྲིན་ཁང་དེ་དག་གི་ལས་དོན་མཚམས་འཇོག་བྱེད་དུ་བཅུག་པའི་ཁྲོད་ནས་བོད་ཕྱི་ནང་གཉིས་ཀྱི་བོད་མིའི་དབར་ཟམ་པ་དང་མགྲིན་ཚབ་པའི་ཚུལ་དུ་གནས་པའི་ཨ་རིའི་བོད་སྐད་རླུང་འཕྲིན་ཁང་དང་ཨེ་ཤི་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གཉིས་ཀྱང་ལས་དོན་སྒྲུབ་མི་ཐུབ་པའི་ཤིན་ཏུ་ཛ་དྲག་པོའི་གནས་ཚུལ་བོད་ནང་ཁུལ་དུ་ཁྱབ་རྗེས། བོད་ནང་གི་བོད་མི་མང་པོའི་སེམས་ནང་སྡུག་བསྔལ་དང་སེམས་འཚབ་ཆེན་པོ་བྱུང་འདུག།

ལྷ་ས་ནས་ཡིན་པའི་བོད་མི་ཞིག་གིས་བདེ་འཇགས་ཀྱི་ཉེན་ཁར་བསམ་ཤེས་ཀྱིས་མིང་མ་བརྗོད་པར་ང་ལ་བཤད་དོན། “རླུང་འཕྲིན་ཁང་འདི་གཉིས་ནི་ང་ཚོར་མཚོན་ན་སྒེའུ་ཁུང་ཆུང་ཆུང་ཞིག་བརྒྱུད་ནས་འཛམ་གླིང་ཆེན་པོ་མཐོང་ཐུབ་པའི་ཐབས་ལམ་གཅིག་པུ་དེ་ཡིན། འདི་མེད་ན་ང་ཚོ་མུན་ནག་ནང་ལྟ་བུར་ལུས་ངེས་རེད།” ཅེས་བཤད་བྱུང་།

ཡང་བོད་ཤར་ཕྱོགས་ཀྱི་ས་ཁུལ་ཞིག་ནས་གཞོན་སྐྱེས་ཤིག་གིས་ཀྱང་ཁོང་གི་སེམས་ཚོར་འདི་ལྟར་བརྗོད་དོན། “ཨ་རིས་རོགས་སྐྱོར་གནང་བའི་བོད་སྐད་རླུང་འཕྲིན་ཁང་དེ་གཉིས་ཡོད་པ་ལ་རྟེན་ནས་བོད་ནང་གི་གནས་ཚུལ་རྒྱལ་སྤྱིའི་ཐོག་སྤེལ་ཐུབ་པ་དང་ཕྱིའི་གནས་ཚུལ་བོད་ནང་ཤེས་རྟོགས་ཐུབ་ཀྱི་ཡོད། ད་ཆ་གློ་བུར་དུ་རླུང་འཕྲིན་ཁང་སྒོ་བརྒྱབ་པ་ནི་ཡིད་མི་ཆེས་པ་ཞིག་རེད།” ཅེས་གསུངས་བྱུང་།

            ངའི་མྱོང་ཚོར་དང་གསར་འགོད་པའི་ཉམས་མྱོང་།

ང་རང་རྒྱ་གར་ནང་ཆབ་སྲིད་ཀྱི་བཙན་བྱོལ་དུ་འབྱོར་རྗེས། གནས་སྟངས་དང་ངའི་དོ་དབྱིངས་ལ་བརྟེན་ནས། ཕྱི་ལོ་ ༢༠༠༩ ནས་ ༢༠༡༨ བར་དུ་ནོར་ཝེ་བོད་ཀྱི་རླུང་འཕྲིན་ (Voice of Tibet) རྒྱ་གར་ལྷོ་ཕྱོགས་ཀྱི་ས་གནས་གསར་འགོད་པའི་ལས་ཀ་བྱེད་པའི་གོ་སྐབས་ཐོབ་བྱུང་། དེ་རྗེས། ༢༠༡༨ ནས་༢༠༢༥ བར། ལོ་བདུན་རིང་ཨ་རིའི་རླུང་འཕྲིན་ཁང་གི་བོད་སྐད་སྡེ་ཚན་གྱི་རྒྱ་གར་ལྷོ་ཕྱོགས་ཁུལ་གྱི་ས་གནས་གསར་འགོད་པའི་འགན་འཁུར་བླངས།

རླུང་འཕྲིན་ཁང་གཉིས་ཀའི་ནང་ངའི་འགན་འཁྲི་གཙོ་བོ་ནི་བོད་ནང་གི་གནས་ཚུལ་བསྡུ་རུབ་བྱས་ཏེ་རྒྱལ་སྤྱིའི་སྤྱི་ཚོགས་ལ་རྒྱང་སྲིང་བྱེད་རྒྱུ་དེ་ཡིན། དུས་ཡུན་ལོ་ངོ་ ༡༧ ཙམ་དེའི་རིང་ལ། ངས་གཤམ་གྱི་བོད་ནང་གི་གནས་ཚུལ་གལ་ཆེན་མང་པོ་སྤེལ་ཐུབ་ཡོད།

• བོད་མི་ ༡༥༥ ལྷག་གིས་རང་ལུས་མེར་བསྲེགས་བཏང་སྟེ་རྒྱ་ནག་གཞུང་ལ་ངོ་རྒོལ་བྱས་པ།
• ཞི་བའི་ངོ་རྒོལ་ལས་འགུལ་སྣ་ཚོགས།
• ཆོས་དད་རང་དབང་མེད་པའི་གནས་སྟངས།
• ཁོར་ཡུག་གཏོར་བཤིག་གི་དཀའ་ངལ།
• འབྲོག་པ་དབང་ཤེད་ཀྱིས་གནས་སྤོ་བྱེད་དུ་བཅུག་པའི་གནད་དོན།
• ས་ཞིང་འཕྲོག་བཅོམ་གྱི་གནས་ཚུལ།
• བོད་མི་འཛིན་བཟུང་དང་བཙོན་འཇུག སྲོག་ཐོག་ཁྲིམས་ཆད་བཅད་པའི་སྐོར།
• ས་གནས་དགོན་པ་ཁག་སྒོ་རྒྱག་པའི་བྱ་སྤྱོད།
• སྒེར་གྱི་ཁྱིམ་ཚང་ནང་༸གོང་ས་ཏཱ་ལའི་བླ་མའི་སྐུ་པར་ཉར་མི་ཆོག་པའི་བཀག་སྡོམ།
• བོད་ཀྱི་སྐད་ཡིག་སློབ་སྦྱོང་དང་བེད་སྤྱོད་ཐད་བཀག་འགོག་བྱེད་པའི་སྲིད་བྱུས་སོགས།

ཁྱོན་བསྡོམས་བོད་ནང་གི་གནས་ཚུལ་༡༩༠༠ ལྷག་རྒྱལ་སྤྱིའི་ཐོག་སྤེལ་ཐུབ་ཡོད།

དུས་ཡུན་དེར་ཕྱིར་མིག་བལྟས་ན། ངའི་ལས་ཀས་བོད་པའི་སྤྱི་ཚོགས་དང་བོད་དོན་ལ་ཞབས་འདེགས་ཕྲན་བུ་བསྒྲུབས་ཐུབ་ཡོད་སྙམ་པའི་སྤོབས་པ་སྐྱེ་བཞིན་ཡོད། འོན་ཀྱང་། ལས་ཀ་འདིའི་རྐྱེན་པས་རྒྱ་ནག་གཞུང་གིས་བོད་ནང་གི་ངའི་ཕ་མ་དང་ནང་མི་ཚོར་བསུན་བཙིར་དང་འདྲི་གཅོད་བྱས་ཏེ་དཀའ་ངལ་མང་པོ་བཟོས་པ་ངས་ཤེས་རྟོགས་བྱུང་།

རྒྱ་ནག་དབང་འཛིན་པས་ངའི་ནང་མི་ཚོས་ཕྱི་རྒྱལ་ལ་ཡོད་པའི་ང་དང་འབྲེལ་བ་བྱེད་མི་ཆོག་པའི་དམ་བསྒྲགས་ནན་པོ་བཟོས་པར་བརྟེན། ལོ་བཅུ་ཕྲག་ལྷག་རིང་ང་དང་ངའི་ནང་མི་ཚོའི་དབར་འབྲེལ་བ་ཡོངས་སུ་ཆད་དེ། ཁོང་ཚོའི་གནས་སྟངས་ཇི་ཡིན་ང་ལ་ཤེས་རྟོགས་མེད་པར་གྱུར། འདི་ནི་ངའི་སྒེར་གྱི་གནས་སྟངས་ཙམ་མ་ཡིན་པར། བཙན་བྱོལ་དུ་ཡོད་པའི་གསར་འགོད་པ་དང་བོད་མི་མང་པོར་འཕྲད་བཞིན་པའི་སྤྱི་མཐུན་གྱི་དཀའ་ངལ་ཞིག་ཡིན།

རླུང་འཕྲིན་ཁང་གཉིས་ཀྱི་ལས་དོན་མཚམས་འཇོག་བྱས་པར་རྒྱ་ནག་གཞུང་གི་དགའ་སྤྲོ།

ཨ་རིའི་རླུང་འཕྲིན་ཁང་ལས་མཚམས་བཞག་པའི་གནས་ཚུལ་ཐོན་པའི་ཉིན་གཉིས་པ་དེར་རྒྱ་ནག་གཞུང་འབྲེལ་གསར་འགྱུར་བརྒྱུད་ལམ་ཁག་ནས་དགའ་བསུ་ཞུས་ཡོད། དཔེར་ན། རྒྱ་ནག་གོ་ལའི་དུས་བབ་ (China Global Times) དང་པེ་ཅིན་ཉིན་རེའི་ཚགས་པར་(Beijing Daily) ཐོག་ཨ་རི་གཞུང་གི་ཐག་གཅོད་ལ་དགའ་སྤྲོའི་ངང་བསྔགས་བརྗོད་ཀྱི་རྩོམ་ཡིག་སྤེལ་ཡོད།

ཁོང་ཚོས་ཨ་རིའི་རླུང་འཕྲིན་ཁང་ལ་ ‘རྫུན་གཏམ་གྱི་བཟོ་གྲྭ་’ ཞེས་མིང་འདོགས་བྱས་པ་དང་། དེ་ནི་ཕྱི་རྒྱལ་ནས་རྒྱ་ནག་ལ་སྐྱོན་བརྗོད་ཤུགས་ཆེ་ཤོས་བྱེད་མཁན་གྱི་གྲས་ཡིན་པའི་ཉེས་འཛུགས་བྱས་ཡོད། ཁོང་ཚོའི་དགའ་སྤྲོ་དེས་རླུང་འཕྲིན་ལས་དོན་མཚམས་འཇོག་བྱས་པའི་ཐག་གཅོད་འདིས་སུ་ལ་ཁེ་ཕན་ཐོབ་མིན་དང་སུ་ལ་གྱོང་གུད་ཕོག་མིན་གསལ་སྟོན་བྱས་ཡོད།

 རླུང་འཕྲིན་ཁང་གི་ལས་དོན་མཚམས་འཇོག་བྱས་པར་བཙན་བྱོལ་བོད་མིའི་སྒྲིག་འཛུགས་དང་བོད་མི་ཚོའི་རྣམ་འགྱུར་དང་སེམས་འཚབ།

བོད་ཀྱི་ཆབ་སྲིད་བཙོན་ཟུར་གྲགས་ཅན་སྐུ་ཞབས་མགོ་ལོག་འཇིགས་མེད་ལགས་ནི་ཨ་རིའི་རླུང་འཕྲིན་ཁང་དང་ཨེ་ཤི་ཡ་རང་དབང་རླུང་འཕྲིན་ཁང་ལ་ཉན་པ་དང་བཅར་འདྲི་སྤྲད་པའི་རྐྱེན་གྱིས་བོད་ནང་བཙོན་འཇུག་བྱས་ཤིང་ད་ལྟ་སུད་སིར་བཞུགས་མུས་ཡིན་པ་ཁོང་གིས་གསུངས་དོན། “ངས་རྒྱ་ནག་གི་དབང་སྒྱུར་འོག་ཡོད་པའི་བོད་མི་ཚོར་རླུང་འཕྲིན་ཁང་དེ་གཉིས་ཇི་འདྲའི་གལ་ཆེན་ཡིན་མིན་དངོས་སུ་ཤེས་ཀྱི་ཡོད། དེ་དག་གིས་འཇིགས་སྣང་དང་རྫུན་གཏམ་དྲིལ་བསྒྲགས་ཀྱི་ཁོར་ཡུག་ནང་དུ་རེ་བ་དང་བདེན་པའི་གནས་ཚུལ་མཁོ་སྤྲོད་བྱེད་ཀྱི་ཡོད།” ཅེས་ནན་བཤད་གནང་ཡོད།

བོད་ནང་བཞུགས་པའི་བུད་མེད་རྩོམ་པ་པོ་སྙན་གྲགས་ཅན་ཚེ་རིང་འོད་ཟེར་ལགས་ཀྱིས་གལ་ཏེ་ཨེ་ཤི་ཡ་རང་དབང་རླུང་འཕྲིན་ཁང་དང་ཨ་རིའི་རླུང་འཕྲིན་ཁང་གི་བོད་སྐད་ཚན་པ་སྒོ་བརྒྱབ་ན། “བོད་མིའི་སྐད་སྒྲ་འཛམ་གླིང་འདི་ནས་མེད་པར་འགྱུར་ངེས་རེད།” ཅེས་གསུངས་འདུག

ཕྱི་ཟླ་གསུམ་པར་བཙན་བྱོལ་བོད་མིའི་གྲོས་ཚོགས་ཀྱིས་རྡ་རམ་ས་ལར་ཛ་དྲག་གི་གནད་དོན་འདིའི་ཐོག་གྲོས་བསྡུར་གནང་ཡོད། བཙན་བྱོལ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱང་སྲིང་དེ་དག་བསྐྱར་གསོ་གནང་ཆེད་འབད་བརྩོན་གནང་རྒྱུའི་ཁས་ལེན་གནང་བ་དང་། དེ་དག་མཚམས་འཇོག་བྱེད་པ་དེ་”བོད་མིའི་འཐབ་རྩོད་ལ་གྱོང་གུན་ཆེན་པོ་ཞིག་ཡིན་ཚུལ་གསུངས་ཡོད།

དབུས་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ནས་གསལ་བཤད་གནང་དོན། རླུང་འཕྲིན་ཁང་གཉིས་ཀྱི་ལས་དོན་གློ་བུར་དུ་མཚམས་འཇོག་བྱེད་བཅུག་པ་ནི་ཧ་ཅང་གི་བློ་ཕམ་ཆེན་པོ་ཡིན་པ་དང་དེས་བོད་ནང་གི་བོད་མི་རྣམས་འཛམ་གླིང་ལ་ལྟ་བའི་སྒོ་མོ་བརྒྱབ་པ་ཞིག་རེད་ཅེས་གསུངས་ཡོད།

ཡོ་རོབ་རང་དབང་རླུང་འཕྲིན་ཁང་གི་གཙོ་འཛིན་སྐུ་ཞབས་བསྟན་ཕན་ཁེ་པ་སིས་(Stephen Capus) རླུང་འཕྲིན་ཁང་གཉིས་ཀྱི་རྒྱང་སྲིང་མ་དངུལ་བཀག་པ་དེ་ནི་ཨ་རིའི་དགྲ་བོ་རྣམས་ལ་ཕུལ་བའི་ལེགས་སྐྱེས་ཆེན་པོ་ཞིག་ཡིན་པ་བརྗོད་འདུག

རྒྱ་ནག་གཞུང་གིས་བོད་ནང་ཕྱིའི་རླུང་འཕྲིན་ཁང་ཁག་ལ་ཁ་གཏད་གཅོག་པའི་དྲིལ་བསྒྲགས་ཤུགས་ཆེ་རུ་གཏོང་བའི་འབད་བརྩོན།

རྒྱ་ནག་གཞུང་གིས་ཕྱིའི་གནས་ཚུལ་དང་དྲིལ་བསྒྲགས་ལ་ཁ་གཏད་གཅོག་པ་དང་བོད་ནང་གི་བོད་མི་ཚོས་ཨ་རིའི་རླུང་འཕྲིན་ཁང་དང་ཨེ་ཤི་ཡ་རང་དབང་རླུང་འཕྲིན་ཁང་ནོར་ཝེ་བོད་ཀྱི་རླུང་འཕྲིན་ཁང་སོགས་ཕྱིའི་བརྒྱུད་ལམ་ལ་དོ་སྣང་བྱེད་པ་དང་ལྟ་ཉན་བྱེད་པར་ཚོད་འཛིན་བྱེད་ཆེད། བོད་ས་ཁུལ་ཡོངས་ལ་རྒྱ་ནག་གཞུང་རང་གི་སྟངས་འཛིན་འོག་ཡོད་པའི་རླུང་འཕྲིན་དང་བརྙན་འཕྲིན་ཁང་མང་པོ་གསར་འཛུགས་བྱས་ཏེ་ཁ་གཏད་གཅོག་གི་ཡོད།

ཉེ་བའི་ལོ་ངོ་བཅུ་ཕྲག་ནང་འདི་ལྟ་བུའི་བརྒྱུད་ལམ་ཁང་གི་གྲངས་འབོར་ཇེ་མང་དུ་ཕྱིན་ཡོད་པ་དང་། དེ་དག་གི་བརྒྱུད་ལམ་གྱི་ནུས་པའང་ཇེ་ཆེར་འགྲོ་བཞིན་ཡོད།

རྒྱ་ནག་གཞུང་གི་བརྒྱུད་ལམ་འདི་དག་གིས་གཙོ་བོ་གཤམ་གྱི་བརྗོད་གཞི་ཁག་ལ་དམིགས་ནས་དྲིལ་བསྒྲགས་བྱེད་ཀྱི་ཡོད།

1. རྒྱ་ནག་གཞུང་གི་ལངས་ཕྱོགས་དང་སྲིད་ཇུས་དྲིལ་བསྒྲགས་སྤེལ་བ།
2. རྒྱ་ནག་གུང་ཁྲན་ཏང་གི་འགོ་ཁྲིད་འོག་བོད་མི་མང་གི་འཚོ་བ་ཡར་རྒྱས་ཕྱིན་ཚུལ་ཤོད་པ།
3. བོད་ཀྱི་ཁ་བྲལ་ལས་འགུལ་ལ་ངོ་རྒོལ་བྱེད་པ།
4. མེས་རྒྱལ་གོང་བུ་གཅིག་གྱུར་སྲུང་སྐྱོབ་དང་མི་རིགས་མཐུན་སྒྲིལ་བྱེད་དགོས་པའི་འབོད་སྐུལ།
5. བོད་ནང་དཔལ་འབྱོར་གྱི་འཛུགས་སྐྲུན་དང་འཕེལ་རྒྱས་སྐོར་གྱི་གནས་ཚུལ་སྤེལ་བ།
6. ༸གོང་ས་མཆོག་དང་བཙན་བྱོལ་བོད་གཞུང་ལ་མཚན་སྨད་དང་སྐྱོན་བརྗོད་བྱེད་པ་བཅས་ཚུད་ཡོད།

རྒྱ་ནག་གཞུང་གིས་བོད་ནང་ཕྱིའི་གསར་འགྱུར་ཉན་པར་དམ་བསྒྲགས་ཆེན་པོ་བྱེད་པ་དང་ཆབས་ཅིག རྒྱལ་སྤྱིའི་གསར་འགོད་པ་རྣམས་རང་དབང་གི་སྒོ་ནས་བོད་ནང་འགྲོ་བསྐྱོད་བྱེད་པར་དམ་དྲག་བྱེད་ཀྱི་ཡོད། དེ་མ་ཟད། ས་གནས་མི་མང་གིས་ཕྱིའི་བརྒྱུད་ལམ་ལ་འབྲེལ་བ་བྱེད་པ་དང་། ཕྱི་ལ་གནས་ཚུལ་མཁོ་སྤྲོད་བྱེད་པར་ཉེས་ཆད་ལྗིད་པོ་གཏོང་གི་ཡོད།

འདི་དག་ཚང་མས་རྒྱ་ནག་གཞུང་གིས་བོད་ནང་གནས་ཚུལ་བརྒྱུད་སྤེལ་དང་བསམ་བློའི་དབང་སྒྱུར་ལ་ཇི་འདྲའི་གལ་ཆེན་པོར་བརྩི་གི་ཡོད་པ་མཚོན་གྱི་ཡོད།

 རླུང་འཕྲིན་ཁང་གཉིས་ཀྱི་ལས་དོན་མཚམས་བཞག་པས་བོད་དོན་ལ་གྱོང་གུན་དང་རྒྱ་ནག་གི་ཁེ་ཕན།

བོད་མི་ཚོར་མཚོན་ན། རླུང་འཕྲིན་ཁང་འདི་དག་ནི་གནས་ཚུལ་གྱི་འབྱུང་ཁུངས་ཙམ་མིན་པར། དམ་དྲག་ཅན་གྱི་ས་ཁུལ་དུ་ལྷག་པའི་མི་རིགས་ཤིག་འཛམ་གླིང་སྤྱི་ཚོགས་དང་འབྲེལ་མཐུད་བྱེད་པའི་སྲོག་རྩ་ལྟ་བུ་ཡིན། དེ་དག་སྒོ་བརྒྱབ་པ་ཡིན་ན་དེ་ནི་སྒྲིག་འཛུགས་ཀྱི་གྱོང་གུད་ཙམ་མིན་པར། ཧ་ཅང་གི་དཀའ་ཚེགས་ཆེ་བའི་བོད་དོན་ལ་སྲོག་ཁྲག་སྦྱིན་མཁན་གྱི་སྐད་ངག་ཞིག་འཛམ་གླིང་འདི་ནས་ཕྱིར་བསྡུ་བྱེད་པ་ཞིག་ཀྱང་ཡིན།  གནས་སྟངས་དེས་གཤམ་གསལ་མཇུག་འབྲས་ཚབ་ཆེན་རྣམས་འབྱུང་ངེས་རེད།

• རྒྱ་ནག་གཞུང་གི་འཁྱོག་བཤད་དང་རྫུན་གཏམ་ལ་རྒོལ་ལན་སྤྲོད་མཁན་མེད་པར་འགྱུར་རྒྱུ།
• བོད་ནང་གི་དངོས་ཡོད་གནས་ཚུལ་ཕྱི་ལོགས་སུ་སླེབ་རྒྱུར་འགོག་རྐྱེན་བཟོ་རྒྱུ།
• ནང་ཁུལ་གནས་ཚུལ་བརྗེ་ལེན་བྱེད་པར་དཀའ་ངལ་སྤྲོད་རྒྱུ།
• རྒྱལ་སྤྱིའི་སྤྱི་ཚོགས་ཀྱིས་བོད་ནང་གི་གནས་སྟངས་ཤེས་རྟོགས་བྱེད་མི་ཐུབ་པར་འགྱུར་རྒྱུ།
• བོད་མི་ཚོའི་སྡུག་བསྔལ་དང་འབོད་སྒྲ་ཕྱིའི་འཛམ་གླིང་ལ་བརྒྱུད་སྤྲོད་བྱེད་མི་ཐུབ་པའི་གནས་སྟངས་བསྐྲུན་རྒྱུ་རེད།

དེ་ལྟ་བུའི་གནས་སྟངས་འོག་རྒྱ་ནག་དམར་ཤོག་གཞུང་ལ་ཁོ་པ་ཚོས་བོད་ནང་དུ་འཛེམ་ཟོན་མེད་པར་རང་སྣང་གང་དྲན་བྱེད་པ་དང་། བོད་མིའི་ཐོག་གཉའ་གནོན་དང་གདུག་རྩུབ་ཀྱི་སྲིད་ཇུས་སྔར་ལྷག་ལག་བསྟར་བྱེད་པའི་གོ་སྐབས་བཟང་པོ་ཞིག་སྤྲོད་ངེས་མ་ཟད་བོད་ཀྱི་སྐད་ཡིག་དང་རིག་གཞུང་གི་གནས་སྟངས་ཀྱང་ཉེན་ཁར་ལྷུང་རྒྱུ་ཡིན་པ་གསལ་པོ་རེད།

ཕྱི་ཟླ་ ༣ཚེས་༡༤ ནས་བོད་སྐད་རླུང་འཕྲིན་ཁང་གཉིས་ཀྱི་ལས་དོན་མཚམས་འཇོག་བྱས་ཏེ་ད་བར་དུས་ཡུན་ཟླ་བ་གཅིག་ལྷག་སོང་ཡོད་རུང་ད་དུང་བཟང་ཕྱོགས་ཀྱི་ཐག་གཅོད་ཅིག་བྱུང་མེད། ད་ལྟའི་ཆར་སླར་གསོ་ཡོང་ཆེད་ཁྲིམས་ཐོག་ནས་འཐབ་རྩོད་དང་འབད་བརྩོན་རྒྱུན་མཐུད་བྱེད་བཞིན་ཡོད་ཀྱང་མ་འོངས་པའི་གནས་བབ་ཇི་འདྲ་ཞིག་ཆགས་མིན་ཐད་ངེས་གཏན་མེད་པར་གནས་ཡོད།

                      མཇུག་དོན།

རྒྱ་ནག་གཞུང་གིས་ཨ་སྒོར་ཐེར་འབུམ་མང་པོ་འགྲོ་གྲོན་བཏང་སྟེ་འཛམ་གླིང་ལ་རྒྱ་ནག་གི་དྲིལ་བསྒྲགས་ཀྱི་ནུུས་པ་རྒྱ་སྐྱེད་བྱེད་པའི་སྐབས་སུ། ཨ་རི་ནི་བདེན་པའི་གནས་ཚུལ་དྲིལ་བསྒྲགས་ཀྱི་དམག་ས་ནས་ཕྱིར་འཐེན་བྱེད་བཞིན་ཡོད། ཕྱིར་འཐེན་འདི་ནི་སྔོན་རྩིས་གཅོག་འཕྲི་ཙམ་མིན་པར། མི་རབས་ནས་མི་རབས་བར་ཨ་རིའི་ཁེ་ཕན་དང་རིན་ཐང་རྒྱུན་སྐྱོང་བྱེད་པའི་གལ་ཆེའི་འཇམ་པོའི་ནུས་པའི་ཐོན་ཁུངས་གལ་ཆེ་ཤོས་ཤིག་དོར་བ་མ་ཟད་དུས་རབས་ཉེར་གཅིག་པའི་བརྡ་འཕྲིན་བརྒྱུད་ལམ་གྱི་འཐབ་རྩོད་ཁྲོད་དུ་རྒྱ་ནག་དམར་ཤོག་སྲིད་གཞུང་དང་དེའི་དབང་འཛིན་པ་རྣམས་ཀྱི་རྒྱལ་ཁ་ཆེན་པོ་ཞིག་ཡིན། མདོར་ན། རླུང་འཕྲིན་གྱི་ལས་དོན་གཉེར་མ་ཐུབ་པའི་གྱོང་གུན་དེ་ནི་བོད་ནང་གི་བོད་མི་ས་ཡ་དྲུག་ཙམ་ཁོ་ན་མ་ཡིན་པར། རྒྱ་གར་དང་། བལ་ཡུལ། འབྲུག་ཡུལ་བཅས་ཧི་མ་ལ་ཡའི་ས་ཁུལ་དུ་ཡོད་པའི་བོད་ཀྱི་རིག་གཞུང་དང་སྐད་ཡིག་གི་ཤུལ་འཛིན་པ་ས་ཡ་མང་པོར་ཡང་ཤུགས་རྐྱེན་ཐེབས་རྒྱུ་ཡིན་པ་མ་ཟད། ཨ་རིའི་རྒྱ་ནག་ལ་ཁ་གཏད་གཅོག་པའི་སྲིད་བྱུས་དང་འགལ་ཟླ་ཡང་ཆགས་ཡོད་སྟབས་དེའི་ཕམ་ཁ་མྱོང་མཁན་ནི་ཨ་རིའི་སྲིད་གཞུང་དང་བོད་མི་མང་ཚུད་པའི་འཛམ་གླིང་ནང་གི་མགོན་སྐྱབས་མེད་པའི་ཉམ་ཆུང་མི་མང་རྣམས་ཡིན་པ་ནི་རྒྱ་ནག་གཞུང་འབྲེལ་གྱི་དགའ་བསུའི་རྩོམ་ཡིག་ལས་ཤེས་ཐུབ།

དེར་བརྟེན་རླུང་འཕྲིན་ཁང་འདི་གཉིས་ཀྱིས་ལས་དོན་ཡོངས་རྫོགས་མུ་མཐུད་དུ་གནས་དགོས་རྒྱུར་གནད་དོན་མང་པོའི་ཐོག་ནས་དགོངས་པ་བཞེས་དགོས་པ་ཞིག་ཡིན་ནོ།།

རྒྱལ་མཚན་ཆོས་གྲགས་ནི་ ༢༠༡༨ ནས་༢༠༢༥ བར་ཨ་རིའི་རླུང་འཕྲིན་ཁང་གི་རྒྱ་གར་ལྷོ་ཕྱོགས་ཁུལ་གྱི་ས་གནས་གསར་འགོད་པའི་ལས་འགན་སྒྲུབ་བཞིན་ཡོད་པ་རེད། དེའི་གོང་༢༠༠༩ནས་ ༢༠༡༨ བར་ནོར་ཝེ་བོད་ཀྱི་རླུང་འཕྲིན་ཁང་གིས་རྒྱ་གར་ལྷོ་ཕྱོགས་ཀྱི་ས་གནས་གསར་འགོད་པའི་ལས་འགན་བསྒྲུབས་ཡོད་པ་རེད།