གངས་ལྗོངས་ལྷ་མི་ཡོངས་ཀྱི་སྟོན་པ། (ཚན་པ་གཉིས་པ།)

ལྷག་དོན་རྒྱ་དམར་གྱིས་འཛམ་གླིང་མི་རྣམས་མགོ་བོ་རྨོངས་ཐབས་སུ་བོད་མི་རྣམས་གང་ཡང་མི་ཤེས་མཁན་དང་། གང་ཡང་མི་འཇོན་མཁན་གྱི་མི་རིགས་ཤིག་ཡིན་པ་དང་། ཐ་ན་གཙང་སྦྲ་ཙམ་བྱེད་མི་ཤེས་མཁན་ཡིན་ཚུལ་དྲིལ་བསྒྲགས་རྫུན་མ་བྱེད་ཀྱི་ཡོད། དེ་ཡང་༸གོང་ས་མཆོག་གིས་གསུམ་བཅུའི་དུས་དྲན་ཐེངས་དང་པོའི་བཀའ་སློབ་ལས། ད་ཕན་རྒྱ་དམར་ནས་མི་བདེན་པ་བདེན་པར་བཟོ་ཐབས་དང་། མི་བཟང་བ་བཟང་དུ་བྱེད་པའི་དྲིལ་བསྒྲགས་མང་པོ་བྱས་ཏེ་འཛམ་གླིང་མི་མང་པོ་ཐེ་ཚོམ་ཅན་དུ་བསྒྱུར་བ་ཞེས་གསུངས་པ་དང་། དེ་བཞིན་༧རྒྱལ་བའི་མཛད་རྣམ་སྙིང་བསྡུས་ལས། ^(༥) “བོད་མི་རྣམས་རྒྱ་གར་ས་རྒྱ་ཆེ་ལ་མི་འབོར་མང་བའི་ཁྲོད་ཁ་འཐོར་གྱིས་སིམ་ནས་མི་རིགས་འདྲེས་མ་རིམ་འཕེལ་དང་། འཚོ་བའང་ལམ་བཟོ་ལ་བརྟེན་ནས་མི་ཚེ་སྐྱེལ་དགོས་བྱུང་ཚེ་དཀའ་ངལ་གྱི་རང་བཞིན་དུ་མ་ཟད། བོད་ཀྱི་ཆོས་དང་རིག་གཞུང་སྐད་ཡིག་བཅས་པ་རྒྱུན་གནས་ཡོང་ཐབས་བྲལ་བར་བརྟེན་གང་ལ་རེ་བའི་མིག་འབུར་གཏད་དེ་ཡོང་བའི་བོད་མི་སེར་སྐྱ་འབུམ་ལ་ཉེ་བར་ངོ་ཤེས་པ་གནམ་ས་གཉིས་ལས་མེད་པ་དང་། སྐད་ཡིག་དང་ལུང་པའི་འགྲོ་སྟངས་མི་ཤེས་པ། ཐ་ན་རང་ཉིད་ཀྱི་མི་ཚེའི་འགྲོ་སྟངས་འདི་ཡིན་གྱི་གདེང་འཁེལ་མེད་པ་དེ་དག་ཐུགས་ཀྱིས་མ་བཟོད་པར་རྒྱ་གར་གཞུང་ལ་རེ་བསྐུལ་གནང་སྟེ།” ཞེས་གསལ་དོན་ལྟར། སྐབས་དེ་དུས་བོད་མིའི་གནས་སྟངས་གང་འདྲ་ཞིག་ཡོད་པ་ཤེས་ཐུབ་པ་ཞིག་རེད།

དེ་ཡང་བོད་ཀྱི་ཆབ་སྲིད་སྐྱོང་སྟངས་དེ་སྔོན་ལྟར་མ་ཡིན་པར་དེང་རབས་དང་མཐུན་པའི་མང་གཙོའི་ལམ་དུ་བསྐྱོད་དགོས་པ་གལ་ཆེའི་རང་བཞིན་ལྡན་པའི་གནས་སྟངས་ཤིག་ཡིན་པ་སོགས་བཀའ་སློབ་རིམ་པ་ཕེབས་དོན་ལྟར། ཕྱི་ལོ་ ༡༩༥༩ ཟླ་ ༡༢ ནང་དུ་གནས་མཆོག་རྡོ་རྗེ་གདན་དུ་བཙན་བྱོལ་བོད་མིའི་གནས་ཡུལ་ས་ཁུལ་ཚང་མའི་སྐྱ་སེར་མང་ཚོགས་འཛོམས་ནས་བརྟན་བཞུགས་འབུལ་ལམ་མཛད་པ་དང་འབྲེལ། མནའ་གན་མཐུ་མོ་ཆེ་བཞག་སྟེ་འབུལ་ལམ་ཞུས་ཡོད་པ་རེད། དེ་ཡང་བཙན་བྱོལ་ནང་གི་བྱུང་བ་བརྗོད་པ་ལས། ^(༦) “བོད་འདི་སྔར་ལྟར་མ་ཡིན་པར་བོད་ཆོས་སྲིད་གཉིས་ལྡན་མང་གཙོའི་གཞུང་ཞིག་དགོས་པ་གལ་ཆེར་བརྟེན་རྒྱ་ཆེའི་མི་མང་གི་ངོ་ཚབ་མང་མོས་འོས་འདེམས་བྱས་པའི་འཐུས་མིའི་ལྷན་ཚོགས་ཤིག་དགོས་ཤིང་སྔ་འཕྲོས་ཆོས་བརྒྱུད་ཆེན་པོ་བཞི་ནས་འཐུས་མི་རེ་དང་། ཆོལ་ཁ་གསུམ་ནས་འཐུས་མི་གསུམ་རེ་བཅས་ཁྱེད་རྣམས་ཁུངས་སོ་སོར་ཕྱིར་ལོག་ཟིན་འཕྲལ་མི་མང་གི་ཁྲོད་དུ་ཤེས་ཡོན་འཇོན་ཐང་དང་། རྒྱལ་གཅེས་ལྷག་བསམ་ལྡན་ལ་མང་ཚོགས་ཀྱི་ཡིད་ཆེས་བློ་གཏད་འཕེར་བ་ཇི་ཡོད་ནས་འོས་འདེམས་ཀྱིས་མིང་ཐོ་འོས་གྲངས་འཕྲལ་འབུལ་དགོས་པ་”སོགས་བཀའ་སློབ་ལམ་སྟོན་ཕེབས་པ་དང་། དེ་ནས་ཕྱི་ལོ་ ༡༩༦༠ ཟླ་ ༩ ཚེས་ ༢ ལ་བོད་ལྗོངས་མང་གཙོ་གསར་བཏོད་མཛད་གནང་བ་ཞིག་རེད། དེ་ནི་མགོན་པོ་མཆོག་གི་མཛད་རྗེས་རླབས་ཆེན་ཞིག་ཀྱང་ལོས་ཡིན་སྙམ། རྒྱལ་ཁབ་གཞན་གྱི་མང་གཙོའི་དོན་དུ་ཁྲག་གི་འགྲོ་གྲོན་བཏང་ནས་རྩོད་ལེན་བྱས་ཡོད་མོད། ང་ཚོར་དེ་ལྟར་མ་ཡིན་པར་༸རྒྱལ་བ་རིན་པོ་ཆེས་མར་གསོལ་རས་སྩལ་གནང་བ་ཞིག་ཡིན་པ་རེད།

ལྷག་དོན། བོད་ཀྱི་ཆོས་དང་རིག་གཞུང་རྒྱུན་གནས་ཡོང་ཐབས་སུ་ཆོས་སྡེ་ཁག དེ་བཞིན་བོད་རིགས་ན་གཞོན་རྣམས་ལ་གནའ་དེང་ཡ་མ་བྲལ་བའི་ཤེས་ཡོན་སྦྱོང་སའི་སློབ་གྲྭའི་ལྟེ་གནས་ཁག་དང་། དེ་བཞིན་བོད་མི་རིགས་ཀྱི་ཐུན་མོང་མ་ཡིན་པའི་སྨན་རྩིས་སྦྱོང་ས་དང་། མཐོ་སློབ་ཁག། མི་རྣམས་ཁ་འཐོར་དུ་མ་ཕྱིན་པར་བོད་ཀྱི་ཆོས་དང་རིག་གཞུང་། ཡ་རབས་བཟང་པོའི་གོམས་གཤིས་སོགས་རྒྱུན་གནས་ཡོང་ཐབས་སུ་བོད་མིའི་ཁེ་གཙང་གཞིས་ཆགས་ཟུར་འཛུགས་གནང་བ་དང་། རིག་གཞུང་སླར་གསོ། རྒས་གསོ་ཁང་སོགས་གསར་འཛུགས་མཛད་པ་བསམ་གྱིས་མི་ཁྱབ་པ་གནང་ཡོད།

༸རྒྱལ་བ་རིན་པོ་ཆེ་མཆོག་རྒྱ་གར་དུ་ཆིབས་སྒྱུར་གནང་གྲུབ་རྗེས་རིམ་པའི་བོད་ཀྱི་ཆོས་དང་རིག་གཞུང་སོགས་ཀྱི་ཆེད་དུ་དཀའ་བ་ཁྱད་བསད་ཀྱིས་ཕེབས་གནང་མཛད་ནས། བོད་ནང་ཆབ་སྲིད་གནས་སྟངས་ཧ་ཅང་ཛ་དྲག་ཅན་ཡིན་པ་དང་། བོད་མི་རྣམས་ལ་དཀའ་སྡུག་ཚད་མེད་མྱོང་བཞིན་ཡོད་ཚུལ་སོགས་ཀྱི་འགྲེལ་བཤད་སྐྱོན་གནང་མཛད་པའི་དྲིན་ལས་རིམ་གྱིས་བོད་ནང་ཆབ་སྲིད་ཕྲན་བུ་གུ་ཡངས་བྱུང་བ་རེད།

༧རྒྱལ་བ་རིན་པོ་ཆེ་མཆོག་བཙན་བྱོལ་དུ་༸ཞབས་སོར་འཁོད་ནས་ཕྱི་རྒྱལ་ཡུལ་གྲུར་ཆིབས་སྒྱུར་ཐོག་མ་ཕྱི་ལོ་ ༡༩༦༧ ལོར་ལྡི་ལི་ནས་མཁའ་ལམ་བརྒྱུད་ཉི་ཧོང་དུ་ཆིབས་སྒྱུར་གནང་བ་རེད། དེ་ཡང་བཙན་བྱོལ་ནང་གི་བྱུང་བ་བརྗོད་པ་ལས། “དེ་རིང་ཉི་ཧོང་གི་རྒྱལ་ས་ཊོཀ་ཁྱོ་རུ་བོད་ཀྱི་རྟེན་དངོས་འགྲེམས་སྟོན་ཁང་དབུ་འབྱེད་བྱ་རྒྱུ་བྱུང་བར་དགའ་བོ་བྱུང་། བོད་མི་རྣམས་ནས་དཀའ་ཚེགས་ཆེན་པོས་འཁྱེར་ཡོང་བའི་གཅེས་པར་འཛིན་པའི་དངོས་རྫས་དང་། གསུང་རྟེན་ཁག་རྣམས་བོད་མིས་གཙོས་མི་མང་པོ་ཞིག་གིས་དགའ་སྤྲོ་སྐྱེས་དགོས་པ་ཞིག་ཆགས་ཡོད།” ཅེས་བཀའ་སློབ་གནང་ཡོད་པ་རེད།

རིམ་པའི་ཕྱི་རྒྱལ་ཁག་ཏུ་ཆིབས་སྒྱུར་མཛད་ནས་འཛམ་གླིང་སྐྱེ་འགྲོ་ཡོངས་ལ་བདེ་སྐྱིད་ཡོང་བའི་ལམ་སྟོན་སྩལ་གནང་མཛད་ཅིང་། འཛམ་གླིང་གི་སྐྱེ་འགྲོ་དུ་མ་ཞིག་ལ་སེམས་ནང་ཞི་བདེའི་རྩ་བ་བསྐྲུན་གནང་མཛད་པ་དང་། དེ་བཞིན་སྐྱེ་འགྲོའི་བདེ་སྐྱིད་ཀྱི་ཆེད་དུ་དུས་འཁོར་དཌ་ཆེན་ཐེངས་སོ་བཞི་བསྐྱངས་གནང་མཛད་ནས། གྲངས་ལས་འདས་པའི་ནང་པའི་དད་ལྡན་པ་ཕྱི་ནང་དབྱེ་བ་མེད་པར་ཆོས་ཀྱི་སྦྱིན་པ་སོགས་ཕྱག་ལས་རླབས་ཆེན་མཛད་ཡོད་པ་རེད།

འཛམ་གླིང་གི་ཡུལ་གྲུ་ཁག་ཏུ་ཆིབས་སྒྱུར་རིམ་པ་མཛད་ཅིང་། བོད་ཀྱི་གནས་སྟངས་འགྲེལ་བཤད་སྩལ་བ་མ་ཟད། འཛམ་གླིང་ཡོངས་ལ་ཞི་བདེ་ཡོང་ཐབས་སུ་བཀའ་སློབ་རིམ་པ་གནང་བ་དང་། དེ་བཞིན་སོ་སོའི་སྡོད་སའི་འཛམ་གླིང་གི་ཕྱིའི་ཁོར་ཡུག་ལ་དོ་སྣང་མེད་པའི་དབང་གིས་གང་སར་ཤིང་ནགས་གཅོད་བྲེག་མང་པོ་དང་། རྡུལ་ཕྲན་གྱི་རྫས་སྦྱོར་རིགས་ཀྱང་གང་སར་གཡུག་པའི་དབང་གིས་ཁོར་ཡུག་ལ་གནོད་སྐྱོན་ཚབས་ཆེན་ཐེབས་བཞིན་ཡོད་པར་བརྟེན། རང་ཉིད་འཚོ་སྡོད་བྱེད་སའི་ཁོར་ཡུག་ལ་བདག་གཅེས་དང་སྲུང་སྐྱོབ་ཇི་ལྟར་གནང་དགོས་པའི་ཁ་ཚ་དགོས་གཏུགས་ཀྱི་བཀའ་སློབ་ཆེས་རིན་ཐང་ཆེ་བ་མང་པོ་བསྩལ་ཡོད། ཁོར་ཡུག་ལམ་སྟོན་བཀའ་སློབ་ལས། ^(༧) “ང་ཚོས་ཤེས་གསལ་ལྟར། འགྲོ་བ་མིའི་ཐོབ་ཐང་རྣམས་ལ་བརྩི་སྲུང་མི་བྱེད་པའི་མིའི་བྱ་སྤྱོད་ཀྱིས་འཛམ་གླིང་སྟེང་གི་ཞི་བདེ་དང་། སྲོག་ཆགས་རྣམས་རྒྱུན་གནས་མི་ཐུབ་པའི་ཉེན་ཁ་བཟོ་བཞིན་ཡོད། རང་བྱུང་གི་བཀོད་པ་དང་། དེ་དག་གི་བདག་འབྲས་བཅུད་ནོར་རྣམས་ཀྱི་གཏོར་བཅོམ་ནི་མི་ཤེས་པ་དང་། འདོད་རྔམ། སྲོག་ཆགས་ལ་བརྩི་མཐོང་མེད་པ་བཅས་ལས་བྱུང་བ་ཡིན། གཞན་ལ་བརྩི་མཐོང་མེད་པའི་གཤིས་སྤྱོད་འདི་འགྲོ་བ་མིའི་རིགས་ནས་ཁྱབ་གདལ་འགྲོ་བཞིན་ཡོད་པས། གལ་ཏེ་འཛམ་གླིང་གི་ཞི་བདེ་ཞེས་པ་དངོས་གནས་ཀྱི་གནས་ཚུལ་ཞིག་ཏུ་མ་གྱུར་བ་དང་། རང་བྱུང་ཁམས་གཏོར་བཅོམ་གྱི་གོམ་པ་འདི་བཞིན་གནས་ན། འབྱུང་འགྱུར་གྱི་མི་རབས་རྣམས་ནས་ཉམས་རྒུད་རྒྱ་ཆེན་པོ་སོང་ཟིན་པའི་གླིང་སྣོད་ཅིག་ལ་རྒྱུད་འཛིན་བདག་དབང་བྱ་དགོས་སུ་འགྱུར་ངེས་ཡིན།” ཞེས་ཕྱི་ལོ་ ༡༩༨༦ འཛམ་གླིང་ཁོར་ཡུག་གི་ཉིན་མོའི་ཐོག་ཏུ་བཀའ་སློབ་སྩལ་གནང་མཛད་ཡོད། ལྷག་དོན་བོད་དོན་ཙམ་མ་ཡིན་པ་སྐྱེ་འགྲོ་ཡོངས་ལ་ཞི་བདེ་ཡོང་ཐབས་སུ་བཀའ་སློབ་རིམ་པ་གནང་བས། འཛམ་གླིང་ཤར་ནུབ་ཀུན་ལ་ཕན་ཐོགས་ཆེན་པོ་བྱུང་ཞིང་། འཛམ་གླིང་གི་ཆེས་སྙན་གྲགས་ཆེ་བའི་ནོར་ཝེལ་ཞི་བདེའི་གཟེངས་རྟགས་སོགས་གཟེངས་རྟགས་གྲངས་ལས་འདས་པ་ཞིག་འབུལ་བཞེས་མཛད་ཡོད།

འཛམ་གླིང་ནང་གི་ཆེས་སྙན་གྲགས་ལྡན་པའི་མི་སྣ་མང་པོས་༸རྒྱལ་བ་རིན་པོ་ཆེའི་མཛད་སྤྱོད་ལ་ཡི་རངས་བསྔགས་བརྗོད་གནང་དང་གནང་བཞིན་ཡོད་ལ། འཛམ་གླིང་ནང་གི་མིག་དཔེ་ལྟ་འོས་པའི་རླབས་ཆེན་མི་སྣ་གལ་ཆེ་ཞིག་ཏུ་གྱུར་ཡོད། དེ་ནི་བོད་མི་ཙམ་མ་ཡིན་པར་ནང་པ་ཡོངས་ཀྱི་དགའ་སྤོབས་བྱེད་འོས་པའི་གནས་སྟངས་ཤིག་ཀྱང་ལོས་ཡིན། དེ་འདྲའི་ངང་ནས་གོང་དུ་ཞུས་ལྟར་མགོན་པོ་མཆོག་གིས་ཉིན་མཚན་དུས་དྲུག་བོད་མི་རིགས་ཀྱི་བདེན་དོན་དང་། ཡང་ན་སངས་རྒྱས་བསྟན་པའི་དོན་སྐད་ཅིག་དལ་ལྷོད་མ་བཞུགས་པར་སྐུ་ལས་མཛད་སྒོ་གནང་མཛད་ནས་འཛམ་གླིང་ཡོངས་ལ་ཕན་ཐོགས་རླབས་ཆེན་བྱུང་ཡོད།

ལྷག་པར་བོད་ཀྱི་བཙུན་མ་རྣམས་ཀྱིས་བསླབ་པ་སློབ་གཉེར་གནང་ནས་དགེ་བཤེས་མ་ཐོན་རྒྱུ་ཡོད་པ་གསར་བཏོད་མཛད་ཡོད་ལ། དེང་སྐབས་བཙུན་མས་གཞུང་ཆེན་ཁག་ལ་སློབ་གཉེར་སོགས་གནང་ནས་དགེ་བཤེས་མ་ཐོན་མཁན་རབས་དང་རིམ་པ་འབྱུང་བཞིན་ཡོད་པས། དེ་ནི་རླབས་ཆེན་གྱི་མཛད་བཟང་ཞིག་ཀྱང་ལོས་ཡིན།

བོད་མི་རིགས་ཀྱི་འཐབ་རྩོད་འཚེ་མེད་ཞི་བའི་ལམ་ནས་སེལ་ཐབས་སུ་སྔ་རྗེས་རིམ་པར་བཀའ་སློབ་ཕེབས་གནང་མཛད་ཡོད། བོད་རྒྱ་གཉིས་ཞི་འགྲིག་ཡོང་ཐབས་སུ་འཛམ་གླིང་གི་ཆབ་སྲིད་འཕོ་འགྱུར་དང་བསྟུན་ནས་དབུ་མའི་ལམ་གྱི་སྲིད་ཇུས་གཏན་འབེབས་སོགས་མཛད་ཡོད། མདོར་ན་སྐུ་ཚེ་ཧྲིལ་པོ་བོད་མི་རིགས་དང་སངས་རྒྱས་བསྟན་པ། ཡང་སྒོས་འཛམ་གླིང་ཞི་བདེ་ཡོང་བ་སོགས་ཀྱི་ཆེད་དུ་སྐུ་ངལ་ཚད་མེད་མཛད་པའི་ཞི་བའི་དེད་དཔོན་ཆེན་པོ་ཞིག་ཀྱང་ཡིན། བཀའ་དྲིན་ཅན་གྱི་རྩ་བའི་བླ་མ་ཁོང་གི་མཛད་པ་འཕྲིན་ལས་བདག་འདྲ་བ་ཞིག་གིས་བརྗོད་པར་ག་ལ་ནུས། འོན་ཀྱང་མེ་ཏོག་ཆུང་ཡང་མཆོད་པའི་རྫས་ཞེས་པའི་དཔེ་ལྟར། ད་རེས་༸རྒྱལ་བ་རིན་པོ་ཆེ་མཆོག་དགུང་གྲངས་དགུ་བཅུར་ཕེབས་ཀྱི་ཡོད་པར་བརྟེན། བཀའ་དྲིན་རྗེས་དྲན་གྱི་ཚུལ་དུ་བྲིས་པ་ཞིག་ཡིན། སྐྱོན་དང་ནོར་འཁྲུལ་ཤོར་ཡོད་ན་ཟུར་གནས་ཀློག་པ་པོ་ཡོངས་ལ་དགོངས་སེལ་ཞུ་རྒྱུ་ལས་མ་འདས་སོ།།

སྨྲས་པ།

ཆོས་སྲིད་གཉིས་ཀྱི་དབུ་ཁྲིད། །འདི་ཕྱི་གཉིས་ཀྱི་སྐྱབས་གནས། །

རྒྱལ་བ་བསྟན་འཛིན་རྒྱ་མཚོ། །སྐུ་ཚེ་ཡུན་རིང་བརྟན་སྨོན། །

རྒྱལ་བ་བསྟན་འཛིན་རྒྱ་མཚོ། །ཕོ་བྲང་གྲུ་འཛིན་གཉིས་པའི། །

ཁྲི་ལ་ཞབས་པད་འཁོད་པའི། །སྨོན་ལམ་སྙིང་ནས་འདེབས་སོ། །

གངས་ལྗོངས་ཆོས་ལྡན་ཞིང་དུ། །རང་དབང་བདེ་སྐྱིད་ཉི་མ། །

མགྱོགས་པར་མྱུར་དུ་ཤར་བའི། །གསོལ་བ་སྨོན་ལམ་འདེབས་སོ། །

འཛམ་གླིང་སྐྱེ་འགྲོ་ཡོངས་ལ། །ནད་མུག་འཁྲུག་རྩོད་མེད་ཅིང་། །

ཞི་བདེའི་རང་དབང་བདེ་སྐྱིད། །རྟག་ཏུ་ལོངས་སྤྱོད་ཡོང་སྨོན། །

ཞེས་པ་འདི་ནི་གོ་སྟོན་གྱི་མཛད་སྒོའི་ཉིན་ཚིགས་བཅད་འདི་ཉིད་གཙུག་ལག་ཁང་གི་ཉེ་འགྲམ་ཀིརྟིའི་དགོན་གྱི་ཆོས་ར་ནས་མྱུར་སྟབས་ཀྱི་བྲིས་པ་ཞིག་ཡིན། ཆབ་མདོ་ངག་ཕུན་གྱིས་བྲིས།

ཟུར་བལྟའི་ཡིག་ཆ་ཁག།

༡༽ མཛད་རྣམ། ཤོག་གྲངས ༡༠༦ དང་། ཡིག་ཕྲེང་ ༡༩ ནང་དུ་གསལ། ཤེས་རིག་དཔར་ཁང་ནས་ཕྱི་ལོ་ ༢༠༠༨ དང་། དཔར་ཐེངས་ ༡ པོ།

༢༽ རྒྱལ་བའི་མཛད་རྣམ་སྙིང་བསྡུས་ལས་ཞེས་པའི་ཤོག་གྲངས་༦༠ ཡིག་ཕྲེང་ ༡༡ ནང་དུ་གསལ། གོ་སྟོན་སྐབས་ཀྱི་བརྟན་བཞུགས་གོ་སྒྲིག་ཚོགས་ཆུང་ནས་ཕྱི་ལོ་ ༢༠༢༤ ཟླ་ ༦ ཚེས་ ༡༡ དཔར་འགྲེམས་གནང།

༣༽ རྒྱལ་བའི་མཛད་རྣམ་སྙིང་བསྡུས་ལས་ཞེས་པའི་ཤོག་གྲངས། ༧༧ ཡིག་ཕྲེང་ ༥ ནང་དུ་གསལ། གོ་སྟོན་སྐབས་ཀྱི་བརྟན་བཞུགས་གོ་སྒྲིག་ཚོགས་ཆུང་ནས་ ཕྱི་ལོ་ ༢༠༢༤ ཟླ་ ༦ ༡༡ དཔར་འགྲེམས་གནང།

༤༽ བཙན་བྱོལ་ནང་གི་བྱུང་བ་བརྗོད་པའི་ཤོག་གྲངས་ ༢༨ ཡིག་ཕྲེང་ ༢ ནང་དུ་གསལ། ཕྱི་དྲིལ་ལས་ཁུངས་ནས་ཕྱི་ལོ ༢༠༡༤ ལོར་དཔར་སྐྲུན་གནང།

༥༽ རྒྱལ་བའི་མཛད་རྣམ་སྙིང་བསྡུས་ལས་ཞེས་པའི་ཤོག་གྲངས་ ༡༡༥ ཡིག་ཕྲེང་ ༡ ནང་དུ་གསལ། གོ་སྟོན་སྐབས་ཀྱི་བརྟན་བཞུགས་གོ་སྒྲིག་ཚོགས་ཆུང་ནས་ ཕྱི་ལོ་ ༢༠༢༤ ཟླ་ ༦ ཚེས་ ༡༡ དཔར་འགྲེམས་གནང།

༦༽ བཙན་བྱོལ་ནང་གི་བྱུང་བ་བརྗོད་པའི་ཤོག་གྲངས་ ༣༤ ཡིག་ཕྲེང་ ༢ ནང་དུ་གསལ། ཕྱི་དྲིལ་ལས་ཁུངས་ནས་ཕྱི་ལོ ༢༠༡༤ ལོར་དཔར་སྐྲུན་གནང།

༧༽ བཙན་བྱོལ་ནང་གི་བྱུང་བ་བརྗོད་པའི་ཤོག་གྲངས་ ༤༠ ཡིག་ཕྲེང་ ༡༥ ནང་དུ་གསལ། ཕྱི་དྲིལ་ལས་ཁུངས་ནས་ཕྱི་ལོ ༢༠༡༤ ལོར་དཔར་སྐྲུན་གནང།

༨༽ ཁོར་ཡུག་དང་བྱམས་བརྩེའི་ལམ་སྟོན། ཤོག་ངོས། ༡ དང་ཡིག་ཕྲེང་ ༦ ལ་གསལ། མཛད་པ་པོ། ༸གོང་ས་༸སྐྱབས་མགོན་ཆེན་པོ་མཆོག

ཚན་པ་དང་པོ། https://tibettimes.net/2025/07/08/243817/