དབྱིན་ཡུལ་གྱི་རྒྱལ་ས་ལོན་ཌོན་གྱི་གྲོང་ཁྱེར་ལྟེ་བར་རྒྱ་ནག་གཞུང་ཚབ་ཁང་ཆེ་ཤོས་ཤིག་གསར་རྒྱག་གི་ལས་གཞི་དེ་ནི་རྒྱལ་འབྲེལ་འཐབ་ཇུས་ཀྱི་ངོ་བོ་མིན་པར་དབྱིན་ཡུལ་ནང་རྒྱ་ནག་གི་ལྟ་སྲུང་དང་འཇིགས་སྐུལ་བྱ་རྒྱུའི་གཞི་རུ་འགྱུར་ཉེན་ཡོད་སྐོར་བརྗོད་འདུག
རྒྱ་ནག་གཞུང་གིས་དབྱིན་ཡུལ་གྱི་རྒྱལ་ས་ལོན་ཌོན་གྱི་གྲོང་ཁྱེར་ལྟེ་བར་གྱུར་བའི་ཊ་ཝར་ཧེམ་ལེ་ཌི་སི་ (Tower Hamlets) རུ་ཡོ་རོབ་ཁུལ་གྱི་རྒྱ་ནག་གཞུང་ཚབ་ཁང་ཆེ་ཤོས་གསར་རྒྱག་བྱ་འཆར་ཡོད་པའི་གནད་དོན་དེར་ཕྱི་ལོ་ ༢༠༡༩ ལོ་ནས་བཟུང་དོ་སྣང་ཆེན་པོ་བྱས་ཏེ་ངོ་རྒོལ་རིམ་པར་བྱུང་ཡོད་ལ། དབྱིན་ཡུལ་གཞུང་གིས་འདི་ལོའི་ཕྱི་ཟླ་ ༩ ཚེས་ ༩ ནང་ཚུད་དུ་གནད་དོན་དེ་ཐག་གཅོད་བྱ་རྒྱུ་ཡིན་སྐོར་བརྗོད་ཡོད་པས་བོད་མི་དང་ཡུ་གུར་བ། ཧོང་ཀོང་བ། དེ་བཞིན་རྒྱ་རིགས་དམངས་གཙོ་དོན་གཉེར་བ་སོགས་ནས་ནུས་པ་མཉམ་དུ་སྤུངས་ཏེ་སྔར་ལས་ལྷག་ལས་གཞི་དེར་འགོག་རྒོལ་དགོས་པའི་འབོད་སྐུལ་གནང་འདུག
ཟླ་འདིའི་ཕྱི་ཚེས་ ༡༦ ཉིན་དབྱིན་ཡུལ་གྱི་འབྲེལ་ཡོད་བློན་ཆེན་བཞིས་རྙིང་ཞེན་ཆབ་སྲིད་ཚོགས་པའི་མགོ་ཁྲིད་ཟུར་པ་ཨི་ཡན་ (Iain Duncan Smith) ལགས་ཀྱི་མཚན་ཐོག་ཏུ་ཡིག་ཆུང་ཞིག་བཏང་ཡོད་པའི་ནང་། འདི་ལོའི་ཕྱི་ཟླ་ ༩ ཚེ་ ༩ ནང་ཚུད་དུ་གཞུང་ཚབ་ཁང་ཆེ་ཤོས་གསར་རྒྱག་གི་ལས་གཞི་དེ་དང་འབྲེལ་ནས་ཐག་གཅོད་བྱ་རྒྱུ་ཡིན་པ་ཡོངས་གྲགས་གནང་བ་མ་ཟད། དེ་འབྲེལ་ཞུ་གཏུག་གི་གནས་ཚུལ་ཇི་ཡོད་མྱུར་དུ་སྤྲོད་དགོས་པ་སོགས་གསལ་ཡོད་འདུག་ལ། ཕྱི་ཚེས་ ༡༥ ཉིན་ལོན་ཌོན་དུ་ཡོད་པའི་བོད་མིའི་རང་དབང་ལས་འགུལ་ཚོགས་པའི་ཨེག་སི་ (X) སྤྱི་ཚོགས་དྲ་ལམ་སྟེང་། དེ་སྔ་དབྱིན་ཡུལ་གཞུང་གིས་རྒྱ་ནག་གཞུང་ཚབ་ཁང་ཆེན་མོ་གསར་རྒྱག་གི་ལས་གཞི་དེ་ལ་ཆོག་མཆན་སྤྲོད་རྒྱུའི་གྲ་སྒྲིག་ཡོད་པའི་རྣམ་པ་བསྟན་ཡོད་ཀྱང་། ད་ལྟའི་ཆར་ལས་གཞི་དེའི་ཚད་བཀག་དང། གསང་བ། དེ་བཞིན་གནས་སྡོད་ཡུལ་མི་རྣམས་ལ་ཤུགས་རྐྱེན་ཇི་ཐེབས་ཀྱི་ཡོད་པའི་སྐོར་ལ་དོགས་འདྲི་སྣ་མང་ཡོང་བཞིན་ཡོད་ལ། ལས་གཞི་དེར་བོད་མི་དང་། ཡུ་གུར་བ། ཧོང་ཀོང་བ། ལྷོ་སོག ཐའེ་ཝན། རྒྱ་རིགས་དམངས་གཙོ་དོན་གཉེར་བ། ས་གནས་མི་མང་། འགྲོ་བ་མིའི་ཐོབ་ཐང་རྩོད་ལེན་པ་སོགས་མི་གྲངས་ ༤༠༠༠ ལྷག་མཉམ་འབྲེལ་གྱིས་ངོ་རྒོལ་ལས་འགུལ་སྤེལ་ཏེ། ལས་འཆར་དེ་མཚམས་འཇོག་དགོས་པ་དང་། རྒྱལ་མཚམས་ལས་བརྒལ་བའི་དྲག་གནོན་མཚམས་འཇོག་དགོས་པའི་དགོས་འདུན་བཏོན་ཡོད་པ་རེད། ད་དུང་ལོན་ཌོན་གྱི་གཞུང་ལམ་ཁག་ཏུ་གཞུང་ཚབ་ཁང་ཆེ་ཤོས་མི་དགོས་ཞེས་པའི་འཕྲེད་དར་འཕྱར་ཏེ། ངོ་རྒོལ་གྱི་ལས་འགུལ་ཤུགས་ཆེན་སྤེལ་བ་མ་ཟད། ཆུ་ཚོད་འགའི་རིང་གཞུང་ལམ་དུ་མོ་ཊ་སོགས་འགྲོ་འོང་བཀག་སྡོམ་བྱས་ཡོད་པ་སོགས་གསལ་འདུག
ཁོང་ཚོའི་ངོ་རྒོལ་བསྒྲགས་གཏམ་དེའི་ནང་། རྒྱ་གཞུང་གིས་ལོན་ཌོན་དུ་གྲོས་འཆར་འདོན་པའི་གཞུང་ཚབ་ཁང་ཆེ་ཤོས་གསར་རྒྱག་གི་ལས་གཞི་དེ་རྒྱལ་འབྲེལ་འཐབ་ཇུས་ཀྱི་ངོ་བོ་མིན་པར་ལྟ་སྲུང་དང་འཇིགས་སྐུལ་བྱེད་ཉེན་ཡོད་པ་མ་ཟད། དྲ་ཚིགས་དེས་དབྱིན་ཡུལ་དུ་ཡོད་པའི་བོད་རིགས་ཚོགས་པའི་ཚོགས་མི་ཚུད་པའི་རྒྱ་ནག་དམར་ཤོག་ཚོགས་པའི་སྲིད་གཞུང་ལ་ངོ་རྒོལ་བྱེད་མཁན་རྣམས་ལ་ལྟ་སྲུང་དང་དྲག་གནོན་བྱ་ཉེན་ཡོད་པ་མངོན་གསལ་རེད། ཅེས་དང་། རྒྱ་ནག་གཞུང་ཚབ་ཁང་ཆེ་ཤོས་ཤིག་གསར་རྒྱག་གི་ལས་གཞི་དེས་པེ་ཅིན་གྱིས་དབྱིན་ཡུལ་ནང་སོ་ལྟ་དང་། དྲག་གནོན་སོགས་བྱ་རྒྱུའི་ལས་དོན་རྒྱ་སྐྱེད་གཏོང་ཐབས་བྱེད་ཀྱི་ཡོད་པ་གསལ་སྟོན་དང་། ཕྱི་ལོ་ ༢༠༡༩ ནས་བཟུང་བོད་དོན་ལས་འགུལ་བ་དང་མཐུན་ཕྱོགས་ཚོགས་པ་ཁག་གིས་དབྱིན་ཡུལ་གྱི་རྒྱལ་ས་ལོན་ཌོན་གྱི་སྙིང་དབུས་སུ་རྒྱ་ནག་དམར་ཤོག་རིང་ལུགས་ཀྱི་སྲིད་ཇུས་རྒྱ་སྐྱེད་གཏོང་ཐབས་བྱེད་པར་ངོ་རྒོལ་མཐའ་གཅིག་ཏུ་བྱས་དང་བྱེད་མུས་ཡིན་སྐོར་སོགས་བརྗོད་འདུག་པ་མ་ཟད། ས་གནས་བོད་མི་ཚང་མས་མཉམ་ཞུགས་བྱེད་དགོས་པའི་འབོད་སྐུལ་གནང་འདུག
ཕྱི་ལོ་ ༢༠༡༨ ལོར་རྒྱ་ནག་གཞུང་གིས་ལོ་རྒྱུས་རང་བཞིན་ལྡན་པའི་ས་ཁྱོན་སྨི་ཊར་གྲུ་བཞི་མ་ཉིས་ཁྲི་ཙམ་གྱི་ས་ཚིགས་རོ་ལ་མིན་ཊི་ (Royal Mint) ཞེས་པ་ཉོས་ཡོད་ཅིང་། དེར་རྒྱ་ནག་གི་གཞུང་ཚབ་ཁང་ཆེ་ཤོས་ཤིག་གསར་རྒྱག་བྱ་རྒྱུར་སྙན་ཞུ་རིམ་པ་བཏང་ཡོད་ཀྱང་ལམ་ལྷོང་བྱུང་མི་འདུག དེ་ནས་ཕྱི་ལོ་ ༢༠༢༢ ལོར་དབྱིན་ཡུལ་གྱི་གཞུང་འཛིན་གསར་པ་ངལ་རྩོལ་ཆབ་སྲིད་ཚོགས་པར་རྒྱལ་ཁ་འཐོབ་པར་བརྟེན། གོ་སྐབས་དེ་དང་བསྟུན་ནས་རྒྱ་གཞུང་གིས་སླར་ཡང་སྙན་ཞུ་བཏང་ནས་ཆོག་མཆན་འཐོབ་ཐབས་བྱས་ཡོད་ཀྱང་། ཕྱི་ལོ་ ༢༠༢༢ དང་ ༢༠༢༤ ལོར་ཊ་ཝར་ཧེམ་ལེ་ཌི་སིའི་ (Tower Hamlets) གྲོང་སྡེ་ལྷན་ཚོགས་ཀྱིས་ཁུལ་དེར་གནས་སྡོད་ཡུལ་མི་རྣམས་ཀྱི་བདེ་འཇགས་ལ་ཉེན་ཁ་ཡོད་པ་གཟིགས་ཏེ་ཆོག་མཆན་སྤྲད་མི་འདུག་ལ། སྐབས་དེར་ཞི་ཅིན་ཕིན་གྱིས་དབྱིན་ཡུལ་གྱི་སྲིད་བློན་ཀི་ཡ་སི་ཊར་མིར་ (Keir Starmer) དང་ལྷན་དུ་གནད་དོན་དེའི་སྐོར་ཐད་ཀར་གླེང་སློང་བྱས་ཡོད་པ་མ་ཟད། འདི་ལོའི་ཕྱི་ཟླ་ ༡ པོའི་ནང་དབྱིན་ཡུལ་གྱི་ནོར་སྲིད་བློན་ཆེན་རཱ་ཆལ་ (Rachel Reeves) ལགས་ཀྱིས་རྒྱ་ནག་ནང་དུ་གཞུང་འབྲེལ་ཕྱོགས་བསྐྱོད་གྲུབ་ཟིན་རྗེས། ནང་སྲིད་བློན་ཆེན་ཁཱུ་པར་ (Yvette Cooper) ལགས་དང་། ཕྱི་སྲིད་བློན་ཆེན་ཌེ་ཝི་ཌི་ (David Lammy) ལགས་རྣམ་གཉིས་ཀྱིས་རྒྱ་ནག་དང་མཉམ་དུ་འབྲེལ་ལམ་ཡར་རྒྱས་གཏོང་རྒྱུ་ཡིན་པར་བསྙད་དེ། རྒྱ་ནག་གཞུང་ཚབ་ཁང་ཆེ་ཤོས་གསར་འཛུགས་ཐད་རྒྱབ་སྐྱོར་གྱི་རྣམ་པ་བསྟན་ཡོད་པ་རེད། ལྷག་པར་དུ་གནད་དོན་དེ་དང་འབྲེལ་ནས་གྲོང་སྡེ་ལྷན་ཚོགས་དང་ཉེན་རྟོག་སྡེ་ཁག་གཉིས་ཀས་དེ་སྔོན་གྱི་དགག་བྱ་བྱས་པ་དེ་ཕྱིར་འཐེན་བྱས་ཏེ། འདི་ལོའི་ཕྱི་ཟླ་ ༢ དང་ ༣ པའི་ནང་གཞི་རྒྱ་ཆེ་བའི་ངོ་རྒོལ་བྱུང་སྟེ། གྲོང་སྡེ་ལྷན་ཚོགས་དང་ཉེན་རྟོག་སྡེ་ཁག་གཉིས་ཀྱིས་དེ་འབྲེལ་གསལ་བཤད་གང་ཡང་བྱས་མེད་པ་རེད།
གཞི་རྩའི་ད་ལྟའི་ཆར་དབྱིན་ཡུལ་ནང་རྒྱ་ནག་གཞུང་ཚབ་ཁང་ཆེ་ཤོས་གསར་རྒྱག་གི་ལས་འཆར་དེ་ནི། ཨ་རི་དང་དབྱིན་ཡུལ་གཉིས་ཀྱི་བདེ་འཇགས་ལ་དམིགས་ཏེ་གསང་བའི་གནས་ཚུལ་བརྒྱུད་སྐུལ་སོགས་སྤྱི་ཡོངས་ཀྱི་འབྲེལ་ལམ་ཐད་ནས་ཉེན་ཚབས་ཆེན་པོ་ཆགས་ཡོད། ལྷག་པར་དུ་ས་བབ་ཆབ་སྲིད་ཀྱི་ཐོག་ནས་ཨ་རི་དང་དབྱིན་ཡུལ། ཁེ་ན་ཌ། ཨོ་གླིང་། ནིའུ་ཛེ་ལེན་ཌི་བཅས་རྒྱལ་ཁབ་ལྔའི་བར་གསང་བའི་གནས་ཚུལ་བརྒྱུད་སྐུལ་གྱི་གནད་དོན་ཐད་འགག་རྩ་ཆེན་པོ་ཞིག་ཏུ་གྱུར་ཡོད་ལ། ཕྱོགས་གཞན་ནས་དབྱིན་ཡུལ་གཞུང་གིས་རྒྱལ་ཁབ་ཀྱི་དཔལ་འབྱོར་ཡར་རྒྱས་ལ་དམིགས་ཏེ། རྒྱ་ནག་དང་ལྷན་དུ་འབྲེལ་ལམ་བསྐྱར་གསོ་བྱེད་བཞིན་པའི་དུས་སྐབས་ཤིག་ཀྱང་ཡིན་པ་རེད། ད་དུང་རྒྱ་ནག་གི་རྒྱལ་ས་པེ་ཅིན་དུ་ཡོད་པའི་དབྱིན་ཡུལ་གཞུང་ཚབ་ཁང་དེ་ཉིད་བསྐྱར་གསོ་བྱ་འཆར་ཡོད་པའི་གནད་དོན་སོགས་དང་འབྲེལ་ནས། ད་ལྟའི་རྒྱ་ནག་གཞུང་ཚབ་ཁང་ཆེ་ཤོས་གསར་རྒྱག་གི་ལས་གཞི་དེ་གནད་འགག་ཆེན་པོ་ཞིག་ཏུ་གྱུར་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
