རྒྱལ་ཚོགས་ཀྱིས་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་གི་གྲོངས་རྐྱེན་ཁ་གསལ་དགོས་པའི་སྐུལ་འདེད་གནང་།

རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་སྡེ་གཉིས་ཀྱིས་རྒྱ་ནག་གཞུང་དང་ཝེ་ཐི་ནམ་གཞུང་གིས་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་གི་དོགས་གཞི་ཅན་གྱི་གྲོངས་རྐྱེན་དང་འབྲེལ་བའི་གནད་དོན་བཅུ་ཁ་གསལ་བཟོ་དགོས་པའི་སྐུལ་འདེད་གནང་།

ཟླ་འདིའི་ཕྱི་ཚེས་ ༨ ཉིན་རྒྱལ་ཚོགས་ཀྱི་བཙན་དབང་གི་འཛིན་བཟུང་བཀག་ཉར་བྱས་པའི་ཐོབ་ཐང་སྲུང་སྐྱོབ་ཚན་པ་དང་། གར་སོང་ཆ་མེད་དུ་གྱུར་བའི་བཙོན་པ་རྣམས་ཀྱི་ཐོབ་ཐང་རྩོད་ལེན་ཚན་པ་གཉིས་ཀྱི་ཆེད་མཁས་པ་དག་གིས། ཝེ་ཐི་ནམ་སྲིད་གཞུང་དང་རྒྱ་ནག་གཞུང་གིས་འདི་ལོའི་ཕྱི་ཟླ་ ༣ ཚེས་ ༢༨ ཉིན་ཝེ་ཐི་ནམ་གྱི་རྒྱལ་སྤྱིའི་སྨན་ཁང་དུ་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་སྐུ་གྲོངས་བའི་དོགས་གཞི་ཅན་གྱི་གནད་དོན་ཁ་གསལ་བཟོ་དགོས་པའི་དགོས་འདུན་བཏོན་འདུག

རྒྱལ་ཚོགས་ཀྱིས་སྤེལ་བའི་ཡིག་ཆ་དེའི་ནང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཆེད་མཁས་པ་དག་ཝེ་ཐ་ནམ་སྲིད་གཞུང་དང་རྒྱ་ནག་གི་གསང་བའི་ལས་མི་སོགས་ཀྱིས་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་འཛིན་བཟུང་བཀག་ཉར་བྱས་པ་དང་། འཛིན་བཟུང་བྱས་རྗེས་གར་སོང་ཆ་མེད་དུ་གྱུར་ནས་མཐར་དོགས་གཞིའི་ངང་ནས་འདས་གྲོངས་སུ་གྱུར་བར་སེམས་འཚབ་ཆེན་པོ་ཡོད། ནང་མི་རྣམས་ཀྱི་ཆོག་མཆན་གང་ཡང་མེད་པར་ཁོང་གི་སྐུ་ཕུང་ཞུགས་འབུལ་བྱས་ཏེ། རྒྱལ་སྤྱིའི་སྤྱི་ཚོགས་ནང་ཞིབ་འཇུག་བྱ་རྒྱུའི་གོ་སྐབས་མེད་པར་བཟོས་པ་རེད། རྒྱལ་ཁབ་སུ་ཡིན་ཡང་ཁྲིམས་ཀྱི་ཐོག་ནས་འཛིན་བཟུང་བཀག་ཉར་བྱས་པ་རྣམས་ཀྱི་བདེ་འཇགས་སྲུང་སྐྱོབ་བྱ་རྒྱུ་ནི་གལ་ཆེན་ཡིན་ལ། བཀག་ཉར་དང་འཛིན་བཟུང་གི་འོག་ནས་འདས་གྲོངས་སུ་གྱུར་བ་ཚོའི་ཕུང་པོར་ཞིབ་འཇུག་དང་རྟོག་ཞིབ་བྱེད་དུ་མ་བཅུག་པ་ནི། འགྲོ་བ་མིའི་ཐོབ་ཐང་སྲུང་སྐྱོབ་ཀྱི་དོན་ཚན་དྲུག་པར་འགྲོ་བ་མིའི་ཚེ་སྲོག་སྲུང་སྐྱོབ་དགོས་པའི་དོན་ཚན་དང་། གར་སོང་ཆ་མེད་དུ་གྱུར་བ་འགོག་ཐབས་དང་ཁྲིམས་མཐུན་གྱི་གནད་དོན་ཞིབ་འཇུག་དགོས་པ་ལས་ཡོངས་སུ་འགལ་ཡོད། ཅེས་གསལ་འདུག

མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་མཆོག་གི་གནད་དོན་ཁ་གསལ་བཟོ་དགོས་པ་དང་འབྲེལ་ནས་གནད་དོན་བཅུའི་ཐད་གསལ་ཁ་བཟོ་དགོས་པའི་དོགས་འདྲི་གནང་བའི་ནང་། མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་མཆོག་འཛིན་བཟུང་བྱ་དགོས་པའི་ཁྲིམས་ཐོག་གི་རྒྱུ་རྐྱེན་དང་། གང་དུ་འཛིན་བཟུང་བཀག་ཉར་བྱས་ཡོད་མེད།  རིན་པོ་ཆེ་མཆོག་ཝེ་ཐི་ནམ་དུ་ག་དུས་ཕེབས་འབྱོར་བྱུང་མིན་དང་། རྒྱ་ནག་གཞུང་དང་མཉམ་འབྲེལ་གྱི་ཐོག་རིན་པོ་ཆེ་མཆོག་འཛིན་བཟུང་བྱས་པའི་རྒྱུ་རྐྱེན། རིན་པོ་ཆེ་མཆོག་ས་གནས་གང་དུ་དགོངས་པ་རྫོགས་པ་དང་དེའི་འགན་དབང་སུ་ལ་ཡོད་མེད། རིན་པོ་ཆེ་མཆོག་གི་སྐུ་ཕུང་ལ་ཞིབ་འཇུག་བྱས་པའི་གྲུབ་དོན་དང་དཔང་རྟགས་རིགས་གསལ་སྟོན་བྱ་དགོས་སྐོར་སོགས་གསལ་འདུག

འདི་ལོའི་ཕྱི་ཟླ་ ༤ ཚེས་ ༣༠ ཉིན་ཡུ་རོབ་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་ཚོགས་གཙོ་སྐུ་ཞབས་མི་ནིར་ས་ཏོ་རི་ (MEP Mounir Satouri) མཆོག་དང་། ཡུ་རོབ་གྲོས་ཚོགས་ཀྱི་རྒྱ་ནག་འབྲེལ་ལམ་སྐུ་ཚབ་ཚོགས་ཆུང་གི་ཚོགས་གཙོ་སྐུ་ཞབས་ཨེན་གིན་ཨེ་རོག་ལུ་ (MEP Engin Eroglu) མཆོག་རྣམ་གཉིས་ཀྱིས། ཡུ་རོབ་གྲོས་ཚོགས་སུ་རྒྱ་ནག་གཞུང་གིས་རིན་པོ་ཆེ་མཆོག་གི་སྐུ་གྲོངས་རྐྱེན་ལ་སེམས་འཚབ་དང་ཝེ་ཐི་ནམ་གཞུང་གིས་རིན་པོ་ཆེ་མཆོག་གི་ནང་མི་དང་། དད་ལྡན་མང་ཚོགས། དེ་བཞིན་འབྲེལ་ཡོད་རྣམས་ཀྱི་མོས་མཐུན་ཡོད་མེད་ལ་མ་ལྟོས་པར། གསང་བའི་ཐོག་ནས་གང་ཉིད་ཀྱི་སྐུ་ཕུང་ཞུགས་འབུལ་བྱས་པའི་གནད་དོན་ཐད་ལ་སེམས་འཚབ་ཧ་ཅང་ཆེན་པོ་ཡོད་སྐོར་གྱི་སྙན་ཞུ་ཞིག་རྒྱལ་ཚོགས་ལ་ཕུལ་ཡོད་པ་རེད།

འདས་ལོའི་ཕྱི་ཟླ་ ༨ པའི་ནང་རྒྱ་ནག་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་ལགས་མགོ་ལོག་ཁུལ་དུ་སླེབ་སྐབས། ཧཱུྃ་ཀར་རྡོ་རྗེ་རིན་པོ་ཆེ་མཆོག་གིས་རྒྱ་གཞུང་གི་རེ་འདོད་ལྟར་སྣེ་ལེན་ཟབ་རྒྱས་མ་ཞུས་པ་དང་། གོང་རིམ་གྱི་བཀའ་ལ་མི་ཉན་པར་དགོན་པ་དང་སློབ་གྲྭ་མང་པོ་བཙུགས་པ། ཉམ་ཆུང་དབུལ་ཕོངས་ཀྱི་ཐོབ་ཐང་རྩོད་ལེན་གནང་ནས་རྙོག་ཟིང་བསླངས་ཡོད་སྐོར་གྱི་ཉེས་མིང་གཡོགས་ཏེ་སུན་གཙེར་ཡང་ཡང་བཟོས་རྐྱེན་སྐབས་ཤིག་རིང་གར་སོང་ཆ་མེད་དུ་གྱུར། འདི་ལོའི་ཕྱི་ཟླ་ ༣ ཚེས་ ༢༨ ཉིན་རྒྱ་ནག་གཞུང་གིས་མགོ་ལོག་དགའ་བདེ་རྫོང་ལུང་སྔོན་དགོན་པའི་གནད་ཡོད་མི་སྣར་རིན་པོ་ཆེ་མཆོག་ཝེ་ཐི་ནམ་གྱི་རྒྱལ་སྤྱིའི་སྨན་ཁང་(Vinmec Central Park International Hospital ) དུ་སྐུ་གྲོངས་ཟིན་སྐོར་གྱི་གསལ་ཁ་གང་ཡང་མེད་པའི་གཏམ་ངན་བཤད། དེ་ནས་ལུང་སྔོན་དགོན་པའི་སྐུ་ཚབ་དགེ་འདུན་པ་ལྔ་ཆེད་དུ་ཝེ་ཐི་ནམ་དུ་ཕེབས་ཏེ་རྩད་གཅོད་གནང་ཡོད་ཀྱང་། ཕྱི་ཟླ་ ༤ ཚེས་ ༡༠ ཉིན་གྱི་ཕྱི་དྲོར་རིན་པོ་ཆེ་མཆོག་གི་ཞལ་ཙམ་ལས་མཇལ་དུ་བཅུག་མེད་པ་མ་ཟད། སྐུ་ཚབ་རྣམས་ཀྱི་འགྲོ་འདུག་སྤྱོད་གསུམ་ལའང་སྟངས་འཛིན་ནན་པོ་བྱས་ཏེ་གནས་ཚུལ་གང་ཡང་ཕྱི་རུ་ཁྱབ་ཏུ་བཅུག་མེད་པ་རེད།   ལོ་དེའི་ཕྱི་ཟླ ༤ ཚེས་ ༢༠ ཉིན་ཝེ་ཐི་ནམ་དུ་སྐུ་ཕུང་གསང་བའི་ཐོག་ནས་ཞུགས་འབུལ་ཞུས་ཡོད་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།