བདེ་ཆེན་བོད་རིགས་རང་སྐྱོང་ཁུལ་གྱི་འཐབ་ཕྱོགས་གཅིག་གྱུར་ཁང་གི་མགོ་ཁྲིད་ཟུར་བ་སྐལ་བཟང་རྣམ་རྒྱལ་ཁྲིམས་འགལ་ཚབས་ཆེན་བྱས་པའི་ནག་ཉེས་འོག་གཞུང་གི་ལས་གནས་དང་དམར་ཤོག་ཚོགས་པའི་ཚོགས་ཁོངས་ནས་ཕྱིར་ཕུད་བྱས་ཡོད་འདུག
རྒྱ་ནག་གཞུང་གིས་དམར་ཤོག་གི་ལངས་ཕྱོགས་དང་མི་མཐུན་པའི་ལྟ་སྤྱོད་ཅན་དང་། བཙན་བཟུང་འོག་ཡོད་པའི་གྲངས་ཉུང་མི་རིགས་ཁག་གི་དཔོན་རིགས་ཚོར་སྟག་དང་སྦྲང་མ་ལེབ་རྡུང་གི་སྲིད་ཇུས་འོག་ནས། ཞིབ་བཤེར་དང་བཙོན་འཇུག་ཁྲིམས་ཐག་གཅོད་ཀྱིན་ཡོད་པ་ལྟར། ཉེ་ལམ་བོད་བདེ་ཆེན་བོད་རིགས་རང་སྐྱོང་ཁུལ་གྱི་རྒྱུན་ལས་དང་འཐབ་ཕྱོགས་གཅིག་གྱུར་ཁང་གི་འགན་འཛིན་ཟུར་བ་སྐལ་བཟང་རྣམ་རྒྱལ་གྱིས་སྒྲིག་འགལ་ཚབས་ཆེན་བྱས་པའི་ཉེས་མིང་འོག་དམར་ཤོག་སྐྱིད་སྡུག་དང་གཞུང་གི་ལས་གནས་ནས་ཕྱིར་ཕུད་བཏང་ཡོད་འདུག དེ་བཞིན། བོད་ནག་ཆུ་གྲོང་ཁྱེར་དཔལ་མགོན་རྫོང་གི་དམར་ཤོག་ཚོགས་པའི་མགོ་ཁྲིད་གཞོན་པ་དང་རྫོང་དཔོན་ཆུང་རྒྱས་ཀྱིས་སྒྲིག་ཁྲིམས་དང་ཁྲིམས་འགལ་ཚབས་ཆེན་གྱི་ཉེས་མིང་འོག་བོད་རང་སྐྱོང་ལྗོངས་སྒྲིག་ཁྲིམས་ལྟ་ཞིབ་ཁང་ཟེར་བས་ཞིབ་བཤེར་བྱེད་བཞིན་ཡོད་ཚུལ་བསྒྲགས་འདུག
རྒྱ་ནག་གཞུང་གིས་ཞིབ་འཇུག་དང་བརྟག་དཔྱད་བྱས་ཡོད་ལུགས་བཤད་ནས་གསལ་བསྒྲགས་ཤིག་སྤེལ་བའི་ནང་། སྐལ་བཟང་རྣམ་རྒྱལ་ཏང་ཡོན་མགོ་ཁྲིད་ལས་བྱེད་པ་ཡིན་ཡང་། ཕུགས་བསམ་དང་དད་སེམས་ཉམས་པ་དང་། ཐོག་མའི་བསམ་འདུན་དང་འགན་འཁྲི་རྒྱབ་ཏུ་བསྐྱུར་བ། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་སྣང་མེད་དུ་བཏང་ནས་སྒྲིག་འགལ་ངང་དོ་དམ་བྱ་ཡུལ་དང་ཞབས་འདེགས་ཞུ་ཡུལ་ས་ནས་ལག་རྟགས་དང་འབུལ་རྟེན་བླངས་པ་དང་། རྩ་འཛུགས་ཀྱི་རྩ་དོན་ལ་རྒྱབ་འགལ་བྱས་པ། མི་སྒེར་གྱི་འབྲེལ་ཡོད་དོན་གནད་སྙན་སེང་ཞུ་དགོས་པའི་གཏན་འབེབས་ལས་འགལ་ཏེ་ཁང་པ་ཡོད་ཀྱང་སྦ་གསང་བྱས་ནས་སྙན་སེང་མ་ཞུས་པ། དབང་ཆའམ་གོ་གནས་ཀྱི་ཤུགས་རྐྱེན་ལ་བརྟེན་ནས་མི་སྒེར་གྱིས་སྤྲོད་དགོས་པའི་འགྲོ་སོང་མི་གཞན་དག་ལ་གཏོང་དུ་བཅུག་པ། གོ་གནས་བེད་སྤྱོད་ཀྱིས་མི་གཞན་ལ་ལས་གྲྭ་འགན་གཙང་ལེན་རོགས་བྱེད་པ་སོགས་ཀྱི་ཐད་ནས་ཁེ་ཕན་རག་ཐབས་བྱས་པར་ཁྲིམས་འགལ་ངང་རྒྱུ་ནོར་འབོར་ཆེན་བླངས་ཡོད། ཅེས་བསྒྲགས་འདུག
སྐལ་བཟང་རྣམ་རྒྱལ་ནི་ཕྱི་ལོ་ ༡༩༦༨ ལོར་བོད་བདེ་ཆེན་རང་སྐྱོང་ཁུལ་དུ་སྐྱེས་ཡོད་ཅིང་། ཕྱི་ལོ་ ༡༩༨༦ ནས་ ༡༩༩༡ བར་ཡུན་ནན་ནོར་སྲིད་དཔལ་འབྱོར་མཐོ་སློབ་དུ་སློབ་སྦྱོང་བྱས། ཕྱི་ལོ་ ༡༩༩༡ ནས་ ༡༩༩༥ བར་བདེ་ཆེན་ཁུལ་ནོར་སྲིད་ཁང་དུ་ལས་ཀ་བྱས། ཕྱི་ལོ་ ༡༩༩༨ ལོར་དམར་ཤོག་ཚོགས་པའི་ནང་དུ་ཞུགས། ཕྱི་ལོ་ ༡༩༩༨ ནས་ ༢༠༠༣ བར་བདེ་ཆེན་ཁུལ་ནོར་སྲིད་ཁང་གི་མ་དངུལ་ཚན་པའི་འགན་འཛིན་བྱས། ཕྱི་ལོ་ ༢༠༠༥ ནས་ ༢༠༢༡ བར་བདེ་ཆེན་ཁུལ་གྱི་ཁུལ་དཔོན་གཞོན་པ་དང་སེམས་ཀྱི་ཉི་ཟླ་རྫོང་གི་འཐབ་ཕྱོགས་གཅིག་གྱུར་ཁང་གི་འགན་འཛིན་སོགས་བྱས། ཕྱི་ལོ་ ༢༠༢༤ ལོའི་ཟླ་ ༩ པ་ནས་བཟུང་ཡུན་ནན་ཞིང་ཆེན་སྒྲིག་ཁྲིམས་ལྟ་ཞིབ་ལྷན་ཁང་ཟེར་བས་ཞིབ་བཤེར་བྱས་ཡོད་འདུག ཆུང་རྒྱས་ནི་ཕྱི་ལོ་ ༡༩༧༦ ལོར་སྐྱེས་ཤིང་། ཕྱི་ལོ་ ༡༩༩༤ ལོར་བོད་རང་སྐྱོང་ལྗོངས་ཉེན་རྟོག་སློབ་གྲྭ་ཟེར་བ་ནས་ཆབ་སྲིད་བདེ་འཇགས་ཐོག་ཆེད་སྦྱོང་བྱས་ཡོད་པ་དང་། ཕྱི་ལོ་ ༡༩༩༨ ནས་ནག་ཆུ་རྫོང་ཉེན་རྟོག་ཁང་དུ་ལས་ཀ་བྱས། ཕྱི་ལོ་ ༢༠༠༠ ནས་ ༢༠༠༤ བར་ནག་ཆུ་རྫོང་ཉེན་རྟོག་ཁང་གི་ཉེས་དོན་ཚན་པའི་དྲུང་ཡིག་དང་རུ་དཔོན་སོགས་བྱས། ཕྱི་ལོ་ ༢༠༠༥ ནས་ ༢༠༡༨ བར་ནག་ཆུ་རྫོང་ཉེན་རྟོག་ཁང་གི་མགོ་ཁྲིད་དང་། ཁྲིམས་འཛིན་ཁང་གི་དམར་ཤོག་ཚོགས་པའི་དྲུང་ཡིག་སོགས་བྱས། ཕྱི་ལོ་ ༢༠༢༡ ལོར་དཔལ་མགོོན་རྫོང་གི་རྫོང་དཔོན་དང་། དམར་ཤོག་ཚོགས་པའི་དྲུང་ཡིག་གཞོན་པ་སོགས་བྱས་ཡོད་འདུག
འདས་པའི་མི་ལོ་གཉིས་ལྷག་གི་རིང་ཉུང་མཐར་བོད་ཁུལ་གྱི་མཐོ་རིམ་དཔོན་རིགས་ ༢༠ ཙམ་ཞིབ་བཤེར་གྱིས་གནས་དབྱུང་བྱས་ཡོད་པའི་ཁྲོད། ཉེ་ལམ་བོད་མཚོ་སྔོན་ཞིང་ཆེན་ནགས་ལས་དང་རྩྭ་ཐང་ཚན་པའི་ལས་མི་དང་འགན་འཛིན་གཞོན་པ་ཟུར་བ་བསྟན་འཛིན་ཞེས་པ་ཞིག་གིས་ཏང་གཤིས་དང་ཐོག་མའི་ཕུགས་འདུན་མི་ལེགས་པར་རྨོངས་དད་ངང་ཆོས་ལུགས་བྱེད་སྒོ་སྤེལ་བའི་ཉེས་མིང་འོག་ལས་གནས་ནས་ཕུད་འདུག འདི་ལོའི་ཕྱི་ཟླ་ ༧ ཚེས་ ༢༢ ཉིན་རྒྱ་ནག་དམར་ཤོག་དབུས་སྒྲིག་ཁྲིམས་ཞིབ་བཤེར་ཁང་ཟེར་བས་རྒྱ་ནག་རྒྱལ་ཡོངས་སྲིད་གྲོས་ཚོགས་ཆེན་སྐབས་བཅུ་བཞི་པའི་རྒྱུན་ལས་ཟུར་བ་དང་། བོད་རང་སྐྱོང་ལྗོངས་སྲིད་གཞུང་ཟེར་བའི་མགོ་ཁྲིད་ཟུར་བ་ཆེ་དགྲ་ལྷས་དམར་ཤོག་གི་ཁྲིམས་སྒྲིག་དང་འགལ་བའི་ནག་ཉེས་ཚབས་ཆེན་བསགས་པའི་དོགས་གཞིའི་འོག་ཞིབ་བཤེར་ཁང་ལ་རྩིས་སྤྲོད་བྱས་ཡོད་འདུག
འདི་ལོའི་ཕྱི་ཟླ་ ༧ ཚེས་ ༡༦ ཉིན་བོད་རང་སྐྱོང་ལྗོངས་ཟེར་བའི་ནང་མི་ལོ་ ༤༤ ཙམ་རིང་མགོ་ཁྲིད་སོགས་ཀྱི་ལས་ཀ་བྱས་མྱོང་བའི་ཝུའུ་ཡེན་ཅེ་ཡིས་རྒྱ་སྒོར་ས་ཡ་ ༣༤༣ ལྷག་གི་ལྐོག་རྔན་བླངས་བའི་ནག་ཉེས་འོག་ལོ་གཉིས་ཕར་འགྱངས་ཀྱི་སྲོག་ཁྲིམས་བཅད་ཡོད་པ་དང་། འདི་ལོའི་ཕྱི་ཟླ་ ༧ ཚེས་ ༨ ཉིན་བོད་རང་སྐྱོང་ལྗོངས་མི་དམངས་སྲིད་གཞུང་ཟེར་བའི་མགོ་ཁྲིད་གཞོན་པ་ཟུར་བ་ཝང་ཡུང་གིས་ལྐོག་རྔན་རྒྱ་སྒོར་དུང་ཕྱུར་ ༢ དང་བྱེ་བ་ ༧ ། ས་ཡ་ ༡ ལྷག་བླངས་བའི་ནག་ཉེས་བཙུགས་ཏེ་སྲོག་ཁྲིམས་བཅད་ཡོད་ཀྱང་ལོ་གཉིས་རིང་ཕྱིར་འགྱངས་བྱས་ཡོད་འདུག འདི་ལོའི་ཕྱི་ཟླ་ ༢ ཚེས་ ༢༤ ཉིན་རྒྱ་ནག་གཞུང་གིས་ཡུན་ནན་བདེ་ཆེན་བོད་རིགས་རང་སྐྱོང་ཁུལ་གྱི་ཁུལ་དཔོན་ཟུར་བ་བོད་མི་བྱང་ཆུབ་དང་། ཁུལ་དཔོན་གཞོན་པ་ཟུར་བ་ཆི་ཅིན་ཞིན་(Qi Jianxin) གཉིས་ཀྱིས་ཁྲིམས་འགལ་ཁེ་ཕན་བླངས་པ་དང་། རྒྱ་ནག་དམར་ཤོག་རིང་ལུགས་ལ་རྒྱབ་འགལ་དང་ཡིད་ཆེས་མེད་པ་སོགས། ཁྲིམས་སྒྲིག་ལ་གཏོར་བརླག་ཚབས་ཆེན་བཏང་བའི་ཉེས་མིང་འོག རྒྱ་ནག་དམར་ཤོག་ཚོགས་པའི་སྐྱིད་སྡུག་ནས་ཕྱིར་ཕུད་བཏང་ཡོད་པ་དང་། འདི་ལོའི་ཕྱི་ཟླ་ ༢ ཚེས་ ༡༢ ཉིན་རྒྱ་ནག་གཞུང་གིས་རྒྱལ་ཁབ་ལ་བློ་མི་དཀར་བ་དང་ཏང་གཤིས་རྩ་དོན་ཤོར་བར། བོད་སྐྱེ་རྒུ་མདོ་ཁུལ་གྱི་དམར་ཤོག་དྲུང་ཆེ་གཞོན་པ་ཤེས་རབ་རྒྱ་མཚོ་ཉེས་མིང་འོག་དམར་ཤོག་ཚོགས་ཁོངས་ནས་ཕྱིར་ཕུད་བཏང་འདུག
འདས་ལོའི་ཕྱི་ཟླ་དང་པོའི་ནང་བོད་རང་སྐྱོང་ལྗོངས་སྲིད་གཞུང་དམར་ཤོག་ཚོགས་པའི་མགོ་ཁྲིད་གཞོན་པ་ཀྲང་ཧོང་ཙི་དང་། འདས་ལོའི་ཕྱི་ཟླ་ ༣ པའི་ནང་བོད་རང་སྐྱོང་ལྗོངས་དམངས་ཆེན་གྱི་རྒྱུན་ལས་མགོ་ཁྲིད་གཞོན་པ་ཇི་གོ་ཀང་། འདས་ལོའི་ཕྱི་ཟླ་ ༦ ཚེས་ ༡༤ ཉིན་བོད་རང་སྐྱོང་ལྗོངས་རྒྱུན་ལས་ལྷན་ཁང་གི་མགོ་ཁྲིད་གཞོན་པ་ཅང་ཅེ། འདས་ལོའི་ཕྱི་ཟླ་ ༦ ཚེས་ ༡༦ ཉིན་བོད་རང་སྐྱོང་ལྗོངས་ཟེར་བའི་དྲུང་ཆེ་ཟུར་པ་ཝུའུ་ཡིན་ཅེ་བཅས་སྔ་རྗེས་སུ་གནས་དབྱུང་བཏང་སྟེ་ཞིབ་བཤེར་བྱས། དེ་བཞིན་བོད་རང་སྐྱོང་ལྗོངས་མི་མང་སྲིད་གཞུང་ཟེར་བའི་དམར་ཤོག་ཚོགས་པའི་ཁོངས་མི་དང་དྲུང་ཡིག་ཆེན་མོ། གཞུང་དོན་ཁང་གི་དམར་ཤོག་ཚོགས་པའི་དྲུང་ཡིག་ཀྲུའུ་ཆང་ལ་ཁྲིམས་འགལ་ཚབས་ཆེན་བྱས་པའི་དོགས་གཞི་འོག བོད་རང་སྐྱོང་ལྗོངས་སྒྲིག་ཁྲིམས་ཞིབ་བཤེར་ཁང་ཟེར་བས་ཞིབ་བཤེར་བྱས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
