བོད་ལྷུན་རྩེ་རྫོང་ཁོངས་སུ་མཁའ་དམག་གི་རྟེན་གཞི་ཞིག་འཛུགས་སྐྲུན་བྱས་འདུག

རྒྱ་ནག་གཞུང་གིས་བོད་ལྷུན་རྩེ་རྫོང་ཁོངས་སུ་མཁའ་དམག་གི་རྟེན་གཞི་ཞིག་འཛུགས་བསྐྲུན་བྱས་ཡོད་པ་རྒྱ་གར་གཞུང་གིས་ཤེས་རྟོགས་བྱུང་ཡོད་ཅིང་གནད་དོན་དབྱེ་ཞིབ་པ་དག་གིས་རྒྱ་ནག་གིས་མཁའ་ལམ་ནས་རྒྱ་གར་ལ་གཏོར་རྒོལ་གཏོང་ཉེན་ཡོད་སྐོར་བརྗོད་འདུག

ཁ་སང་ཕྱི་ཚེས་ ༢༧ ཉིན་རྒྱ་གར་གྱི་གསར་ལམ་ཁག་གིས་གནས་ཚུལ་སྤེལ་བ་ལྟར་ན། རྒྱ་གར་གཞུང་གིས་འཁོར་སྐར་བརྒྱུད་རྒྱ་ནག་གཞུང་གིས་རྒྱ་གར་བྱང་ཤར་གྱི་འཕགས་བོད་མཐའ་མཚམས་ཀྱི་ཉེ་ཁུལ་བོད་ལྷུན་རྩེ་རྫོང་ཁོངས་སུ་མཁའ་དམག་གི་གནམ་གྲུ་འཇོག་སའི་ལྕགས་ཁེབས་ཅན་གྱི་ཁང་པ་མང་པོ་ཞིག་དང་། སྡོད་ཁང་གསར་པ། གནམ་གྲུ་འཇོག་སའི་མདུན་གྱི་རྡོ་ཅལ་སོགས་གསར་རྒྱག་བྱས་ཟིན་ཡོད་པ་ཤེས་རྟོགས་བྱུང་འདུག

རྒྱ་གར་གྱི་མཁའ་དམག་གི་དམག་སྤྱི་ཟུར་པ་སྐུ་ཞབས་མལ་ཤལ་(Marshal BS Dhanoa) ལགས་ཀྱིས། ད་ལན་རྒྱ་ནག་གིས་གནམ་གྲུ་འཇོག་ས་གསར་རྒྱག་བྱས་པ་དེས། ཐེངས་རྗེས་མར་རྒྱ་གར་དང་རྒྱ་ནག་གི་དམག་མིའི་གདོང་ཐུག་བྱུང་ཚེ། ཁོང་ཚོའི་དམག་མིར་ལྷུན་རྩེར་རྟེན་གཞི་བྱས་པའི་མཁའ་དམག་གིས་རོགས་འདེགས་བྱ་རྒྱུ་ཡིན་པ་གསལ་པོ་རེད། ཅེས་དང་། ད་ལན་གྱི་འཛུགས་སྐྲུན་དང་འཕེལ་རྒྱས་དེས། རྒྱ་གར་དང་ས་ཁམས་ཆབ་སྲིད་ཀྱི་རྩོད་རྙོག་འབྱུང་སྐབས། རྒྱ་ནག་གཞུང་གིས་འཆར་གཞི་ལྡན་པའི་དམག་འཁྲུག་གི་འཐབ་ཇུས་ཤིག་འདིང་མུས་ཡིན་སྐོར་སོགས་བརྗོད་འདུག

གནད་དོན་དབྱེ་ཞིབ་ཁག་ཅིག་གིས། རྒྱ་ནག་གཞུང་གིས་འཕགས་བོད་མཐའ་མཚམས་ས་ཐིག་དང་ཆེས་ཁ་ཐག་ཉེ་བའི་རྒྱ་གར་གྱི་མོན་རྟ་དབང་དང་། འབྲས་ལྗོངས། ལ་དྭགས། ཨུ་ཊར་ཁན་ཌི་མངའ་སྡེའི་ཁུལ་སོགས་སུ་མཁའ་དམག་དང་། སྐམ་དམག་གི་རྟེན་གཞི་སོགས་ཕྱོགས་ཡོངས་ནས་མཐའ་མཚམས་ཁུལ་དུ་འཛུགས་སྐྲུན་བྱེད་མུས་ཡིན་པ་དེས། རྒྱ་ནག་གཞུང་གིས་རྒྱ་དཀར་ནག་གི་འབྱུང་འགྱུར་ས་མཚམས་སོགས་ཀྱི་རྩོད་རྙོག་རིགས་འབྱུང་སྐབས། འཆར་གཞི་དང་ཐབས་ཇུས་རང་བཞིན་གྱི་ཐོག་ནས་འཐབ་རྒོལ་བྱ་རྒྱུའི་གྲ་སྒྲིག་བྱེད་ཀྱི་ཡོད་ཅིང་། རྒྱ་ནག་གིས་བོད་དིང་རི་དང་། ལྷུན་རྩེ། སྤུ་ཧྲེང་རྫོང་སོགས་སུ་མཁའ་དམག་གི་རྟེན་གཞི་བསྐྲུན་པ་ནི། འཕགས་བོད་མཐའ་མཚམས་ཁག་དང་ཧ་ཅང་ཁ་ཐག་ཉེ་སྟབས། རྒྱ་ནག་གིས་མཐའ་མཚམས་ཁུལ་དུ་མཁའ་དམག་གི་རྟེན་གཞི་རྒྱ་སྐྱེད་དང་འཆར་གཞི་དམིགས་བསལ་ཞིག་སྒྲིག་བཞིན་ཡོད་པའི་ཚོད་དཔག་བྱེད་ཀྱིན་འདུག

ཉེ་སྔོན་འཁོར་སྐར་བརྒྱུད་ལྟ་ཞིབ་བྱེད་སྐབས། རྒྱ་ནག་གཞུང་གིས་མཚོ་སྔོན་ཞིང་ཆེན་མཚོ་ནུབ་བོད་རིགས་རང་སྐྱོང་ཁུལ་གྱི་ན་གོར་མོ་གྲོང་ཁྱེར་ཁུལ་དུ་བྱེ་ཐང་ཞིག་ཏུ་རྡུལ་ཕྲན་མཚོན་ཆའི་ལྟེ་གནས་ཤིག་གསར་རྒྱག་དང་། བྱེ་ཐང་དུ་བགྲོད་པའི་ལམ། གོ་མཚོན་མངག་གཏོང་གི་ལམ་ཐིག དེ་བཞིན་གོ་མཚོན་ལྟེ་གནས་ཁང་དེའི་ཁང་པ་སོགས་གསར་རྒྱག་དང་།  མེ་ཤུགས་འཕུར་མདའ་སྐྱེལ་འདྲེན་ཆེད་སྒོ་རའི་ཁང་ཆེན་དང་། བྱེ་ཐང་དུ་ཤར་གཏོང་བྱ་སའི་རིམ་པ་མང་པོ་ཞིག་བཟོས་ཡོད་པ་སོགས་ཤེས་རྟོགས་བྱུང་འདུག

འདི་ལོའི་ཕྱི་ཟླ ༧ ནང་རྒྱ་གར་གྱི་རྒྱལ་ས་ལྡི་ལི་རུ་རྒྱ་གར་གྱི་ཤར་ཨེ་ཤ་ཡའི་ཟུང་དྲུང་སྐུ་ཞབས་གྷ་རན་གྷ་ལལ་དྷ་སི་(Gourangalal Das) ལགས་ཀྱིས་སྣེ་འཁྲིད་པའི་རྒྱ་གར་གྱི་སྐུ་ཚབ་ཚོགས་ཆུང་ཞིག་གིས། རྒྱ་ནག་མཐའ་མཚམས་དང་མཚོ་ཁུལ་གྱི་གནད་དོན་ལས་ཁུངས་ (Boundary and Oceanic Affairs Department)  ཀྱི་འགན་འཛིན་ཧོང་ལིང་(Hong Liang) ཟེར་བས་མགོ་ཁྲིད་པའི་རྒྱ་ནག་གི་ཚོགས་ཆུང་དང་ཐུག་འཕྲད་གནང་སྟེ། རྒྱ་ནག་དཀར་ནག་གཉིས་ཀྱིས་འཕགས་བོད་མཐའ་མཚམས་ཁུལ་དུ་འཛུགས་སྐྲུན་དང་མཉམ་ལས་བྱེད་ཕྱོགས་ཀྱི་སྐོར་ལ་གྲོས་མོལ་གནང་ཡོད་ལ། སྐབས་དེར་རྒྱ་གར་ཕྱི་སྲིད་བློན་ཆེན་ལས་ཁུངས་ཀྱིས་བསྒྲགས་གཏམ་ཞིག་སྤེལ་བའི་ཁྲོད། ཕྱོགས་གཉིས་ཀྱི་སྐུ་ཚབ་ཚོགས་ཆུང་གིས་འཕགས་བོད་མཐའ་མཚམས་ཁུལ་དུ་ཞི་བདེ་བརྟན་བརླིང་དང་། ཕྱོགས་གཉིས་ཀྱི་འབྲེལ་ལམ་དེ་རྒྱུན་ལྡན་བཞིན་ཡོང་རྒྱུའི་ཐད་ལ་གླེང་སློང་གནང་ཡོད་པ་མ་ཟད། མཐའ་མཚམས་ཁུལ་དུ་ཚོང་དོན་ཚུད་པའི་མཉམ་ལས་དང་། འདི་ལོའི་ལོའི་མཇུག་ཏུ་སླར་ཡང་རྒྱ་དཀར་ནག་གཉིས་ཀྱི་མཐའ་མཚམས་ཁུལ་གྱི་གནད་དོན་དང་འབྲེལ་བའི་སྐུ་ཚབ་ཚོགས་ཆུང་གི་ཚོགས་འདུ་ཞིག་རྒྱ་གར་དུ་འཚོག་འཆར་ཡོད་སྐོར་སོགས་བསྒྲགས་ཡོད་པ་རེད།

ཕྱི་ལོ་ ༢༠༢༠ ཟླ་ ༦ ཚེས་ ༡༥ ཉིན་བོད་དང་རྒྱ་གར་གྱི་ས་མཚམས་སུ་ཁེལ་བའི་གྷལ་ཝན་ལུང་གཞོངས་སུ་རྒྱ་དཀར་ནག་གཉིས་ཀྱི་དམག་མིའི་བར་དྲག་པོའི་འཁྲུག་འཛིང་ཤོར་ཏེ། རྒྱ་གར་གྱི་མཐའ་སྲུང་དམག་མི་ ༢༠ དང་རྒྱ་ནག་གི་མཐའ་སྲུང་དམག་མི་ ༤ ཡས་མས་ཀྱི་ཚེ་སྲོག་ཤོར་ཡོད་པའི་གནས་ཚུལ་ཐོན་ཏེ།  ཕྱོགས་གཉིས་བར་ཐེངས་མང་པོར་གྲོས་མོལ་བྱས་ཏེ་མཐའ་མཚམས་ཞི་བདེ་དང་བརྟན་བརླིང་ཡོང་སླད། ཕྱོགས་གཉིས་ཀྱི་དམག་མི་ཕྱིར་འཐེན་བྱ་རྒྱུའི་མོས་མཐུན་བྱུང་ཡོད་ཀྱང་། འདས་པའི་ལོ་ཤས་རིང་རྒྱ་དཀར་ནག་གཉིས་བར་འཕགས་བོད་མཐའ་མཚམས་ཁུལ་དུ་གདོང་ཐུག་ཡང་ཡང་བྱུང་ནས་གནས་སྟངས་ཛ་དྲག་ཅན་དུ་གྱུར་སྟབས། ཕྱོགས་གཉིས་ནས་མཐའ་མཚམས་བརྟན་སྲུང་ཆེད་གཞུང་ལམ་དང་དམག་དོན་ལྟེ་གནས་སྔར་ལས་མང་པོ་འཛུགས་སྐྲུན་བྱས་ཏེ་དམག་དོན་ནུས་པ་གོང་སྤེལ་དུ་གཏོང་མུས་ཡིན་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།