བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་བསམ་གྲུབ་ལྷ་རྩེ་ལགས་འདས་གྲོངས་སུ་ཕྱིན་པར་གཞུང་འབྲེལ་མཆོད་འབུལ་སྨོན་ལམ་འཚོགས་སོང་།
དེ་ཉིན་རྒྱབ་ཆུ་ཚོད་ ༣ པའི་སྟེང་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་དང་ལྷན་ཁང་ཁག་གི་དྲུང་ཆེ་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་བོད་མིའི་སྒྲིག་འཛུགས་ཀྱི་དྲུང་ཆེ་ཟུར་བ་བསམ་གྲུབ་ལྷ་རྩེ་ལགས་ཨ་རིའི་མངའ་སྡེ་མི་ནི་སོ་ཊར་འདས་གྲོངས་སུ་ཕྱིན་པར་གཞུང་འབྲེལ་མཆོད་འབུལ་སྨོན་ལམ་ཞིག་འཚོགས་སོང་ལ། དམ་པ་ཁོང་ལ་གདུང་སེམས་མཉམ་སྐྱེད་དང་མྱ་ངན་གུས་འདུད་མཚོན་སླད་མཆོད་འབུལ་སྨོན་ལམ་གྲུབ་མཚམས་དབུས་ལས་ཁུངས་ཁག་ལས་མཚམས་བཞག་སོང་།
སྐབས་དེར་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་དམ་པ་ཁོང་གི་ལོ་རྒྱུས་སྒྲོགས་སྦྱང་གནང་སྐབས། དྲུང་ཆེ་ཟུར་བ་བསམ་གྲུབ་ལྷ་རྩེ་ལགས་ནི་ཕྱི་ལོ་ ༡༩༥༡ ལོར་བོད་དུ་སྐྱེས་ཤིང་། ཕྱི་ལོ་ ༡༩༨༢ ཟླ་བ་ ༡༠ ཚེས་ ༡༥ ནས་གནས་དགུ་པ་ཚོད་ལྟའི་ཐོག་སྤོག་ར་བཀྲ་ཤིས་གླིང་བཟོ་མགོ་ལས་ཚབ་ཏུ་བསྐོ་གཞག་གནང་བ་དང༌། ཕྱི་ལོ་ ༡༩༨༤ ཟླ་ ༧ ཚེས་ ༥ ནས་གཞུང་ཞབས་ངོ་མར་བསྐོ་གཞག ཕྱི་ལོ་ ༡༩༨༧ ཟླ་ ༢ ཚེས་ ༡ ནས་གནས་བརྒྱད་པར་གནས་སྤར། ཕྱི་ལོ་ ༡༩༩༠ ཟླ་ ༨ ཚེས་ ༢ ནས་གནས་བདུན་པར་གནས་སྤར་གྱིས་བཀྲ་ཤིས་དཔལ་འཁྱིལ་གཞིས་མགོར་བསྐོ་གཞག ཕྱི་ལོ་ ༡༩༩༢ ཟླ་ ༨ ཚེས་ ༡ ནས་དྲུང་གཞོན་གནས་རིམ་དུ་བསྐོ་གཞག ཕྱི་ལོ་ ༡༩༩༣ ཟླ་ ༦ ཚེས་ ༨ ནས་ཟུང་དྲུང་དུ་གནས་སྤར། ཕྱི་ལོ་ ༡༩༩༦ ཟླ་ ༤ ཚེས་ ༡༦ ནས་ཤེས་རིག་ལས་ཁུངས་སུ་གནས་སྤོས། ཕྱི་ལོ་ ༡༩༩༧ ཟླ་ ༧ ཚེས་ ༡༦ ནས་བལ་ཡུལ་དོན་ཁང་གི་ཟུང་དྲུང་དུ་གནས་སྤོས། ཕྱི་ལོ་ ༡༩༩༨ ཟླ་ ༣ ཚེས་ ༢༧ ནས་བལ་ཡུལ་སྐུ་ཚབ་དོན་གཅོད་དུ་བསྐོ་གཞག ཕྱི་ལོ་ ༡༩༩༩ ཟླ་ ༢ ཚེས་ ༥ ནས་དྲུང་ཆེ་ལས་འཕར་དུ་གནས་སྤར། ཕྱི་ལོ་ ༢༠༠༡ ཟླ་ ༨ ཚེས་ ༡ ནས་འཆར་འགོད་ལས་ཁང་གི་དྲུང་ཆེར་གནས་སྤོས། ཕྱི་ལོ་ ༢༠༠༡ ཟླ་ ༡༠ ཚེས་ ༡༩ ནས་སྨན་རྩིས་ཁང་གི་འགན་འཛིན་དུ་གནས་སྤོས། ཕྱི་ལོ་ ༢༠༠༤ ཟླ་ ༡༠ ཚེས་ ༡༨ ནས་དྲུང་ཡིག་ཆེན་མོར་གནས་སྤར་ཐོག་རྩིས་ཞིབ་དྲུང་ཆེར་གནས་སྤོས། ཕྱི་ལོ་ ༢༠༠༦ ཟླ་ ༢ ཚེས་ ༢༣ ནས་བདེ་སྲུང་འཛིན་སྐྱོང་དྲུང་ཆེར་གནས་སྤོས། ཕྱི་ལོ་ ༢༠༡༠ ཟླ་ ༨ ཚེས་ ༢ ནས་བཀའ་དྲུང་ཡིག་ཚང་གི་ཁྱབ་ཁོངས་ལོ་རྒྱུས་འབྲི་རྩོམ་དང་བར་བརྒལ་ལས་བཀོད་སྡེ་ཚན་གྱི་དྲུང་ཆེའི་ལས་འཁུར་ཐོག ཕྱི་ལོ་ ༢༠༡༠ ཟླ་ ༡༠ ཚེས་ ༢༧ ཉིན་ནས་བགྲེས་ཡོལ་སྔ་སྣུར་ཞུས་ཡོད་འདུག
