དེ་རིང་ཚོགས་ཆེན་གྱི་ཉིན་གཉིས་པར་༧རྒྱལ་དབང་ཚངས་དབྱངས་རྒྱ་མཚོ་སྐུ་གྲོངས་བའི་བརྒྱུད་རིམ་དང་ཁོང་གིས་གནང་བའི་བཀའ་ཤོག་རིགས་ལ་དཔྱད་པའི་གཏམ་བཤད་གནང་སོང་།
དེ་རིང་ཕྱི་ཚེས་ ༤ ཉིན་གྱི་རྒྱལ་སྤྱིའི་རྒྱལ་དབང་ཚངས་དབྱངས་རྒྱ་མཚོའི་ཞིབ་འཇུག་ཚོགས་ཆེན་ཐེངས་དང་པོའི་ཉིན་རྒྱབ་ཚོགས་ཐེངས་སྟེང་། ས་ཪཱ་བོད་ཀྱི་མཐོ་རིམ་སློབ་གཉེར་ཁང་གི་མཚན་འཛིན་གཙུག་ལག་སློབ་དཔོན་བསོད་ནམས་རྒྱལ་མཚན་ལགས་དང་། སཱ་ར་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་ཚེ་རིང་སྟོབས་ལགས་གཉིས་ཀྱིས། རྒྱལ་དབང་དྲུག་པ་ཚངས་དབྱངས་རྒྱ་མཚོ་སྐུ་འདས་པའི་བརྒྱུད་རིམ་ལ་བལྟ་བ་ཞེས་པ་དང་། ཆུ་ལུག་ཕྱི་ལོ་ ༡༧༠༣ ལོར་རྒྱལ་དབང་ཚངས་དབྱངས་རྒྱ་མཚོས་སྤོང་རོང་རྗེ་དབོན་ལ་གནང་བའི་ཤེ་བམ་གྱི་ནང་དོན་ལ་ཞིབ་འཇུག་ཅེས་པའི་ཐད་ལ་གཏམ་བཤད་གནང་སོང་།
ས་ཪཱ་བོད་ཀྱི་མཐོ་རིམ་སློབ་གཉེར་ཁང་གི་མཚན་འཛིན་གཙུག་ལག་སློབ་དཔོན་བསོད་ནམས་རྒྱལ་མཚན་ལགས་ཀྱིས་འདི་གའི་གསར་འགོད་པར། ངའི་ད་ལན་གྱི་དཔྱད་རྩོམ་དེ་༸རྒྱལ་དབང་སྐུ་ཕྲེང་དྲུག་པ་རིག་འཛིན་ཚངས་དབྱངས་རྒྱ་མཚོ་སྐུ་འདས་པའི་བརྒྱུད་རིམ་ལ་ཞིབ་ལྟ་ཞེས་པ་དེ་རེད། ད་བར་བོད་ནང་ལོགས་ནས་དཔྱད་རྩོམ་མང་པོ་ཞེ་དྲགས་བྲིས་འདུག་ལ། བརྒྱ་ཆ་དགུ་བཅུ་ཡིས་རྒྱལ་བ་དྲུག་པ་ཚངས་དབྱངས་རྒྱ་མཚོ་མཆོག་སྐུ་འདས་འདུག་ཅེས་བྲིས་འདུག་པས། ངས་ལྟ་བ་དང་ཁས་ལེན་དེ་འཛིན་གྱི་ཡོད་རེད། ངས་ད་ལན་ཞུ་ཡ་གཙོ་བོ་དེ་རྒྱལ་བ་དྲུག་པ་དང་དྭགས་པོ་བླ་མ་ངག་དབང་ཆོས་གྲགས་གཉིས་གཤིས་ཀ་ཐ་དད་དང་། ཆོས་བརྒྱུད་གྲུབ་མཐའ་ཐ་དད་དང་ཀུན་སྤྱོད་ཐ་དད་ཡིན་པས། རྒྱུ་མཚན་དེ་གསུམ་ལ་བརྟེན་ནས་དེ་གཉིས་མི་གཅིག་ལ་གཏན་ནས་བཞག་ཤེས་ཀྱི་མི་འདུག་པས་ཐ་དད་རེད་ཅེས་རྒྱུ་མཚན་དེ་བཤད་ཀྱི་ཡོད། མི་དེ་གཉིས་གཅིག་ལ་བཞག་ས་མི་འགྲོ་བར་ཐ་དད་ཡིན་པ་དེ། ལོ་རྒྱུས་ཀྱི་ཞིབ་འཇུག་གི་ཁྱབ་ཡོངས་ནས་རེད་མ་གཏོགས། ཡང་ཆོས་ལུགས་དང་གསང་བ་བསམ་གྱིས་མི་ཁྱབ་དེ་འདྲར་འབྲེལ་བ་མེད། དེ་ཞིབ་འཇུག་གི་ཁྱབ་ཁོངས་མ་རེད། དེ་བཞིན་གནད་དོན་གཞན་ཞིག་ནི་རྒྱལ་དབང་དྲུག་པ་ཚངས་དབྱངས་རྒྱ་མཚོ་དུས་དེར་བྲོས་ནས་ཕེབས་ཐུབ་རྒྱུའི་ཚོད་ཅིག་མ་རེད། གཅིག་ནས་སྐུ་སྙུང་ནས་རྐང་པ་ན་ནས་ཕེབས་ཐུབ་ཀྱི་ཡོད་མ་རེད། གཉིས་ནས་སྲུང་མཁན་ནི་ཕྱོགས་གསུམ་རེད། ཨ་ཁུ་བཀྲ་ཤིས་པ་ཐུར་གྱི་དབུ་སྒར་གྱི་འགྲམ་དང་། རྒྱུ་ནང་རྒྱལ་པོ་གཉིས་ཀ་རྒྱལ་དབང་ཚངས་དབྱངས་རྒྱ་མཚོར་དད་པ་ཡོད་རེད་ལ། ཁོང་ཚོར་གོ་སྐབས་ཤིག་རག་ན་ལེན་ཆོག་ཆོག་རེད་དེ། མན་ཇུ་ཁང་སྐྱ་ཞེད་ནས་ལག་པ་འཆང་ཐུབ་ཀྱི་ཡོད་མ་རེད། གཉིས་ནས་རྒྱལ་པོ་ལྷ་བཟང་ཁན་དང་སྤུན་མཆེད་ནང་འགལ་ཟླ་བྱུང་གི་བསམས་ནས་མིག་བཙུགས་ནས་བསྡད་ཡོད་རེད། དེ་དག་རྒྱལ་དབང་སྐུ་ཕྲེང་བདུན་པའི་སྐབས་ཧ་གོ་ཡི་རེད། དེ་བཞིན་དུས་སྐབས་དེར་རྒྱལ་དབང་རིན་པོ་ཆེས་ཇག་རོང་དགོན་པའི་ཁྲི་བ་བྱས་ནས་བསྡད་ཐུབ་ཡ་ཡོད་མ་རེད། གང་ཡིན་ཟེར་ན། ཇག་རོང་དགོན་པར་གཅིག་ནས་མན་ཇུ་ཡི་ཤུགས་རྐྱེན་ཡོད་རེད། གཉིས་ནས་དེ་དག་གི་ནང་དུ་ཡོད་མཁན་རྣམས་ཀྱིས་རྒྱལ་དབང་དྲུག་པ་ངོ་ཤེས་མཁན་ཡོད་པས། རྒྱལ་དབང་དྲུག་པ་ཚངས་དབྱངས་རྒྱ་མཚོ་ངོ་ཤེས་ཡོད་ན་བསྡད་ཐུབ་ཀྱི་མེད། ཕྱོགས་གཞན་ཞིག་ནས་སྐབས་དེར་ས་ཁུལ་དེར་མན་ཇུའི་ཤུགས་རྐྱེན་ཡོད་རེད། ཨ་ལག་ཤ་དང་གཙང་རོང་དགོན་པ་ཡོད་ས་གཉིས་ཀར་གོང་མ་ཁང་ཤིའི་དབང་ཤུགས་ཡོད་རེད། བྱས་ཙང་འདི་འདྲའི་བར་ཞིག་ལ་རྩ་བ་ཉིད་ནས་བསྡད་ཤེས་ཀྱི་མི་འདུག་ཞེས་བཤད་ཀྱི་ཡོད། ཡང་རྒྱུ་མཚན་གཞན་ཞིག་ལ་བལྟས་ན། གོང་མ་ཁང་ཤིས་རྒྱལ་བ་རིན་པོ་ཆེའི་འདོད་པ་དང་། རྒྱལ་བ་རིན་པོ་ཆེ་ལ་བརྟེན་ནས་སོག་པོ་དབང་དུ་བསྡུ་རྒྱུ་དང་། བོད་མངའ་ཁོངས་ལ་འབྱུང་རྒྱུའི་དམིགས་ཡུལ་བཟུང་ཡོད་པའང་རྒྱལ་དབང་བདུན་པའི་རྣམ་ཐར་དུ་གསལ་པས། དེ་དག་ཚང་མར་བལྟས་པ་ཡིན་ན་རྒྱལ་དབང་སྐུ་ཕྲེང་དྲུག་པ་སྐུ་འཚོ་བཞུགས་གནང་ནས་བསྡད་ཡ་དེ་ཡོང་ཤེས་ཡ་མི་འདུག དེ་བཞིན་གསང་བའི་རྣམ་ཐར་གྱི་ཁྲོད་དུའང་སྐྱོན་མང་པོ་ཞིག་འདུག བྱས་ཙང་རྒྱལ་བ་སྐུ་ཕྲེང་དྲུག་པ་འཚོ་ནས་བཞུགས་པ་དེ་ངོས་ལེན་ཐུབ་ཀྱི་མི་འདུག ངས་དེའི་སྐོར་ལ་ཞིབ་འཇུག་བྱེད་ཀྱི་ཡོད། ངར་རྩོམ་ཡིག་མང་པོ་ཞིག་དང་དགག་ཡིག་གི་ཁ་གཏད་ཀྱི་ཡིག་ཆ་མང་པོ་ཞིག་ཡོང་བ་ཡིན་ན། དེས་ངར་དཔེ་ཕན་ཐོགས་ས་རེད། ཅེས་འགྲེལ་བརྗོད་གནང་བྱུང་།
དེ་བཞིན་སཱ་ར་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་ཚེ་རིང་སྟོབས་ལགས་ཀྱིས་འདི་གའི་གསར་འགོད་པར། ངས་དཔྱད་རྩོམ་དེ་རྒྱལ་བ་ཚངས་དབྱངས་རྒྱ་མཚོས་དགོན་པ་ཁག་དང་། ཡུལ་སྡེ་ཁག དཔོན་རིགས་སོགས་ལ་གནང་བའི་བཀའ་ཤོག་རིགས་མང་པོ་འདུག དེ་དག་རྒྱལ་བ་ཚངས་དབྱངས་རྒྱ་མཚོའི་གསུང་རྩོམ་ཁྲོད་ལ་སླེབས་ཐུབ་ཐབས་དང་། ད་བར་ཡོངས་གྲགས་ཀྱིས་བཀའ་ཤོག་རུབ་རུབ་བྱས་མེད་པས། དེ་དག་ཚང་མ་བསྡུ་རུབ་བྱས་པ་ཡིན་ན། དེ་ཚངས་དབྱངས་རྒྱ་མཚོའི་གསུང་རྩོམ་ཁྲོད་རིགས་ཚན་གསར་པ་ཞིག་ཆགས་འགྲོ་ཡི་འདུག་པས། ད་ལན་ངས་ཚངས་དབྱངས་རྒྱ་མཚོས་ཕྱི་ལོ་ ༡༧༠༣ ལོར་སྤོང་རོང་ངམ་སྔོན་མ་ཤེལ་དཀར་རྫོང་ཁོངས་སུ་ཡོད་པའི་སྤོང་རོང་འབྲོག་སྡེ་ཆེན་པོ་ཞིག་ལ་བཀའ་ཤོག་གནང་འདུག དེའི་སྐོར་ལ་ཞིབ་འཇུག་བྱས་ཡིན། དཔྱད་རྩོམ་དེའི་ཁྲོད་ཚངས་དབྱངས་རྒྱ་མཚོའི་བཀའ་ཤོག་གི་ནང་དོན་གྱི་འགྲོ་སྟངས་ཀྱི་ཐོག་ནས་གནས་སྟངས་གང་འདྲ་ཆགས་མིན་དང་། བཀའ་ཤོག་གི་བརྗོད་བྱ་ག་རེ་ཡིན་མིན་དང་ཉར་ཚགས་ཀྱི་བརྒྱུད་རིམ། དེ་བཞིན་རྒྱལ་བ་ཚངས་དབྱངས་རྒྱ་མཚོས་གནང་བའི་བཀའ་ཤོག་ཨ་མ་སྔོན་མ་བོར་བརླག་ཏུ་ཕྱིན་ཀྱང་། ཕྱི་ལོར་ ༡༩༠༧ ལོར་་བཀའ་ཤག་ལ་ཡོད་པ་དེ་ཚིག་བཤུས་བྱས་ནས་དེར་བཀའ་ཤག་གི་བཀའ་དམ་ཕབ་འདུག དེ་སླར་ཡང་སྤོར་རོང་ལ་རག་ནས། ད་ལྟ་ཕྱི་ལོགས་ལ་བཀའ་ཤོག་དེའི་ནང་དོན་ལ་བལྟ་ཡ་ཡོད་པ་དེ་དག་གི་སྐོར་དང་། བཀའ་དམ་ག་རེ་ག་རེ་བརྒྱབ་ཡོད་མེད་ཀྱི་ཞིབ་འཇུག་གི་གྲུབ་དོན་རྙེད་ཡོད། ཅེས་དང་། སྤོང་རོང་གི་བཀའ་ཤོག་དེ་དག་ད་ལྟ་བོད་ཀྱི་དཔེ་མཛོད་ཁང་དང་། འཇར་མན་གྱིི་བྲག་གཡབ་རིན་པོ་ཆེའི་ཕྱག་ལ་ཡོད་ས་རེད། དེ་བཞིན་མང་པོ་ཞིག་ཁངས་དཀར་ཚུལ་ཁྲིམས་སྐལ་བཟང་དང་ཉི་ཧོང་གི་ཨི་ཐོ་ནི་ཡ་གཙུག་ལག་སློབ་གྲྭར་གཅེས་ཉར་ཞུས་ཡོད་པའི་སྐོར་ལ་དཔྱད་ཞིབ་ཞུས་ཡིན། དེས་བཀའ་ཤོག་གི་རིགས་ལ་ཞིབ་འཇུག་བྱེད་སྟངས་དང་། དོ་སྣང་སྤྲོད་སྟངས། གནད་དོན་དེ་དང་འབྲེལ་ནས་ཚངས་དབྱངས་རྒྱ་མཚོའི་གསུང་དང་འབྲེལ་བའི་བཀའ་ཤོག་མང་པོ་ཞིག་ཡོད་པ་དེ་དག་ཉར་ཚགས་ཐུབ་པ་ཡིན་ན། གསུང་དེ་དག་ལ་ཁ་སྣོན་དང་བཀའ་ཤོག་ལ་དོ་སྣང་། བོད་ཀྱི་གཞུང་འབྲེལ་ཡི་གེའི་འགྲོ་སྟངས་ལ་ཕན་ཐོགས་དང་ཞིབ་འཇུག་གི་བརྗོད་གཞི་ཡུལ་གསར་པ་ཞིག་རེད། ཅེས་འགྲེལ་བརྗོད་གནང་བྱུང་།
མོན་རྟ་དབང་ནས་གསར་འགོད་པ་དཔལ་ལྡན་གྱིས་སྤེལ། རྩོམ་སྒྲིག་བྱེད་མཁན། པདྨ་མཚོ།
