ཕྱི་ལོ་ ༢༠༢༥ ལོའི་དུས་བབ་གསར་ཁང་གི་བོད་ནང་གི་གནས་ཚུལ་གལ་ཆེན་ཁག

ཉུང་མཐར་བོད་མི་  ༡༡༥ ལྷག་འཛིན་བཟུང་བཀག་ཉར་བྱས། 

ཕྱི་ལོ ༢༠༢༥ ལོ་གཅིག་པུར་རྒྱ་ནག་གཞུང་གིས་ཉུང་མཐར་བོད་མི་སེར་སྐྱ་ ༡༡༥  ལྷག་འཛིན་བཟུང་བཀག་ཉར་བྱས་ཏེ། ཆབ་སྲིད་ཀྱི་ཉེས་མིང་གཡོགས་པ་མང་པོ་ཞིག་གི་གནས་སྟངས་ཤེས་རྟོགས་ཐུབ་ཀྱི་མི་འདུག ཕྱི་ལོ་ ༢༠༢༥ ཟླ་ ༣ ཚེས་ ༢༠ ཉིན་བོད་ཆབ་མདོ་སྟེང་ཆེན་རྫོང་གསེར་བྲག་གྲོང་བརྡལ་གྱི་སྐལ་བཟང་ཞེས་པ་ཞིག་གིས། ས་གནས་སྲིད་གཞུང་གིས་ཕྱི་ལོ་ ༢༠༡༩ ལོ་ནས་བཟུང་ལོ་ ༩ རིང་ཁོང་གི་ནང་མིར་ཆུ་གློག་སོགས་ཀྱི་མཐུན་རྐྱེན་བཀག་པའི་དཀའ་ངལ་ཞུ་གཏུག་བྱས་ཡོད་ཀྱང་ཕན་འབྲས་མ་ཐོན་པའི་སྐོར་སྤྱི་ཚོགས་དྲ་ལམ་དུ་ཁྱབ་བསྒྲགས་བྱས་རྗེས། རྒྱ་ནག་གཞུང་གིས་སྤྱི་ཚོགས་ཀྱི་སྒྲིག་ལམ་ལ་གཏོར་སྐྱོན་བཏང་བ་དང་། ཏང་དང་སྲིད་གཞུང་ལ་གནོད་འཚེ་བཟོས་པའི་ཉེས་མིང་འོག ཕྱི་ལོ་ ༢༠༢༥ ཟླ་ ༣ ཚེས་ ༢༤ ཉིན་སྟེང་ཆེན་རྫོང་ཉེན་རྟོག་པས་དུས་ཐུང་རིང་ཁོང་བཀག་ཉར་བྱས་རྗེས་ཀློད་ཡོད་ཀྱང་། ཕྱི་ཟླ་ ༤ ཚེས་ ༡༨ ཉིན་བསྐྱར་དུ་འཛིན་བཟུང་བྱས་ཏེ་གོ་ཐོས་མེད་པར་གྱུར་ཡོད་པ་མ་ཟད། གནད་དོན་དེར་ཁ་གཡར་ནས་ཁོང་གི་བྱིས་པ་ཡང་སློབ་གྲྭར་བཅུག་མ་ཐུབ་པའི་དཀའ་ངལ་འཕྲད།

ཕྱི་ལོ་ ༢༠༢༥ ཟླ་ ༥ ཚེས་ ༧ ཉིན་གྱི་ཞོགས་པར་བོད་ཀྱི་རྒྱལ་ས་ལྷ་ས་གྲོང་ཁྱེར་གྱི་ནུབ་ཁུལ་དུ་འཁྲུག་འཛིང་དོན་རྐྱེན་ཞིག་བྱུང་སྟེ་མི་ ༣༡ འཛིན་བཟུང་བྱས་ནས་ཉེས་ཆད་བཅད་ཡོད་པ་དང་། ལྷ་ས་གྲོང་ཁྱེར་ཉེན་རྟོག་ཁང་གིས་དེའི་སྐོར་ལ་གསལ་བསྒྲགས་ཤིག་སྤེལ་བའི་ནང་། ལྷ་ས་གྲོང་ཁྱེར་ནུབ་ཁུལ་དུ་རང་བཙན་དང་འཇིགས་སྐུལ་གྱི་བྱ་སྤྱོད་སྤེལ་བར་དོགས་ཟོན་ལྟ་རྟོག་ནན་པོ་བྱེད་བཞིན་ཡོད་སྐོར་བསྒྲགས།

རྒྱ་ནག་གཞུང་གིས་གོ་སྟོན་གྱི་སྔ་རྗེས་སུ་བོད་ནང་དམ་དྲག་སྔར་ལས་ཤུགས་ཆེན་བྱས་ཡོད་པ་ལྟར། ཕྱི་ལོ་ ༢༠༢༥ ཟླ་ ༧ པའི་ཟླ་མགོར་བོད་རྔ་བ་རྫོང་ཁོངས་ནས་ཡིན་པའི་གླུ་བ་ཨ་སངས་དང་། ཁོང་གི་རོགས་པ་གླུ་བ་དཔལ་ཆུང་ལགས་གཉིས་ཀྱིས་ལོ་ཤས་གོང་དུ་གཞས་པ་གཞན་གྱིས་བླངས་བའི་གླུ་གཞས་ (ཞི་བདེའི་རྒྱལ་སྲས་) ཞེས་པ་བསྐྱར་དུ་བླངས་བའི་རྐྱེན་གྱིས་འཛིན་བཟུང་བཙན་འཁྲིད་བྱས་ཏེ་ད་ལྟའང་བཀག་ཉར་འོག་ཡོད་པ་རེད། དེ་བཞིན་༧སྐུའི་གོ་སྟོན་གྱི་ཚབ་མཚོན་དབུ་ཞྭ་སྤྱི་ཚོགས་དྲ་ལམ་དུ་ཁྱབ་བསྒྲགས་བྱས་པའི་ཉེས་མིང་འོག ཕྱི་ཟླ་ ༧ ཚེས་ ༡ ཡས་མས་ཤིག་ལ་ཨ་འདུས་དགོན་པའི་དགེ་འདུན་པ་ཚེ་དབང་དོན་གོ་ལགས་བཙན་འཁྲིད་བྱས་ཏེ་གོ་ཐོས་མེད་པར་གྱུར།

ཕྱི་ལོ་ ༢༠༢༥ ཟླ་ ༧ ཚེས་ ༢ ཡས་མས་ཙམ་ལ་རྨ་ལྷོ་སོག་རྫོང་གཙང་དགོན་པའི་དགེ་འདུན་པ་མཛེས་དགའ་རྒྱ་མཚོ་ལགས་མཚོ་སྔོན་གྱི་ཟི་ལིང་གྲོང་ཁྱེར་ནས་འཛིན་བཟུང་བྱས་ཡོད་པ་དང་། རྒྱ་ནག་གཞུང་གིས་ཁོང་ལ་ཕྱི་ཕྱོགས་སུ་དངུལ་བསྐུར་བའི་ཉེས་མིང་གཡོགས་ཡོད་པ་དང་། འདི་ལོའི་ཕྱི་ཟླ་ ༡༡ ནང་ཁོང་གི་ཉེ་འབྲེལ་ཁག་ཅིག་ཟི་ལིང་དུ་ཁོང་ལ་ཐུག་ཏུ་ཕྱིན་ཡོད་ཀྱང་ཐུག་བཅུག་མེད་པ་རེད། ཕྱི་ལོ་ ༢༠༢༥ ཟླ ༩ ཚེས ༡༦ ཉིན་འདི་ག་དུས་བབ་གསར་ཁང་ལ་འབྱོར་བའི་གནས་ཚུལ་ལྟར་ན། ཕྱི་ལོ་ ༢༠༢༡ ཟླ་ ༨ ཚེས་ ༥ ཉིན་བོད་ཀྱི་རྒྱལ་ས་ལྷ་ས་ནས་དགེ་འདུན་པ་དར་རྒྱས་ལགས་དང་ཁོང་གི་རོགས་པ་གཉིས་བཅས་འཛིན་བཟུང་བྱས་ཡོད་པ་དང་། ཟླ་འགའི་རྗེས་ནས་རོགས་པ་གཉིས་ཀློད་གྲོལ་བཏང་ཡོད་ཀྱང་གྲྭ་དར་རྒྱས་ལགས་མུ་མཐུད་བཀག་ཉར་བྱས་ཏེ་གནས་ཚུལ་གང་ཡང་ཕྱི་ཕྱོགས་སུ་ཐོན་མེད་པ་རེད།

ཕྱི་ལོ་ ༢༠༢༥ ཟླ་ ༧ ཚེས་ ༡༣ ཉིན་ནས་བཟུང་རྔ་བ་བོད་རིགས་རང་སྐྱོང་ཁུལ་ཟེར་བའི་ཁོངས་ཀྱི་ཀིརྟིའི་དགོན་པ་ཁག་གི་ནང་ཀིརྟི་རིན་པོ་ཆེའི་སྐུ་པར་སྒྲིག་གཤོམ་མི་ཆོག་པའི་བཀའ་བསྒྲགས་ཏེ། ཉིན་དེ་རང་ལ་མཛོད་དགེ་རྫོང་ཁོངས་ཀྱི་སྟག་ཚང་ལྷ་མོ་ཀིརྟི་དགོན་དང་། རྔ་བ་རྫོང་ཁོངས་ཀྱི་རྔ་བ་ཀིརྟི་དགོན། འབར་ཁམས་རྫོང་ཁོངས་ཀྱི་རྒྱལ་རོང་ཚོ་བདུན་ཀིརྟི་དགོན་བཅས་ཀིརྟིའི་དགོན་པ་ཆེ་ཁག་རྣམས་སུ་དུས་གཅིག་ཏུ་ཀིརྟི་རིན་པོ་ཆེའི་སྐུ་པར་རྣམས་ཕྱིར་བསྡུ་བྱེད་དུ་བཅུག་ཡོད་པ་དང་། ཀིརྟིའི་དགོན་ཁག་སྤྱིའི་ཤེས་ཡོན་སློབ་གཉེར་ཐོག་ལྟ་རྟོག་གནང་མཁན་ཀིརྟིའི་དགོན་ཁག་གི་སྤྱི་ཁྱབ་ནང་བསྟན་ཤེས་ཡོན་འགན་འཛིན་ལྷན་ཚོགས་ཞེས་པ་དེའང་༧སྐྱབས་རྗེ་ཀིརྟི་རིན་པོ་ཆེ་ལ་འབྲེལ་བ་ཡོད་པར་བསྙད་ནས་སྒོ་བརྒྱབ།

ཕྱི་ལོ་ ༢༠༢༥ ཟླ་ ༨ པའི་ནང་གནས་ཚུལ་ཐོན་པ་ལྟར་ན། བོད་བསང་ཆུ་རྫོང་ཁོངས་ཧོར་གཙང་ཀིརྟིའི་དགོན་གྱི་ཁྲི་ཚབ་དང་དཔེ་ཁྲིད་དགེ་རྒན་དགེ་བཤེས་ལྷ་རམས་པ་དཀོན་མཆོག་ཆོས་གྲགས་ལགས་རྫོང་ཉེན་རྟོག་པས་བཙན་ཁྲིད་བྱས་ཏེ་སྐབས་དེར་ཟླ་ ༨ ལྷག་ཕྱིན་ཡོད་ཀྱང་། ཁོང་གི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད། ཁོང་ཕྱི་ལོ་ ༢༠༢༤ ཟླ་ ༡༢ ནང་འཛིན་བཟུང་བཙན་འཁྲིད་བྱས་ཡོད་འདུག ཁོང་ཆུང་དུས་ནས་སྟག་ཚང་ལྷ་མོ་ཀིརྟི་དགོན་དུ་ཆོས་ཞུགས་ཀྱིས་གསན་བསམ་སློབ་གཉེར་གནང་སྟེ། ཕྱི་ལོ་ ༢༠༡༩ ལོར་དགེ་བཤེས་ལྷ་རམས་པའི་དམ་བཅའ་བཞག་ཅིང་། ཕྱི་ལོ་ ༢༠༢༡ ལོར་ཧོར་གཙང་ཀིརྟིའི་དགོན་གྱི་ཁྲི་ཚབ་ཏུ་བསྐོ་བཞག་གནང་ཡོད་འདུག

ཕྱི་ལོ་ ༢༠༢༥ ཟླ་ ༡༡ ཚེས་ ༥ ཉིན་གྱི་ཉིན་རྒྱབ་ཆུ་ཚོད་ ༣ པ་ཡོལ་དུ། བོད་རྫ་ཆུ་ཁའི་ཀ་བཞི་སྡེ་བའི་གསེར་ཁོག་ཅེས་པའི་ས་ཆ་དེར་རྒྱ་ནག་གིས་གསེར་གྱི་གཏེར་ཁ་སྔོག་འདོན་བྱེད་བཞིན་པ་ཡུལ་མི་ཚོས་མཐོང་ནས་གཏེར་ཁ་སྔོག་འདོན་བཀག་འགོག་བྱས་སྟབས། ཟླ་དེའི་ཕྱི་ཚེས་ ༦ ཉིན་གྱི་དགོང་དྲོའི་ཆུ་ཚོད་ ༦།༥༠ ཙམ་ནས་རྒྱ་ནག་གཞུང་གིས་ཀ་བཞི་སྡེ་བའི་ཡུལ་མི་འཛིན་བཟུང་བྱེད་མགོ་བརྩམས་ཏེ། ཕྱི་ཟླ་ ༡༢ ཚེས་ ༡༥ བར་ཁྱོན་ཡུལ་མི་ ༨༠ ཡས་མས་འཛིན་བཟུང་བྱས་ནས་ད་ལྟའང་མི་མང་པོ་བཀག་ཉར་འོག་ཡོད་པ་རེད། ཡུལ་མི་ཁག་ཅིག་ལ་ཉེས་རྡུང་བཏང་ནས་རྩིབ་མ་བཅག་པ་དང་མི་འགའ་ཞིག་གི་མཁལ་མ་ནད་པ་བཟོས་པ། གཟུགས་པོ་སྐྱོ་བོ་ཆགས་པ། དེ་བཞིན་ཁ་ཤས་ཀྱི་གློ་ནད་བསྐྱར་ལོག་བརྒྱབ་པ་སོགས་བྱུང་བའི་གནས་ཚུལ་ཐོན།

ཆབ་སྲིད་ཉེས་མིང་འོག་སྐུ་སྲོག་ཤོར་བའི་བོད་མི། 

བོད་མགོ་ལོག་དགའ་བདེ་རྫོང་ལུང་སྔོན་དགོན་པའི་དགོན་བདག་ཧཱུྃ་ཀར་རྡོ་རྗེ་རིན་པོ་ཆེ་མཆོག་གིས་རྒྱལ་མཚན་ནོར་བུ་ལགས་མགོ་ལོག་ཁུལ་དུ་བསླེབས་སྐབས་རྒྱ་ནག་གཞུང་གི་བཀའ་བཀོད་ལྟར་སྣེ་ལེན་ཟབ་རྒྱས་མ་བྱས་པ་དང་། གོང་རིམ་གྱི་བཀའ་ལ་མི་ཉན་པར་དགོན་པ་དང་སློབ་གྲྭ་མང་པོ་བཙུགས་པ། ཉམ་ཆུང་དབུལ་ཕོངས་ཀྱི་ཐོབ་ཐང་རྩོད་ལེན་གནང་ནས་རྙོག་ཟིང་བསླངས་ཡོད་སྐོར་སོགས་བརྗོད་ནས་སུན་གཙེར་ཡང་ཡང་བཟོས་རྐྱེན་ཉེན་གཡོལ་དུ་ཕེབས་དགོས་བྱུང་ཡོད་ཀྱང་། ཕྱི་ལོ་ ༢༠༢༥ ཟླ་ ༣ ཚེས་ ༢༨ ཉིན་རྒྱ་ནག་གཞུང་གིས་རིན་པོ་ཆེ་མཆོག་ཝེ་ཐི་ནམ་གྱི་རྒྱལ་སྤྱིའི་སྨན་ཁང་ (ςινμεχ Χεντραλ Παρκ Ιντερνατιοναλ Ηοσπιταλ ) དུ་སྐུ་གྲོངས་ཟིན་སྐོར་བརྗོད་ཡོད་པ་དང་། དེ་ནས་ལུང་སྔོན་དགོན་པའི་སྐུ་ཚབ་དགེ་འདུན་པ་ལྔ་ཆེད་དུ་ཝེ་ཐི་ནམ་དུ་ཕེབས་ཏེ་རྩད་གཅོད་གནང་ཡོད་ཀྱང་། ཕྱི་ཟླ་ ༤ ཚེས་ ༡༠ ཉིན་གྱི་ཕྱི་དྲོར་རིན་པོ་ཆེ་མཆོག་གི་ཞལ་ཁོ་ན་ཙམ་མཇལ་དུ་བཅུག་སྟེ། ཟླ་དེའི་ཕྱི་ཚེས་ ༢༠ ཉིན་ཝེ་ཐི་ནམ་དུ་སྐུ་ཕུང་གསང་བའི་ཐོག་ནས་ཞུགས་འབུལ་ཞུས་ཡོད་པ་རེད། རིན་པོ་ཆེ་མཆོག་ཝེ་ཐི་ནམ་དུ་ཡོད་པའི་རྒྱ་ནག་གཞུང་ཚབ་ཁང་གི་ནང་བཅུག་སྟེ་གཅར་རྡུང་མནར་གཅོད་ཚད་མེད་བཏང་ནས་ཁོང་གི་ལུས་ལ་རྨས་སྐྱོན་ཆེན་པོ་བཟོས་ཡོད་པ་སྐབས་དེའི་ལས་བྱེད་ཚོས་འགྲེལ་བརྗོད་བྱས་པ་བརྒྱུད་ལམ་དུ་ཐོན་ཡོད་པས་ཁོང་རྒྱ་གཞུང་གིས་བཀྲོངས་ཡོད་པར་ངོས་འཛིན་བྱེད་ཀྱི་ཡོད་པ་རེད། ཁོང་གི་མ་ཡུམ་གདུགས་དཀར་སྒྲོལ་མ་ལགས་ཐུགས་ཁྲལ་གྱིས་སྙུང་གཞི་བཞེས་ཏེ་ཟླ་ ༣ ལྷག་རིང་ཟི་ལིང་དུ་སྨན་བཅོས་བྱས་ཡོད་ཀྱང་དྲག་སྐྱེད་མ་བྱུང་བར་ཕྱི་ལོ་ ༢༠༢༥ ཟླ་ ༥ ཚེས་ ༦ ཉིན་ལུང་སྔོན་དགོན་པའི་མཐའ་རུ་ཡོད་པའི་གཟིམ་ཆུང་དུ་དགུང་ལོ་ ༨༥ ཐོག་གྲོངས་ཡོད་པ་རེད།

ཕྱི་ལོ་ ༢༠༢༥ ལོའི་འཁྲུངས་སྐར་གྱི་སྔ་གཞུག་ཏུ་རྒྱ་གཞུང་གིས་བོད་རྨ་ལྷོ་སོག་རྫོང་གི་གཙང་དགོན་པའི་ལོ་ན་བཅོ་བརྒྱད་མན་གྱི་དགེ་འདུན་པ་མང་པོ་ཕྱིར་ཕུད་བཏང་ཡོད་པ་མ་ཟད། དགོན་པའི་དབུ་འཛིན་དགེ་འདུན་པ་ཤེར་བཟང་རྒྱ་མཚོ་ལགས་སུ་ཡང་ཡང་གནོན་ཤུགས་སྤྲད་དེ་ཉེས་འདོགས་སྣ་ཚོགས་བྱས་པར་བརྟེན། ཕྱི་ལོ་ ༢༠༢༥ ཟླ་ ༨ ཚེས་ ༡༨ ཉིན་གྱི་ཕྱི་དྲོ་ཙམ་ལ་དགོན་པའི་ཚོང་ཁང་གི་ཐོག་ཁར་རང་སྲོག་བཅད།

ཕྱི་ལོ ༢༠༢༥ ཟླ་ ༧ ཚེས་ ༡༩ ཉིན་རྒྱ་ནག་གཞུང་གིས་བོད་གོ་འཇོ་རྫོང་པ་ལ་ཆུས་ཟེར་བའི་ཁོངས་སུ་ཡོད་པའི་ཆོས་རྒྱལ་དགོན་པའི་དགོན་བདག་ཡོངས་གྲགས་སུ་ཆོས་རྒྱལ་སྤྲུལ་སྐུའམ་མཚན་དངོས་ལ་དཔལ་ལྡན་དབང་རྒྱལ་ལགས་ཀན་སུའུ་ཞིང་ཆེན་གྱི་ཁོངས་སུ་ཡོད་པའི་བཙོན་ཁང་ཞིག་ཏུ་བཅུག་སྟེ་མནར་གཅོད་ཚད་མེད་བཏང་བའི་རྐྱེན་གྱིས་བཙོན་ཁང་དུ་སྐུ་བཀྲོངས།

གྲྭ་བཙུན་ཕྱིར་ཕུད་དང་དགོན་པར་གཏོར་བཤིག

ཕྱི་ལོ་ ༢༠༢༥ ཟླ་ ༢ ནང་རྒྱ་ནག་གཞུང་གིས་བོད་གསེར་རྟ་བླ་རུང་སྒར་གྱི་གྲྭ་བཙུན་མང་པོར་ཁྲིམས་མཐུན་གྱི་ཡིག་ཆ་མེད་སྐོར་སོགས་བརྗོད་དེ། གྲྭ་བཙུན་གྲངས་ ༡༠༠༠  ལྷག་རིམ་པས་དགོན་པ་ནས་ཕྱིར་ཕུད་བཏང་ཡོད་པ་རེད། དེའི་ཐད་བླ་རུང་སྒར་ནས་ཕྱིར་ཕུད་བཏང་བའི་བཙུན་མ་ཞིག་གིས་འདི་ག་དུས་བབ་ཀྱི་གསར་འགོད་པར། རྒྱ་ནག་གཞུང་གི་ལས་བྱེད་དང་གསེར་རྟ་རྫོང་གི་དམག་མི་སོགས་ཀྱིས་བརྟག་དཔྱད་མང་པོ་ཞིག་བྱས་པ་བརྒྱུད། ང་ཚོ་གྲྭ་བཙུན་གཅིག་སྟོང་དགོན་པར་འདུག་མི་ཆོག་པར་རིམ་པས་དགོན་པ་ནས་བུད་དགོས་པའི་བཀའ་ཕབ་བྱུང་། ཞེས་བརྗོད་བྱུང་། ཕྱི་ལོ་ ༢༠༡༦ ལོ་ནས་བཟུང་རྒྱ་གཞུང་གིས་གསེར་རྟ་བླ་རུང་སྒར་ལ་གཏོར་བཤིག་དང་གྲྭ་བཙུན་ཕྱིར་ཕུད་གཏོང་བའི་མགོ་བརྩམས་ཡོད་པ་མ་ཟད། རྒྱ་ནག་གཞུང་འབྲེལ་གྱི་ཡིག་ཆའི་ནང་སྒར་དུ་གྲྭ་བཙུན་གྲངས་ ༥༠༠༠ ལས་བརྒལ་མི་ཆོག་པ་དང་། དེའི་ནང་ཞིང་ཆེན་གཞན་ནས་གྲྭ་བཙུན་གྲངས་ ༡༠༠༠ ལས་མང་བ་འཇོག་མི་ཆོག་པའི་བཀའ་རྒྱ་བཏང་ཡོད་པ་རེད།

ཕྱི་ལོ་  ༢༠༢༥ ཟླ་ ༦ ནང་སྲིད་གཞུང་གི་ས་ཆའི་ཐོག་འཛུགས་སྐྲུན་བྱས་པར་བསྙད་དེ། བོད་དཀར་མཛེས་ཁུལ་བྲག་མགོ་རྫོང་འཇང་སྒང་དགོན་པའི་ཉེ་འཁྲིས་ལུང་རབ་བཟང་རིར་བོད་བརྒྱུད་ནང་བསྟན་གྱི་མཆོད་རྟེན་འབྲིང་བ་ ༣༠༠ ལྷག་དང་། མཆོད་རྟེན་ཆེ་བ་གསུམ་ཡོད་པ་བཙན་གྱིས་གཏོར་ཏེ་རྩ་མེད་དུ་བཏང་ཡོད་པ་མ་ཟད། གནས་ཚུལ་ཕྱི་ལ་མི་ཁྱབ་པའི་ཆེད་དུ་ས་གནས་སུ་འགྲོ་བར་བཀག་སྡོམ་བྱེད་ཀྱི་ཡོད་པའི་གནས་ཚུལ་ཐོན་ཡོད་པ་རེད། ཡིན་ནའང་། དེའི་རྗེས་ཀྱི་གནས་ཚུལ་རྣམས་ཤེས་རྟོགས་མ་ཐུབ་པར་ལྷག་འདུག

ཕྱི་ལོ་ ༢༠༢༥ ཟླ་ ༡༠ ཚེས་ ༡༦ ཉིན་ནས་ཉིན་གྲངས་གསུམ་རིང་། བོད་བླ་བྲང་བཀྲ་ཤིས་འཁྱིལ་དགོན་པ་དང་ཐང་ནག སྔོན་ཆགས། གླས་དྲུག བསང་ཁོག མར་སྟེང་སོགས་སུ། རྒྱ་ནག་གཞུང་དང་རྫོང་སྲིད་གཞུང་གི་བཀའ་རེད་ཟེར་ནས་བོད་རིགས་ལས་བྱེད་གསུམ་གྱིས། དགོན་པའི་གྲྭ་ཤག་དང་། ཁྱིམ་ཚང་སོགས་ཀྱི་ནང་བཙན་གྱིས་སྔོག་བཤེར་བྱས་ཏེ། ༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་སྒྲིག་གཤོམ་བྱས་པ་ནི་ཁྲིམས་འགལ་ཡིན་ལུགས་བརྗོད་དེ་བཙན་འཕྲོག་བྱས་པའི་གནས་ཚུལ་འདི་ག་གསར་ཁང་ལ་འབྱོར་བྱུང་ཡང་། ས་གནས་སུ་བཀག་སྡོམ་ཤུགས་ཆེ་རུ་བཏང་བར་བརྟེན་མུ་མཐུད་གནས་ཚུལ་ཁ་གསལ་རྒྱུས་ལོན་བྱེད་ཁག་པོ་ཆགས།

དཔའ་ངར་ཞུམ་མེད་ཀྱིས་འཐབ་རྩོད་བྱེད་བཞིན་པའི་བོད་ཀྱི་བུད་མེད་གཉིས།

ཕྱི་ལོ་ ༢༠༢༥ ཟླ་ ༨ ཚེས་ ༡༨ ཉིན་མགོན་པོ་སྐྱིད་ལགས་ཀྱིས། རང་ཉིད་གཅུང་པོ་བོད་ཀྱི་ཆབ་སྲིད་བཙོན་པ་རྡོ་རྗེ་བཀྲ་ཤིས་ལགས་དང་ཁྲིམས་རྩོད་པར་ཐུག་འཕྲད་བྱེད་དུ་འཇུག་དགོས་པའི་འབོད་སྐུལ་ལས་འགུལ་སྤེལ་སྐབས། རྒྱ་གཞུང་ཉེན་རྟོག་པས་ཁོང་མོ་བཙན་གྱིས་གཡག་མགྲོན་ཁང་དུ་བཅུག་སྟེ་ཕྱི་རུ་ཐོན་བཅུག་མེད་པས། ཨ་ཆད་འུ་ཐུག་གིས་གཡག་མགྲོན་ཁང་གི་ཐོག་རྩེག་གཉིས་པ་ནས་མཆོངས་ཏེ་རང་སྲོག་གཅོད་རྩིས་བྱས་ཡོད་པར་བརྟེན། པུས་མོ་དང་སྐེད་པ་སོགས་ལ་རྨས་སྐྱོན་ཆེན་པོ་ཕོག་ཡོད་ནའང་དུས་ཐོག་ཏུ་སྨན་བཅོས་བྱེད་དུ་བཅུག་མེད་སྟབས། ད་ལྟའང་སྒོ་ཕྱི་ཁྱིམ་དུ་འགྲོ་བར་དཀའ་ངལ་འཕྲད་བཞིན་ཡོད་པས་མུ་མཐུད་རང་ཁྱིམ་དུ་སྨན་བཅོས་བྱེད་བཞིན་ཡོད་པ་རེད། མགོན་པོ་སྐྱིད་ལགས་ཀྱིས་སྔ་གཞུག་ཏུ་ཐེངས་བཅུ་གྲངས་ཤིག་ལ་ལྷ་ས་གྲོང་ཁྱེར་ཉེན་རྟོག་ཁང་དང་འབྲེལ་ཡོད་ཁྲིམས་ཁང་སོགས་ཀྱི་མདུན་དུ་རྡོ་རྗེ་བཀྲ་ཤིས་ལགས་ལ་དྲང་བདེན་མིན་པའི་བཙོན་འཇུག་ཁྲིམས་ཐག་ལོ་ ༡༠ བཅད་པ་དེར་བསྐྱར་དུ་ཁྲིམས་བཤེར་དགོས་པའི་རེ་འབོད་ལས་འགུལ་སྤེལ་ཡོད་པ་དང་། ཁོང་མོ་ཐེངས་མང་ཉེན་རྟོག་པས་བཙན་འཁྲིད་བཀག་ཉར་དང་གཅར་རྡུང་སྡིགས་ར་བསྐུལ་ཏེ་ཕ་ཡུལ་དུ་བཙན་སྐྱེལ་བྱས་པ་སོགས་ཀྱི་གནས་ཚུལ་བྱུང་ཡོད་ཀྱང་རེ་འབོད་ལས་འགུལ་མཚམས་བཞག་མེད་པ་རེད། ཕྱི་ཟླ་ ༡༢ ཚེས་ ༩ ཉིན་བོད་ཁྲི་ཀ་རྫོང་མི་མང་ཁྲིམས་ཁང་ཟེར་བས། བུད་མེད་ཡུལ་སྐོར་སྣེ་ཤན་པ་ཚེ་རིང་མཚོ་ལགས་ལ་སྤྱི་ཚོགས་འཁྲུག་རྐྱེན་བསླངས་བའི་ཉེས་མིང་གཡོགས་ཏེ་ལོ་གཅིག་གི་བཙོན་འཇུག་ཁྲིམས་ཐག་བཅད་ཡོད་པ་དང་།  ཁྲིམས་ཆད་དེ་ཕྱི་ལོ་ ༢༠༢༥ ཟླ་ ༡༢ ཚེས་ ༩ ནས་བརྩིས་པའི་ལོ་གཉིས་ཀྱི་རྗེས་ནས་དངོས་སུ་ལག་བསྟར་བྱ་རྒྱུ་ཡིན་པའི་བཅད་ཁྲ་བཏང་སྟེ་བཟང་བཙོན་དུ་བཞག་ཡོད་པར་བརྟེན། ཚེ་རིང་མཚོ་ལགས་ཀྱིས་མཚོ་ལྷོ་ཁུལ་འབྲིང་རིམ་མི་མང་ཁྲིམས་ཁང་ལ་དྲང་བདེན་མིན་པའི་ཁྲིམས་ཆད་དེར་བསྐྱར་དུ་ཁྲིམས་བཤེར་དགོས་པའི་ཞུ་གཏུག་ཡིག་ཆ་ཚང་མ་སྤྲད་ཟིན་ཡོད་ཀྱང་ཚུལ་བཞིན་ལག་བསྟར་མ་བྱས་པའི་དཀའ་ངལ་འཕྲད་བཞིན་ཡོད་འདུག བཟང་བཙོན་གྱི་དུས་ཡུན་ལོ་གཉིས་རིང་གོང་རིམ་གྱི་ཆོག་མཆན་མེད་པར་ཡར་མར་འགྲོ་མི་ཆོག་པ་དང་། མི་ལ་འབྲེལ་འདྲིས་མི་ཆོག་པ། ས་གནས་གཞན་དུ་སྨན་པར་བསྟེན་གཏུག་བྱེད་དུ་འགྲོ་མི་ཆོག་པ། གོང་རིམ་གྱི་དུས་བཅད་ལྟར་ཆབ་སྲིད་སློབ་གསོའི་བྱེད་སྒོར་མཉམ་ཞུགས་དགོས་པ་སོགས་ཀྱི་བཀའ་རྒྱ་བསྒྲགས། ད་ལྟ་རང་ལོ་ ༤༡ ཙམ་ཡིན་པའི་ཚེ་རིང་མཚོ་ལགས་ཀྱིས་ཞེད་སྣང་གང་ཡང་མེད་པར་ཕྱི་ལོ་ ༢༠༡༥ ཙམ་ནས་བཟུང་རྒྱ་ནག་ཉེན་རྟོག་པ་དང་ལས་བྱེད་པས་ཁྲིམས་མེད་ལུགས་མེད་ཀྱིས་བོད་མི་རྣམས་ལ་དབྱེ་འབྱེད་དང་། དམིགས་བསལ་དམ་དྲག་བཙན་གནོན་བྱེད་བཞིན་པའི་གནད་དོན་མང་པོ་ཐེར་འདོན་བྱས་པར་བརྟེན། ཐེངས་ ༥ ལྷག་ལ་ཉེས་མིང་སྣ་ཚོགས་གཡོགས་ཏེ་འཛིན་བཟུང་བཀག་ཉར་བྱས།

ཆོས་ལུགས་མི་སྣ་བེད་སྤྱད་དེ་ཆབ་སྲིད་ནག་པོའི་འཁྲབ་སྟོན་བྱས།

འདི་ལོའི་ཕྱི་ཟླ་ ༡༠ ཚེས་ ༩ ནས་ ༡༢ བར་ཉིན་གྲངས་བཞིའི་རིང་འཛམ་གླིང་ཞི་བདེ་དང་མེས་རྒྱལ་དར་ཞིང་རྒྱས་པ་ཟེར་བ་སོགས་ཀྱི་ཆེད་དུ། རྒྱ་ནག་གཞུང་གིས་པཎ་ཆེན་ཡང་སྲིད་དུ་ངོས་འཛིན་བྱས་པའི་རྒྱལ་མཚན་ནོར་བུ་ལགས་ཀྱིས་བཀྲ་ཤིས་ལྷུན་དགོན་དུ་དུས་འཁོར་དབང་ཆེན་ཐེངས་གཉིས་པ་དེ་གནང་དུ་བཅུག་ཡོད་པ་དང་། དེ་བཞིན་ཆབ་མདོ་དང་ནག་ཆུ། གམ་པ་རྫོང་། དིང་རི་རྫོང་། པ་སྣམ་རྫོང་། བཞད་མཐོང་སྨོན་རྫོང་། རྣམ་གླིང་རྫོང་། བསམ་གྲུབ་རྩེ་སོགས་སུ་ཕྱིན་ཡོད་པ་དང་། ཕྱི་ལོ་ ༢༠༢༤ ལོར་བོད་མཚོ་སྔོན་ཞིང་ཆེན་མགོ་ལོག་ཁུལ་སོགས་ཀྱི་ནང་རྒྱལ་མཚན་ནོར་བུ་ལགས་ཀྱིས་སྐོར་སྐྱོད་བྱས་ཏེ། ཞི་ཅིན་ཕིང་གི་སྣེ་འཁྲིད་འོག་རྒྱ་ནག་དམར་ཕྱོགས་གཞུང་གི་སྲིད་ཇུས་བཟང་བ་དང་བོད་ལ་བཀའ་དྲིན་ཆེ་བ། ཁྲིམས་སྲུང་རྒྱལ་གཅེས་ཀྱི་བསམ་བློ་སྤེལ་དགོས་པ། བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་བའི་ལས་དོན་གལ་ཆེ་བ་སོགས་མི་མང་ནང་གཏམ་བཤད་གནང་ཡོད་པ་རེད། འདི་ལོར་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་གོང་དུ་སྤེལ་བ་ཟེར་བའི་ཆབ་སྲིད་དྲིལ་བསྒྲགས་འོག་བོད་ཁུལ་གྱི་དགོན་པ་དང་སློབ་གྲྭ། ཞིང་འབྲོག་མང་ཚོགས་ནང་ཚོགས་འདུ་དང་ཟབ་སྦྱོང་ལྟ་བུ་མང་དུ་སྤེལ་སོང་ལ། ལྷག་པར་དུ་བོད་ཁུལ་གྱི་དགོན་སྡེ་ཁག་གི་འདུ་ཤེས་གསུམ་གྱི་སློབ་གསོ་སྐུལ་འདེད་གཏོང་བ་ཟེར་བའི་བྱ་འགུལ་ཚ་ཚ་འུར་འུར་གྱིས་སྤེལ་ཡོད་པ་དང་། དེའི་ཁྲོད་དགོན་པའི་ལས་དོན་བརྟག་ཞིབ་རུ་ཁག་བོད་ཁུལ་གྱི་དགོན་པ་ཁག་ཏུ་ཕྱིན་ཏེ། རྒྱལ་གཅེས་ཆོས་གཅེས་ཀྱི་བསམ་བློའི་གནས་ཚད་ཞན་དྲག་པར་སྐྱོན་བརྗོད་ཚ་ནན་དང་། གནས་ཚད་ཡག་པོར་སོན་པ་ཚོར་གཟེངས་བསྟོད་བྱས། ད་དུང་སདགོན་སྡེ་ཁག་གི་ལས་སྣེ་དང་དགེ་འདུན་པ་རྣམས་རུ་ཁག་མང་པོར་བགོས་ཏེ་རྒྱ་ནག་པེ་ཅིན་སོགས་སུ་ལྟ་སྐོར་དུ་འཁྲིད་དེ། མེས་རྒྱལ་གྱི་རླབས་ཆེན་དར་རྒྱས་ཉམས་སུ་མྱོང་བ་དང་། ཁྲིམས་སྲུང་དམ་གཙང་གི་ཆོས་ལུགས་མི་སྣ་གསོ་སྐྱོང་གི་གལ་ཆེའི་ནུས་པ་བཏོན་ཡོད་སྐོར་བསྒྲགས་ཡོད་པ་རེད།

འབྱུང་བཞིའི་གོད་ཆག་དང་སྐྱིད་སྡུག་མཉམ་མྱོང་།

ཕྱི་ལོ་ ༢༠༢༥ ཟླ་ ༡ ཚེས་ ༧ ཉིན་གྱི་ཞོགས་པར་བོད་དིང་རི་རྫོང་དང་། ངམ་རིང་རྫོང་། ལྷ་རྩེ་རྫོང་། ས་སྐྱ་རྫོང་སོགས་ཀྱི་ཁོངས་སུ་ས་ཡོམ་ཤུགས་ཚད་ ༧ ཙམ་ཞིག་བརྒྱབ་ནས་མི་རྒྱུ་གཉིས་ལ་གནོད་འཚེ་ཚབས་ཆེན་བྱུང་སྟབས། རང་དབང་ལྡན་པའི་བརྒྱུད་ལམ་ཁག་ཏུ་སྐབས་དེར་མི་གྲངས་ ༤༠༠ ལྷག་རྐྱེན་འདས་སུ་ཕྱིན་ཡོད་སྐོར་ཐོན་ཡོད་ཀྱང་། རྒྱ་ནག་གཞུང་ཕྱོགས་ནས་མི་གྲངས་ ༡༢༦ ལྷག་རྐྱེན་འདས་དང་། མི་གྲངས་ ༣༤༠ མ་ཟིན་ཙམ་ལ་རྨས་སྐྱོན་ཕོག  སྡོད་ཁང་མང་པོར་རྡིབ་སྐྱོན་བྱུང་ཡོད་སྐོར་བབསྒྲགས་ཡོད་པ་རེད། ས་ཡོམ་གོད་ཆག་བྱུང་སྐབས་བོད་ཡུལ་ཡོངས་ནས་མི་རྒྱུ་གཉིས་ཀྱི་ཐོག་ནས་རོགས་རམ་རྒྱ་ཆེན་པོ་གནང་སྟེ་སྐྱིད་སྡུག་མཉམ་མྱོང་བྱས་ཡོད།  བཙན་བྱོལ་ནང་ནས་ཀྱང་གདུང་སེམས་མཉམ་སྐྱེད་དང་མཆོད་འབུལ་སྨོན་ལམ་ཞུས་ཡོད་པ་རེད། ཕྱི་ཟླ་དང་པོའི་ཚེས་ ༧ ཉིན། ༧གོང་ས་༧རྒྱལ་བ་རིན་པོ་ཆེ་མཆོག་ནས་ཐུགས་གསོ་དང་བསྔོ་སྨོན་གྱི་གསུང་འཕྲིན་བསྩལ་བའི་ནང་། ས་ཡོམ་ཁྲོད་རྐྱེན་འདས་དང་རྨས་སྐྱོན་ཕོག་པ། ཁང་པ་མང་པོ་གཏོར་བཤིག་བྱུང་བར་ཐུགས་ཕམ་ཆེན་པོ་བྱུང་ཞེས་དང་། རྐྱེན་འདས་སུ་སོང་བ་རྣམས་ལ་བསྔོ་སྨོན་དང་། རྨས་སྐྱོན་བྱུང་བ་རྣམས་གང་མྱུར་དྲག་སྐྱེད་ཡོང་བའི་སྨོན་འདུན་ཡོད་ཅེས་གསུངས་ཡོད་ལ། དེ་བཞིན་ཆོས་བརྒྱུད་ཁག་གི་དབུ་བླ་རྣམ་པ་དང་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག བོད་མི་མང་སྤྱི་འཐུས་ཚོགས་གཙོ་མཆོག གཞན་ཡང་། ཨ་རི་དང་རྒྱ་གར། ཐའེ་ཝན་སོགས་ཀྱི་གཞུང་ནས་ཀྱང་གདུང་སེམས་མཉམ་སྐྱེད་གནང་། འདི་ལོའི་ཕྱི་ཟླ་ ༥ པའི་ནང་དིང་རི་རྫོང་གི་ས་ཡོམ་སླར་གསོ་བསྐྱར་སྐྲུན་གཞུང་ལས་ཁང་ཟེར་བ་བཙུགས་ཏེ། མང་ཚོགས་ཀྱི་སྡོད་ཁང་འཛུགས་སྐྲུན་ནང་གཅིག་གྱུར་འཆར་འགོད་དང་ཉམས་བཟོ་བརྟན་གཏོང་ཟེར་བ་གཙོ་འདོན་བྱས་ཏེ། རྫོང་ཁག་ ༧ གྱི་གྲོང་གསེབ་ ༤༨༦ ནང་སྡོད་ཁང་ ༢༢༠༠༠ གསར་སྐྲུན་དང་། སྡོད་ཁང་ ༡༠༥༠༠ ལ་ཉམས་གསོ་བྱས་ཟིན་ཏེ་མི་མང་སྤྲད་ཡོད་སྐོར་དང་། བསྡོམས་པའི་སྡོད་ཁང་ ༣༢༥༠༠ བསྐྱར་སྐྲུན་བྱས་དང་བྱེད་བཞིན་ཡོད་སྐོར་བསྒྲགས་ཡོད་པ་རེད། ཡིན་ནའང་། ས་གནས་མི་མང་གིས་མགྱོགས་མྱུར་དུས་ཐུང་ནང་བཟོས་པའི་སྡོད་ཁང་རྣམས་སྤུས་ཚད་ཞན་པ་དང་། རུབ་སྡོད་བྱས་ཏེ་སྔོན་གྱི་ས་ཆ་རྣམས་ཤོར་བ་སོགས་ཀྱིས་མང་ཚོགས་ལ་དཀའ་ངལ་འཕྲད་ཀྱི་ཡོད་འདུག ཕྱི་ཟླ་ ༡༢ པའི་ཟླ་མཇུག་ཏུ་རྒྱལ་མཚན་ནོར་བུ་ལགས་དིང་རིར་ཕྱིན་ཏེ་ཏང་བཀའ་དྲིན་ཆེན་པོ་ཡིན་ལ། བློ་བརྟན་འགྱུར་མེད་ཀྱིས་ཏང་གི་ཁ་ལ་ཉན་ཞིང་ཏང་གི་རྗེས་སུ་འབྲང་དགོས་སྐོར་བཤད་ཡོད་པ་རེད།

  བོད་མཐོ་སྒང་གི་ཉི་གློག་ཤེལ་ལེབ་དང་འབྲོག་པའི་སེམས་ངལ།

རྒྱ་ནག་ནི་འཛམ་གླིང་གི་ཉི་འོད་གློག་ནུས་བེད་སྤྱོད་བྱེད་མཁན་ཤུགས་ཆེ་ཤོས་ཨང་དང་པོར་རྩི་བཞིན་ཡོད་ལ། འདས་པའི་ལོ་ཤས་ནང་རྒྱ་ནག་གཞུང་གིས་བོད་ཁུལ་གྱི་རི་ལུང་ཐང་གསུམ་དུ་ཉི་གློག་ཤེལ་ལེབ་ཀྱི་ལྟེ་གནས་མང་པོ་གསར་འཛུགས་བྱས་རྐྱེན་འབྲོག་མང་ལ་སེམས་འཚབ་གསར་པ་ཞིག་བཟོས་འདུག ཕྱི་ལོ་ ༢༠༢༥ ལོར་རྒྱ་ནག་གཞུང་གིས་བོད་ཉག་ཆུ་རྫོང་ཁོག་ལ་གྲོང་བརྡལ་དུ་ཝ་ཌི་(ωαττ) ཁྲི་ ༡༠༠ ལྷག་ཟིན་པའི་འཛམ་གླིང་གི་ཉི་གློག་ཤེལ་ལེབ་ཀྱི་ས་ཚིགས་ཆེ་ཤོས་ཡིན་ཟེར་བ་ཞིག་གསར་འཛུགས་བྱས་ཡོད་པ་རེད། འདི་ག་གསར་ཁང་ནས་ཤེས་རྟོགས་བྱུང་བ་ལྟར་ན། བོད་རྔ་བ་ཁུལ་ཁྱུང་མཆུ་རྫོང་དང་། ལྷོ་ཁ། སྙེ་མ་རྫོང་། ལྷ་ས་གྲོང་ཁྱེར་མལ་གྲོ་གོང་དཀར། མཚོ་སྔོན་ན་གོར་མོ་སོགས་སུ་ས་གནས་འབྲོག་མང་ལ་གུན་གསབ་དངུལ་ཙམ་སྤྲད་དེ་ཉི་གློག་ཤེལ་ལེབ་ཀྱི་ལྟེ་གནས་རྒྱ་ཆེན་པོ་བཙུགས་དང་འཛུགས་བཞིན་པ་རེད་འདུག བོད་ནང་གི་ལྷ་གཡག་ཚོང་རྟགས་ཀྱི་སྦྱིན་བདག་ཁེ་ལས་བ་མི་འགྱུར་རྡོ་རྗེ་ལགས་ཀྱིས་བོད་ཀྱི་འབྲོག་པ་དང་རྩྭ་ཐང་སྲུང་སྐྱོབ་སྐོར་ལ་སྐར་མ་བཅུ་དྲུག་ལྷག་ཅན་གྱི་བརྙན་ཐུང་ཞིག་ཡོངས་ཁྱབ་ཏུ་སྤེལ་བའི་ནང་།  དེང་སང་བོད་ནང་གི་འབྲོག་པའི་ས་ཐོག་ཏུ་ཉི་གློག་འདི་གསར་རྒྱག་བྱེད་ཀྱིན་ཡོད་པ་རེད། རྒྱ་ནག་གཞུང་གིས་ཉི་གློག་དེ་ནུས་ཤུགས་གསར་པའི་ཁོངས་ཀྱི་ཚོང་ལས་གལ་ཆེན་ཞིག་ཏུ་ངོས་འཛིན་བྱེད་ཀྱིན་ཡོད་ལ། བོད་ནང་གི་རོང་འབྲོག་གི་ས་ཁུལ་མང་པོ་ཞིག་ཏུ་ཚོང་ལས་ཀྱི་ངོ་བོའི་ཐོག་ནས་ཉི་གློག་གསར་རྒྱག་བྱེད་མུས་ཡིན་པའི་ཁར། དེང་སྐབས་བོད་ནང་གི་ས་གནས་མང་ཆེ་བ་དང་ལྷག་པར་དུ་འབྲོག་པའི་རྩྭ་ཐང་སྟེང་ཉི་གློག་ས་ཚིགས་མང་པོ་ཞིག་གསར་རྒྱག་བྱེད་མུས་ཡིན་པ་རེད། ཅེས་དང་། བོད་ནང་གི་རོང་འབྲོག་མང་ཚོགས་དང་ལྷག་པར་དུ་འབྲོག་པ་ཚོ་ནི་མི་རབས་ནས་མི་རབས་བར་རྩྭ་ཐང་ཁོ་ན་ལ་བརྟེན་ཡོད་པས། འབྲོག་པའི་རིག་གནས་དང་འཚོ་བ་སྐྱེལ་སྟངས་མང་པོ་ཞིག་ཀྱང་རྩྭ་ཐང་གི་སྟེང་ནས་གྲུབ་ཡོང་བ་ཞིག་རེད། འབྲོག་པ་ཚོ་རྩྭ་ཐང་དང་བྲལ་ཚེ་བོད་པའི་ཡུལ་སྲོལ་གོམས་གཤིས་དང་འཚོ་གནས་ལས་ཁ་བྲལ་དུ་བཏང་བ་ཡིན། ཞེས་བརྗོད་འདུག་ལ། ནེའུ་ཡོག་དུས་བབ་ཀྱིས་རྒྱ་ནག་གཞུང་གིས་འཛམ་གླིང་གི་ཡང་རྩེ་བོད་མཐོ་སྒང་དུ་རྨི་གྲུ་བཞི་མ་ ༡༦༢ (Σθυαρε Μιλεσ) ལྷག་གི་སར་ཉི་གློག་ཤེལ་ལེབ་འཛུགས་དོན་ག་རེ་ཡིན་ནམ་ཞེས་པའི་དཔྱད་རྩོམ་ཞིག་སྤེལ་བའི་ནང་དུ། བོད་མཐོ་སྒང་གི་མཐོ་ཚད་ཕི་ཊི་ ༡༠,༠༠༠ ལྷག་ཙམ་གྱི་སར་ཉི་གློག་ཤེལ་ལེབ་ཀྱིས་མཐོང་ཚད་དུ་བཀབ་སྟེ། ནེའུ་ཡོག་གྲོང་ཁྱེར་གྱི་ལྟེ་བ་མན་ཧ་ཊོན་གྱི་རྒྱ་ཁྱོན་ལས་ལྡབ་བདུན་ཆེ་བ་ཡོད། དེ་དག་གིས་མཚོ་ངོས་ལས་ཉི་འོད་ཆེས་བཀྲག་མདངས་ལྡན་པ་འཇིབ་ལེན་བྱེད་ཀྱི་ཡོད། དེ་ནི་མཁའ་དབུགས་ཤིན་ཏུ་སྲབ་པས་རེད། ཅེས་བྲིས་འདུག

བོད་ཁུལ་གྱི་མཐོ་རིམ་དཔོན་རིགས་གོ་གནས་ནས་ཟགས་པ།

ཕྱི་ལོ་ ༢༠༢༥ ལོར་བོད་ཁུལ་གྱི་མཐོ་རིམ་དཔོན་རིགས་ཉུང་མཐར་ ༩ ཞིབ་བཤེར་དང་ཁྲིམས་ཐག་བཅད། ཕྱི་ལོ་ ༢༠༢༥ ཟླ་ ༧ ཚེས་ ༢༢ ཉིན་རྒྱ་ནག་དམར་ཤོག་དབུས་སྒྲིག་ཁྲིམས་ཞིབ་བཤེར་ཁང་ཟེར་བས། བོད་རང་སྐྱོང་ལྗོངས་སྲིད་གཞུང་ཟེར་བའི་མགོ་ཁྲིད་ཟུར་པ་ཆེ་དགྲ་ལྷས་ཕུགས་འདུན་འདུ་ཤེས་ཤོར་བ་དང་། ཐོག་མའི་དམ་བཅའ་དང་འགན་འཁྲི་ལ་རྒྱབ་འགལ། ཁྱོན་ཡོངས་ནས་ཏང་ནན་གྱིས་སྐྱོང་བའི་འགན་འཁྲི་གཙོ་བོ་ལག་བསྟར་ཡག་པོ་མ་ཐུབ་པ་དང་། ལྐོག་རྔན་འབོར་ཆེན་བླངས་བའི་དོགས་གཞིའི་འོག་ཞིབ་བཤེར་བྱེད་ཀྱི་ཡོད་པའི་གནས་ཚུལ་ཐོན།  ཕྱི་ཟླ་ ༧ ཚེས་ ༡༦ ཉིན་པེ་ཅིང་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས། བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཟུར་པ་ཝུའུ་ཡེན་ཅེ་ (Ωυ Ψινγϕιε) ཡིས་རྒྱ་སྒོར་ས་ཡ་ ༣༤༣ ལྷག་གི་ལྐོག་རྔན་བླངས་བའི་ནག་ཉེས་འོག་ལོ་གཉིས་ཕར་འགྱངས་ཀྱི་སྲོག་ཁྲིམས་བཅད་པ་ཕྱིར་བསྒྲགས་བྱས། ཕྱི་ལོ་ ༢༠༢༥ ཟླ་ ༡༠ ཚེས་ ༢༢ ཉིན་བདེ་ཆེན་བོད་རིགས་རང་སྐྱོང་ཁུལ་གྱི་འཐབ་ཕྱོགས་གཅིག་གྱུར་ཁང་གི་མགོ་ཁྲིད་ཟུར་བ་སྐལ་བཟང་རྣམ་རྒྱལ་དང་། ཕྱི་ཟླ་ ༡༠ ནང་མཚོ་སྔོན་ཞིང་ཆེན་ནགས་ལས་དང་རྩྭ་ཐང་ཚན་པའི་ལས་མི་དང་འགན་འཛིན་གཞོན་པ་ཟུར་པ་བོད་མི་བསྟན་འཛིན།  ཕྱི་ཟླ་ ༢ ཚེས་ ༢༤ ཉིན་རྒྱ་ནག་གཞུང་གིས་ཡུན་ནན་བདེ་ཆེན་བོད་རིགས་རང་སྐྱོང་ཁུལ་གྱི་ཁུལ་དཔོན་བོད་མི་བྱང་ཆུབ་དང་། ཁུལ་དཔོན་གཞོན་པ་ཆི་ཅིན་ཤིང་ (Θι ϑιανξιν) བཅས་ཀྱིས་ཁྲིམས་འགལ་ཁེ་ཕན་བླངས་པ་དང་། རྒྱ་ནག་དམར་ཤོག་རིང་ལུགས་ལ་རྒྱབ་འགལ་དང་ཡིད་ཆེས་མེད་པ་སོགས་ཀྱི་ཉེས་མིང་འོག་གནས་དབྱུང་ཞིབ་བཤེར་བྱས། ཕྱི་ཟླ་ ༧ ཚེས་ ༨ ཉིན་བོད་རང་སྐྱོང་ལྗོངས་མི་དམངས་སྲིད་གཞུང་ཟེར་བའི་མགོ་ཁྲིད་གཞོན་པ་ཟུར་བ་ཝང་ཡུང་གིས་ལྐོག་རྔན་རྒྱ་སྒོར་དུང་ཕྱུར་ ༢ དང་བྱེ་བ་ ༧། ས་ཡ་ ༡ ལྷག་བླངས་བའི་ནག་ཉེས་བཙུགས་ཏེ་སྲོག་ཁྲིམས་བཅད་ཡོད་ཀྱང་ལོ་གཉིས་རིང་ཕྱིར་འགྱངས་བྱས། ཕྱི་ཟླ་ ༣ པའི་ནང་བོད་རང་སྐྱོང་ལྗོངས་དམངས་ཆེན་གྱི་རྒྱུན་ལས་མགོ་ཁྲིད་གཞོན་པ་ཇི་གོ་ཀང་གིས་ཁྲིམས་འགལ་ཚབས་ཆེན་བྱས་པའི་དོགས་གཞིའི་འོག་ཞིབ་བཤེར་བྱས། ཕྱི་ཟླ་ ༡༢ ཚེས་ ༢༤ ཉིན་བོད་རང་སྐྱོང་ལྗོངས་མི་མང་འཐུས་ཚོགས་ཀྱི་རྒྱུན་ལས་ཁང་གི་མགོ་ཁྲིད་གཞོན་པ་ཝང་ཅུན་ཟེར་བས་སྒྲིག་ཁྲིམས་དང་འགལ་ཚབས་ཆེན་པོ་བྱས་པའི་དོགས་གཞིའི་འོག རྒྱ་ནག་དབུས་སྒྲིག་ཁྲིམས་དང་ལྟ་ཞིབ་ལྷན་ཁང་གིས་ཞིབ་བཤེར་བྱེད་བཞིན་ཡོད་སྐོར་བསྒྲགས།

མཉམ་འབྲེལ་དམག་སྦྱོང་དང་དམག་དོན་འགྲོ་གྲོན་འཕར་ཆ།  

ཕྱི་ལོ་ ༢༠༢༥ ཟླ་ ༡༡ ཚེས་ ༡༩ ཉིན་ཡུ་རོབ་ཀྱི་ས་མཚོ་གནམ་གསུམ་གྱི་དམག་དོན་དང་འབྲེལ་བའི་ཌི་ཧྥོར་ཁུ་རོ་སི་ (ΔΕΦΧΡΟΣ) གསར་ཁང་གིས་འཁོར་སྐར་ (σατελλιτε) བརྒྱུད་ལྟ་ཞིབ་བྱེད་སྐབས། རྒྱ་ནག་གཞུང་གིས་མཚོ་ངོས་ནས་མཐོ་ཚད་རྨི་ ༡༤༡༠༠ ལྷག་ཡོད་པའི་བོད་མངའ་རིས་སེངྒེ་ཁ་འབབ་གྲོང་རྡལ་ (Σηιθυανηε) གྱི་ལྷོ་ཤར་རྒྱུད་ཀྱི་སྤྱི་ལེ་ ༡༠ ལྷག་གི་མཚམས་སུ། མི་མེད་དམག་དོན་མཁའ་གྲུ་ (υνμαννεδ αεριαλ ϖεηιχλε ) ཡི་ས་ཚིགས་ཤིག་གསར་འཛུགས་བྱས་ཡོད་པ་ཤེས་རྟོགས་བྱུང་ཡོད་པ་རེད།  རྒྱ་ནག་གཞུང་གིས་བོད་ཀྱི་རྒྱལ་ས་ལྷ་ས་དང་མཐའ་མཚམས་ཁུལ་དུ་དྲག་ཆས་ཕོན་ཆེན་དབོར་འདྲེན་བྱས་ཏེ་མཉམ་འབྲེལ་དམག་སྦྱོང་རྒྱུན་དུ་བྱེད་བཞིན་ཡོད་པ་ལྟར། ཕྱི་ལོ་ ༢༠༢༥ ཟླ་ ༤ ཚེས་ ༡༤ ཉིན་བོད་རང་སྐྱོང་ལྗོངས་དང་འཕགས་བོད་ས་མཚམས་ཁུལ་དུ་ཆེད་འཛུགས་བྱས་ཡོད་པའི་མཉམ་འབྲེལ་དམག་སྦྱོང་ཁུལ་དུ་དམག་རྩལ་དང་དྲག་པོའི་མེ་ཤུགས་འཕུར་མདེལ་འཕེན་གཏོང་། མི་མེད་འཕུར་གྲུར་གཏོར་རྒོལ་སོགས་ཀྱི་སྦྱོང་བརྡར་དང་ཚོད་ལྟ་རྒྱ་ཆེན་པོ་བྱས་ཡོད་པ་རེད།  ཕྱི་ལོ་ ༢༠༢༥ ཟླ་ ༣ ཚེས་ ༥ ཉིན་རྒྱ་ནག་སྐབས་ ༡༤ པའི་མི་དམངས་འཐུས་མིའི་ཚོགས་ཆེན་ (14τη Νατιοναλ Πεοπλε’σ Χονγρεσσ) དང་། སྲིད་གྲོས་སྐབས་བཅུ་བཞི་བའི་ཚོགས་ཆེན་ཐེངས་གསུམ་པའི་ཐོག་དམག་དོན་འགྲོ་གྲོན་ཐད་འཕར་ཆ་ཆེན་པོ་བྱས་ཡོད་པའི་ཐད་རྒྱ་ནག་གོ་ལའི་དུས་བབ་ཀྱི་གནས་ཚུལ་ནང་། ཕྱི་ལོ་ ༢༠༢༡ ལོར་རྒྱ་སྒོར་ཐེར་འབུམ་ ༡༣༥༥།༣༤༣ དང་། ཕྱི་ལོ་ ༢༠༢༢ ལོར་རྒྱ་སྒོར་ཐེར་འབུམ་ ༡༤༥༠།༤༥། ཕྱི་ལོ་ ༢༠༢༣ ལོར་རྒྱ་སྒོར་ཐེར་འབུམ་ ༡༥༥༣།༧། ཕྱི་ལོ་ ༢༠༢༤ ལོར་རྒྱ་སྒོར་ཐེར་འབུམ་ ༡༦༦༥། ༥༤། ཕྱི་ལོ་ ༢༠༢༥ ལོར་རྒྱ་སྒོར་ཐེར་འབུམ་ ༡༧༨༤།༦༦༥ གཏོང་འཆར་ཡོད་པ་བཀོད་འདུག

ལོ་རྒྱུས་མཁས་དབང་དང་སྒྱུ་རྩལ་བ་འདས་གྲོངས།

ཕྱི་ལོ་ ༢༠༢༥ ཟླ་ ༢ ཚེས་ ༡༦ ཉིན་གྱི་མཚན་མོར་བོད་ནང་གི་ལོ་རྒྱུས་མཁས་དབང་དང་སློབ་དཔོན་ཆེན་མོ་བཙན་ལྷ་ངག་དབང་ཚུལ་ཁྲིམས་ལགས་དགུང་ལོ་ ༩༦ སྟེང་སྐུ་གྲོངས་ཡོད་སྟབས། བོད་ནང་གི་རྩོམ་པ་པོ་དང་སྙན་ངག་པ། དེ་བཞིན་ཤེས་ཡོན་པ་མང་པོས་ཁོང་ལ་རྗེས་དྲན་དང་མྱ་ངན་ཞུས། མཁས་དབང་ཆེན་མོ་བཙན་ལྷ་ངག་དབང་ཚུལ་ཁྲིམས་ལགས་ནི་ཕྱི་ལོ་ ༡༩༣༠ ལོར་བོད་རྒྱལ་མོ་ཚ་བ་རོང་གི་བཙན་ལྷར་སྐྱེས་ཤིང་། ཕྱི་ལོ་ ༡༩༧༧ ལོ་ནས་ལྷོ་ནུབ་མི་རིགས་སློབ་ཆེན་དུ་ཕྱག་ལས་གནང་སྟེ་སློབ་དཔོན་ཆེན་མོའི་མཚན་གནས་ཐོབ། ཁོང་གི་བརྩམས་ཆོས་ནི་《བརྡ་དཀྲོལ་གསེར་གྱི་མེ་ལོང་།》དང་《རྒྱལ་རོང་ཞིབ་འཇུག་དཔྱད་ཡིག་ཕྱོགས་བསྒྲིགས།》 《  རྒྱལ་རོང་ཁ་སྐད་ཚིག་མཛོད》 《  ཨ་མདོའི་སྐད་དང་རྒྱལ་རོང་སྐད་དཔྱད་སྡུར་དབྱེ་ཞིབ།》 《 བཙན་ལྷ་ངག་དབང་ཚུལ་ཁྲིམས་ཀྱི་དཔྱད་རྩོམ་ཕྱོགས་བསྒྲིགས།》 《 རྒྱལ་རོང་གི་ལོ་རྒྱུས་དང་རིག་གནས།》 རྒྱ་ཡིག་སོགས་དང་། འགྱུར་ཡིག་ལ《རླངས་ཀྱི་པོ་ཏི་བསེ་རུ།》དང《བཀའ་ཆེམས་དེབ་ཐེར།》 《 བོད་ཀྱི་ལོ་རྒྱུས་ཀུན་དགའ་མེ་ལོང་།》སོགས་དང་། གནའ་དཔེ་དཔེ་སྒྲིག་སྐོར་ལ《གེ་སར་སྒྲུང་བཤད་པ་རྣམ་བདུན》དང《གེ་སར་སྒྲུང་ཟངས་མདོག་དཔལ་རི།》 《 ཇོ་ནང་ཆོས་འབྱུང་།》 《 ཇོ་ནང་ཆོས་འབྱུང་གི་ལྷན་ཐབས།》སོགས་བོད་ཁམས་སུ་སྙན་གྲགས་ཆེན་པོ་རྒྱས་ཡོད་པ་རེད། ཕྱི་ལོ་ ༢༠༢༥ ཟླ་ ༢ ཚེས་ ༡༠ ཉིན་གྱི་སྔ་དྲོར་བོད་ཀྱི་གླུ་བ་གྲགས་ཅན་ལུ་གུ་རྒྱལ་ལགས་ནད་གཞིའི་རྐྱེན་གྱིས་འདས་གྲོངས་སུ་གྱུར་ཡོད་ཅིང་།  ཁོང་ནི་རྒྱ་ནག་རྒྱལ་ཡོངས་ཀྱི་རིམ་པ་དང་པོའི་འཁྲབ་སྟོན་པ་དང་རྒྱ་ནག་རྒྱལ་ཡོངས་ཀྱི་རིག་གནས་སྒྱུ་རྩལ་རིག་རྩལ་ལྷན་ཚོགས་ཀྱི་རིམ་པ་དང་པོའི་སྒྱུ་རྩལ་པ་སོགས་ཡིན་ལ། བོད་ཡུལ་དུ་དམངས་ཁྲོད་གླུ་གཞས་ཀྱི་ཐད་ནས་སྙན་གྲགས་ཆེན་པོ་ཡོད་པ་རེད།

འབར་རྫས་ཀྱིས་ཁོར་ཡུག་གཏོར་སྐྱོན་དང་མི་མང་གི་སེམས་འཚབ།

འདི་ལོའི་ཕྱི་ཟླ་ ༩ ཚེས་ ༡༩ ཉིན་གྱི་ཕྱི་དྲོར་བོད་རྒྱལ་རྩེ་རྫོང་ར་ལུང་གྲོང་སྡེའི་རི་ངོས་ཤིག་ཏུ། སྒྱུ་རྩལ་དང་རང་བྱུང་ཁོར་ཡུག་གི་དུས་སྟོན་ཟེར་བའི་མིང་འོག་ནས་རྒྱ་རིགས་སྒྱུ་རྩལ་བ་ཚའེ་གོ་ཆང་ (Χαι Γυο−θιανγ) ཟེར་བ་ཞིག་དང་། རྒྱ་ནག་གི་གྱོན་ཆས་བཟོ་ཚོང་ཁང་ (Αρχ’τερψξ)གཉིས་མཉམ་འབྲེལ་གྱིས་འབྲུག་དབྱིབས་སུ་ཚོན་མདངས་སྣ་ལྔའི་ཤོག་སྦག་ཕོན་ཆེན་སྤར་ཏེ་ཁོར་ཡུག་དང་རི་སྐྱེས་སྲོག་ཆགས་ལ་གནོད་སྐྱོན་ཚབས་ཆེན་བཏང་བ་དང་། ཤོག་སྦག་གི་སྙིགས་རོ་རྣམས་གང་སར་གཡུགས་ནས་བཞག་པར་བརྟེན། ས་གནས་བོད་མི་དང་སྤྱི་ཚོགས་དྲ་ལམ་ནས་སྐྱོན་བརྗོད་ཤུགས་ཆེན་བྱས། ཕྱིས་སུ་རྒྱ་ནག་གཞུང་གིས་བྱ་སྤྱོད་དེ་ནི་ཁོར་ཡུག་སྲུང་སྐྱོབ་ཀྱི་བཅའ་ཁྲིམས་དང་འགལ་ཡོད་པ་བརྗོད་དེ། རྒྱ་རིགས་སྒྱུ་རྩལ་བ་དང་གྱོན་ཆས་བཟོ་ཚོང་ཁང་གཉིས་ལ་ཉེས་ཆད་དང་། འབྲེལ་ཡོད་མགོ་འཁྲིད་ཁག་ཅིག་ལས་གནས་ནས་གནས་དབྱུང་བཏང་བའི་གནས་ཚུལ་བསྒྲགས། དེ་བཞིན་ཕྱི་ཟླ་ ༡༠ ཚེས་ ༡༣ ཉིན་བོད་མཚོ་སྔོན་མང་ར་རྫོང་མགོ་མང་གྲོང་རྡལ་གྱི་འབྲོག་སར་གློ་བུར་དུ་མེ་ཤུགས་འཕུར་མདའི་ལྷུ་ལག་ཅིག་ལྷུང་སྟེ་འབར་གས་ཆེན་པོ་བྱུང་ཡོད་སྟབས། ས་གནས་མང་ཚོགས་ཀྱིས་སེམས་འཚབ་ཆེན་པོས་བརྙན་པར་མང་པོ་བླངས་བ་དྲ་ལམ་དུ་ཁྱབ་ཡོད། རྒྱ་ནག་གཞུང་ཕྱོགས་ནས་དེ་ལ་གསལ་ཁ་གང་ཡང་བཟོས་མེད་ཀྱང་། ཟི་ལིང་གྲོང་ཁྱེར་དུ་ཡོད་པའི་རྒྱ་ནག་གི་ཇོ་ཆན་( ϑιυθυαν)འཁོར་སྐར་ལྟེ་གནས་ཁང་གིས་མེ་ཤུགས་འཕུར་མདེལ་བརྒྱུད་ (Σηιψαν−31) ཞེས་པ་ཚོད་ལྟ་བྱས་ཡོད་པ་དང་། འཕུར་མདལ་ལྷུ་ལག་དེ་ཚོད་ལྟ་དེ་ལས་བྱུང་བའི་གནས་ཚུལ་ཐོན།

གསར་འགོད་པ་དཔལ་ལྡན་གྱིས་ཕྱོགས་སྒྲིག་བྱས།