ཧི་མ་ལ་ཡའི་མཛངས་མ་འགྲན་བསྡུར་གོ་སྒྲིག་བྱ་རྒྱུ་ཡིན་ཟེར།

བློ་བཟང་དབང་རྒྱལ་ལགས་ཀྱིས་ད་ལོར་བོད་ཀྱི་མཛངས་མ་འགྲན་བསྡུར་ཕྱིར་འཐེན་བྱས་ཡོད་ཀྱང་། ད་ལོའི་ཕྱི་ཟླ་ ༡༠ པའི་ནང་ཧི་མ་ལ་ཡའི་མཛངས་མའི་འགྲན་བསྡུར་ཟེར་བ་ཞིག་ངྷ་སར་གོ་སྒྲིོག་ཞུ་རྒྱུ་ཡིན་ཚུལ་བརྗོད་ཡོད།

བཙན་བྱོལ་སྤྱི་ཚོགས་ཁྲོད་ཀྱི་ན་གཞོན་ཚོས་དོ་སྣང་ཆེ་ཤོས་དང་། ལོ་ལྟར་སྤྱི་ཚོགས་ནང་ཡག་སྡུག་གི་གླེང་སློང་མང་ཤོས་ཀྱི་གསར་འགྱུར་ཞིག་ནི། ངྷ་རམ་ས་ལའི་པར་པ་བློ་བཟང་དབང་རྒྱལ་ལགས་ཀྱིས་གོ་སྒྲིག་བྱེད་བཞིན་པའི་བོད་ཀྱི་མཛངས་མ་འགྲན་བསྡུར་དེ་རེད། དེ་ནི་ ༢༠༠༡ ལོར་མགོ་འཛུགས་གནང་ཡོད་ཅིང་། མཚམས་རེར་བུ་མོ་གཅིག་རེ་ལས་འཛུལ་ཞུགས་བྱེད་མཁན་མ་བྱུང་སྟབས། འགྲན་ཡ་མེད་པར་མཛངས་མའི་དབུ་རྒྱན་ཐོབ་པའི་གནས་ཚུལ་ཡང་བྱུང་ཡོད། ད་ལོར་བོད་ཀྱི་མཛངས་མ་འགྲན་བསྡུར་དེ་མཚམས་ཆད་ཡོད་ཅིང་། དེའི་སྐོར་ལ་སྤྱི་ཚོགས་ནང་གླེང་སློང་སྣ་ཚོགས་ཤིག་ཡོང་གི་ཡོད། མི་འགའ་རེས་བློ་བཟང་དབང་རྒྱལ་གྱི་ལས་འགུལ་དེའི་ནང་ད་ལོར་འཛུལ་བཞུགས་བྱེད་མཁན་བུ་མོ་གཅིག་ཀྱང་མ་བྱུང་བ་རེད་ཟེར་ལ། བློ་བཟང་དབང་རྒྱལ་ཁོ་རང་གིས་ད་ལོ་བོད་ནང་གི་མེར་བསྲེགས་ལས་འགུལ་ཛ་དྲག་ཡིན་སྟབས་ཕྱིར་འཐེན་བྱས་ཚུལ་བཤད་ཡོད། གང་ལྟར། བློ་བཟང་དབང་རྒྱལ་ལགས་ཀྱིས་ད་ལོར་བོད་ཀྱི་མཛངས་མ་འགྲན་བསྡུར་མཚམས་འཇོག་དང་འབྲེལ་༼ ཧི་མ་ལ་ཡའི་མཛངས་མ་འགྲན་བསྡུར༽ཞེས་པ་ཞིག་གསར་འཛུགས་ཀྱི་གསལ་བསྒྲགས་བསྐྱངས་ཡོད།   

ཕྱི་ཚེས་ ༥ ཉིན་འདི་གའི་གསར་འགོད་པས་བློ་བཟང་དབང་རྒྱལ་ལགས་སུ་བཅར་འདྲི་ཞུས་སྐབས། ད་ལོའི་ཕྱི་ཟླ་ ༡༠ པའི་ཚེས་  ༡༡ ནས་ ༡༣ ཉིན་བར་བཞུཊ་སྒར་ངྷ་རམ་ས་ལར་ཧི་མ་ལ་ཡའི་ཞི་བདེ་དང་ཁོར་ཡུག་སྲུང་སྐྱོབ་བྱ་རྒྱུར་དམིགས་ཏེ། ཧི་མ་ལའི་མཛངས་མ་ (Miss Himalaya) ཞེས་པའི་མཛངས་མ་འགྲན་བསྡུར་གྱི་མཛད་སྒོ་ཞིག་བསྡུ་འཆར་ཡོད་འདུག་ལ། ཐེངས་འདིའི་མཛངས་མ་འགྲན་བསྡུར་སྟེང་ ༢༠༡༡ ལོར་མཛེས་མའི་དབུ་རྒྱན་ཐོབ་པའི་བོད་པ་དང་བལ་ཡུལ། འབྲུག འབྲས་ལྗོངས་བཅས་ཀྱི་མཛངས་མ་གཙོས་རྒྱ་གར་གྱི་ལ་དྭགས་དང་སྦི་ཏི། ཁུ་ནུ། ཀཱར་ཤཱ། མཱ་ཎ་ལི། སིམ་ལ། སྒང་ཏོག་བཅས་ཀྱི་བུ་མོ་ཁག་ཅིག་དང་བལ་ཡུལ་གྱི་ཤར་པ་དང་རྟ་མང་། ནེ་ཝ་རི། རོང་པའི་བུ་མོ་སོགས་ཁྱོན་བུ་མོ་བཅུ་གྲངས་ཤིག་དངོས་གཞིའི་འགྲན་བསྡུར་ནང་འཛུལ་ཞུཊ་བྱ་རྒྱུ་ཡིན་ཚུལ་སོགས་བརྗོད་བྱུང་།

ཡང་བློ་བཟང་དབང་རྒྱལ་ལགས་ཀྱིས་ཧི་མ་ལ་ཡའི་མཛངས་མ་ཞེས་པའི་ཁ་བྱང་(WWW.MissHimalaya.Com ) འདི་ ༢༠༡༠ ལོར་གསར་དུ་དེབ་སྐྱེལ་བྱས་ཡོད་པ་དང་། ཐེངས་འདིའི་མཛངས་མ་འགྲན་བསྡུར་དེ་ནི་ཧི་མ་ལ་ཡའི་ཞི་བདེ་དང་ཁོར་ཡུག་སྲུང་སྐྱོབ་ཁོ་ནར་དམིཊ་པ་ཞིག་ཡིན་སྟབས། ཧི་མ་ལ་ཡ་རི་རྒྱུད་ཀྱི་ལ་དྭགས་ནས་མོན་བར་གྱི་བུ་མོ་ག་ཚོད་ཞུགས་ཀྱང་འགྲིག་གི་ཡོད་ནའང་བོད་པའི་སྐུ་ཚབ་གཉིས་ལས་ཞུགས་ཆོག་སྐོར་བརྗོད་སོང་ལ། དེ་སྔ་བོད་ཀྱི་མཛངས་མ་འགྲན་བསྡུར་སྐབས་གོ་སྒྲིག་པས་འགྲན་ཞུགས་བུ་མོ་ཚོར་བོད་ཀྱི་ཆོས་དང་རིག་གཞུང་། སྐད་ཡིག ཆབ་སྲིད། ཁོར་ཡུག སྤྱི་ཚོཊ། འཕྲོད་བསྟེན་བཅས་ཀྱི་ཐོག་གོ་རྟོགས་སྤེལ་ཡོད་ཀྱང་། ད་ལོའི་ཧི་མ་ལ་ཡའི་མཛངས་མ་འགྲན་བསྡུར་སྐབས་ཧི་མ་ལ་ཡའི་མི་རིཊ་ཚང་མའི་ངོ་བོ་མཚོན་ཐབས་བྱས་ཏེ་འགྲན་བསྡུར་གནང་དགོས་རྒྱུ་ལས་བོད་དོན་དང་དམིགས་བསལ་འབྲེལ་བ་གང་ཡང་མེད་སྐོར་གསལ་བཤད་དང་། ཧི་མ་ལ་ཡའི་མཛངས་མའི་དབུ་རྒྱན་རག་མཁན་དེ། མ་འོངས་པར་ཨེ་ཤ་ཡའི་མཛེས་མ་དང་འཇིག་རྟེན་མཛེས་མ། དེ་ནས་རིམ་བཞིན་འཛམ་གླིང་མཛེས་མའི་འགྲན་བསྡུར་ཁྲོད་འཛུལ་ཞུགས་གནང་ཆོག་ཚུལ་དང་། སྐབས་དེར་སོ་སོའི་ངོས་ནས་གནས་ཡུལ་རྒྱལ་ཁབ་ཀྱི་གནས་སྟངས་རྒྱལ་སྤྱིའི་ཐོག་ངོ་སྤྲོད་གནང་ཆོག་གི་ཡོད་སྐོར་སོགས་བརྗོད་སོང་།  

ཧི་མ་ལ་ཡའི་མཛངས་མའི་འགྲན་བསྡུར་ནང་ཞུཊ་མཁན་བུ་མོ་ཚོར་སྔོན་འགྲོའི་ཆ་རྐྱེན་ཁ་ཤས་ཤིག་ཚང་དགོས་པ་ནི། བུ་མོ་རང་ལོ་ ༡༧ ནས་ ༢༥ བར་ཡིན་དགོས་པ། སོ་སོའི་རྒྱལ་ཁབ་ཀྱི་ངོ་སྤྲོད་ལག་དེབ། གཏན་སྡོད་ཁ་བྱང་། ཤེས་ཚད། འཚོ་ཐབས། འབྲེལ་གཏུཊ་ཁ་བྱང་། འཁྲབ་སྟོན་བྱས་མྱོང་ཡོད་མེད། སྐད་ཡིག་ག་ཚོད་ཤེས་མིན། གཟུགས་པོའི་རིང་ཐུང་། ལྗིད་ཚད། བྲང་གཞུང་གི་ཆེ་ཆུང་། སྐེད་པའི་སྤོམ་ཕྲ། འཕོང་ཚོས་ཀྱི་ཆེ་ཆུང་། དགའ་ཕྱོགས། སྐྱེས་ཚེས་ལག་དེབ། ཕྱེད་པར། གཟུགས་པོ་ཧྲིལ་པོའི་པར། དེ་བཞིན་ཧི་མ་ལ་ཡའི་ཁོར་ཡུག་དང་རིག་གཞུང་། གོམ་གཤིས་ཐད་ཀྱི་རྩོམ་ཐུང་། རང་གི་དམིགས་ཡུལ་བཅས་ཕྱི་ཟླ་ ༧ པའི་ཟླ་མཇུག་བར་ཧི་ལ་མ་ཡ་མཛངས་མའི་དྲ་ངོས་སུ་ཐོ་འགོད་གནང་དགོས་ཀྱི་ཡོད་འདུག

བློ་བཟང་དབང་རྒྱལ་ལགས་ཀྱིས་ཧི་མ་ལ་ཡ་མཛངས་མའི་དབུ་རྒྱན་དེར་བོད་ཀྱི་མཛངས་མའི་དབུ་རྒྱན་ལས་གོང་ཚད་ཆེན་པོ་སྤྲད་དེ་བཟོ་འགོད་བྱས་ཡོད་པར་མ་ཟད། མཛངས་མའི་དབུ་རྒྱན་གྱི་ཇུས་འགོད་ཀྱང་ཧི་མ་ལ་ཡའི་མི་རིཊ་ཐུན་མོང་གི་ངོ་བོ་མཚོན་པར་བྱས་ཏེ་བཟོས་ཡོད་འདུག མཛངས་མའི་འགྲན་བསྡུར་གྱི་མཐའ་མའི་བྱ་དགའ་ཨང་དང་པོ་ཐོབ་མཁན་ལ། ཧི་མ་ལ་ཡའི་དངུལ་གྱི་དབུ་རྒྱན་དང་ཧིན་སྒོར་ཆིག་འབུམ་ ༡༠༠༠༠༠ གི་གསོལ་རས་གནང་རྒྱུ་དང་། ཨང་གཉིས་པར་བྱ་དགའ་ཧིན་སྒོར་ལྔ་ཁྲི་ ༥༠༠༠༠། ཨང་གསུམ་པར་བྱ་དགའ་ ༢༥༠༠༠ བཅས་གནང་རྒྱུ་ཡིན་འདུག འགྲན་བསྡུར་སྐབས་འགྲན་ཞུགས་པའི་ཟས་དོད་དང་ཁང་གླ། འགྲུལ་བཞུད་སོགས་ཚང་མ་གོ་སྒྲིག་པ་རང་ངོས་ནས་ནར་གཏོང་ཞུ་རྒྱུ་ཡིན་འདུག

གསར་འགོད་པས་བློ་བཟང་དབང་རྒྱལ་ལགས་སུ། ད་ལོར་བོད་ཀྱི་མཛངས་མའི་འགྲན་བསྡུར་ཕྱིར་འཐེན་གནང་དགོས་དོན་ཅི་ཡིན་དྲིས་པར། “ ད་ལོར་བོད་ཀྱི་མཛངས་མའི་འགྲན་བསྡུར་གོ་སྒྲིག་མ་བྱས་པ་དེ་འགྲན་བསྡུར་ནང་ཞུཊ་མཁན་མེད་པ་དེ་འདྲ་མ་རེད། ཕྱི་ཟླ་ ༥ པའི་ནང་བོད་པའི་བུ་མོ་ཁ་ཤས་ཀྱིས་ད་ལོའི་མཛངས་མའི་འགྲན་བསྡུར་ནང་ཞུགས་འདོད་ཡོད་ཅེས་བཤད་སོང་། མ་གཞི་ད་ལོར་བོད་ནང་བོད་མི་མང་པོ་ཞིག་གིས་རང་ལུས་མེ་ལ་བསྲེགས་ཏེ། རྒྱ་གཞུང་ལ་ཐད་ཀར་ངོ་རྒོལ་བྱས་ཡོད་པ་རེད། དེ་ཚོ་ངོ་མ་སེམས་སྐྱོ་བོ་ཞེ་དྲག་རེད། དེའི་ཡིན་དུས། སྐབས་མཚམས་ལ་སླེབས་སྐབས་ངས་བུ་མོར་དེ་ཚོར་ད་ལོར་བོད་ཀྱི་མཛངས་མ་འགྲན་བསྡུར་ཡོང་ས་རེད་མ་རེད་ཅེས་ཞུས་པ་ཡིན་ ”ཞེས་བརྗོད་སོང་།

གསར་འགོད་པས་བྷེང་ལོར་མཐོ་སློབ་ནང་གསར་འགོད་རིག་པར་སློབ་སྦྱོང་བྱེད་བཞིན་པའི་བུ་མོ་བསྟན་འཛིན་སྒྲོན་མེ་ལཊ་སུ་བཅར་འདྲི་ཞུས་པར། “བོད་ཀྱི་མཛངས་མའི་འགྲན་བསྡུར་གོ་སྒྲིག་མ་ཐུབ་པ་དེར་བསམ་ཚུལ་ཅི་ཡོད་དྲིས་སྐབས། སྤྱིར་རྒྱ་གར་དང་བལ་ཡུལ། ཨ་རི། ཡུ་རོབ་བཅས་ཀྱི་ནང་བོད་པའི་བུ་མོ་མང་པོ་ཞིག་ཡོད་ནའང་། བུ་མོ་མང་པོ་ཞིག་བོད་ཀྱི་མཛངས་མའི་འགྲན་བསྡུར་ནང་ཞུཊ་ཀྱི་ཡོད་པ་མ་རེད། ལོ་ལྟར་བོད་ཀྱི་མཛངས་མའི་འགྲན་བསྡུར་ནང་ཞུཊ་མཁན་དག་ནི་བུ་མོ་བློ་ཁོག་ཆེན་པོ་དེ་འདྲ་མ་གཏོཊ་རྣམ་པ་ཡོད་མཁན་དང་སློབ་སྦྱོང་ཡོད་མཁན་དེ་ཚོ་ཞུཊ་ཀྱི་ཡོད་པ་མ་རེད། དེ་ཡིན་དུས་ང་རང་སྒེར་ངོས་ནས་མཛངས་མའི་འགྲན་བསྡུར་དེ་བོད་པའི་བུ་མོ་ཚོར་ཕན་ཐོཊ་ཡོད་པ་ཞིག་ལ་ངོས་འཛིན་བྱེད་ཀྱི་མེད་ ” ཅེས་བརྗོད།

མཛངས་པའི་འགྲན་བསྡུར་གོ་སྒྲིག་བྱེད་ཕྱོཊ་ཐོག་ནོར་གླིང་གནས་སྡོད་བུ་མོ་བསྟན་འཛིན་ཆོས་དབྱངས་ལཊ་སུ་བཅར་འདྲི་ཞུས་པར། བོད་ཀྱི་མཛངས་མ་འགྲན་བསྡུར་དེ་ལོ་ལྟར་རྒྱུན་མ་ཆད་པར་གོ་སྒྲིག་བྱེད་ཀྱི་ཡོད་སྟབས། ད་ལོར་གོ་སྒྲིག་མ་བྱས་པ་དེ་ཡག་པོ་ཞིག་མཐོང་མ་སོང་། མཛངས་མའི་འགྲན་བསྡུར་ལ་ཆབ་སྲིད་དང་འབྲེལ་བ་གང་ཡང་ཡོད་པ་མ་རེད། གཞན། བློ་བཟང་དབང་རྒྱལ་ལགས་ཀྱིས་ཧི་མ་ལ་ཡའི་མཛངས་མའི་འགྲན་བསྡུར་གོ་སྒྲིག་གནང་གི་ཡིན་ཟེར་བ་དེར། ང་རང་སྒེར་ངོས་ནས་རྒྱབ་སྐྱོར་གང་ཡང་མེད། ཧི་མ་ལ་ཡའི་མཛངས་མའི་འགྲན་བསྡུར་དེ་བོད་པའི་རྩ་དོན་ལ་ཕན་ཐོགས་པ་རེད་མི་འདུག་ཅེས་བརྗོད་བྱུང་།

གསར་འགོད་པ། དཔལ་ལྡན།

བོད་ཀྱི་དུས་བབ་ཚགས་པར་ལས་འདིར་བདམས་བཀོད་བྱས།