བློ་བཟང་དཀོན་མཆོག་དང་བློ་བཟང་ཚེ་རིང་གཉིས་ལ་ནག་ཉེས་མེད།

ཉིན་འདི་འགར་རྒྱ་གཞུང་གིས་རང་ལུས་མེར་བསྲེགས་དང་འབྲེལ་བ་ཡོད་པའི་ཉེས་མིང་འོག བོད་ནང་གི་བོད་མི་ཚོར་གང་བྱུང་ཁྲིམས་ཆད་གཅོད་བཞིན་པའི་གནས་ཚུལ་དེ། རྒྱལ་སྤྱིའི་ཁྲིམས་ལུགས་དང་འགལ་ཡོད་པ་མ་ཟད། ཐ་ན་རྒྱ་ནག་རང་གི་ཁྲིམས་ལ་ཡང་རྒྱབ་འགལ་ཆགས་ཡོད་སྟབས། གསར་འགོད་པ་ཚོས་གནས་ཚུལ་དེ་རྒྱལ་སྤྱིའི་ཐོག་ལ་བསྒྲགས་རོགས་ཟེར།

ཁ་སང་ཕྱི་ཚེས་ ༢ ཉིན་གྱི་ཉིན་རྒྱབ་ཆུ་ཚོད་ ༢།༠༠ ཐོག་རྒྱ་གར་གྱི་རྒྱལ་ས་ལྡི་ལིའི་ཇན་ཊིར་མན་ཊིར་ས་གནས་སུ་ཡོད་པའི་ (Jantadal United Office) ཞེས་པའི་ཚོགས་ཁང་ནང་། བཀའ་ཟུར་ཀིརྟི་རིན་པོ་ཆེ་མཆོག་དང་ནང་སྲིད་བཀའ་བློན་རྒྱ་རི་སྒྲོལ་མ་རྣམ་གཉིས་ཀྱིས་གསར་འགོད་གསལ་བསྒྲགས་ཤིག་བསྐྱངས་ཏེ། རྒྱ་ནག་གཞུང་གིས་བོད་ནང་རང་ལུས་མེར་བསྲེཊ་ཀྱི་གནས་ཚུལ་དང་འབྲེལ་བ་ཡོད་པའི་ཉེས་འཛུགས་འོག བོད་མི་ཚོར་གང་བྱུང་ཁྲིམས་ཆད་བཙོན་འཇུག་བྱེད་བཞིན་པའི་གནས་སྟངས་ཐོག་གསར་འགོད་ལྷན་ཚོགས་ཤིག་བསྐྱངས་སོང་། དེར་ཕྱི་རྒྱལ་དང་རྒྱ་གར། བོད་པ་བཅས་ཀྱི་རླུང་བརྙན་འཕྲིན་དང་དྲ་རྒྱ། ཚགས་ཤོག དུས་དེབ་བཅས་ཀྱི་གསར་འགོད་པ་ ༣༠ མ་ཟིན་ཙམ་འདུ་འཛོམས་བྱུང་འདུག

གསར་འགོད་ལྷན་ཚོགས་ཐོག་བཀའ་ཟུར་ཀིརྟི་རིན་པོ་ཆེ་མཆོག་གིས་འདི་ལོའི་ཕྱི་ཟླ་  ༡  ཚེས་ ༣༡ ཉིན། སི་ཁྲོན་རྔ་པ་འབྲིང་རིམ་མི་དམངས་ཁྲིམས་ཁང་གིས། རྔ་པའི་རང་ལོ་ ༤༠ ཡིན་པའི་བློ་བཟང་དཀོན་མཆོག་དང་། རང་ལོ་ ༣༡ ཡིན་པའི་ཁོང་གི་ཚ་བོ་བློ་བཟང་ཚེ་རིང་གཉིས་ཀྱིས་དེ་སྔོན་ས་གནས་ཀྱི་བོད་མི་བརྒྱད་ལ་རང་ལུས་མེར་བསྲེགས་གཏོང་བར་བརྒྱུད་སྐུལ་བྱས་ཡོད་པའི་ཉེས་འཛུགས་འོག བློ་བཟང་དཀོན་མཆོག་ལ་ལོ་ ༢ རྗེས་ཀྱི་སྲོག་ཐོག་གི་ཁྲིམས་ཆད་དང་། བློ་བཟང་ཚེ་རིང་ལ་ལོ་ ༡༠ ཁྲིམས་ཐག་བཅད་ཡོད་ཅིང་། རྒྱ་ནག་ཞིན་ཧྭ་དྲ་བའི་སྟེང་ཁོང་གཉིས་ཀྱིས་རྔ་པ་ཁུལ་གྱི་རང་ལུས་མེར་བསྲེགས་ལས་ལ་བརྒྱུད་སྐུལ་བྱས་ཡོད་པ་མ་ཟད། ལག་ཁྱེར་ཁ་པར་བརྒྱུད་རང་ལུས་མེར་བསྲེགས་ཀྱི་པར་དང་གནས་ཚུལ་ཕྱི་ཕྱོགས་ཀྱི་བོད་རང་བཙན་ཚོགས་པ་ཁག་ལ་མཁོ་སྤྲོད་བྱས་ཡོད་སྟབས། ༢༠༡༢ ལོའི་ཕྱི་ཟླ་ ༨ པའི་ནང་ཁོང་གཉིས་འཛིན་བཟུང་བྱས་ཡོད་པ་དང་། ཁོང་གཉིས་ཀྱིས་ནག་ཉེས་ཡོངས་རྫོགས་ངོས་ལེན་བྱས་ཡོད་སྐོར་སོགས་བཀོད་ཡོད་པ་དང་། ད་དུང་། ཉིན་དེར་ཀན་སུའུ་ཞིང་ཆེན་ཀན་ལྷོ་ཁུལ་བསང་ཆུ་རྫོང་མི་མང་ཁྲིམས་ཁང་གིས་ཀྱང་། བོད་མི་པདྨ་དོན་གྲུབ་ལ་ལོ་ ༡༢ དང་སྐལ་བཟང་རྒྱ་མཚོར་ལོ་ ༡༡། པདྨ་འཚོ་ལ་ལོ་ ༨། ལྷ་མོ་དོན་གྲུབ་ལ་ལོ་ ༧ ། གདུགས་དཀར་སྐྱབས་ལ་ལོ་ ༤ ། གཡང་མོ་སྐྱིད་ལ་ལོ་ ༣ བཅས་ལ་བོད་ནང་གི་རང་ལུས་མེར་བསྲེགས་དང་འབྲེལ་བའི་ཉེས་འཛུགས་འོག་ཁྲིམས་ཐག་བཅད་ཡོད་པ་དེ་དག་ནི། རྒྱལ་སྤྱིའི་ཁྲིམས་ཀྱི་འགྲོ་སྟངས་ཕར་ཞོག ཐ་ན་རྒྱ་ནག་རང་གི་ཁྲིམས་དང་མི་མཐུན་པའི་ཐོག་ནས་ཉེས་ཁྲིམས་བཙན་འགེལ་བྱས་པ་ཞིག་ཡིན་སྐོར་སོགས་གསུངས་བྱུང་།

གསར་འགོད་པའི་དྲི་བའི་ལན་དུ་ཁོང་གིས། རྒྱ་གཞུང་གིས་རང་ལུས་མེར་བསྲེཊ་ཐད་འཁྱོག་བཤད་དང་བོད་མི་ཚོར་ནག་ཉེས་བཙན་འགེལ་བྱས་ཏེ་དངོས་ཡོད་མིན་པའི་དྲིལ་བསྒྲགས་བྱེད་བཞིན་པའི་ཐད “ རྒྱ་གཞུང་གིས་བོད་མིའི་མེར་བསྲེགས་ཀྱི་འབྱུང་རྩ་བོད་ཕྱི་ལོགས་ཡིན་པའི་དཔང་རྟགས་ཡིན་ཟེར་བའི་བརྙན་འཕྲིན་ཞིག་ཉེ་ཆར་བཀྲམས་པ་དེའི་རྒྱ་སྐད་ཀྱིས་འགྲེལ་བརྗོད་དང་། བློ་བཟང་དཀོན་མཆོག་གི་སྐད་ཆ་གཉིས་འགལ་ཟླ་ཆགས་ཡོད་པ་རེད། ཁོང་ཚོ་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་དང་འབྲེལ་བ་ཡོད་སྐོར་ཤོད་ཀྱི་ཡོད་ཀྱང་། ཁོ་རང་ཚོའི་བར་བརྒྱུད་ལམ་གང་གི་ཐོག་ནས་ཀྱང་འབྲེལ་བ་མེད་པ་མ་ཟད། པར་དང་གནས་ཚུལ་གཅིག་ཀྱང་འབྱོར་མི་འདུག རྒྱ་ནག་གཞུང་གིས་ཁོང་གཉིས་དང་འབྲེལ་བ་བྱེད་མཁན་མདོ་སྔགས་ཡིན་པ་དང་། ཁོང་བོད་ནས་འབྲེལ་མཐུད་ཚོགས་པའི་ཚོགས་མི་དང་བོད་གནས་འབྲེལ་མཐུད་ཚོགས་པར་མི་ ༡༡ ཡོད་སྐོར་བཤད་འདུག དེའི་ཐད་མདོ་སྔགས་འབྲེལ་མཐུད་ཚོགས་པའི་ཚོགས་མིན་པ་མ་ཟད། བོད་གནས་འབྲེལ་མཐུད་ཚོགས་པར་མི་གཉིས་མ་གཏོགས་ཡོད་པ་མ་རེད། གནས་སྟངས་འདི་དག་འོག་ཁོང་གཉིས་ལ་དཔང་རྟགས་རྫུན་བཟོ་བྱས་ཏེ་ནག་ཉེས་བཙན་འགེལ་བྱས་པ་གསལ་བོ་རེད་ལ། འདི་དང་འབྲེལ་ཏེ་བོད་ནང་གི་ས་ཁུལ་ཡོངས་སུ་རང་ལུས་མེར་བསྲེཊ་གནང་མཁན་རྣམས་ཀྱི་ནང་མི་སྤུན་མཆེད་དང་། གྲོགས་པོ་གྲོགས་མོ་བཅས་རིམ་པས་དྲང་བདེན་མིན་པའི་ཁྲིམས་ཆད་ཀྱི་གནས་ཚུལ་འདིི་རིགས་འབྱུང་ངེས་སྟབས། རྒྱལ་སྤྱིའི་གསར་འགོད་པ་རྣམ་པས་བོད་ནང་གི་དངོས་ཡོད་གནས་སྟངས་ལ་ཞིབ་འཇུག་དང་བརྟག་དཔྱད་བྱས་ཏེ། རྒྱལ་སྤྱིའི་སྟེང་ཁྱབ་བསྒྲགས་གནང་རོགས་ཞེས་འབོད་སྐུལ་ཞུ་བཞིན་ཡོད”ཅེས་གསུངས་བྱུང་།

རང་ལུས་མེར་བསྲེགས་གནང་མཁན་མང་ཤོས་རྔ་པ་ཆགས་དགོས་པའི་རྒྱུ་རྐྱེན་ཐད་གསུང་རྒྱུར། ཕྱི་ལོ་ ༡༩༣༥ ལོར་མའོ་ཙེ་ཏུང་གིས་སྣེ་འཁྲིད་པའི་དམར་དམག་རྒྱང་སྐྱོད་ཀྱི་བོད་མདོ་སྨད་རྔ་པ་བརྒྱུད་དེ་བོད་ལ་བཙན་འཛུལ་བྱས་ཡོད་པ་དང་། སྐབས་དེའི་དམག་དཔུང་གིས་རྔ་པ་མི་མང་ལ་དཀའ་སྡུག་ཚད་མེད་བཏང་ཡོད་ཅིང་། ༢༠༠༨ ལོར་བོད་ས་ཡོངས་སུ་ཞི་རྒོལ་བྱུང་སྐབས། རྔ་པའི་མི་མང་ཐོག་གང་བྱུང་མེ་མདའ་བརྒྱབ་ཏེ་མི་ ༢༣  དམར་གསོད་དང་། དེ་ལས་མང་བར་རྨས་སྐྱོན་དང་བཙོན་འཇུག གཅར་རྡུང་ཚད་མེད་པ་བཏང་བ་བཅས་ལ་བརྟེན་ཏེ། མི་མང་གི་སེམས་ལ་རྨ་ཁ་ཆེན་པོ་བཟོས་ཏེ་ཐབས་ཟད་འུ་ཐུག་གི་གནས་སྟངས་འོག  ༢༠༠༩ ལོར་གྲྭ་བཀྲ་བྷེའི་རང་ལུས་མེར་བསྲེཊ་བཏང་སྟེ་རིམ་གྱིས་རྔ་པ་ས་ཆར་རང་ལུས་མེར་བསྲེཊ་ཀྱི་གནས་ཚུལ་བྱུང་སྐོར་གསུངས་སོང་།

ཐེངས་འདིའི་བོད་མིའི་གདུང་སེམས་མཉམ་སྐྱེད་བརྒྱུད་དེས་བོད་ནང་ཐུགས་ཕན་ག་ཚོད་སོས་ཀྱི་ཡོད་མེད་དྲིས་པའི་ལན་དུ་ “ ཕྱི་སྡོད་བོད་མི་ཚོར་མཚོན་ན་བོད་ནང་གི་བོད་མི་ཚོ་ལས་རང་དབང་ཡོད་པ་དང་། བོད་ནང་མྱངས་དང་མྱོང་བཞིན་པའི་དཀའ་སྡུག་རྒྱལ་སྤྱིའི་སྟེང་བསྐྱལ་རྒྱུ་ལས་འགན་ཆགས་ཡོད་སྟབས། ང་ཚོས་རེ་བ་ཡོད་མེད་ལ་མ་ལྟོས་པར་ད་རེ་བཀའ་སྤྱི་ཐུན་མོང་གི་གོ་སྒྲིག་འོག་གདུང་སེམས་མཉམ་སྐྱེད་ཀྱི་ལས་འགུལ་འདི་བརྒྱུད་དེ། གཙོ་བོ་བོད་ཕྱི་ནང་གཉིས་སུ་ཡོད་པའི་བོད་མི་ཚོའི་སྐྱིད་སྡུག་མཉམ་མྱོང་གི་ནུས་པ་ངོ་འཕྲོད་རྒྱུ་དང་། རྒྱ་ནག་ལ་མཚོན་ནའང་། གང་བྱུང་བོད་ནང་གི་བོད་མི་ཚོར་སྡུག་སྦྱོང་གཏོང་མི་ཆོག་པའི་བརྡ་ལན་སྤྲོད་རྒྱུ་གལ་ཆེན་པོ་ཆགས་ཡོད་པ་རེད། ”ཅེས་གསུངས་བྱུང་།

ཡང་རིན་པོ་ཆེ་མཆོག་ལ་ད་ཆར་༸གོང་ས་མཆོག་གིས་ཆབ་སྲིད་ཀྱི་སྐུ་དབང་མི་མང་གིས་འོས་འདེམས་བྱས་པའི་སྲིད་སྐྱོང་བློ་བཟང་སེང་གེར་རྩིས་སྤྲོད་བྱས་ཡོད་སྟབས། འདིའི་ཐད་རིན་པོ་ཆེ་མཆོག་གི་ལྟ་སྟངས་དང་ནུས་པ་གང་འདྲ་ཞིག་ཐོན་པའི་རེ་བ་བྱེད་ཀྱི་ཡོད་མེད་དྲིས་པའི་ལན་དུ་ཁོང་གིས། “ སྲིད་སྐྱོང་མཆོག་གི་ཕྱོགས་ནས། ད་ལྟའི་བར་ཁོང་གིས་མི་མང་གི་སྣེ་འཁྲིད་སྟངས་དང་རྒྱལ་སྤྱིའི་ཐོག་བོད་ནང་གི་གནས་ཚུལ་ཁྱབ་བསྒྲགས་སོགས་ཀྱི་ཐད་སྐུ་ངལ་ཆེན་པོ་སྐྱོན་གྱི་ཡོད་པ་རེད། ༸གོང་ས་མཆོག་ལ་མཚོན་ནའང་ཐུགས་རེ་ཆེན་པོ་གནང་གི་ཡོད་པ་རེད་ལ། མི་མང་ལ་མཚོན་ནའང་ཡིད་ཆེས་དང་རེ་བ་ཆེན་པོས་འོས་བླུགས་པ་ཞིག་ཡིན་སྟབས། ང་རང་གི་ངོས་ནས་ཀྱང་སྲིད་སྐྱོང་མཆོག་ལ་རེ་བ་ཆེན་པོ་བྱེད་ཀྱི་ཡོད།” ཅེས་གསུངས་བྱུང་།

གསར་འགོད་པ་དོན་གོས་རྒྱ་གར་རྒྱལ་ས་ལྡི་ལི་ནས་སྤེལ།