བོད་ཡིག་དག་ཆ་འགྲན་བསྡུར།

གཟའ་ཟླ་བའི་ཉིན་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་གཡུ་རྩོམ་སྒྲིག་ཚོཊ་ཆུང་གི་གོ་སྒྲིག་འོག ༢༠༡༣ ལོའི་ཐེངས་དང་པོའི་བོད་ཡིག་དག་ཆ་འགྲན་བསྡུར་གནང་ཡོད་འདུག

ཟླ་འདིའི་ཕྱི་ཚེས་ ༢༢ ཉིན་དགོང་དྲོ་རྒྱ་གར་ལྷོ་ཕྱོགས་བྷེང་ལོར་༸གོང་ས་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་ཚོགས་ཁང་དུ། མཐོ་སློབ་ཀྱི་གཡུ་རྩོམ་སྒྲིག་ཚོགས་ཆུང་གིས། བོད་ནང་རང་ལུས་མེར་བསྲེཊ་གནང་མཁན་རྒྱལ་གཅེས་དཔའ་བོ་དཔའ་མོ་རྣམ་པར་གདུང་སེམས་མཉམ་སྐྱེད་དང་། ཁོང་རྣམ་པའི་ཞལ་ཆེམས་ལྟར་བོད་མི་རིགས་ཀྱི་རིག་གནས་དང་སྐད་ཡིག་སྲུང་སྐྱོབ་དང་དར་སྤེལ། ལྷག་པར་དུ་ཏཱ་ལའི་བླ་མ་མཐོ་སློབ་ཀྱི་བོད་སྐད་ཡིག་ཡར་རྒྱས་གོང་འཕེལ་གཏོང་ཆེད་བཅས་ལ་དམིགས་ཏེ། ༼དུས་རབས་གསར་པའི་ཕ་སྐད་སྲུང་སྐྱོབ་བོད་ཡིག་དག་ཆ་འགྲན་བསྡུར་ཐེངས་དང་པོ༽ ཞེས་པ་བསྡུས་ཡོད་འདུག་ལ། དེར་མཐོ་སློབ་ཀྱི་བོད་ཡིག་རིག་གནས་རབ་འབྱམས་སྡེ་ཚན་དང་གློག་ཀླད་སྡེ་ཚན། དགེ་འོས་སྡེ་ཚན། འབྱུང་རིག་སྡེ་ཚན། རྒྱ་ཡིག་སྡེ་ཚན་བཅས་ཀྱི་ཁྱོན་སློབ་མ་ ༣༠ མཉམ་ཞུགས་གནང་ཡོད་འདུག  

ཐེངས་འདིའི་དག་ཆ་འགྲན་བསྡུར་སྐབས་གཙོ་བོ་རྒྱུན་ལྡན་གྱི་འཚོ་བོའི་ནང་བཀོལ་སྤྱོད་མང་བའི་མིང་ཚིག་དང་བྱ་ཚིག་བཅས་ཀྱི་དག་ཆའི་འགྲན་བསྡུར་གནང་ཡོད་འདུག་ལ། མིང་ཚིག་ ༡༠༠༠ ལྷག་གི་དག་ཆའི་འགྲན་བསྡུར་ནང་། ཨང་དང་པོ་རྒྱ་ཡིག་སྡེ་ཚན་གྱི་ལོ་རིམ་དང་པོའི་སློབ་མ་ཕུན་ཚོགས་དང་། ཨང་གཉིས་པ་རིག་གནས་ལོ་རིམ་དང་པོའི་སློབ་མ་ཀརྨ་ཚེ་དབང། ཨང་གསུམ་པ་རྒྱ་ཡིག་སྡེ་ཚན་ལོ་རིམ་དང་པོའི་སློབ་མ་སྒྲོལ་མ་ཚེ་འཚོ་བཅས་ལ་ཐོབ་ཡོད་པ་དང་། བྱ་དགའ་ཐོབ་པའི་སློབ་མ་ཚོར་གཡུ་རྩོམ་སྒྲིག་ཚོགས་ཆུང་དང་མཐོ་སློབ་བཅས་ཀྱི་ངོས་ནས་མཇལ་དར་དང་མཉམ་དུ་ཕྱག་ཁྱེར་རེ་ཕུལ་ཡོད་འདུག་ལ། འགྲན་བསྡུར་སྐབས་སོན་རྩ་ཚོགས་པའི་གློག་ཀླད་སློབ་གཉེར་བ་ཁག་ཅིག་གིས་སྒྲིག་བཟོ་བྱས་པའི་རང་ལུས་མེར་བསྲེཊ་གནང་རྒྱལ་གཅེས་དཔའ་བོ་དཔའ་མོའི་བརྙན་རིས་ཤིག་ཀྱང་གཟིགས་འབུལ་བྱས་ཡོད་འདུག

༸གོང་ས་ཏཱ་ལའི་བླ་མ་མཐོ་རིམ་སློབ་གཉེར་ཁང་ནི། ༢༠༠༨ ལོར་རྒྱ་གར་ལྷོ་ཕྱོགས་བྷེང་ལོར་གྲོང་ཁྱེར་དུ་གསར་འཛུགས་གནང་ཡོད་པ་དང་། འདི་ལོའི་སློབ་སྐབས་གསར་བ་ནས་བཟུང་རྒྱ་གར་གྱི་མེ་སོར་ (Mysore University) གཙུག་ལག་སློབ་གཉེར་ཁང་གི་ཁྱབ་ཁོངས་ཀྱི་རིག་གཞུང་བསྟི་གནས་ཤིག་ཆགས་ཡོད།