འཇར་མན་སྲིད་བློན་རྒྱ་ནག་ཏུ་སྐྱོད།

འཇར་མན་གྱི་སྲིད་བློན་རྒྱ་ནག་ནང་སྐོར་སྐྱོད་བྱས་ཏེ་རྒྱ་ནག་དང་ཚོང་དོན་དང་ཐབས་ཇུས་ཐད་ཀྱི་མཉམ་འབྲེལ་ལས་གཞི་མང་པོ་ཞིག་ལ་གྲོས་མཐུན་མིང་རྟགས་བཀོད་ཡོད་འདུག

ཟླ་འདིའི་ཚེས་ ༦ ཉིན་ནས་བཟུང་ཉིན་གསུམ་རིང་འཇར་མན་སྲིད་བློན་ལྕམ་ཨན་གྷི་ལ་མེར་གྷལ་(Angela Merkel ) མཆོག་གིས་སྣེ་འཁྲིད་པའི་ཚོང་དོན་སྐུ་ཚབ་ཚོགས་ཆུང་ཞིག་རྒྱ་ནག་ནང་སྐོར་སྐྱོད་བྱེད་བཞིན་ཡོད་ཅིང་། རྒྱ་ནག་གི་སྲིད་འཛིན་ཞི་ཅིན་ཕིན་དང་སྲིད་བློན་ལི་ཁེ་ཆང་སོགས་ལ་ཐུག་འཕྲད་བྱས་ཏེ། རྒྱ་ནག་ནང་འཇར་མན་གྱི་རླངས་འཁོར་ཝོག་སེ་ཝ་གྷན་ (Volkswagen) གྱི་བཟོ་གྲྭ་གཉིས་གསར་འཛུགས་དང་། རྒྱ་ནག་གི་འགྲུལ་སྐྱེལ་གནམ་གྲུ་ ( Air China) དང་འཇར་མན་གྱི་འགྲུལ་སྐྱེལ་གནམ་གྲུ་ལུབ་ཋན་སཱ་ (Lufthansa) བར་མཉམ་ལས་བྱེད་ཕྱོགས། འཇར་མན་གྱི་གནམ་གྲུ་བཟོ་གྲྭ་ (Airbus) ཞེས་པས་རྒྱ་ནག་ལ་ཐད་འཕུར་གནམ་གྲུ་ ༡༢༣ ཙམ་བཙོང་རྒྱུ། རྒྱ་ནག་གི་དངུལ་ཁང་དང་འཇར་མན་གྱི་དངུལ་ཁང་ (Deutsche ) གཉིས་བར་གྱི་མཉམ་ལས་གྲོས་མཐུན། དེ་བཞིན། འཇར་མན་གྱི་བརྡ་འཕྲིན་ཚན་རྩལ་ཁེ་ལས་སཱི་མོན་སེ་ (Siemens) དང་རྒྱ་ནག་གི་ཁེ་ལས་བར་མཉམ་ལས་བྱ་རྒྱུ་བཅས་ཚོང་དོན་གྲོས་མཐུན་ཁག་དྲུག་ལ་མིང་རྟགས་བཀོད་ཡོད་པ་མ་ཟད། ཨི་རན་གྱི་རྡུལ་ཕྲན་མཚོན་ཆའི་གནད་དོན་དང་ཡུའུ་ཁི་རེན་གྱི་གནས་སྟངས། དྲ་རྒྱའི་བདེ་འཇགས་སོགས་ཀྱི་སྐོར་ལ་གྲོས་མོལ་བྱས་ཡོད་འདུག འདི་ནི་ལྕམ་ཨན་གྷི་ལ་མེར་གྷལ་རྒྱ་ནག་ལ་གཞུང་འབྲེལ་སྐོར་སྐྱོད་བྱས་པ་ཐེངས་ ༧ དེ་ཆགས་ཡོད་འདུག

རྒྱ་ནག་གི་སྲིད་འཛིན་ཞི་ཅིན་ཕིན་གྱིས། “འཇར་མན་སྲིད་བློན་ཨན་གྷི་ལ་མེར་གྷལ་རྒྱ་ནག་ནང་སྐོར་སྐྱོད་གནང་བ་དེས། རྒྱལ་སྤྱིའི་ཐོག་རྒྱལ་ཁབ་གཉིས་ཀྱི་ཚོང་དོན་དང་ཆབ་སྲིད་འབྲེལ་ལམ་གོང་མཐོར་འགྲོ་བཞིན་ཡོད་པ་གསལ་སྟོན་བྱས་ཡོད་སྟབས། མ་འོངས་པར་རྒྱལ་ཁབ་གཉིས་ཀྱི་འབྲེལ་ལམ་སྔར་ལྷག་འཕེལ་རྒྱས་གཏོང་རྒྱུ་ཡིན། “ ཞེས་དང་། རྒྱ་ནག་སྲིད་བློན་ལི་ཁེ་ཆང་གིས། “རྒྱལ་སྤྱིའི་ཐོག་རྒྱ་ནག་དང་འཇར་མན་གྱི་འབྲེལ་ལམ་ནི་གལ་འགངས་ཆེ་ཤོས་ཀྱི་འབྲེལ་ལམ་ཞིག་ཆགས་ཡོད་སྟབས། མ་འོངས་པར་རྒྱལ་ཁབ་གཉིས་ཀྱིས་ཚོང་དོན་རྐྱང་པའི་འབྲེལ་ལམ་གཙིགས་འཛིན་མ་བྱས་པར་རྒྱལ་སྤྱིའི་དཀའ་རྙོག་ཁག་ལ་མཉམ་ལས་གདོང་ལེན་བྱ་རྒྱུ་ཡིན།“ཞེས་སོགས་བརྗོད་འདུག

འཇར་མན་སྲིད་བློན་ལྕམ་ཨན་གྷི་ལ་མེར་གྷལ་གྱིས། “ འཇར་མན་གཞུང་གིས་རྒྱ་ནག་གཞུང་དང་ཚོང་འབྲེལ་བྱེད་ཤུགས་ཆེ་རུ་གཏོང་རྒྱུ་ཙམ་མ་ཟད། རྒྱ་ནག་གི་ཁེ་ལས་འཇར་མན་ནང་གསར་འཛུགས་བྱ་རྒྱུར་མཐུན་རྐྱེན་གང་མང་བསྐྲུན་ཏེ། རྒྱལ་ཁབ་གཉིས་ཀྱི་འབྲེལ་ལམ་སྔར་ལྷག་འཕེལ་རྒྱས་བཏང་སྟེ། རྒྱ་ནག་འཇར་མན་གྱི་མཐུན་གྲོགས་རྒྱལ་ཁབ་ཡག་ཤོས་ཤིག་ཏུ་འགྱུར་ཐུབ་པ་བྱ་རྒྱུ་ཡིན།” ཞེས་བརྗོད་འདུག

ཚེས་ ༦ ཉིན་འཇར་མན་སྲིད་བློན་རྒྱ་ནག་ཟི་ཁྲོན་གྲོང་ཁྱེར་ཁྲིན་ཏུའུ་རུ་སྐོར་སྐྱོད་བྱས་ཏེ་ས་གནས་དཔོན་རིགས་དང་ཐུག་འཕྲད་གྲོས་མོལ་བྱས་རྗེས། གྲོང་ཁྱེར་ནང་ཡོད་པའི་འཇར་མན་ཝོག་སེ་ཝ་གྷན་ (Volkswagen) རླངས་འཁོར་བཟོ་གྲྭར་ཕྱིན་ཏེ་བཟོ་གྲྭའི་འགན་འཛིན་དང་ཐུག་འཕྲད་བྱས་ཡོད་པ་དང་། དེའི་རྗེས་འཇར་མན་ནང་སློབ་སྦྱོང་དང་ལས་ཀ་བྱེད་མྱོང་མཁན་རྒྱ་རིགས་སློབ་དཔོན་ཀྲང་ཝན་ཆའོ་ཡིས་གསར་འཛུགས་བྱས་པའི་སྤྱི་ཚོགས་ཕན་བདེ་ཁང་ལ་ལྟ་སྐོར་གྲུབ་རྗེས། པེ་ཅིན་རྒྱལ་ཁབ་གཉིས་ཀྱི་དཔལ་འབྱོར་དང་ཚོང་དོན་གླེང་སྟེགས་ཚོགས་འདུ་ (China-Germany Economic and Trade Commission) ཞེས་པར་མཉམ་ཞུགས་བྱས་ཡོད་འདུག

འཇར་མན་སྲིད་བློན་ཨན་གྷི་ལ་མེར་གྷལ་རྒྱ་ནག་ནང་སྐོར་སྐྱོད་མ་བྱས་གོང་། འཇར་མན་ནང་ཡོད་པའི་གྲངས་ཉུང་མི་རིགས་ཀྱི་འཐུས་ཚབ་ཚོས་ད་རེབ་སྲིད་བློན་རྒྱ་ནག་མགོ་ཁྲིད་ཚོར་ཐུག་འཕྲད་བྱེད་སྐབས། རྒྱ་ནག་ནང་གི་འགྲོ་བ་མིའི་ཐོབ་ཐང་གནད་དོན་སྐོར་ལ་གླེང་སློང་དགོས་པའི་འབོད་སྐུལ་ཞུས་ཡོད་པ་མ་ཟད། རྒྱལ་སྤྱིའི་ཡུ་གུར་མཐུན་ཚོགས་ཀྱིས་ཕྱག་ཡིག་ཅིག་ཕུལ་ཏེ། ཤིན་ཅང་མི་རིགས་ཀྱི་དཀའ་ངལ་སྐོར་ལ་གོ་བསྡུར་གནང་དགོས་པའི་ཞུ་འབོད་བྱས་ཡོད་པ་དང་། ད་རེབ་སྲིད་བློན་རྒྱ་ནག་མགོ་ཁྲིད་ཚོ་དང་ཐུག་འཕྲད་སྐབས་གནད་དོན་དེ་དག་ཐོག་གླེང་སློང་བྱས་ཡོད་མེད་ཀྱི་གནས་ཚུལ་འཐོན་མི་འདུག་ཀྱང་། སྲིད་བློན་ཁོང་གིས་རྒྱ་ནག་ཆིན་ཧྭ་སློབ་ཆེན་ནང་སློབ་མ་ཚོར་གཏམ་བཤད་སྤེལ་སྐབས། འགྲོ་བ་མིའི་ཐོབ་ཐང་དང་དམངས་གཙོའི་སྐོར་མང་ཙམ་བཤད་ཡོད་ཀྱང་རྒྱ་ནག་གི་བརྒྱུད་ལམ་ཁག་ཏུ་གནས་ཚུལ་དེའི་སྐོར་གང་ཡང་འཁོད་མི་འདུག

༢༠༠༧ ལོར་འཇར་མན་སྲིད་བློན་གྱིས་རྒྱ་ནག་གི་གནོན་ཤུགས་ལ་མ་ལྟོས་པར་༧གོང་ས་མཆོག་དང་མཇལ་འཕྲད་གནང་བར་བརྟེན། རྒྱ་ནག་དང་འཇར་མན་བར་གྱི་འབྲེལ་ལམ་ཇེ་སྡུག་ཏུ་ཕྱིན་ཡོད་ཀྱང་། ༢༠༠༨ ལོར་རྒྱལ་སྤྱིའི་དཔལ་འབྱོར་ཉམས་ཉེས་བྱུང་བ་དང་འབྲེལ་ནས་རྒྱལ་ཁབ་གཉིས་ཀྱི་འབྲེལ་ལམ་བསྐྱར་གསོ་བྱུང་ཡོད་ཅིང་། སྲིད་འཛིན་དང་གནད་ཡོད་མི་སྣའི་བར་ཕན་ཚུན་འགྲོ་འོང་བྱེད་ཤུགས་ཆེ་རུ་ཕྱིན་ཏེ་ཚོང་དོན་དང་དམག་དོན་སྐོར་ལ་གྲོས་མཐུན་མང་པོ་བཞག་སྟེ། ལོ་རེར་ཉུང་མཐར་ཨ་སྒོར་ཐེར་འབུམ་ ༡༠༠ ལྷག་གིས་ཚོང་འབྲེལ་བྱས་ཡོད་འདུག

༢༠༠༨ ལོར་ཨ་སྒོར་ཐེར་འབུམ་ ༡༠༣།༨༩ དང་།

༢༠༠༩ ལོར་ཨ་སྒོར་ཐེར་འབུམ་ ༡༢༡།༧༡།

༢༠༡༠ ལོར་ཨ་སྒོར་ཐེར་འབུམ་ ༡༢༨།༤༥༩།

༢༠༡༡ ལོར་ཨ་སྒོར་ཐེར་འབུམ་ ༡༣༢།༠༦།

༢༠༡༢ ལོར་ཨ་སྒོར་ཐེར་འབུམ་ ༡༤༠།༡༨།

༢༠༡༣ ལོར་ཡུ་སྒོར་ ( Euro ) ཐེར་འབུམ་ ༡༤༠།༤

༢༠༡༣ ནས་ ༢༠༡༤ ལོའི་ཟླ་ ༦ བར་ཨ་སྒོར་ཐེར་འབུམ་ ༡༨༠ ཙམ་གྱི་ཚོང་འབྲེལ་བྱས་ཡོད་པ་མ་ཟད། ༢༠༡༥ ལོར་ཨ་སྒོར་ཐེར་འབུམ་ ༢༡༥ ལྷག་གི་ཚོང་འབྲེལ་བྱ་རྒྱུའི་འཆར་གཞི་ཡོད་འདུག ད་ལྟ་འཇར་མན་རྒྱ་ནག་ལ་ཚོང་འབྲེལ་མང་ཤོས་བྱེད་མཁན་གྱི་རྒྱལ་ཁབ་ཨང་ ༣ དེ་ཆགས་ཡོད་འདུག

རྒྱ་ནག་སྲིད་འཛིན་ཞི་ཅིན་ཕིན་ཟླ་འདིའི་ཚེས་ ༣ ཉིན་ལྷོ་ཀོ་རི་ཡར་སྐོར་སྐྱོད་མ་བྱས་གོང་། ཉི་ཧོང་རྒྱལ་ཡོངས་གྲོས་ཚོགས་ཀྱིས་འཛམ་གླིང་དམག་ཆེན་གཉིས་པའི་སྐབས་གཏན་འབེབས་བྱས་པའི་རྒྱལ་ཁབ་གཞན་ལ་དམག་མི་གཏོང་མི་ཆོག་པའི་རྩ་ཁྲིམས་ལ་བཅོས་བསྒྱུར་བཏང་སྟེ། ཉི་ཧོང་གཞུང་གིས་རྒྱལ་སྤྱིའི་བདེ་འཇགས་ཆེད་རྒྱལ་ཁབ་གཞན་ནང་ཉི་ཧོང་གི་དམག་མི་གཏོང་རྒྱུ་ཡིན་སྐོར་བསྒྲགས་དང་། རྒྱ་ནག་གཞུང་གིས་འཇར་མན་སྲིད་བློན་རྒྱ་ནག་ནང་སྐོར་སྐྱོད་བྱས་བ་དང་བསྟུན་ཏེ་སྲིད་འཛིན་ཞི་ཅིན་ཕིན་དང་སྲིད་བློན་ལི་ཁེ་ཆང་གིས་ ༡༩༣༧ ལོའི་རྒྱ་ནག་དང་ཉི་ཧོང་དམག་འཐབ་སྐབས་ཀྱི་མཱར་ཁཱོ་པོ་ལོ་ (Marco Polo Bridge) ཟམ་ཆེན་གྱི་དོན་རྐྱེན་བྱུང་སྟེ། ལོ་ ༧༧ འཁོར་བའི་དུས་དྲན་སྲུང་བརྩི་དང་ཞི་ཅིན་ཕིན་གྱིས་གཏམ་བཤད་སོགས་སྤེལ་ཡོད་འདུག

གནད་དོན་དབྱེ་ཞིབ་པ་ཚོས་ཨ་རིས་ཉེ་ལམ་འཇར་མན་དང་རྒྱ་ནག་གི་འབྲེལ་ལམ་ཇེ་བཟང་དུ་འགྲོ་བཞིན་ཡོད་སྟབས། མ་འོངས་པར་ཨ་རིར་དཔལ་འབྱོར་དང་ཐབས་ཇུས་སོགས་ཀྱི་ཐོག་ནས་གྱོང་གུད་ཕོག་རྒྱུ་ཡིན་པའི་སེམས་འཚབ་ཐོག འདས་ལོའི་ནང་ཨ་རིའི་གསང་བའི་ལས་ཁུངས་ཀྱིས་འཇར་མན་སྲིད་བློན་ལྕམ་སྐུ་ཨན་གྷི་ལ་མེར་གྷལ་མཆོག་གི་ཁ་པར་ལྐོག་ཉན་བྱས་པའི་གནས་ཚུལ་དང་། ཉེ་ལམ་ཨ་རིའི་དོགས་ཡོད་སོ་ཉུལ་བ་ཞིག་གིས་འཇར་མན་གྱི་གསང་བའི་ཡིག་ཆ་ ༢༠༠ ལྷག་རྐུ་འཁྱེར་དང་འབྲེལ་ཨ་སྒོར་ ༣༤༠༠༠ ཙམ་ལ་ཕྱིར་ཚོང་བྱས་པ་སོགས་རྒྱལ་ཁབ་གཉིས་ཀྱི་འབྲེལ་ལམ་ཇེ་སྡུག་ཏུ་ཕྱིན་པ་བཅས་ལ་ཞིབ་འཇུག་བྱས་ཏེ། མ་འོངས་པར་འབྲེལ་ལམ་བསྐྱར་གསོ་ཡོང་ཐབས་བྱ་ངེས་ཡིན་སྐོར་བརྗོད་འདུག

རྒྱ་ནག་ཤིན་ཧྭ་གསར་འགྱུར་ནང་། “ད་ལྟ་རྒྱལ་སྤྱིའི་ཐོག་རྒྱ་ནག་དང་འཇར་མན་གྱི་འབྲེལ་ལམ་ཚད་གཞི་མཐོ་ཤོས་ཤིག་ཏུ་བསླེབས་ཡོད་།“ ཅེས་འཁོད་འདུག

རྒྱལ་སྤྱིའི་གནད་དོན་ཆེད་མཁས་པ་ཇོན་རེག་སི་ཌོན་ལགས་ཀྱིས། “ད་ལྟ་རྒྱ་ནག་དང་འཇར་མན་གྱི་འབྲེལ་ལམ་སྔར་ལྷག་བཟང་དུ་འགྲོ་བཞིན་ཡོད་ཀྱང་། རྒྱ་ནག་གཞུང་གིས་རྒྱལ་སྤྱིའི་ཚོང་དོན་གསང་བ་མང་པོ་ཞིག་རྐུ་འཁྱེར་བྱེད་བཞིན་ཡོད་སྟབས། མ་འོངས་པར་རྒྱལ་ཁབ་གཉིས་ཀྱི་འབྲེལ་ལམ་སླར་ཇེ་སྡུག་ཏུ་འགྲོ་ངེས་ཡིན།“ཞེས་བརྗོད་འདུག

དེ་རིང་སྔ་དྲོ་འཇར་མན་སྲིད་བློན་གྱིས་པེ་ཅིན་མི་རིགས་སློབ་ཆེན་ནང་གཟིགས་སྐོར་དང་འབྲེལ་སློབ་ཕྲུག་ཚོར་གཏམ་བཤད་གནང་རྗེས་འཇར་མན་ལ་ཕྱིར་ལོག་བྱེད་བཞིན་ཡོད་འདུག

གསར་འགོད་པ། དོན་གྲུབ།