འབྲས་ལྗོངས་གློག་ཤུགས་ལས་ཁུངས་ཀྱིས་འཕྲལ་སེལ་ལས་བྱེད་ཁག་ཅིག་ལ་ཟླ་ལྔའི་རིང་གླ་ཕོགས་མ་སྤྲད་པར་ཁོང་ཚོས་ལས་ཁུངས་ལ་ངོ་རྒོལ་བྱས་ཡོད་འདུག
ཟླ་འདིའི་ཚེས་ ༡༢ ཉིན་རྒྱ་གར་བྱང་ཤར་འབྲས་ལྗོངས་རྒྱལ་ས་སྒང་ཏོག་ཏུ། མངའ་སྡེ་གློག་ཤུགས་ལས་ཁུངས་ཀྱི་འཕྲལ་སེལ་ལས་བྱེད་ཁག་ཅིག་ད་ལོའི་ཕྱི་ཟླ་ ༣ པའི་ནང་ལས་ཁུངས་དེའི་གཏན་འཇགས་ལས་བྱེད་ཆགས་རྒྱུ་གཏན་འཁེལ་བྱས་ཡོད་ཀྱང་། སྐབས་དེར་ལས་བྱེད་ངོ་མ་ཆགས་ཡོད་མེད་ཀྱི་བརྡ་ལན་འབྱོར་མེད་པ་མ་ཟད། འདས་པའི་ཟླ་ངོ་ལྔའི་རིང་ཟླ་ཕོག་ཀྱང་སྤྲད་མེད་པར་བརྟེན། ཁོང་ཚོས་གནད་དོན་དེ་མངའ་སྡེ་གཞུང་གིས་ཐག་གཅོད་ཡོང་ཆེད་ལས་ཁུངས་ནས་མངའ་སྡེའི་སྤྱི་ཁྱབ་བློན་ཆེན་གྱི་ལས་ཁུངས་བར་འབོད་ཚིག་འདྲ་མིན་འཁོད་པའི་ཤོག་བྱང་བཟུང་སྟེ་ངོ་རྒོལ་གོམ་བགྲོད་བྱས་ཡོད་འདུག
སྐབས་དེར་མངའ་སྡེའི་སྤྱི་ཁྱབ་བློན་ཆེན་གྱི་དྲུང་ཆེའི་འབོད་སྐུལ་འོག་འབྲས་ལྗོངས་ལས་བྱེད་སྤྱི་མཐུན་ཚོགས་པའི་ཚོགས་གཙོ་པདྨ་སྒྲོལ་མ་བྷོ་ཊི་ཡ་ལགས་གཙོས་མི་ ༦ ལས་གྲུབ་པའི་ལས་བྱེད་སྐུ་ཚབ་ཚོགས་ཆུང་དང་། གློག་ཤུགས་བློན་ཆེན་དང་དྲུང་ཆེ་སོགས་ཀྱིས་ཚོགས་འདུ་ཚོགས་ཏེ། གློག་ཤུགས་ལས་ཁུངས་ལ་དཔལ་འབྱོར་གྱི་དཀའ་ངལ་འོག་ལས་བྱེད་གཏན་འབེབས་ཀྱི་བརྒྱུད་རིམ་དེ་གནས་སྐབས་རིང་མཚམས་འཇོག་བྱས་ཡོད་སྟབས། གཞུང་གིས་ཁོང་ཚོར་འཕྲལ་སེལ་ལས་ཀའི་གླ་ཕོག་སྤྲོད་རྒྱུ་ཡིན་པའི་ཐག་གཅོད་བྱས་ཡོད་འདུག
ཚོགས་འདུ་གྲོལ་རྗེས་ལས་བྱེད་སྐུ་ཚབ་མི་སྣས་གྲོས་མོལ་གྱི་གནས་ཚུལ་སྐོར་ངོ་རྒོལ་བྱེད་མཁན་ཚོར་བརྗོད་སྐབས། ཁོང་ཚོས་གཞུང་གི་ཐག་གཅོད་དེར་ཁས་ལེན་བྱས་མེད་པ་མ་ཟད། ཁོང་ཚོར་ངེས་པར་དུ་གཏན་འཇགས་ལས་བྱེད་དང་གཅིག་མཚུངས་ཀྱི་གླ་ཕོགས་སྤྲོད་དགོས་ཚུལ་བརྗོད་དེ་ཉིན་དེའི་ཕྱི་དྲོའི་བར་ངོ་རྒོལ་མུ་མཐུད་བྱས་སྐབས། ས་གནས་ཉེན་རྟོག་པས་སྤྱི་ཚོགས་བདེ་འཇགས་སྲུང་སྐྱོབ་ལ་ཁ་གཡར་ནས་སྐད་འབོད་མཚམས་འཇོག་བྱས་བཅུག་ཡོད་འདུག
ཁ་སང་ཕྱི་ཚེས་ ༡༣ ཉིན་འཕྲལ་སེལ་ལས་བྱེད་དེ་དག་ལས་ཁུངས་ཀྱི་མདུན་དུ་ཡང་བསྐྱར་འཛོམས་ཏེ། གཞུང་གིས་ལས་བྱེད་གཏན་འབེབས་མཚམས་འཇོག་བྱས་ཡོད་ཟེར་བ་དེར་ངོས་ལེན་མེད་པ་དང་། འདས་པའི་ཟླ་ངོ་ལྔ་ལྷག་རིང་གི་གླ་ཕོགས་ཆད་ལུས་མེད་པར་སྤྲོད་དགོས་པའི་ངོ་རྒོལ་བྱས་སྟབས། གློག་ཤུགས་ལས་ཁུངས་ཀྱི་དྲུང་ཆེ་ཡིས་ཐེངས་འདིའི་གཏན་འཇགས་ལས་བྱེད་ཆགས་པའི་ཡིག་ཆ་ཁག་ལ་ནོར་འཁྲུལ་ཡོད་སྟབས། ལས་ཁུངས་ཀྱིས་བསྐྱར་ཞིབ་བྱས་ཏེ་ཐག་གཅོད་བྱ་རྒྱུ་ཡིན་སྐོར་བརྗོད་རྗེས། ལས་བྱེད་ཚོས་གནས་སྐབས་རིང་ངོ་རྒོལ་མཚམས་འཇོག་བྱས་ཡོད་འདུག
གསར་འགོད་པ། ལྷ་སྐྱབས་རྒྱལ།
