རྒྱ་ནག་གཞུང་གིས་ཧོང་ཀོང་ནང་ཁྲིམས་གསར་ལག་བསྟར་བྱས་ཏེ་ལོ་གཅིག་མ་ཟིན་པའི་ནང་ཉུང་མཐར་ཧོང་ཀོང་གི་ལས་འགུལ་བ་ ༤༩༨ འཛིན་བཟུང་བྱས་ཡོད་འདུག
དེ་རིང་ཕྱི་ཚེས་ ༡ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཧོང་ཀོང་ཉེན་རྟོག་པས་བུད་མེད་ ༨ དང་སྐྱེས་པ་ ༣༩ བཅས་ཁྱོན་ལས་འགུལ་བ་ ༤༧ འཛིན་བཟུང་བྱས་ཡོད་པ་དང་། ལས་འགུལ་བ་དེ་ཚོས་ཁྲིམས་ལུགས་ལ་གཏོར་བརླག་གཏོང་ཆེད་ལྐོག་ཇུས་ཀྱི་ལས་འགུལ་སྤེལ་གྱི་ཡོད་པ་རེད། ཅེས་བརྗོད་ཡོད་འདུག
དེ་ཡང་དབྱིན་ཡུལ་ཕྱི་སྲིད་ལྷན་ཁང་གི་དྲུང་ཡིག་ཆེན་མོ་ཌོ་མི་ནིག་རབ (Dominic Raab) ལགས་ཀྱིས་ཊུ་ཝི་ཊར་ནང་། རྒྱལ་ཁབ་ཀྱི་བདེ་འཇགས་སྲུང་སྐྱོབ་ཀྱི་ཁྲིམས་ལུགས་རྩ་གཏོར་གཏོང་བའི་སྐྱོན་འཛུགས་འོག ཧོང་ཀོང་གི་ཆབ་སྲིད་པ་ ༤༧ འཛིན་བཟུང་བྱས་པ་འདི་ཟིང་འཁྲུག་སློང་ཐབས་ཤིག་ཡིན་པ་དང་། རྒྱ་ནག་གཞུང་གིས་ཁས་ལེན་བྱས་པ་དང་འགལ་ཏེ། ཁྲིམས་དེས་ཆབ་སྲིད་པ་སླར་གསོ་བྱ་རྒྱུའི་ཚབ་ལ་ཁ་གཏད་ཆབ་སྲིད་པ་མེད་པར་བཟོ་ཡི་འདུག ཅེས་བྲིས་འདུག
དེ་ཡང་ངོ་རྒོལ་ལས་འགུལ་བ་གཞོན་སྐྱེས་སམ་ཆོང་ (Sam Cheung) ཞེས་པ་ཞིག་གིས། ངའི་རེ་བར་ཚང་མས་ཧོང་ཀོང་གི་རྒྱལ་ཁབ་བློས་མི་གཏོང་བར་མུ་མཐུད་འཐབ་རྩོད་བྱེད་པའི་རེ་བ་བྱེད་ཀྱི་ཡོད། ཅེས་བརྗོད་འདུག་ལ། དེ་བཞིན། ལས་འགུལ་བ་ཇི་མི་ཤམ་(Jimmy Sham)ཞེས་པ་ཞིག་གིས། དམངས་གཙོ་ནི་ལྷ་ཡུལ་ནས་ཐོབ་པའི་ལག་རྟགས་ནམ་ཡང་མིན། དེ་ནི་མི་མང་པོའི་འདུན་པ་ལས་ཐོབ་པ་ཞིག་ཡིན། ང་ཚོ་མུ་མཐུད་སྟོབས་ཤུགས་ཆེན་པོའི་ངང་གནས་ཏེ་རང་ཉིད་ལ་གང་དགོས་པ་དེའི་ཐོག་འཐབ་རྩོད་བྱ་དགོས། ཞེས་བརྗོད་འདུག
ཕྱི་ལོ་ ༢༠༢༠ ཟླ་ ༦ ཚེས་ ༣༠ ཉིན་རྒྱ་ནག་གཞུང་གིས་རྒྱལ་ཁབ་བདེ་འཇགས་ཀྱི་ཁྲིམས་ཟེར་བ་གཏན་འབེབ་བྱས་ཏེ། ཉིན་དེའི་དགོང་མོར་ཧོང་ཀོང་སྲིད་གཞུང་གིས་ཁྲིམས་གཏན་འབེབ་བྱས་ཟིན་པ་ཡོངས་བསྒྲགས་བྱས་ཏེ། དབྱིན་ཡུལ་གཞུང་གིས་ཧོང་ཀོང་རྒྱ་ནག་ལ་རྩིས་སྤྲོད་བྱས་ཏེ་ལོ་ངོ་ ༢༣ འཁོར་བའི་དུས་དྲན་ཞེས་པ་དང་བསྟུན་ལག་བསྟར་བྱས་ཡོད་པ་དང་། དམག་མི་སྟོང་ཕྲག་ ༤ ལྷག་འགྲེམས་འཇོག་བྱས་ཏེ་ཉིན་དང་པོར་དམངས་གཙོ་ཚོགས་པའི་གྲོས་ཚོགས་འཐུས་མི་ཨན་ཌོར་ཝན་(Andrew Wan)ལགས་སོགས་ཉུང་མཐར་ཞི་རྒོལ་བ་ ༡༨༠ འཛིན་བཟུང་བྱས་ཡོད་པ་རེད། བྷི་བྷི་སི་ཡི་ཕྱོགས་བསྡོམས་ལྟར་ན། ཕྱི་ཟླ་ ༧ པའི་ནང་ཧོང་ཀོང་གི་མི་གྲངས་ ༣༧༠ འཛིན་བཟུང་བྱས་པ་དང་། ཕྱི་ཟླ་ ༩ པའི་ནང་མི་ ༢༨། ཕྱི་ལོ་ ༢༠༢༡ ཟླ་ ༡ ནང་མི་ ༥༣། ཕྱི་ཟླ་ ༢ པའི་ནང་ ༤༧ བཅས་ཁྱོན་བསྡོམས་མི་གྲངས་ ༤༩༨ འཛིན་བཟུང་ཡོད་བྱས་འདུག
གསར་འགོད་པ། བསྟན་འཛིན་ཕུར་བུ།
