རྒྱ་ནག་གིས་གསར་འགོད་རང་དབང་ལ་འཇིགས་སྐུལ་གཏོང་གི་ཡོད་པའི་སྙན་ཐོ་བཏོན།

འདས་ལོར་རྒྱ་ནག་གིས་རྒྱལ་སྤྱིའི་གསར་འགོད་པར་དྲག་གནོན་གྱིས་ཏོག་དབྱིབས་གཉན་རིམས་ཀྱི་འབྱུང་ཁུངས་གཙོས་པའི་རྒྱ་ནག་ལ་ཚོར་ཤུགས་སྐྱེན་པའི་ས་ཁུལ་གྱི་གནས་ཚུལ་སྤེལ་བར་ཕྱོགས་ཡོངས་ནས་དམ་དྲགས་དང་འཇིགས་སྐུལ་བཏང་ཡོད་འདུག

རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་རྒྱ་ནག་ནང་གནས་སྡོད་བྱེད་པའི་རྒྱལ་སྤྱིའི་གསར་འགོད་འབྲེལ་མཐུད་ཚོགས་པས། ཕྱི་ལོ་ ༢༠༢༠ ལོའི་རྒྱ་ནག་ནང་གི་གསར་འགོད་རང་དབང་སྐོར་གྱི་སྙན་ཐོ་ཞིག་བཏོན་པའི་ནང་། ཕྱི་ལོ་ ༢༠༢༠ ལོར་རྒྱ་ནག་གཞུང་གིས་ཏོག་དབྱིབས་གཉན་རིམས་འགོས་ཁྱབ་ལ་ཁ་གཡར་ཏེ། གསར་འགོད་པའི་ཐོངས་མཆན་དང་ཐོབ་ཐང་བསྡུ་ལེན་གྱིས་རྒྱལ་སྤྱིའི་གསར་འགོད་རང་དབང་ལ་ཚོད་འཛིན་དང་གཉའ་གནོན་བྱས་ཡོད་སྐོར་བརྗོད་འདུག

དེ་ཡང་རྒྱལ་སྤྱིའི་གསར་འགོད་འབྲེལ་མཐུད་ཚོགས་པས། རྒྱ་ནག་གཞུང་གིས་དྲ་རྒྱའི་གསང་ཞིབ་མྱུལ་ལྟ་ཚུད་པའི་བཙན་དབང་ཡོད་ཚད་བཀོལ་སྤྱད་ཀྱིས། རྒྱལ་སྤྱིའི་གསར་འགོད་པར་བརྙས་བཅོས་དང་འཇིགས་སྐུལ་བཏང་ཡོད་པ་མ་ཟད། རྒྱལ་སྤྱིའི་གསར་འགོད་པར་རོགས་རམ་གནང་མཁན་རྒྱ་ནག་གི་གསར་འགོད་པ་དང་བཅར་འདྲི་བྱེད་ཡུལ་བཅས་ལའང་དྲག་གནོན་བྱས་ཡོད། ཅེས་བརྗོད་ཡོད་པ་དང་། འདས་ལོར་རྒྱ་ནག་གཞུང་གིས་ཨ་རིའི་ནེའུ་ཡོག་དུས་བབ་དང་། ཝང་ཤིན་ཊོན་ཆ་འཕྲིན་ཕོ་ཉ། དེ་བཞིན། རྒྱལ་སྤྱིའི་དཔལ་འབྱོར་གནས་བབ་དབྱེ་ཞིབ་བྱེད་པའི་ཨ་རིའི་གསར་ཁང་(Wall Street Journal) སོགས་ཀྱི་གསར་འགོད་པ་ཁྱོན་ ༡༨ ལྷག་ཕྱིར་ཕུད་བཏང་སྟེ། རྒྱ་ནག་ནང་གི་གནས་ཚུལ་འགོད་མཚམས་འཇོག་ཏུ་བཅུག་ཡོད་པར་བརྟེན། འདས་ལོ་ནི་ཕྱི་ལོ་ ༡༩༨༩ སྟེ་དྲུག་བཞིའི་དོན་རྐྱེན་རྗེས་སུ་རྒྱ་ནག་ནས་གསར་འགོད་པ་ཕྱིར་ཕུད་བཏང་བའི་གྲངས་འབོར་མང་ཤོས་ཆགས་ཀྱི་ཡོད་འདུག

གསར་འགོད་འབྲེལ་མཐུད་ཁང་ཚོགས་པའི་སྙན་ཐོ་ལྟར་ན། རྒྱ་ནག་གཞུང་གི་དཔོན་རིགས་ཚོས། མང་ཚོགས་ཀྱི་འཕྲོད་བསྟེན་ལ་ཁ་གཡར་ཏེ། རྒྱལ་སྤྱིའི་གསར་འགོད་པ་ཚོར་ཤུགས་སྐྱེན་པའི་རྒྱ་ནག་གི་ས་ཁུལ་དུ་བསྐྱོད་རྒྱུ་བཀག་འགོག་བྱས་པ་དང་། དམིགས་བསལ་ཤིན་ཅང་ཁུལ་གྱི་གནས་ཚུལ་འགོད་མཁན་རིགས་ལ་འཇིགས་སྐུལ་བཏང་སྟེ་ཟུར་བཀག་འོག་སྡོད་བཅུག་ཡོད་པ་མ་ཟད། ཐོངས་མཆན་བཀག་སྡོམ་གྱིས་གནས་ཚུལ་སྤེལ་རྒྱུར་གནོན་ཤུགས་སྤྲད་ཡོད་པ་རེད།

དེ་འབྲེལ་ཐད་ཁ་སང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཝང་ཝིན་པེན་ཟེར་བས་སྙན་ཐོ་དེ་ནི་གཞི་མེད་སྐྱོན་འཛུགས་ཡིན་སྐོར་དང་སྦྲགས། རྒྱ་ནག་གི་ཁྲིམས་ལུགས་གཞིར་བཟུང་གནས་ཚུལ་འགོད་སླད། ང་ཚོས་ག་དུས་ཡིན་ཡང་རྒྱལ་སྤྱིའི་གསར་འགོད་པ་ཚང་མར་ཕེབས་བསུ་ཞུ་ཡི་ཡོད། འོན་ཀྱང་། གསར་འགོད་རང་དབང་གི་མིང་ཐོག་ནས་གནས་ཚུལ་རྫུན་མ་སྤེལ་བ་དང་། ལྟ་གྲུབ་མི་འདྲ་བའི་རྒྱུ་མཚན་གྱིས་རྒྱ་ནག་ལ་ཁྱད་གསོད་བྱེད་གཏོང་མཁན་ཚོར་ང་ཚོས་ངོས་ལེན་བྱེད་ཀྱི་མེད། ཅེས་ལན་འདེབས་བྱས་ཡོད་པ་རེད།

ཡང་སྙན་ཐོའི་ནང་། ཕྱི་ལོ་ ༢༠༢༠ ལོར་རྒྱ་ནག་གཞུང་གིས་རྒྱལ་སྲིད་བདེ་འཇགས་ལ་གནོད་སྐྱོན་གཏོང་གི་ཡོད་པའི་ངོས་འཛིན་འོག རྒྱལ་སྤྱིའི་གསར་འགོད་པར་དྲག་གནོན་གྱིས། ཏོག་དབྱིབས་གཉན་རིམས་ཀྱི་འབྱུང་ཁུངས་གཙོས་པའི་ནད་ཡམས་སྐོར་གྱི་གནས་ཚུལ་རིགས་འགོད་པར་བཀག་སྡོམ་ཤུགས་ཆེན་བྱས་ཡོད་པ་དང་། གསར་འགོད་པ་ཁག་ཅིག་གི་ལོ་གཅིག་རིང་སྤྲོད་སྲོལ་ཡོད་པའི་ཐོངས་མཆན་དང་གསར་འགོད་ཐོབ་ཐང་གཉི་ག་རྩིས་མེད་དུ་བཏང་སྟེ། རྒྱ་ནག་ནས་ཕྱིར་ལོག་མི་ཆོག་པའི་འཇིགས་སྐུལ་བྱས་པ་དང་།  གསར་འགོད་པ་ ༡༣ གྱི་ཐོངས་མཆན་ཟླ་དྲུག་རིང་མ་གཏོགས་ཕར་འགྱང་སྤྲད་མེད་སྐོར་བརྗོད་སོགས་བརྗོད་འདུག

སྙན་ཐོའི་ནང་བྱེ་བྲག་ཏུ། རྒྱ་ནག་གིས་ཕྱི་ལོ་ ༢༠༢༢ ལོའི་ཨོ་རྩལ་འགྲན་ཚོགས་ཆེན་མོ་བསྡུས་ཏེ། རྒྱལ་སྤྱིའི་གསར་འགོད་པ་དང་ལུས་རྩལ་བ། དེ་བཞིན་ལྟད་མོ་བ་བཅས་རྒྱ་ནག་ནང་ཡོང་བར་གྲ་སྒྲིག་བྱེད་བཞིན་པའི་སྒང་ཡིན་ནའང་། འདས་ལོའི་ཕྱི་ཟླ་ ༩ ནས་བཟུང་རྒྱ་ནག་གིས་ཨ་རི་གཙོས་པའི་ཨེ་ཊི་ལི་དང་ཉི་ཧོང་། ནེའུ་རྫའེ་ལན་ཌི། དབྱིན་ཡུལ་བཅས་ཀྱི་གསར་འགོད་པར་གསར་འགོད་ཐོབ་ཐང་ལག་ཁྱེར་སྤྲད་མེད་པ་མ་ཟད། གསར་འགོད་ལག་ཁྱེར་གྱི་ཚབ་ཏུ་ཟླ་ ༢ ནས་ ༣ བར་གནས་སྡོད་ཆོག་པའི་ཡི་གེ་རེ་སྤྲད་ཡོད་སྟབས། རྒྱལ་སྤྱིའི་གསར་འགོད་འབྲེལ་མཐུད་ཚོགས་པས། རྒྱ་ནག་གིས་ཨོ་རྩལ་འགྲན་ཚོགས་ཀྱི་རིན་ཐང་ལས་ལྡོག་སྟེ། རྒྱ་ནག་ནང་གསར་འགོད་རང་དབང་དང་སྨྲ་བརྗོད་རང་དབང་སོགས་བཀག་སྡོམ་བྱས་དང་བྱེད་མུས་ཡིན་པར་བློ་ཕམ་ཞེ་དྲགས་བྱུང་ཡོད་སྐོར་སོགས་ཀྱི་སྐྱོན་བརྗོད་ཀྱང་བྱས་འདུག

འདས་ལོའི་སྙན་ཐོ་དེ་རྒྱལ་སྤྱིའི་གསར་འགོད་འབྲེལ་མཐུད་ཚོགས་པས། རྒྱ་ནག་ནང་གསར་འགོད་ལས་རིགས་གཉེར་བཞིན་པའི་རྒྱལ་སྤྱིའི་གསར་འགོད་པ་དང་གསར་ཁང་ཁག་གི་རྒྱལ་ཡོངས་དོ་དམ་པ་བཅས་ཁྱོན་མི་གྲངས་  ༡༥༠ ལ་བཅར་འདྲི་བྱས་པའི་གྲུབ་དོན་ཞིག་ཡིན་ཞིང་། བཅར་འདྲིའི་ཁྲོད་གསར་འགོད་པ་གཅིག་གིས་ཀྱང་རྒྱ་ནག་ནང་གསར་འགོད་རང་དབང་གི་གནས་བབ་ཇེ་བཟང་དུ་སོང་མེད་སྐོར་བརྗོད་ཡོད་པ་རེད།

གསར་འགོད་པ། སྐལ་བཟང་སྦྱིན་པ།