སྟོབས་ཆེན་རྒྱལ་ཁབ་བདུན་ནས་ཏོག་དབྱིབས་གཉན་རིམས་ཀྱི་འབྱུང་ཁུངས་བསྐྱར་ཞིབ་ཚུད་པའི་ཡུ་གུར་དང་ཧོང་ཀོང་། ཐའེ་ཝན་མཚོ་འགོག་དང་རྒྱ་གར་ཞི་བདེ་རྒྱ་མཚོའི་ཁུལ་སོགས་ཀྱི་གནད་དོན་དང་འབྲེལ་ནས་རྒྱ་ནག་ལ་ཁ་གཏད་དང་འགན་ལེན་བྱེད་དུ་འཇུག་རྒྱུ་ཡིན་པ་ནན་བརྗོད་བྱས་འདུག
ཁ་སང་ཕྱི་ཚེས་ ༡༣ ཉིན་སྟོབས་ཆེན་རྒྱལ་ཁབ་བདུན་གྱི་ཉིན་གསུམ་གྱི་ཚོགས་ཆེན་མཇུག་བསྒྲིལ་བ་དང་བསྟུན། སྟོབས་ཆེན་རྒྱལ་ཁབ་བདུན་ཐུན་མོང་གི་གྲོས་ཆོད་ཡོངས་བསྒྲགས་བྱས་ཏེ། རྒྱ་ནག་གཞུང་གིས་ཡུ་གུར་གྲང་ཉུང་མི་རིགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་མཚམས་འཇོག་དགོས་པ་དང་ཧོང་ཀོང་གི་རྒྱལ་ཁབ་གཅིག་ལ་ལམ་ལུགས་གཉིས་ཀྱི་ཚད་མཐོའི་རང་སྲིད་རང་སྐྱོང་རྒྱུན་སྐྱོང་བྱེད་དགོས་པ་མ་ཟད། རྒྱ་ནག་ནས་མཆེད་པའི་ཏོག་དབྱིས་གཉན་རིམས་ཀྱི་འབྱུང་ཁུངས་མཐིལ་ཕྱིན་པ་ཞིག་རྩད་གཅོད་གཏོང་དགོས་པའི་འབོད་ཚིག་ནན་བསྒྲགས་བྱས་འདུག
དེ་འབྲེལ་རོའུ་ཊར་གསར་ཁང་གི་གནས་ཚུལ་ནང་། སྟོབས་ཆེན་རྒྱལ་ཁབ་བདུན་གྱི་མགོ་ཁྲིད་ཐུན་མོང་ནས་ད་རེས་རྒྱ་ནག་ཐོག་བཟུང་བའི་ལྟ་སྟངས་ཧ་ཅང་མཁྲེགས་པོ་ཡིན་པ་དང་། མདོར་ན་རྒྱ་ནག་ལ་ཆེས་ཚོར་ཤུགས་སྐྱེན་པའི་ཐའེ་ཝན་མཚོ་འགོག་གི་སྐོར་ཡིན་ཕྱིན་གླེང་སློང་གིས། རྒྱ་ནག་ལ་ཁ་གཏད་དང་འགན་ལེན་བྱེད་དུ་འཇུག་རྒྱུ་ཡིན་སྐོར་བརྗོད་འདུག་ལ། བྱེ་བྲག་ཏུ་ཐའེ་ཝན་མཚོ་འགག་དང་རྒྱ་གར་ཞི་བདེ་རྒྱ་མཚོ་ཁུལ་གྱི་བདེ་འཇགས་ནི་རྒྱལ་སྤྱིའི་བདེ་འཇགས་དང་འབྲེལ་བ་ཡོད་པས་རྒྱལ་སྤྱིའི་ཁྲིམས་སྒྲིག་གི་གཙིགས་སུ་འཛིན་རྒྱུ་ཡིན་སྐོར་བརྗོད་ཡོད་པ་རེད།
འཛམ་གླིང་གང་སར་བཞུགས་པའི་བོད་མི་ཚོས་རང་ཉིད་གནས་ཡུལ་རྒྱལ་ཁབ་ཀྱི་མགོ་ཁྲིད་བརྒྱུད་སྟོབས་ཆེན་རྒྱལ་ཁབ་བདུན་གྱི་ཚོགས་ཆེན་སྟེང་བོད་དོན་གླེང་སློང་ཡོང་བར་ཐབས་ཤེས་ཡོད་རྒུ་འདོན་བཞིན་ཡོད་ནའང་། ད་རེས་ཚོགས་ཆེན་ཐོག་ཐའེ་ཝན་མཚོ་འགག་དང་རྒྱ་གར་ཞི་བདེ་རྒྱ་མཚོའི་གལ་གནད། དེ་བཞིན་ཧོང་ཀོང་དང་ཡུ་གུར་སོགས་ཀྱི་གནད་དོན་གླེང་བྱས་ཡོད་པ་ལས་བོད་དོན་སྐོར་གྲོས་ཆོད་དང་ཚོགས་འདུའི་ཡུལ་དངོས་གང་གི་སྟེང་གླེང་སློང་གནང་མེད་པ་རེད་ལ། དེ་ཡང་ཚོགས་ཆེན་གྱི་གོང་དུ་རྒྱལ་སྤྱིའི་བོད་དོན་ལས་འགུལ་ཁང་དང་བོད་ཀྱི་རྒྱལ་སྤྱིའི་མཐུན་གྲོགས་ཚོགས་པ་ (Global Alliance for Tibet) སོགས་ཀྱིས་སྟོབས་ཆེན་རྒྱལ་ཁབ་བདུན་གྱི་ཚོགས་ཆེན་དང་བསྟུན། སྟོབས་ཆེན་རྒྱལ་ཁབ་བདུན་གྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། ཚོགས་ཆེན་ཐོག་ཏུ་བོད་དོན་གླེང་དགོས་དགོས་པ། དེ་བཞིན་བོད་ནང་རྒྱལ་ཚོགས་ཀྱི་རང་དབང་ལྡན་པའི་རྟོག་ཞིབ་ཚན་པ་ཞིག་གཏོང་དགོས་པ་དང་། བོད་ནང་གི་ཁོར་ཡུག་གི་གནས་སྟངས་ཧ་ཅང་ཛ་དྲག་ཅན་དུ་གྱུར་ཡོད་པ་དང་། བོད་ནི་ཆུ་བོ་མང་པོའི་མགོ་ཁོངས་ཡིན་སྟབས། ཚན་རིག་དང་མཐུན་པའི་རྒྱལ་སྤྱིའི་ཞིབ་འཇུག་ཚོགས་པ་ཞིག་གསར་འཛུགས་བྱས་ཏེ་ཆུ་བོ་ཁག་གི་བརྒྱུད་དུ་འཛུགས་བསྐྲུན་བྱས་པ་སོགས་ཀྱི་གནས་ཚུལ་རྒྱུས་ལོན་བྱེད་དགོས་པའི་དགོས་འདུན་བཏོན་ཡོད་པ་རེད།
རྒྱལ་ཁབ་བདུན་གྱི་གྲོས་ཆོད་ནང་། རྒྱ་ནག་གི་བརྒྱུད་གཅིག་ལམ་གཅིག་གི་ལས་གཞི་དང་རྒྱལ་སྤྱིའི་ཐོག་འཕེལ་བཞིན་པའི་རྒྱ་ནག་གི་ཤུགས་རྐྱེན་ལ་གདོང་ལེན་བྱེད་ཐབས་སུ། ཨ་ཧྥི་རི་ཀ་ནང་མེ་འཁོར་ལྕགས་ལམ་འཛུགས་བསྐྲུན་དང་ཨེ་ཤ་ཡའི་རང་བྱུང་གི་རླུང་ལ་བརྟེན་ནས་གློག་འདོན་འཕྲུལ་འཁོར་ (wind farms) གྱི་ལས་གཞི་ལ་སྟོབས་ཆེན་རྒྱལ་ཁབ་བདུན་གྱིས་རྒྱབ་སྐྱོར་བྱ་རྒྱུ་ཡིན་པ་དང་། རྒྱལ་ཚོགས་འཕྲོད་བསྟེན་སྒྲིག་འཛུགས་ཀྱི་གོ་སྒྲིག་འོག་ཏོག་དབྱིབས་གཉན་རིམས་ཀྱི་འབྱུང་ཁོངས་དང་འབྲེལ་རྟོག་ཞིབ་ཐེངས་གཉིས་པ་བྱེད་མགོ་བཙུགས་ཏེ། གཉན་སྲིན་དེ་བཞིན་བརྟག་དཔྱད་ཁང་ནས་ཤོར་བ་ཞིག་གམ་སྲོག་ཆགས་གཞན་ནས་མི་ལ་འགོས་པ་ཡིན་མིན་རྩད་གཅོད་དགོས་སྐོར། དེ་བཞིན་རྒྱལ་སྤྱིའི་ཁྲོམ་རའི་ནང་རྒྱ་ནག་གཞུང་གིས་དྲང་བདེན་མིན་པའི་ཚོང་ལས་གཉེར་བཞིན་པར་གདོང་ལེན་བྱ་རྒྱུ་ཡིན་སྐོར་སོགས་རྒྱ་ནག་གཞུང་ལ་ཁ་གཏད་གཅོག་རྒྱུ་ཡིན་པ་བཀོད་འདུག
ཡང་ཚོགས་ཐོག་ཏུ་གོ་ལའི་གནམ་གཤིས་འགྱུར་ལྡོག་དང་འབྲེལ་ནས་སྟོབས་ཆེན་རྒྱལ་ཁབ་བདུན་གྱིས་ལོ་གཅིག་གི་ནང་ཨ་སྒོར་ཐེར་འབུམ་ ༡༠༠ བཏང་སྟེ། སྟོབས་འབྱོར་ཞན་པའི་རྒྱལ་ཁབ་ཁག་གི་ནང་དུག་རླངས་ཇེ་ཉུང་དུ་གཏོང་ཐབས་དང་། གོ་ལའི་ཚ་དྲོད་འཕེལ་བཞིན་པར་གདོང་ལེན་བྱ་རྒྱུ་ཡིན་པའི་གྲོས་ཆོད་བྱུང་ཡོད་པ་དང་། མ་འོངས་ལོ་གཅིག་གི་ནང་སྟོབས་འབྱོར་ཞན་པའི་རྒྱལ་ཁབ་ཁག་གི་ནང་ཏོག་དབྱིབས་གཉན་རིམས་ཀྱི་འགོག་ཁབ་དུང་ཕྱུར་ ༡༠ ཡི་རོགས་རམ་བྱ་རྒྱུ་ཡིན་པ། ཨུ་རུ་སུ་གཞུང་གིས་ཨུ་རུ་སུ་རང་ནས་བྱུང་བའི་རྒྱལ་སྤྱིའི་དྲ་བར་འཇམ་རྒོལ་བྱས་ཏེ་ནུབ་ཕྱོགས་རྒྱལ་ཁབ་ཁག་གི་ཕྱུག་བདག་ཚོར་བསླུ་བྲིད་གཏོང་གི་ཡོད་པའི་འགན་འཁུར་ལེན་དགོས་པ་དང་། ཨུ་རུ་སུས་རྡུལ་ཕྲན་མཚོན་ཆ་བེད་སྤྱོད་བྱེད་ཕྱོགས་ལ་རྟོག་ཞིབ་བྱེད་དགོས་སྐོར་སོགས་ཀྱི་དགོས་འདུན་བཏོན་ཡོད་པ་རེད།
འོན་ཀྱང་རྒྱལ་སྤྱིའི་གནད་དོན་དབྱེ་ཞིབ་པ་ཚོས་མ་འོངས་ལོ་གཅིག་གི་ནང་འགོག་ཁབ་དུང་ཕྱུར་ ༡༠ རོགས་རམ་བྱ་རྒྱུ་ཡིན་པ་ཁས་ལེན་བྱས་ཡོད་ནའང་། སྟོབས་ཆེན་རྒྱལ་ཁབ་བདུན་གྱིས་འགོག་ཁབ་ཀྱི་གྲངས་དེ་ལས་མང་བའི་རོགས་རམ་བྱེད་ཐུབ་པ་དང་། གཉན་རིམས་ལ་གདོང་ལེན་ཆེད་འགོག་ཁབ་ཐོག་ནུས་པ་འདོན་ཤུགས་ཆེ་ཤོས་དེ་མིན་སྐོར་དང་། གནམ་གཤིས་འགྱུར་ལྡོག་གི་གནད་དོན་ཐད་ཁས་ལེན་བྱས་པ་དག་ནི་ཁ་གསལ་མེད་སྐོར་བརྗོད་ཀྱིན་འདུག་ལ། ཁོར་ཡུག་ལས་འགུལ་བ་གྲགས་ཆེན་བུ་མོ་གྷེ་རེ་ཊ་ཐན་བྷག་ (Greta Thunberg) གིས་ཐེངས་འདིའི་ཚོགས་ཆེན་གྱི་ཁོར་ཡུག་དང་འབྲེལ་བའི་གྲོས་ཆོད་ཁག་ཡ་ལན་སྟོང་པ་ཞིག་ཡིན་པའི་སྐྱོན་བརྗོད་བྱས་འདུག
ཚོགས་ཆེན་སྐབས་སྟོབས་ཆེན་རྒྱལ་ཁབ་བདུན་གྱི་མགོ་ཁྲིད་ཚོས་བྷའེ་ཌན་ཨ་རིའི་སྲིད་འཛིན་ལ་འོས་འདེམས་བྱུང་རྗེས། བསྐྱར་དུ་ཨ་རིའི་མཐུན་གྲོགས་རྒྱལ་ཁབ་ཚོ་དང་མཉམ་འབྲེལ་གྱི་ནུས་ཤུགས་ཆེ་རུ་གཏོང་བའི་སྲིད་བྱུས་བཟུང་བར་དགའ་བསུ་དང་རྒྱབ་སྐྱོར་ཡོད་པའི་རྣམ་འགྱུར་བསྟན་ཡོད་པ་དང་། ཧྥ་རན་སིའི་སྲིད་འཛིན་མཱག་རོན་ (Macron) ལགས་ཀྱིས། སྲིད་འཛིན་བྷའེ་ཌན་མཆོག་ནས་མགོ་ཁྲིད་ཀྱི་ནུས་པ་ནི་མཉམ་འབྲེལ་བྱ་རྒྱུ་དེ་ཡིན་སྐོར་གསུངས་ཡོད་པ་ལྟར། ཨ་རིར་མཉམ་འབྲེལ་བྱ་འདུན་ཆེ་བའི་སྲིད་འཛིན་ཞིག་བྱུང་བ་དེ་གཏམ་བཟང་ཞིག་ཡིན་སྐོར་དང་། དབྱིན་ཡུལ་གྱི་སྲིད་བློན་བྷོ་རི་སི་ཇོན་སན་ (Boris Johnson) མཆོག་ཉིན་དང་པོར་སྲིད་འཛིན་བྷའེ་ཌན་མཆོག་དང་མཇལ་འཕྲད་རྗེས། སྲིད་འཛིན་བྷའེ་ཌན་མཆོག་གི་རྒྱལ་སྤྱིའི་ཁོར་ཡུག་དང་བདེ་སྲུང་། དེ་བཞིན་ཏོག་དབྱིབས་གཉན་རིམས་སོགས་ཀྱི་གནད་དོན་ཐོག་མཉམ་འབྲེལ་བྱེད་པའི་སྙིང་སྟོབས་ལ་བསྔགས་བརྗོད་ཡོད་སྐོར་བརྗོད་པ་དང་འབྲེལ། ཨ་རི་དང་དབྱིན་ཇི་གཉིས་མུ་མཐུད་མཉམ་འབྲེལ་བྱ་འདུན་ཡོད་སྐོར་སོགས་བརྗོད་ཡོད་འདུག
གསར་འགོད་པ། ཀླུ་མགོན་ཐར།
