རྒྱ་གར་ནང་ཧམ་སྤུ་ནག་པོའི་ནད་ཡམས་འགོས་ཁྱབ་ཤུགས་ཆེན་བྱུང་སྟེ་མི་མང་པོའི་ཚེ་སྲོག་ཤོར་བ་དང་མི་མང་པོ་ནད་མནར་གྱི་དཀའ་སྡུག་འོག་གནས་མུས་ཡིན་པ་རེད།
འདི་ལོའི་ཕྱི་ཟླ་ ༥ ནང་རྒྱ་གར་འཕྲོད་བསྟེན་ལྷན་ཁང་གིས། གཉན་ནད་ཧམ་སྤུ་ནག་པོ་(Black fungus) ཞེས་པ་ནད་ཡམས་ཤིག་ལ་ངོས་འཛིན་གྱིས་རྒྱ་གར་རྒྱལ་ཡོངས་སུ་དེའི་ཛ་དྲག་གི་ཤུགས་རྐྱེན་བསླེབ་སྲིད་པའི་ཉེན་བརྡ་བཏང་བ་དང་བསྟུན། རྒྱ་གར་མི་མང་ནས་ཏོག་དབྱིབས་དང་ཧམ་སྤུ་ནག་པོ་གཉིས་ཀར་དུས་མཚུངས་སུ་སྔོན་འགོག་དང་སྨན་བཅོས་བརྟག་དཔྱད་སོགས་བྱས་ཏེ་གདོང་ལེན་གནང་དགོས་པའི་བཀའ་ཁྱབ་བཏང་ཡོད་མོད། ཏོག་དབྱིབས་གཉན་རིམས་ཀྱི་རླབས་གཉིས་པ་འཇགས་པ་དང་རྒྱ་གར་རྒྱལ་ཡོངས་སུ་ཕྱོགས་ཡོངས་ནས་སྤྱི་ཚོགས་ལྷོད་ཡངས་སུ་གཏོང་བཞིན་པའི་སྐབས་འདིར། ད་ལྟའི་ཆར་རྒྱ་གར་ནང་ཧམ་སྤུ་ནག་པོ་ཕོག་པའི་ནད་པ་ཇེ་མང་དུ་འགྲོ་ཡི་ཡོད་པ་མ་ཟད། ད་བར་མི་གྲངས་ ༤༣༠༠ ལྷག་རྐྱེན་འདས་སུ་ཕྱིན་ཡོད་འདུག
རྒྱ་གར་འཕྲོད་བསྟེན་ལྷན་ཁང་གི་གནས་ཚུལ་ལྟར་ན། ད་ལྟ་རྒྱ་གར་ནང་ཧམ་སྤུ་ནག་པོ་ཕོག་པའི་མི་གྲངས་ ༤༥༣༧༤ ཡོད་པ་དང་། ནད་འབུ་འདིས་ཐད་ཀར་མི་ཡི་སྣ་དང་མིག ཀླད་པ་སོགས་སུ་གནོད་སྐྱོན་བཟོ་ཡི་ཡོད་སྟབས། མི་སུ་ཞིག་ལ་ནད་འབུ་འགོས་ཚེ་ཐད་ཀར་ནད་གཞི་ཕོག་ཡུལ་གྱི་དབང་པོའམ་ལུས་པོའི་ཆ་ཤས་གང་དེ་གཅོད་པའམ་མེད་པར་བཟོ་དགོས་ཀྱི་ཡོད་པ་རེད། དེ་བས་ད་ལྟ་རྒྱ་གར་གྱི་མངའ་སྡེ་ ༡༣ ལྷག་གི་སྨན་ཁང་ཁག་ཏུ་ཧམ་སྤུ་ནག་པོ་ཕོག་པའི་རྐྱེན་གྱིས། མི་མང་པོའི་མིག་བཀག་སྟེ་ཞ་ར་ཆགས་པ་དང་སྣ་བཀག་པ། འགྲམ་རུས་བླངས་ཟིན་པ་སོགས་ཀྱི་གནས་ཚུལ་བྱུང་དང་འབྱུང་གི་ཡོད་པ་རེད་ལ། དམིགས་བསལ་ཏོག་དབྱིབས་གཉན་རིམས་ཕོག་པ་དང་གཅིན་སྙིའི་ནད་གཞི་ཡོད་མཁན། གཉན་ནད་རེག་དུག་དང་འབྲས་སྐྲན་ཡོད་མཁན་ཚོར་ཧམ་སྤུ་ནག་པོ་ཕོག་སྲིད་པའི་ཉེན་ཁ་ཧ་ཅང་ཆེ་བ་ཡོད་འདུག
འདི་ལོའི་ཕྱི་ཟླ་ ༤ ནང་རྒྱ་གར་ནང་ཧམ་སྤུ་ནག་པོའི་ན་ཚ་བྱུང་བ་ནས་བཟུང་བརྒྱུད་ལམ་ཁག་ཏུ་ནད་འབུ་ཕོག་པའི་མིའི་པར་དང་བརྙན་རིགས་འཇིགས་སུ་རུང་བ་མང་དག་ཅིག་ཁྱབ་སྤེལ་བྱུང་བ་བཞིན། ཉེ་ལམ་བྷི་བྷི་སི་གསར་ཁང་གི་གསར་འགོད་པ་རྒྱ་གར་གྱི་མངའ་སྡེ་མ་ཧཱ་ར་ཤི་ཊའི་ཧམ་སྤུ་ནག་པོ་བཅོས་སའི་སྨན་ཁང་ཞིག་ཏུ་བསྐྱོད་དེ་ཡུལ་དངོས་ཀྱི་གནས་ཚུལ་ལ་རྒྱུས་ལོན་བྱེད་སྐབས། སྨན་ཁང་དེའི་ནང་ཁྱོན་ནད་པ་ ༦༠ ཡོད་པའི་ཁྲོད། ཡ་མགལ་དང་མ་མགལ། སྣ་དང་མིག་སོགས་འགོག་དགོས་བྱུང་བའི་ནད་པ་མང་དག་ཅིག་མཐོང་རྒྱུ་འདུག་ལ། སྐབས་དེར་མིག་ཡ་གཅིག་མེད་པར་གྱུར་བའི་ཤའེ་ཝ་རྗའེ་ཝིར་ཟེར་བའི་འགྲེས་སོན་ཞིག་གིས། ང་ནི་རླངས་འཁོར་ཁ་ལོ་བ་ཞིག་ཡིན། ངའི་ཁྱིམ་ཚང་གི་འཚོ་རྟེན་ང་ལ་བརྟེན་ནས་ཡོད། ང་ཚོས་བུ་ལོན་འབོར་ཆེན་བླངས་ཏེ་ད་ལྟ་ང་རང་གསོན་ཐུབ་ཙམ་བྱུང་ཡོད་ཀྱང་། ད་ནས་ངས་རླངས་འཁོར་གཏོང་ཐུབ་ཀྱི་མེད་པས་ད་ཅི་བྱ་ཞེས་སྐྱོ་ངལ་དང་བཅས་བརྗོད་ཀྱི་འདུག
རྒྱ་གར་དབུས་གཞུང་ནས་ཧམ་སྤུ་ནག་པོ་ནད་ཡམས་ཤིག་ལ་ངོས་བཟུང་བ་གཞིར་བཟུང་། ད་ལྟ་རྒྱ་གར་གྱི་མངའ་སྡེ་ ༧ ནས་ཛ་དྲག་གི་གནས་སྟངས་འོག་ཧམ་སྤུ་ནག་པོ་ནད་ཡམས་ཤིག་ལ་ངོས་བཟུང་སྟེ། ནད་གཞི་ཕོག་པའི་མིར་དམིགས་བསལ་ཟུར་དབྱེ་ནད་ཁང་དང་སྨན་བཅོས་སོགས་བྱེད་ཀྱིན་ཡོད་ལ། ལྷག་པར་དུ་ད་ལྟ་འཚོགས་བཞིན་པའི་རྒྱ་གར་གྲོས་ཚོགས་སྟེང་། རྒྱ་གར་སྨན་པའི་མཐུན་ཚོགས་ཀྱིས་སྲིད་བློན་མུ་དྷི་མཆོག་ལ་ཞུ་ཕུལ་ཏེ། ཧ་ཅང་དཀོན་པོ་ཡིན་པའི་ཧམ་སྤུ་ནག་པོ་བཅོས་ཐབས་ཀྱི་སྨན་ (Amphotericin-B) ཞེས་པ་བཟོ་སྐྲུན་དགོས་པའི་འབོད་སྐུལ་ཞུས་ཡོད་པ་དང་། ད་ལྟ་རྒྱ་གར་གྱི་མངའ་སྡེ་ཁག་ཅིག་ཏུ་ཏོག་དབྱིབས་ནད་པའི་གྲངས་འབོར་ལས་ཧམ་སྤུ་ནག་པོ་འགོས་ཁྱབ་བྱུང་བའི་ནད་པ་མང་བ་ཡོད་ཅིང་། སྨན་པ་མང་པོས་ཧམ་སྤུ་ནག་པོ་ཏོག་དབྱིབས་གཉན་རིམས་ལས་ཀྱང་ཉེན་ཁ་ཆེ་བ་ཡོད་སྐོར་བཤད་འདུག
རྒྱ་གར་གྱི་གྲོང་ཁྱེར་མོམ་བྷེ་རུ་རྟེན་གཞི་བྱས་པའི་སྨན་པ་ (Akshay Nair) ལགས་ཀྱིས། ནད་པ་མང་དག་ཅིག་སྨན་ཁང་དུ་མ་འབྱོར་གོང་འདས་གྲོངས་སུ་འགྲོ་ཡི་ཡོད་པ་དང་། ནད་པ་ཁག་ཅིག་སྨན་བཅོས་ཀྱིས་དྲག་སྐྱེད་བྱུང་རྗེས་སླར་ཡང་ནད་ལོག་རྒྱག་གིན་འདུག དེར་བརྟེན། ནད་ཡམས་འདི་མིའི་མིག་དང་ཀླད་པ་སོགས་སུ་འགོས་ཁྱབ་ཤུགས་ཆེན་འབྱུང་གི་ཡོད། ཅེས་བརྗོད་ཡོད་ལ། ད་ལྟ་རྒྱ་གར་ནང་ཧམ་སྤུ་ནག་པོ་འགོས་ཁྱབ་ཆེ་ཤོས་ཀྱི་མངའ་སྡེ་ནི་མ་ཧཱ་ར་ཤི་ཊ་དང་གྷོ་ཇའོ་རེ་ཊི་གཉིས་ཡིན་ཞིང་། མངའ་སྡེ་དེ་གཉིས་ནས་ཁྱོན་མི་གྲངས་ ༡༧༨༥ རྐྱེན་འདས་སུ་ཕྱིན་འདུག་པ་དང་། གཞན་ཡང་ཧམ་སྤུ་ནག་པོ་ལྡི་ལི་དང་ཅཱན་དྷི་གྷར། པཎ་ཇབ་དང་ལྷོ་ཕྱོགས་མངའ་སྡེ་ཁར་ནཱ་ཊ་ཀ་སོགས་བོད་མིའི་འདུས་སྡོད་ཀྱི་མངའ་སྡེ་ཁག་དང་དེའི་ཉེ་འཁྲིས་སུ་འགོས་ཁྱབ་བྱུང་གི་ཡོད་པ་གཞིར་བཟུང་། བོད་མིའི་སྒྲིག་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་རྒྱ་གར་དབུས་གཞུང་གི་བཀོད་ཁྱབ་ལྟར། རང་རིགས་བཙན་བྱོལ་བོད་མི་ཡོངས་ནས་ཏོག་ནད་དང་ཧམ་ནད་གཉིས་ལ་སྔོན་འགོག་གནང་དགོས་གལ་ཆེ་བའི་ལམ་སྟོན་སོགས་གང་མང་གནང་ཡོད།
གསར་འགོད་པ། སྐལ་བཟང་སྦྱིན་པ།
ནད་གསར་པ་དེ་ལ་བོད་པས་སོ་པ་རིག་པས་ནད་མིང་གང་ཡིན་ནམ་?